புதுக்குடியிருப்பு வேணாவில் பாடசாலை மாணவர்களின் பரிசளிப்பும், வேணாவில் கலைமகள் கலாமன்றத்தின் ஆண்டுவிழாவும் சிவராத்திரி தினமான நேற்றைய நாள் வேனாவில் அம்மன் கோவில் முன்றலில் நடைபெற்றது.

இந் நிகழ்வில், பிரதம விருந்தினராக வன்னி மாவட்ட பாராளுமன்ற உறுப்பினர் வைத்திய கலாநிதி சி.சிவமோகன், சிறப்பு விருந்தினராக வடமாகாண சபை உறுப்பினர் திரு.அன்ரனி ஜெகநாதன், பிரதேச சபையின் கலாச்சார உத்தியோகத்தர் திரு.பிரதீபன் மற்றும் புதுக்குடியிருப்பு மேற்கு கிராம சேவையாளர் திருமதி.தேவகி ஆகியோர் கலந்து சிறப்பித்தனர்.

கருத்துரைகளை கலாச்சார உத்தியோகத்தரும், வடமாகாண சபை உறுப்பினரும் நிகழ்த்தினர். சிறப்புரையினை வன்னி மாவட்ட பாராளுமனற உறுப்பினரும் வன்னிக் குறோஸ் கலாச்சாரப் பேரவையின் நிறைவேற்றுப் பணிப்பாளருமான வைத்திய கலாநிதி சி.சிவமோகன் ஆற்றினார். அவர் தனதுரையில்..

இந்துக்கள் புனிதமாகப் போற்றும் சிவராத்திரி தினமான இன்று, பின்தங்கிய இக்கிராமத்தில் நடைபெறும் இந் நிகழ்வில் கலந்து கொள்வதனையிட்டு மனமகிழ்கிறேன். கடந்த யுத்தத்தில் உயிர், உடமைகளை எமது மக்கள் இழந்தாலும் கூட தங்களுடைய கலை கலாச்சாரத்தின் மேல் தங்கள் மனஉறுதியை இழக்கவில்லை.

இதன் எடுத்துக்காட்டாக இப்பிரதேச சிறுவர்கள், கலைஞர்கள் நிகழ்த்துகின்ற கலை நிகழ்வுகள் எடுத்து இயம்புகின்றன. வளங்கள் பற்றாக்குறையாக இருந்தும் கூட இருக்கின்ற வளங்களை வைத்து சிறந்த கலை நிகழ்வுகளை நடாத்துகின்றனர்.

எமது பாரம்பரிய கலை, கலாச்சாரங்களை கட்டிக் காக்கவேண்டும் என்பதற்காக எனது சிந்தனையில் வன்னி குறோஸ் கலாச்சாரப் பேரவை உதயமாகி செயற்பட்டுக்கொண்டிருக்கின்றது. இந்த கலைஞர்களின் வளர்ச்சியில் புத்திஜீவிகள், கல்விமான்கள், கலையார்வம் கொண்டவர்கள் போன்றவர்கள் ஊக்கமளித்து, எங்கள் கலை கலாச்சாரங்களை கட்டிக்காக்க வேண்டும். இதற்காக என்னுடைய பணி தொடர்ந்த வண்ணமே இருக்கும் எனவும் தெரிவித்தார்.

தொடர்ந்து அறநெறிப் பாடசாலை மாணவர்களின் வில்லிசை, நடனம், காத்தவராயன் சிந்து நடன கூத்து என்பன இடம்பெற்று பரிசளிப்பும் இடம்பெற்றது. இந்நிகழ்வில் ஆயிரத்திற்கு மேற்பட்ட பொது மக்கள் கலந்து கொண்டனர்.

அனுமதியின்றி மேடை நாடகம் ஒன்றை ஏற்பாடு செய்து நடாத்தியமை தொடர்பில் பேராதனை பல்கலைக்கழகத்தின் கால்நடை மருத்துவ பீடத்தின் 12 மாணவர்களுக்கு வகுப்புத் தடை விதிக்கப்பட்டுள்ளது.

இதேவேளை இந்த மேடை நாடகத்திற்கான பணம் வசூலிப்பு மற்றும் இந்த மேடை நாடகத்தை நடாத்துவதற்கான இடம் போன்றவை அனுமதியின்றி இடம்பெற்றதாகவும் குறிப்பிடப்பட்டுள்ளது.

