நியூசிலாந்து கிரிக்கெட் அணியின் சுழற்பந்து வீச்சாளர் 34 வயதான டேனியல் வெட்டோரி கணுக்கால் காயத்தால் அவதிப்பட்டார். சாம்பியன்ஸ் கிண்ண கிரிக்கெட் முடிந்ததும் காயத்துக்கு அவர் அறுவை சிகிச்சை செய்து கொண்டார்.
இந்த நிலையில் வரும் கிரிக்கட் பருவ காலத்துக்கான நியூசிலாந்து கிரிக்கெட் வாரியத்தின் புதிய ஒப்பந்தத்தை ஏற்க வெட்டோரி திடீரென மறுத்து விட்டார். அது ஏன் என்பது குறித்து நேற்று நிருபர்களிடம் விளக்கி கூறினார்.
´காயத்தில் இருந்து முழுமையாக குணமடைந்து மறுபடியும் எப்போது கிரிக்கெட் விளையாடுவேன் என்பதை என்னால் இப்போது உறுதியாக கூற முடியாது. இத்தகைய சூழலில் ஒப்பந்தத்தை நான் ஏற்றுக் கொண்டால், அது தவறானதாக அமைந்து விடும்.
காயத்தில் இருந்து சீராக, அடுத்த 6 மாத காலத்திற்கு எந்தவித கிரிக்கெட் போட்டியிலும் விளையாடாமல் ஓய்வு எடுக்க முடிவு செய்துள்ளேன். இந்த காலக்கட்டத்தில் முழு உடல்தகுதியை எட்டுவதில் கவனம் செலுத்துவேன்.
அதன் பிறகு தான் எனது எதிர்கால கிரிக்கெட் குறித்து முடிவு செய்ய முடியும். கோடை கால பருவத்தில் மீண்டும் கிரிக்கெட் களத்திற்கு திரும்புவதே எனது இலக்காகும்´ என்றார்.
