சிரிப்பு ஒரு ஆரோக்கியமான தொற்று, ஒருவர் சிரித்தால் உடன் இருப்பவரும் சிரிப்பார் இந்த சிரிப்பு ஆரோக்கியமான உடலினை தருகிறது அதே சமயத்தில் நோய் எதிர்ப்பு சக்தியினை தந்து உடல் வலியினையும், மன உளைச்சலையும் நீக்குகின்றது.
வாய் விட்டு சிரித்தால் நோய் விட்டு போகும் என்பதற்கு அமைய மனிதனுக்கு செலவில்லா எளிய மருந்து சிரிப்புதான் என்பது உண்மை.
இன்று தொலைகாட்சி நிகழ்ச்சிகள் பலவற்றில் சிரிப்புக்கு முக்கியத்துவம் கொடுப்பது மக்களுக்குச் செய்யும் மிகப் பெரிய சேவை என்றே சொல்லலாம்.
கடுமையான, கொடுமையான நிகழ்ச்சிகளை பார்க்கும் மனம், சோகத்திலேயே இருக்கும் அதனையே தொடர்ந்து நினைப்பது ஒரு வழக்கமாகி விடும்.
அதனால் எவராலும் மகிழ்ச்சியாக இருக்க முடியாது. பிறரையும் மகிழ்ச்சியாக வைக்க முடியாது முடிவில் சோகத்திலேயே பழகும் ஒரு மனிதன் நிரந்தர நோயாளியாகவே ஆகி விடுகின்றான். சிரிக்கத் தெரிந்த மனிதனுக்கு இயற்கையாகவே ஆரோக்கியம் ஓடி வந்து ஒட்டிக் கொள்ளும்.
இது தொடர்பில் நடத்தப்பட்ட ஆய்வொன்றில் சர்க்கரை நோயாளிகளை உணவுக்குப் பின் இரு பிரிவாக பிரித்து ஒரு பிரிவினரை சிரிப்பு மிகுந்த நாடகம் ஒன்றினை பார்க்கச் செய்தனர்.
மற்றொரு பிரிவினரை சற்று திகிலான நாடகத்தினை பார்க்க செய்தனர் அவர்களின் சர்க்கரை அளவினை பரிசோதித்த பொழுது நகைச்சுவை நாடகத்தை பார்த்தவர்களின் சர்க்கரை அளவு சரியான அளவில் இருந்தது.
திகில் நாடகத்தினை பார்த்தவர்களின் சர்க்கரை அளவு அதிகரித்து இருந்தது. ஆகவேத்தான் சர்க்கரை நோயாளிகளை எப்பொழுதும் டென்ஷன் இன்றி மகிழ்ச்சியுடன் இருக்குமாறு அறிவுறுத்துகின்றனர்.