அத்துடன் இந்த மேடை நாடகத்தில் பங்கு பற்றுவதற்காக வந்த நடிகர்,நடிகைகளின் வருகை தொடர்பில் பல்கலைக்கழக நிர்வாகத்திற்கு அறிவிக்கவில்லை என்றும் இதன் காரணமாகவே இந்த நிகழ்வை ஏற்பாடு செய்த குறித்த 12 மாணவர்களுக்கு எதிராக ஒழுக்காற்று நடவடிக்கை எடுக்கும் முகமாக இவர்களுக்கான வகுப்புத் தடை செய்யப்பட்டுள்ளதாகவும் தெரிவிக்கப்பட்டுள்ளது.

-தமிழ்வின்-

ஐக்கிய தேசிய கட்சியின் மத்திய மாகாண சபை உறுப்பினர் பதவியில் இருந்து இராஜினாமா செய்துள்ளதாக அசாத் சாலி தெரிவித்துள்ளார்.

அத்துடன் இந்தியா ஸ்ரீலங்கா அமைப்பின் பணிப்பாளர் பதவியிலிருந்தும் தான் இராஜினாமா செய்துள்ளதாக அவர் மேலும் கூறியுள்ளார்.

தனது பதவி விலகல் கடிதத்தை ஜனாதிபதியிடம் கையளித்துள்ளதாக அசாத் சாலி கூறியுள்ளார்.

கடந்த இரண்டு மாதங்களில் இலங்கை கணனி அவசர முறைப்பாட்டு நிலையத்திற்கு 400 முறைப்பாடுகள் கிடைத்துள்ளது.

இதில் அதிகமான முறைப்பாடுகள் பேஸ்புக் தொடர்பானவை என்று இலங்கை கணனி அவசர முறைப்பாட்டு நிலையத்தின் பாதுகாப்பு பொறியியலாளரான ரொஷான் சந்ரகுப்தா தெரிவித்துள்ளார்.

அத்துடன் நூறில் 80 வீதமானவை போலி பேஸ்புக் கணக்குகள் தொடர்பாகவும், அனுமதியின்றி சட்டவிரோதமாக மற்றவர்களின் பேஸ்புக் கணக்குகளை பயன்படுத்தல் உள்ளிட்ட முறைப்பாடுகளும் கிடைத்துள்ளதாக அவர் மேலும் தெரிவித்துள்ளார்.

மேலும் மின்னஞ்சல் மூலம் பல்வேறு நிதி மோசடிகள் இடம்பெறுவது தொடரபிலும் கடந்த இரண்டு மாதத்திற்குள் நான்கு முறைப்பாடுகள் கிடைத்திருப்பதாகவும் சந்ர குப்தா தெரிவித்துள்ளார்.

சிறுநீரக நோயை கட்டுப்படுத்த விரைவாக வேலைத்திட்டம் ஒன்றை மேற்கொள்வது அவசியம் என்பதால், நாட்டில் சிறுநீரக நோய் தொடர்பில் அறிக்கையை பெற்றுத் தருமாறு சுகாதார அமைச்சின் செயலாளருக்கு ஜனாதிபதி மைத்திரிபால சிறிசேன பணிப்புரை விடுத்துள்ளார்.

சுகாதார போசனை மற்றும் சுதேச வைத்திய அமைச்சின் முன்னேற்றம் குறித்த கூட்டம் நாரஹேன்பிட்டவில் இடம்பெற்றது. இந்த நிகழ்விலேயே அவர் இவ்வாறு கூறியுள்ளார்.

இதன்போது ஒரு வருடத்தில் 5000 சிறுநீரக நோயாளர்கள் வரை பதிவாவதாக சுட்டிக்காட்டப்பட்டது.

மேலும், விவசாய உற்பத்திகளுக்காக விஷ இரசாயனங்களைப் பயன்படுத்துதல், நீரழிவு மற்றும் உயர் இரத்த அழுத்தம் போன்றன சிறுநீரக நோய்க்கு முக்கிய காரணமாக அமைவதாகவும் சுகாதார அமைச்சு கூறியுள்ளது.

தற்போது மக்களின் உணவுகளில் விஷ இரசாயனங்கள் பயன்படுத்தப்படுகின்றமை பிரதான பல நோய்களுக்கு காரணம் எனவும், இது குறித்து மேற்கொள்ளப்படக் கூடிய நடவடிக்கைகள் குறித்து, சுகாதார அமைச்சின் முன்னேற்றம் குறித்த கூட்டத்தில் அதிக அவதானம் செலுத்தப்பட்டுள்ளதாகவும் தெரிவிக்கப்பட்டுள்ளது.

