வவுனியாவில் பொருளாதார மத்திய நிலையத்தினை தாண்டிக்குளத்தில் அமைத்துத் தருமாறு கோரி இன்று காலை ஆரம்பமாக தொடர் உண்ணாவிரதப் போராட்டம் கைவிடப்பட்டுள்ளது.

வன்னி மாவட்ட நாடாளுமன்ற உறுப்பினர் கே.கே.மஸ்தான் மற்றும் நேரில் சென்ற சிறிரேலோ கட்சியின் செயலாளர் ப.உதயராசா ஆகியோர் இன்று (27.06.2016) மாலை கூடிய வவுனியா மாவட்ட வர்த்தகர் சங்கம் ஆகிய இணைந்து எடுத்த தீர்மானத்திற்க அமைவாக எதிர்வரும் வியாழக்கிழமை வவுனியா வரும் வடமாகாண முதலமைச்சர் அவர்களை சந்தித்து நேரடியாக சந்திப்பு ஒன்றை ஏற்படுத்தி வவுனியா தாண்டிக்குளத்தில் அமையவுள்ள பொருளாதார மத்திய நிலையத்திற்கான முடிவினை எற்படுத்தித் தருவதாக அளித்த வாக்குறுதியை அடுத்து இன்றைய உண்ணாவிரதப் போராட்டம் மாலை 6.40 மணியளவில் முடிவுக்கு வந்துள்ளது.

 
வவுனியாவில் இன்று நடைபெற்றுக்கொண்டிருக்கும் தனியார் பேரூந்து ஊழியர்களின் பணிபுறக்கணிப்பு, வவுனியா விவசாயிகளின் பணிப்புறக்கணிப்பினை முன்னிட்டு வவுனியா நகர் முழுவதும் பொலிஸ் பாதுகாப்பு பலப்படுத்தப்பட்டுள்ளது.

குறிப்பாக வவுனியா மாவட்ட செயலகம், வவுனியா இ.போ.சபை பேரூந்து தரிப்பிடம் போன்றவற்றில் பலத்த பொலிஸ் பாதுகாப்பு நிலவுவதாக எமது பிராந்திய செய்தியாளர் தெரிவிக்கின்றார்.

 
இன்று காலை 8 மணிமுதல் தினச்சந்தை வளாகத்தில் தொடர் உண்ணாவிரதப் போராட்டத்தினை முன்னெடுத்துள்ள உள்ளுர் விளைபொருள் விற்பனையாளர் சங்கத்தினர் தமது 35 வியாபார நிலையங்களை மூடி இவ் உண்ணாவிரதப் போரட்டத்தில் இணைந்து கொண்டனர்.

வவுனியாவில் பொருளாதார மத்திய நிலையம் தாண்டிக்குளத்தில் அமையவேண்டும் அதில் எந்த மாற்றுக் கருத்தும் கிடையாது என்று உண்ணாவிரதத்திலிருப்பவர்கள் தெரிவித்துள்ளனர்.

இன்று காலை ஆரம்பமான தொடர் உண்ணாவிரதம், இன்று முடிவு ஏதும் எட்டப்படாவிட்டால் தொடர்ந்து நாளையும் தொடரவுள்ளதாகவும் ஏற்பாட்டுக் குழுவினர் தெரிவித்திருந்தனர்.

இன்றைய உண்ணாவிரதப் போராட்டத்திற்கு ஆதரவாக வன்னி மாவட்ட நாடாளுமன்ற உறுப்பினர்களான சி.சிவமோகன், கே.கே.மஸ்தான் மற்றும் வடமாகாண சபை உறுப்பினர் ஜெயதிலக, சிறிரேலோ கட்சியின் செயலாளர் ப.உதயராசா, வன்னி மாவட்ட ஜக்கிய தேசியக்கட்சியின் அமைப்பாளர், மற்றும் சங்க உறுப்பினர்கள் என நூற்றுக்கும் மேற்பட்டவர்கள் இவ் உண்ணாவிரதப் போராட்டத்தில் கலந்து கொண்டனர்.

