மன்னார் வளைகுடாவில் காணாமல் போன இராமேஸ்வரம் மீனவர்கள் நான்கு பேரை இலங்கை கடற்படையினர் மீட்டுள்ளனர்.
இவர்களை இன்று இந்திய கடலோர காவல் துறையிடம் ஒப்படைக்க நடவடிக்கை எடுக்கப்பட்டுள்ளது. கடந்த புதன் கிழமை இராமேஸ்வரத்தில் இருந்து 600க்கு மேற்பட்ட விசைப்படகுகளில் 2500க்கும் மேற்பட்ட மீனவர்கள் மீன் பிடிக்க கடலுக்கு சென்றனர்.
மீனவர்கள் அனைவரும் கச்சத்தீவு அருகே இந்திய கடலோர எல்லையில் மீன் பிடித்து கரை திரும்பினர், இதில் ஜஸ்டின் என்பவரது விசைபடகில் சென்ற 4 மீனவர்கள் மட்டும் கரை திரும்பவில்லை.
இதனால் அதிர்ச்சி அடைந்த குடும்பத்தினர் இராமேஸ்வர மீன்வளத்துறையில் புகார் அளித்தனர். இந்தநிலையில் இந்த நான்கு மீனவர்கள் சென்ற படகு பழுதடைந்து உணவு இன்றி நாடு கடலில் தத்தளித்து வந்தனர்.
அப்பொழுது இலங்கை கடற்படையினர் மீனவர்களை மீட்டு உணவு அளித்து அவர்களை பத்திரமாக தங்கள் படகுகில் தங்க வைத்தனர். பின்னர் இந்திய கடலோர காவல் படையினரிடம் தகவல் அளித்தனர்.
இதனை அடுத்து மீட்கப்பட்ட 4 மீனவர்களும் இன்று சர்வதேச கடல் எல்லையில் இந்திய கடற்படையினரிடம் இலங்கை கடற்படையினர் ஒப்படைக்கவுள்ளனர்.
இந்த செய்தி மீனவ குடும்பத்தினர், உறவினர்கள் மற்றும் இதர மீனவர்களிடையே மகிழ்ச்சியை ஏற்படுத்தியுள்ளது.
