படத்தின் தலைப்பு வைக்கப்படாமலேயே விஷ்ணுவர்தன் இயக்கத்தில் அஜித் நடிக்கும் படத்தின் படப்பிடிப்பு ஆரம்பமானது. சமீபத்தில் இந்த படத்திற்கு ஆரம்பம் என பெயர் சூட்டப்பட்டுள்ளது. இந்தப் படத்தின் இறுதிக்கட்ட வேலைகள் தற்போது மும்முரமாக நடைபெற்றுக் கொண்டிருக்கிறது. விரைவில் படத்தின் பாடலை வெளியிடவிருக்கின்றனர்.
இப்படத்திற்கான தலைப்பை தேர்ந்தெடுப்பதற்கு கடந்த 1 வருட காலமாக படாதபாடுபட்டனர் படக்குழுவினர். கடைசியில் ஒருவழியாக ஆரம்பம் என தலைப்பிட்டு படத்தை வெளியிடவுள்ளனர்.
இந்நிலையில் அஜித் தற்போது சிறுத்தை சிவா இயக்கும் படத்தில் நடித்து வருகிறார். அஜித் ஜோடியாக தமன்னா நடிக்கிறார். இவர்களுடன் விதார்த், சந்தானம், ரமேஷ் கண்ணா, அப்புக்குட்டி, நாடோடிகள் அபிநயா, இளவரசு, மயில்சாமி, பெரியார்தாசன், தேவதர்ஷினி என ஒரு பெரிய நட்சத்திர பட்டாளமே நடித்து வருகிறது. விஜயா புரொடக்ஷன்ஸ் சார்பில் திருமதி பாரதி ரெட்டி தயாரிக்கிறார்.
இப்படமும் தலைப்பு அறிவிக்கப்படாமல்தான் படத்தின் ஷூட்டிங் ஆரம்பமானது. இந்நிலையில் தற்போது இந்த படத்துக்கு வீரம் என பெயர் வைத்துள்ளனர். அஜித்துக்கு மிகப்பெரிய வெற்றிகளை கொடுத்துள்ள வாலி, வில்லன், வரலாறு ஆகிய படங்களின் தலைப்பில் உள்ள முதல் எழுத்துக்களான வ, வி ஆகியவற்றின் வரிசையில் தொடர்ந்து வரும் படம்தான் வீரம்.
இந்த படத்திற்காக ஓடும் ரெயிலில் நடக்கும் சண்டைக் காட்சி ஒடிஷாவில் உள்ள ராயகடா என்ற இடத்தில் பெரும் பொருட்செலவில் படமாக்கப்பட்டு வருகிறது. இந்த படத்தை வரும் தைப் பொங்கலுக்கு வெளியிடப் போவதாக கூறப்படுகிறது. வருகிற ஓகஸ்ட் 15ம் திகதி இப்படத்தின் முதல் பார்வை வெளியிடப்படுகிறது என்பது ரசிகர்களை உற்சாகத்தில் ஆழ்த்தும் கூடுதல் தகவல்.
