தங்கத்தின் விலை..
எதிர்வரும் ஓரிரு மாதங்களுக்குள் தங்கத்தின் விலையை ஓரளவேனும் குறைப்பதற்கான சாத்தியம் காணப்படுவதாக அகில இலங்கை தங்க நகை வர்த்தக சங்கம் தெரிவித்துள்ளது.
அந்த சங்கத்தின் பொருளாளர் இரா.பாலசுப்ரமணியம் இதனை கூறியுள்ளார். பிபிசி தமிழ் செய்தி சேவைக்கு வழங்கிய விசேட செவ்வியிலேயே அவர் இதனை கூறியுள்ளார்.
இலங்கையில் தங்க இறக்குமதிக்கு விதிக்கப்பட்ட 15 சதவீத வரி நீக்கப்பட்டுள்ள நிலையில், தற்போது வரையில் இலங்கையில் தங்கித்தின் விலை குறைக்கப்படவில்லை, இது குறித்து கருத்து வெளியிட்டுள்ள அவர்,
தங்க இறக்குமதிக்கு விதிக்கப்பட்டிருந்த வரி நீக்கப்பட்டுள்ள போதிலும், அதன் நன்மைகளை நுகர்வோருக்கு தற்போதைய சூழ்நிலையில் வழங்க இயலவில்லை.
உலக சந்தையில் தங்கத்தின் விலையேற்றம் மற்றும் அரசாங்கம் வெளியிட்ட அறிவிப்பு தொடர்பிலான முறையான திட்டம் இல்லாதது உள்ளிட்ட சில காரணங்களால் தங்கத்தின் விலையை தற்போதைக்கு குறைக்க முடியாதுள்ளது.
எனினும், எதிர்வரும் ஓரிரு மாதங்களுக்குள் ஓரளவேனும் தங்கத்தின் விலையை குறைப்பதற்கான சாத்தியம் காணப்படுவதாக அவர் நம்பிக்கை தெரிவித்தார். இதேவேளை, தெற்காசியாவிலேயே தங்கத்தின் விலை குறைவான நாடாக இலங்கை காணப்படுவதாகவும் அவர் சுட்டிக்காட்டியுள்ளார்.
இந்நிலையில், அரசாங்கம் வெளியிட்ட அறிவிப்பு நடைமுறைப்படுத்தப்படும்பட்சத்தில், தெற்காசியாவில் தங்கத்தின் விலை மிகவும் குறைந்த நாடாக இலங்கை காணப்படும்.
இலங்கை தங்க நகை செய்பவர்களால் தயாரிக்கப்படும் தங்க ஆபரணங்களுக்கு சர்வதேச சந்தையில் பாரிய கேள்வி காணப்படுவதாக அவர் மேலும் கூறியுள்ளார்.