பி.வி.பி.சினிமா நிறுவனம் தயாரித்து, நாகார்ஜுன்-கார்த்தி-தமன்னா ஆகியோர் நடித்துள்ள தோழா படத்தின் பாடல்கள் வெளியீட்டு விழா, சென்னையில் நடந்தது. விழாவில் நடிகர் சூர்யா கலந்து கொண்டு பாடல்களை வெளியிட்டார்.
நடிகர்கள் நாகார்ஜுன், கார்த்தி, தமன்னா ஆகியோர் கலந்து கொண்டு பேசினார்கள். இங்கு பேசிய தமன்னா, ‘‘நான் நடிக்கும் படங்கள் அனைத்தும் வெற்றி பெறுவதாகவும், எனவே என்னை அதிர்ஷ்ட தேவதை என்றும் ரசிகர்கள் கூறுகிறார்கள். நான், அதிர்ஷ்ட தேவதை அல்ல. உண்மையிலேயே அதிர்ஷ்ட நாயகன், சூர்யாதான். அவரை என்னுடைய அதிர்ஷ்ட நாயகன் என்று சொல்லலாம்.
பாகுபலி படவிழாவில் சூர்யா கலந்து கொண்டு பாடல்களை வெளியிட்டார். அந்த படம் 600 கோடி வசூல் செய்தது. இப்போது நான் நடித்திருக்கும் தோழா படத்தின் பாடல்களையும் சூர்யா வெளியிட்டு இருக்கிறார். இந்த படமும் வசூலில் சாதனை படைக்கும் என்று எதிர்பார்க்கிறேன்.’’ என்று தமன்னா பேசினார்.
இவ் விழாவில் தமிழ் திரைப்பட தயாரிப்பாளர்கள் சங்க தலைவர் எஸ்.தாணு, செயலாளர் டி.சிவா, நடிகர் சங்க துணைத்தலைவர் பொன்வண்ணன், நடிகர்கள் சிவகுமார், மனோபாலா, உதயா, பிரேம்குமார், ஸ்ரீமன், நடிகைகள் குட்டி பத்மினி, லலிதகுமாரி, பட அதிபர்கள் கே.எஸ்.சீனிவாசன், கே.ஈ.ஞானவேல்ராஜா, எஸ்.ஆர்.பிரபு, தனஞ்செயன், சசிகாந்த், இயக்குனர்கள் சந்தானபாரதி, சுதா கோங்ரா, வம்சி பி, இசையமைப்பாளர் கோபி சுந்தர், பாடல் ஆசிரியர் மதன் கார்க்கி, வசனகர்த்தா ராஜுமுருகன் ஆகியோர் கலந்து கொண்டனர்.