இதேவேளை, உணவில் பயன்படுத்தப்படும் சில சுவையூட்டிகளையும் எதிர்காலத்தில் தடைசெய்ய நடவடிக்கை எடுக்கப்படவுள்ளதாகவும் சுகாதார அமைச்சு இதன்போது கூறியுள்ளது.

அத்துடன் மருந்து உற்பத்தி மற்றும் டெங்கு நோய் குறித்தும் இந்த சந்திப்பில் அவதானம் செலுத்தப்பட்டுள்ளது.

மல்லாவியில் மல்லாவிக் கஜன் எழுதிய ‘ஒருபிடி மண்’ சிறுகதை நாளை (08.02.2016) மதியம் 1.30 மணிக்கு துணுக்காய் பிரதேச செயலக மாநாட்டு மண்டபத்தில் நடைபெறவுள்ளது.

ஈழத்து இலக்கிய தடத்தில் முல்லைத்தீவின் பங்களிப்பு குறைவாகவே இருந்திருக்கிறது. இருக்கிறது. அதிலும் துணுக்காய் பிரதேசத்திலிருந்து இலக்கியங்கள் படைக்கப்படுவது அரிதிலும் அரிதே.

அந்த வகையில் எதிர்வரும் 8ம் திகதி மகளிர் தினத்தன்று மல்லாவிக்கஜன் எழுதிய ‘ஒரு பிடி மண்’ சிறுகதைத் தொகுப்பு துணுக்காய் பிரதேச செயலக மண்டபத்தில் வெளியிடப்படுகிறது.

துணுக்காய் பிரதேச பண்பாட்டுப் பேரவையின் ஏற்பாட்டில் கவிஞர் வே.முல்லைத்தீபன் தலைமையில் இந்நூல் வெளியிடப்படும். நூல் ஆராய்வுரையினை வைத்தியக் கலாநிதி செ.மதுரகன் (வவுனியா தமிழ் மாமன்ற மேல்சபை உறுப்பினர்) வழங்க.. வாழ்த்துக் கவியினை மல்லாவிக் கண்ணன் நிகழ்த்துவார்.

வாழ்த்துரைகளை துணுக்காய் பிரதேச செயலர் திரு குணபாலன், துணுக்காய் வலயக்கல்விப் பணிப்பாளர் திருமதி மாலினி வெனிற்றன் மற்றும் எழுத்தாளரும் திறனாய்வாளருமாகிய கவிஞர் மேழிக்குமரன் ஆகியோர் நிகழ்த்துவார்.

சிறப்புரையினை முல்லைத்தீவு கல்விவலய பிரதிக்கல்விப் பணிப்பாளர் திரு ஞா ஆதவன் அவர்கள் வழங்குவார்

சர்வதேச அளவில் பெண்மையைப் போற்றுவதற்காக ஐக்கிய நாடுகள் சபையினால் அங்கிகரிக்கப்பட்ட மார்ச் எட்டாம் நாளில் சர்வதேச மகளிர் தினம் கொண்டாடப்படுகிறது. முதன் முதலில் சர்வதேச உழைக்கும் மகளிர் தினம் என அழைக்கப்பட்ட இந்த மகளிர் தினம், பொருளாதார, அரசியல் மற்றும் சமூக ரீதியில் சாதனை புரிய முயலும் பெண்களின் மீது மரியாதை, மதிப்பு, அன்பு ஆகியவற்றை வெளிப்படுத்தும் வகையில் பொதுவாகக் கொண்டாடப்படுகின்றது.

இவ் மகளிர் தினமானது பெண்கள் முன்னேற்றத்தை ஊக்குவிக்கும் வகையிலும், அவர்களின் உரிமைகளுக்குப் பங்கம் விளைவிக்காமல் சாதனைகளைக் கொண்டாடும் வகையிலும் கடைப்பிடிக்கப்பட வேண்டும். காலம் காலமாகக் கண்ணீருடன் வாழ்ந்து வரும் பெண் இனம் காத்து வரும் கண்ணிய உணர்வால்தான் இந்த மண்ணில் மனிதநேயம் உயிர்த்து இருக்கிறது என்பதையும் மக்கள் தொகையில் சரி பாதியாக இருக்கும் பெண்களின் முன்னேற்றமே, ஒட்டு மொத்த உயர்வுக்கு வழி வகுக்கும் என்பதனையும் அனைத்து தரப்பினரும் உணர்ந்துகொள்ள வேண்டும்.

