இலங்கையின், மொத்த சனத்தொகையில் 23.4 வீதமானோர் புகைத்தல் பழக்கமுடையவர்களாக இருப்பதாக, சுகாதார அமைச்சு தெரிவித்துள்ளது. சுகாதார சேவைகள் பணிப்பாளர் நாயகம் வைத்திய கலாநிதி பாலித மஹிபால இதனை தெரிவித்துள்ளார்.

2020ல் புகையிலையில்லா இலங்கை என்ற தொனிப்பொருளில் சுகாதார கல்விப் பிரிவினால் முன்னெடுக்கப்படும் திட்டம் தொடர்பாக விளக்கமளிக்கும் ஊடகவியலாளர் சந்திப்பிலேயே அவர் இதனை கூறியுள்ளார்.

இதன் போது தொடர்ந்தும் கருத்து தெரிவித்துள்ள அவர், 20ஆம் நுற்றாண்டின் இறுதி வரை புகையிலையினால் உலகில் 100 மில்லியன் மக்கள் உயிரிழந்துள்ளனர்.

வெண்சுருட்டில், 700 வகையான இரசாயன பதார்த்தங்கள் காணப்படுகின்றன. அவற்றில் 69 வகையான இரசாயன பதார்த்தங்கள் புற்றுநோயை ஏற்படுத்தக்கூடியவை.

மேலும் 250 இரசாயனங்கள் உடலுக்குப் பாதிப்பை ஏற்படுத்தக் கூடியவை. சுமார் 55 தொடக்கம் 60 வரையான புற்றுநோயாளிகள், புகைப்பழக்கமுடையவர்களாக இருக்கின்றனர்.

கடந்த ஆண்டு மேற்கொள்ளப்பட்ட ஆய்வுகளின் பிரகாரம், 23.4 வீதமானோர் இலங்கையில் புகைப்பழக்கம் கொண்டவர்களாக உள்ளனர்.

இதேவேளை, மாணவர்களில் 3 வீதமானோருக்கு புகைத்தல் பழக்கம் இருப்பதாக அவர் மேலும் தெரிவித்துள்ளார்.

இலங்கையில் அதிகம் மதுபானம் விற்கப்படுவது யாழ்ப்பாணத்திலேயே என ஜனாதிபதி மைத்திரிபால சிறிசேன தெரிவித்துள்ளார்.

அத்துடன் இலங்கையில் ஆண்களை விட பெண்களே அதிகம் மதுபாவனைக்கு அடிமையாகியுள்ளதாகவும் அவர் குறிப்பிட்டுள்ளார்.

இன்று நுவரெலியாவில் ஜனாதிபதி தலைமையில் இடம்பெற்ற சுதந்திர நாட்டுக்கு தேசிய வேலைத்திட்டம் நிகழ்வில் கலந்து கொண்ட போதே அவர் இதனைத் தெரிவித்துள்ளார்.

அத்துடன் குறித்த மது விற்பனையில் அதிகமான வருமானத்தை பெற்று தருவதில் முதலிடத்தில் யாழ்ப்பாணமும், இரண்டாவது இடத்தை நுவரெலியாவும் வகிப்பதாகவும், மூன்றாவது இடத்தை மட்டக்களப்பும் வகிப்பதாக அவர் தெரிவித்துள்ளமை சுட்டிக்காட்டத்தக்கது.

அத்துடன் இந்த தகவல்களானது நாட்டில் சட்டரீதியான மது விற்பனையை பற்றி எனவும் ஜனாதிபதி மைத்திரிபால சிறிசேன குறிப்பிட்டுள்ளார்.

இதேவேளை மதுபானம்,சிகரெட்டுக்காக நுவரெலிய மாவட்ட மக்கள் வருடத்திற்கு 106 கோடி நிதியனை செலவிடுவதாகவும் தெரிவித்துள்ளார்.

அத்துடன் சட்டவிரோத, சட்டரீதியான மதுபாவனை இரண்டுமே மக்களை அழிப்பதாகவும் ஜனாதிபதி அறிவுறுத்தியுள்ளார்.

அம்பாறை – கொண்டுவடவான ஆற்றுக்கு அருகில் பெண் ஒருவர் கூறிய ஆயுதத்தால் தாக்கப்பட்டு கொலை செய்யப்பட்டுள்ளார்.

நேற்று(26.06) காலை இடம்பெற்ற இந்த சம்பவத்தில் சந்தேகநபர் விஷம் அருந்தி தானும் தற்கொலை செய்ய முற்பட்டுள்ளதாக, அம்பாறை பொலிஸார் குறிப்பிட்டுள்ளனர்.

காதல் விவகாரம் தொடர்பில் ஏற்பட்ட முரண்பாடே சம்பவத்துக்குக் காரணம் எனத் தெரியவந்துள்ளது.
மேலும் கொலையான பெண் 30 வயதான ஒருவராவார்.

