தமிழில் முதல்வன், பம்பாய், இந்தியன் உள்ளிட்ட படங்களில் நடித்தவர் மனிஷா கொய்ரலா. கடைசியாக மாப்பிள்ளை படத்தில் தனுஷ் மாமியாராக நடித்தார். தெலுங்கு, இந்தி படங்களில் நடித்துள்ளார். மனிஷா கொய்ரலாவுக்கு கடந்த நவம்பர் மாதம் உடல் நலக்குறைவு ஏற்பட்டது.
வைத்தியர்கள் பரிசோதித்த போது கர்ப்பப்பை புற்று நோய் இருப்பது கண்டறியப்பட்டது. இதையடுத்து கடந்த நவம்பர் மாதம் உயர் சிகிச்சைக்காக அமெரிக்கா சென்றார். அங்குள்ள ஆஸ்பத்திரியில் அனுமதிக்கப்பட்டு சிகிச்சை பெற்றார். தீவிர சிகிச்சைக்குப்பின் பூரண குணமடைந்தார்.
சிகிச்சை காரணமாக தலைமுடி போய்விட்டது. ஆளே உருமாறி இருக்கிறார். தற்போதைய தோற்றத்திலான புகைப்படத்தை டுவிட்டரில் வெளியிட்டார். அமெரிக்காவில் ஆறு மாத சிகிச்சை முடிந்து நேற்று மும்பை திரும்பினார். அந்தேரியில் உள்ள வீட்டில் உறவினர்கள் வரவேற்றனர்.