அவுஸ்திரேலிய அணிக்கு எதிரான ஆட்டத்தில் சதம் அடித்த சங்கக்கார 14,000 ஓட்டங்களை கடந்து சாதனை படைத்துள்ளார். இதன் மூலம் சர்வதேச ஒருநாள் போட்டிகளில் அதிக ஓட்டங்கள் குவித்த வீரர்கள் வரிசையில் சச்சினைத் தொடர்ந்து 2வது இடத்தில் இருக்கிறார்.
மேலும் சிட்னியில் நடந்த இன்றைய ஆட்டத்தில் முதலில் துடுப்பெடுத்தாடிய அவுஸ்திரேலிய அணி 376 ஓட்டங்களை குவித்தது.
இதைத் தொடர்ந்து களமிறங்கிய இலங்கை அணி சிறப்பாக விளையாடி ஓட்டங்களை குவித்தது. இதில் பொறுமையாக ஆடிய சங்கக்காரா தனது 24வது சதத்தை அடித்தார். இவர் 107 பந்துகளில் 104 ஓட்டங்கள் குவித்து அசத்தினார்.
வங்கதேசம் மற்றும் இங்கிலாந்து அணிகளுக்கு எதிராக இந்த உலகக்கிண்ணத்தில் ஏற்கனவே இரண்டு சதம் அடித்திருந்த சங்கக்காரவுக்கு இது 3வது சதமாகும்.
இதன் மூலம் உலகக்கிண்ணத் தொடரில் தொடர்ச்சியாக 3 முறை சதம் அடித்த முதல் வீரர் என்ற சாதனையையும் படைத்தார்.
இந்த உலகக்கிண்ணத்தோடு சர்வதேச ஒருநாள் போட்டிகளிலிருந்து தான் ஓய்வுபெறுவதாக சங்கக்கார ஏற்கனவே அறிவித்திருந்தார்.
இந்நிலையில் வரும் ஓகஸ்டில் இந்தியாவுக்கு இலங்கை அணி சுற்றுப்பயணம் மேற்கொண்டு விளையாடும் டெஸ்ட் தொடரோடு, டெஸ்ட் கிரிக்கெட்டில் இருந்து தான் ஓய்வுபெறப் போவதாக சங்கக்கார அறிவித்துள்ளார்.