சந்தேகநபர் அம்பாறை பொலிஸாரால் கைதுசெய்யப்பட்டுள்ளதோடு, தற்போது பொலிஸ் பாதுகாப்பின் கீழ் அம்பாறை வைத்தியசாலையில் சிகிச்சை பெற்று வருகின்றார்.

சீனி உற்பத்தி தொடர்பில் விதிக்கப்பட்டுள்ள வரி வீதத்தை அதிகரிக்க அமைச்சரவையில் யோசனை ஒன்றை முன்வைக்கவுள்ளதாக, அமைச்சர் ராஜித்த சேனாரத்ன தெரிவித்துள்ளார்.

தொற்றா நோய்கள் மக்களுக்கு ஏற்படுவதை கட்டுப்படுத்தவே இந்த நடவடிக்கை மேற்கொள்ளப்படவுள்ளதாக அவர் சுட்டிக்காட்டியுள்ளார்.

சீனிக்கான வரி அதிகரிக்கப்பட வேண்டும் என தான் முன்னதாக தெரிவித்திருந்த போதும், அது குறித்து பல்வேறு சர்ச்சைகள் ஏற்பட்டதாக அவர் கூறியுள்ளார்.

எனினும், தொற்றா நோய்களைக் கட்டுப்படுத்த இங்கிலாந்து போன்ற நாடுகளில் சீனிக்காக வரி அதிகரிக்கப்பட்டுள்ளதாக அவர் குறிப்பிட்டுள்ளார்.

இதேவேளை, மென்பாணங்களில் சீனியின் அளவைக் குறிக்கும் வர்ண குறியீடுகளை அறிமுகப்படுத்தும் சட்டம் எதிர்வரும் ஆகஸ்ட் 1ம் திகதி முதல் நடைமுறைப்படுத்தப்படவுள்ளதாகவும் அமைச்சர் ராஜித்த சேனாரத்ன தெரிவித்துள்ளார்.

திருகோணமலை – சேருநுவர பொலிஸ் பிரிவுக்குட்பட்ட பகுதி பாடசாலையொன்றில், 10ம் தரத்தில் கல்வி பயிலும் 15 வயது சிறுமியை பாலியல் பலாத்காரத்திற்கு உட்படுத்தி கர்ப்பமாக்கிதாக சந்தேகிக்கப்படும் இருவர் கைதுசெய்யப்பட்டுள்ளனர்.

பாதிக்கப்பட்ட சிறுமியின் பக்கத்து வீட்டிலுள்ள 50 மற்றும் 55 வயதுடைய இருவரையே கந்தளாய் தலைமைய பொலிஸின் சிறு குற்றத் தடுப்பு பிரிவினர் நேற்று ஞாயிற்றுக்கிழமை (26.06) இவ்வாறு கைதுசெய்துள்ளனர்.

சம்பந்தப்பட்ட சிறுமி வயிற்றுவலியெனத் தெரிவித்து பெற்றோருடன் கந்தளாய் வைத்தியசாலைக்குச் சென்றுள்ளார்.
அவரை, சோதனைக்குட்படுத்திய போது இரண்டு மாத கர்ப்பம் என தெரியவந்தது.

இதனையடுத்து சிறுமியின் பெற்றோர் வழங்கிய முறைப்பாட்டையடுத்து, விசாரணைகளை மேற்கொண்ட பொலிஸார் இருவரையும் சந்தேகத்தின் பேரில் கைது செய்துள்ளனர்.

இதேவேளை, சிறுமி, கந்தளாய் வைத்தியசாலையில் அனுமதிக்கப்பட்டு சிகிச்சை பெற்றுவருகின்றார்.

எதிர்வரும் ஜனாதிபதி தேர்தலில் மீண்டும் ஒருமுறை போட்டியிடவேண்டும் என்று மைத்திரிபால சிறிசேனவுக்கு ஸ்ரீலங்கா சுதந்திரக்கட்சி விடுத்தவேண்டுகோளை அவர் நிராகரித்துள்ளார். கடந்த வாரம் கட்சியின் கூட்டம் இடம்பெற்றபோது இந்த விருப்பமின்மையை ஜனாதிபதி வெளியிட்டதாக கட்சியின் பேச்சாளர் திலான் பெரேரா தெரிவித்துள்ளார்.

தாம் 2020 ஆம் ஆண்டுடன் ஜனாதிபதி பதவியை தொடர்வதில்லை என்று முன்னர் தாம் எடுத்த தீர்மானத்தில் மாற்றம் இல்லை என்று ஜனாதிபதி இதன்போது குறிப்பிட்டுள்ளார். எனினும் சிறிசேன, அடுத்த பிரதமர் தேர்தலில் போட்டியிடுவதற்கான வாய்ப்புக்கள் இருப்பதாகவே கருதப்படுகிறது .தேசிய அரசாங்கம் வீழ்ச்சியடையும் சந்தர்ப்பத்தில் இதற்கான ஆயத்தங்கள் மேற்கொள்ளப்படலாம் என்று எதிர்பார்க்கப்படுகின்றது.