வீராட் கோலி தலைமையிலான இந்திய கிரிக்கெட் அணி 5 ஒருநாள் போட்டிகளில் விளையாடுவதற்காக சிம்பாப்வே சென்றுள்ளது.
இந்தியா- சிம்பாப்வே அணிகள் மோதும் முதல் ஒருநாள் போட்டி ஹராரேயில் இன்று நடக்கிறது. இந்த நிலையில் இந்திய அணியை எப்படி வீழ்த்துவது என்பது தொடர்பாக சிம்பாப்வே அணி வீரர்களுக்கு அந்நாட்டு முன்னாள் வீரரும் இங்கிலாந்து அணியின் பயிற்சியாளருமான அண்டி பிளவர் ஆலோசனை வழங்கியுள்ளார்.
இது தொடர்பாக அவரது சகோதரரும் சிம்பாப்வே அணியின் பேட்டிங் பயிற்சியாளருமான கிராண்ட் பிளவர் கூறும்போது இந்திய அணியை எப்படி எதிர்கொள்வது என்பது பற்றிய சில ஆலோசனைகளை அண்டி பிளவர் தெரிவித்தார். அவர் வழங்கிய அறிவுரைகளை நாங்கள் பின்பற்றுவோம் என்றார்.
அண்டி பிளவர் எந்த மாதிரியான ஆலோசனைகளை வழங்கியுள்ளார் என்ற விவரத்தை வெளியிட கிராண்ட் பிளவர் மறுத்துவிட்டார். அவுஸ்திரேலியாவுக்கு எதிரான ஆசஷ் டெஸ்ட் தொடரில் இங்கிலாந்து அணி இதுவரை நடந்த 2 டெஸ்டிலும் வெற்றி பெற்றது.
இதற்கு பயிற்சியாளர் அண்டிபிளவர் பங்களிப்பு முக்கியத்துவம் பெற்றதாக இருக்கிறது. 5 போட்டியில் ஏதாவது ஒரு ஆட்டத்தில் இந்திய அணியை தோற்கடிப்போம் என்று சிம்பாப்வே அணியின் தலைவர் டெய்லர் நம்பிக்கை தெரிவித்துள்ளார்.
