கொழும்பு கிங்ஸ் மருத்துவமனையில் இரண்டு நோயாளிகளுக்கு, 3,000 கிலோமீற்றருக்கும் அதிகமான தொலைவில் இந்தியாவின் புதுடெல்லியில் இருந்துகொண்டு, மருத்துவ நிபுணர்கள் ரோபோ தொழில்நுட்பத்தின் மூலம் அறுவைச் சிகிச்சைகளை வெற்றிகரமாக மேற்கொண்டுள்ளனர்.
இந்தச் சிகிச்சைகள் திங்கட்கிழமை (ஒக்டோபர் 20) இடம்பெற்றதாகத் தெரிவிக்கப்பட்டுள்ளது. இதன் மூலம், இலங்கையில் முதன்முறையாக இரண்டு ரோபோக்கள் மூலம் அறுவைச் சிகிச்சைகள் மேற்கொள்ளப்பட்டுள்ளன.
பேராசிரியர் ஸ்ரீநாத் சந்திரசேகர மற்றும் பேராசிரியர் பவந்த கமகே ஆகியோர், அதிவேகத் தொடர்பு வலையமைப்புடன் இணைக்கப்பட்ட ரோபோ அறுவைச் சிகிச்சைத் தொழில்நுட்பத்தைப் பயன்படுத்தி இந்தச் சிகிச்சைகளை மேற்கொண்டனர்.
நோயாளிகளுக்கு அருகில் மருத்துவர்கள் அறுவைச் சிகிச்சைகள் நடைபெற்றபோது, கொழும்பு மருத்துவமனையில் நோயாளிகளுக்கு அருகில் சிறப்பு அறுவைச் சிகிச்சை மருத்துவர்களும் தயார்நிலையில் இருந்தனர்.
அவசரத் தேவை ஏற்பட்டால், உடனடியாகத் தலையிடும் வகையில் ஏற்பாடுகள் செய்யப்பட்டிருந்தன. இரண்டு சிகிச்சைகளும் தொலைவிலிருந்து வெற்றிகரமாக நிறைவடைந்ததுடன், அருகிலிருந்த மருத்துவர்கள் தலையிட வேண்டிய அவசியமும் ஏற்படவில்லை.
இந்நிலையில், இச்சாதனை கொழும்பு கிங்ஸ் மருத்துவமனைக்கு ஒரு மைல்கல் மட்டுமல்லாமல், சிறப்பு அறுவைச் சிகிச்சைப் பராமரிப்புக்குத் தூரம் ஒரு தடையாக இருக்க வேண்டியதில்லை என்பதையும் நிரூபித்துள்ளது.
ஒவ்வொரு இலங்கையரும் தாங்கள் எங்கிருந்தாலும் எதிர்கால மேம்பட்ட அறுவைச் சிகிச்சையின் பலன்களைப் பெற்றுக்கொள்ளும் சாத்தியக்கூறுக்கு ஒரு மைல்கல்லாக, இந்தத் தொழில்நுட்பம் இலங்கையின் மருத்துவத் துறையில் ஒரு முக்கிய முன்னேற்றமாகக் கருதப்படுகிறது.