எமது நாட்டைப் பொறுத்த வகையில் சர்வதேச மட்டத்திலான பல முன்னுதாரணங்களை பெண்கள் நடைமுறைப்படுத்தி காண்பித்துள்ளனர். உலகின் முதலாவது பெண் பிரதமர் உள்ளிட்ட உதாரணங்களையும் யுத்த காலத்தில் தமிழ் பெண்கள் அகிம்சை முதல் ஆயுதப் போராட்டம்வரை பிரமிக்கத்தக்க சாதனைகளை படைத்து கான்பித்துள்ளனர்.

இதற்கு அன்னை பூபதி முதல் அங்கயற்கண்ணி வரை பல பெண்களை உதாரணமாக குறிப்பிட முடியும்.

“பட்டங்கள் ஆள்வதும் சட்டங்கள் செய்வதும்
பாரினில் பெண்கள் நடத்தவந்தோம்;
எட்டு மறிவினில் ஆணுக் கிங்கேபெண்
இளைப்பில்லை காணென்று கும்மியடி!
வேதம் படைக்கவும் நீதிகள் செய்யவும்
வேண்டி வந்தோ மென்று கும்மியடி!
சாதம் படைக்கவும் செய்திடுவோம்;தெய்வச்
சாதி படைக்கவும் செய்திடுவோம்.”

என்ற பாரதியின் வரிகள் ஓரளவிற்கு மெய்ப்பிக்க பட்டபோதிலும் இன்றும் சில அடிப்படைவாதிகளினாலும் சமூக விரோதிகளாலும் பெண்களுக்கு எதிரான வன்முறைகள் மேற்கொள்ளப்படுகின்றமை வேதனையளிக்கின்று. அன்மைக்காலமாக எமது நாட்டில் இடம்பெறுகின்ற பாலியல் வன்கொடுமைகளும் படுகொலைகளும் ஒட்டுமொத்த பெண்களின் பாதுகாப்பினை கேள்விக்குறியாக்கியுள்ளதுடன் ஒருபானை பாலில் ஒருதுளி விசம் கலந்தால் அனைத்து பாலும் நஞ்சாவது போன்று இவ்வாறான ஒருசில சம்பவங்கள் ஒட்டுமொத்த நாட்டிற்குமே ஒரு இழிவாகவே பார்க்கப்படும்.

யாழ் புங்குடுதீவு வித்தியாவின் கொடூர சம்பவம் தொடக்கம் கரிஷ்ணவியின் படுகொலை வரையிலும் பல கொடூர சம்பவங்கள் நாட்டில் அரங்கேறியுள்ளமை ஆரோக்கியமான பெண்விடுதலையினை கடுமையாக பாதித்துள்ளது இதன்மூம் பெண்களின் சுதந்திரமான நடமாட்டம் மட்டுமன்றி வீடுகளில் தனிமையில் இருப்பதும் அச்சத்திற்கு உள்ளாக்கப்பட்டுள்ளது.

எனவே இவ்வாறான சம்பவங்களை கட்டுப்படுத்த ஐக்கிய அரபு இராட்சியம் , ஈரான், ஈராக், ஆப்கானிஸ்தான், போன்ற நாடுகளில் பாலியல் குற்றங்களுக்காக பொதுமக்கள் முன்னிலையில் வழங்கப்படுவதைப் போன்று கடுமையான தண்டனைகளை வழங்கி கட்டுப்படுத்த அரசாங்கம் முன்வர வேண்டுமென கேட்டுக்கொள்வதோடு மகளிர் தினத்தினை சீனா, ரஷ்யா, பல்கேரியா, வியட்நாம் போன்ற பல நாடுகள் விடுமுறை தினமாகப் பிரகடனப் படுத்தியுள்ளது போன்று நமது நாட்டிலும் இந்நாளை அரச விடுமுறையாக அறிவித்து மகளிர் தினத்தினை முக்கியத்துவமான நாளாக மாற்றியமைக்க வேண்டுமென கேட்டுக்கொள்ளுகின்றேன்.

அத்துடன் இந்த உயர்ந்த நாளில் பெண்ணுரிமைக்காகப் போராடிய போராளிகளைப் பற்றியும் பெண்கள் போர்க்குணத்துடன் கட்டியமைத்த இயக்கங்கள் பற்றியும் நன்றியுடன் நினைத்துச் சிறப்புச் செய்யவதுடன் கடந்த கால வரலாற்றை, அதில் நடந்த தவறுகளைத் திறந்த மனதோடு இரு பாலாரும் கற்று ஆய்ந்து தீர்வைக் காண வேண்டும், எனவும் கேட்டுநிற்கின்றேன்.

நன்றி
ப.உதயராசா
செயலாளர் நாயகம்
சிறி ரெலோ