சூப்பர் ஸ்டார் ரஜினிகாந்த் சினிமா திரையுலகிற்கு நடிக்க வந்து இன்றோடு 38 வருடங்கள் நிறைவாகியுள்ளது.
ரஜினியின் முதல்படமான அபூர்வ ராகங்கள் இதே நாளில் தான் 1975ம் ஆண்டு வெளியானது.
பெரும்பாலும் தன் திரைஉலக பிறந்தநாளில் தனது முதல் படமான அபூர்வ ராகங்கள் படத்தை டிவியில் குடும்பத்துடன் பார்த்து ரசிப்பது சூப்பர்ஸ்டாரின் வழக்கம்.
கர்நாடகாவில் பேருந்து நடத்துனராக வாழ்க்கையை தொடங்கியவர் சிவாஜி ராவ் கெய்க்வாட். அவருக்குள் இருந்த நடிப்புத் திறமையைக் கண்டு கொண்ட அவரது நண்பர்கள், அவரை பிலிம் இன்ஸ்டிடியூட்டில் சேர்த்து மேலும் நடிப்புப் பயிற்சி பெற வைத்தனர்.
எதேச்சையாகக் கிடைத்த கே பாலச்சந்தரின் அறிமுகத்தால், சினிமா பிரவேசம் சாத்தியமானது.
அபூர்வ ராகங்கள் கதாபாத்திரத்திற்காக ஆள் தேடிக் கொண்டிருந்த பாலச்சந்தருக்கு ரஜினி ஞாபகம் வர, ஏற்கனவே தமிழ் சினிமாவில் திலகம் சிவாஜி இருப்பதால், ஒரு ஹோலி பண்டிகை அன்று சிவாஜி ராவ், ´ரஜினிகாந்த்´ ஆனார்.
அபூர்வ ராகங்கள் திரைப்படம் 1975ம் ஆண்டு ஒகஸ்ட் 18ம் திகதி வெளியானது. முதல் காட்சியிலேயே பெரிய கதவைத் திறந்து கொண்டு உள்ளே நுழைவார் ரஜினி. அக்கதவுகள் ரஜினியை திரைஉலகிற்குள் வரவேற்பது போல் அமைந்திருந்தது எதிர்பாராமல் கடவுள் அமைத்துக் கொடுத்தது.
இன்றோடு அந்த படம், வெளியாகி 38 ஆண்டுகள் நிறைவு பெற்றுவிட்டது. தற்போது கோச்சடையான் படவேலைகளில் பிசியாக இருக்கிறார் சூப்பர்ஸ்டார்.
சமூக வலைதளங்களிலும் பிற வழிகளிலும் ரஜினிக்கு வாழ்த்துக்கள் வந்து குவிந்த வண்ணம் உள்ளன. வில்லனாக திரை வாழ்வைத் தொடங்கி, இன்று அனைவராலும் சூப்பர்ஸ்டார் என ஏற்றுக்கொள்ளப் பட்ட ஒரே நடிகர் ரஜினி தான்.