 
பயணிகளின் பாதுகாப்பான பயணத்தை கருத்தில் கொண்டு தனியார் போக்குரத்துச் சேவைகள் பல்வேறு கோரிக்கைகளை முன் வைத்து இன்று திங்கட்கிழமை(27.06.2016) முதல் வடமாகாண ரீதியில் பணிப்பகிஸ்கரிப்பை ஆரம்பித்துள்ளனர்.

வட இலங்கை தனியார் பேரூந்து உரிமையாளர் சங்கம் ஏற்பாட்டில் மேற்கொள்ளப்பட்டு வரும் குறித்த பணிப்பகிஸ்கரிப்பு இன்று திங்கட்கிழமை காலை முதல் வவுனியாவிலும் மேற்கொள்ளப்பட்டு வருகின்ற நிலையில்
இன்று (27.06.2016) காலை 10.30 மணியளவில் வவுனியா தனியார் பேரூந்து தரிப்பிடத்திலிருந்து வவுனியா மாவட்ட செயலகம் வரை தொடரணியாகச் சென்ற பேரூந்துகள் வவுனியா மாவட்ட செயலகத்திற்கு அருகே தரித்து இ.போ.ச இணைந்த தனியார் நேர அட்டவனை எங்கே?, மாகாண அரசே உரிய அதிகாரத்தை பெற்று எமது தனியார் போக்குவரத்து சேவையினை சீர் செய், நல்லாட்சி அரசே தனியார் போக்குவரத்தினை ஒதுக்காதே என பல்வேறு பாதாகைகனை ஏந்திய வண்ணம் ஆர்ப்பாட்டத்தில் ஈடுபட்டனர்.

அதன் பின்னர் வவுனியா தனியார் போக்குவரத்தின் சங்கத்தின் முகாமைத்துவப் பணிப்பாளர் ராஜேஸ்வரன் அவர்களினால் வவுனியா மாவட்ட மேலதிக அரசாங்க அதிபர் திருச்செல்வம் திரேஸ்குமார் அவர்களிடம் மகஜர் ஒன்றும் கையளிக்கப்பட்டது.

 
தனியார் போக்குவரத்துச் சேவைகள் வடமாகாண ரீதியில் பணிப்பகிஸ்கரிப்பை முன்னெடுத்துள்ளதாக வட இலங்கை தனியார் பேரூந்து உரிமையாளர் சங்கம் அறிவித்துள்ள நிலையில் வவுனியாவில் தனியார் பேரூந்துகள் எவையும் சேவையில் ஈடுபடுத்தப் படாமையினால் அரச உத்தியோகத்தர்கள், மாணவர்கள், மக்கள் எனப் பலரும் பாதிக்கப்பட்டுள்ளனர்.

தனியார் பேரூந்திற்கு 60 வீதமும், இலங்கை அரச போக்குவரத்துச் சேவை பேரூந்திற்கு 40 வீதமும் என்ற விகிதாசாரத்தில் கடந்த 3 வருட கால முயற்சியின் பின் இணைந்த நேர அட்டவணை தயாரிக்கப்பட்டது.

எனினும் இலங்கை அரச போக்குவரத்துச் சேவை இதற்கு ஒத்துழைப்பு வழங்காத நிலையில் அத்துமீறிய சேவையை மேற்கொண்டு வருவதாக வட இலங்கை தனியார் பேரூந்து உரிமையாளர் சங்கம் தெரிவித்துள்ளது.

இந்த விடயம் தொடர்பில் மத்திய அரசுடனும், மாகாண அரசுடனும் சந்திப்புக்களை ஏற்படுத்தியும் எந்தவித பலனும் இதுவரை எட்டப்படவில்லை எனவும் குற்றம்சுமத்தப்பட்டள்ளது.