காணாமல் போன மலேசிய விமானத்தின் பாகங்கள் என சந்தேகிக்கப்படும் இரு தடயங்கள் கண்டுபிடிக்கப்பட்டுள்ளதாக அவுஸ்திரேலிய பிரதமர் டோனி அப்போட் தெரிவித்துள்ளார்.
இந்திய பெருங்கடலின் தெற்குப் பகுதியில் அவுஸ்திரேலியா விமானத் தேடுதலை தீவிரப்படுத்தி இருப்பதாகவும் அதன்போதே செயற்கைகோளில் தடயங்கள் கண்டுபிடிக்கப்பட்டுள்ளதாகவும் அவர் குறிப்பிட்டுள்ளார்.
மலேசிய ஏர்லைன்ஸ் விமானம் காணாமல் போய் 12 நாட்கள் ஆகியுள்ளன. தேடுதல் நடவடிக்கை அதிகரித்து வருகிறது, ஆனால் விமானம் இது வரையில் கிடைக்கவில்லை.
இந்திய பெருங்கடலில் நடைபெற்று வரும் தேடுதல் நடவடிக்கையில் பங்கேற்பதற்காக மேலும் ஒன்பது கப்பல்களை சீனா அனுப்பியுள்ளது. சீனா தன்னுடைய செயற்கை கோள்கள் மூலமாக தன்னுடைய பிரதேசங்களை தேடுகிறது.
தாய்லாந்து, தன்னுடைய இராணுவ ராடாரில் பதிவான தகவல்களின் படி மலேசியாவில் இருந்து மலாக்கா நீரிணைப் பக்கமாக ஒரு விமானம் சென்றுள்ளதாகக் கூறுகிறது.
இப்போது ஐரோப்பாவின் பரப்பளவுக்கு தேடுதல் நடைபெற்று வருகிறது, தேடுதல் நடவடிக்கையில் 26 நாடுகள் ஈடுப்பட்டு வருகின்றன.
