வவுனியா பொது வைத்தியசாலை சிற்றூழியர்களும் வேலை நிறுத்தம்!!(படங்கள்)

வவுனியா பொது வைத்தியசாலை சிற்றூழியர்கள் இன்று (16) வேலை நிறுத்தப் போராட்டத்தில் ஈடுபட்டிருந்தனர்.

வவுனியா பொது வைத்தியசாலைக்கு முன்னால் இடம்பெற்ற இப்போராட்டத்தில் 6-2006 சுற்றறிக்கையை சரியாக அமுல்படுத்து, சகல தற்காலிக மற்றும் அண்மைய ஊழியர்களை நிரந்தரமாக்கு, 8 மணித்தியால காலவரையறைக்கு மேலதிகமாக கடமைக்கான உரிய கொடுப்பனவை பெற்றுக்கொடு, சீருடை கொடுப்பனவை ஒரே தடவையில் வழங்கு உட்பட 9 அம்ச கோரிக்கைகளை முன்வைத்து ஆர்ப்பாட்டத்தில் முன்னெடுக்கப்பட்டது.

இதன்போது வைத்தியசாலைக்கு வருகை தந்த நோயாளர்கள் பெரும் சிரமங்களை எதிர்நோக்கியதுடன் நோயாளர்களின் உறவினர்களே அவர்களை வைத்தியசேவைக்கு அழைத்தும் சென்றிருந்ததை அவதானிக்க முடிந்திருந்தது.

மதியம் 12 மணிவரை இடம்பெற்ற இப்போராட்டத்திற்கு உரிய பலன் கிடைக்காத பட்சத்தில் தொடர்ச்சியாக தாம் வேலை நிறுத்தப் போராட்டத்தில் ஈடுபடவுள்ளதாக சிற்றூழியர்கள் தெரிவித்தனர்.