அமெரிக்காவில் பெற்றோரின் திருமணத்தில் மாப்பிள்ளைத் தோழனாக இருந்த 2 வயது குழந்தை புற்றுநோயால் நேற்று மரணம் அடைந்தது. அமெரிக்காவைச் சேர்ந்தவர் ஷான் ஸ்டீவன்சன். அவரது காதலி கிறிஸ்டீன் ஸ்விடோர்ஸ்கீ.
அவர்களுடைய குழந்தை லோகன் ஸ்டீவன்சன்(2). லோகன் ரத்த புற்றுநோயால் அவதிப்பட்டு வந்தான். அவனுக்கு பல முறை அறுவை சிகிச்சை செய்தும் பலனில்லை. இந்நிலையில் கடந்த மாதம் குழந்தையை பரிசோதித்த மருத்துவர்கள் லோகன் இன்னும் சில வாரங்களில் இறந்துவிடுவான் என்று தெரிவித்தனர்.
இதையடுத்து அடுத்த ஆண்டு ஜூலை மாதம் திருமணம் செய்ய முடிவு செய்திருந்த ஷான், கிறிஸ்டீன் கடந்த வாரம் திருமணம் செய்து கொண்டனர். திருமணத்தில் லோகன் தான் மாப்பிள்ளைத் தோழனாக இருந்தான்.
இந்நிலையில் லோகன் நேற்று இறந்துவிட்டான். இது குறித்து கிறிஸ்டீன் பேஸ்புக்கில் கூறுகையில், லோகன் என் கைகளில் இறுதி மூச்சை விட்டான். அவனுக்கு இனி வலி இருக்காது என்று தெரிவித்துள்ளார்.
