அமெரிக்க உணவகம் ஒன்றில் தினமும் மீதமாகும் உணவுகளை திருட்டுத் தனமாக கரடி சாப்பிட்டு வந்தது ரகசிய கமராவில் பதிவாகியுள்ளது.
பொதுவாக வீட்டில் வளர்க்கப் படும் செல்லப் பிராணிகள் தான் கொஞ்சம் கொஞ்சமாக மனிதர்கள் சாப்பிடும் உணவிற்கு அடிமையாவது சகஜம். ஆனால் அமெரிக்காவில் காட்டில் வாழும் கரடி ஒன்று தினமும் இரவு அங்குள்ள பிரபல உணவகம் ஒன்றின் பின்பக்க கதவு வழியாக ரகசியமாக உள்ளே நுழைந்து அங்கு மீதமாகியுள்ள உணவுகளைப் போட்டு வைத்திருக்கும் பெட்டியில் உள்ள உணவுகளைச் சாப்பிட்டு வந்துள்ளது.
அமெரிக்காவில் உள்ள கொலோராடோ ஸ்பிரிங் பகுதியில் உள்ளது எடல்வெய்ஸ் உணவகம். இங்கு காரசாரமான உருளைக்கிழங்கு, ரொட்டி மற்றும் ஊறுகாய் வகை உணவுகள் பிரபலம். இரவு மீதமாகும் உணவுகளை ஒரு பெட்டியில் கொட்டி மூடி வைப்பது இவர்களது வழக்கம்.
ஆனால் கடந்த சில நாட்களாக அந்த பின்பக்கத்தில் வைக்கப் படும் அந்த உணவுப் பெட்டி காலையில் கார் பார்க்கிங் பகுதியில் உருண்டு கிடப்பதையும் அதிலுள்ள உணவுகள் மாயமாகி வருவதும் கண்டு ஊழியர்கள் அதிர்ச்சியடைந்தனர்.
இரவில் என்ன நடக்கிறது என்பதை அறிய ரகசிய கமரா பொருத்தப்பட்டது. மறுநாள் காலை ரகசிய கமராவில் பதிவான காட்சிகளைப் போட்டுப் பார்த்த ஊழியர்கள் அதிர்ச்சியடைந்தனர். காரணம் இரவில் பின்பக்க கதவு வழியாக உள்ளே நுழையும் கரடி ஒன்று உணவுப் பெட்டியை சுமார் 15 அடி தூரம் நகர்த்திச் சென்று அதிலுள்ள உணவுகளை ரசிந்து உண்பது பதிவாகி இருந்தது.
காட்டிற்குள் இருந்து வரும் இக்கரடி சுற்றுலாப்பயணிகள் அளித்த உணவின் மூலம் ருசியான உணவிற்கு அடிமையாகி இருக்கலாம் எனக் கூறப் படுகிறது. இப்போதெல்லாம், அக்கரடிக்குப் பயந்து உணவுத் தொட்டியை சங்கிலியால் கட்டிச் செல்கிறார்களாம் உணவக ஊழியர்கள்.
