தசரா தொடர் விடுமுறை நாளில், கர்நாடக மாநிலம் குடகு மாவட்டத்தில் கார் ஏரியில் கவிழ்ந்து விபத்துக்குள்ளானதில், 3 வயது மகள் உட்பட ஒரே குடும்பத்தைச் சேர்ந்த மூன்று பேர் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.
கர்நாடக மாநிலம் குடகு மாவட்டம் சித்தாப்பூர் அருகே உள்ள படகா பனங்கலா பகுதியில் உள்ள ஒரு எஸ்டேட்டில் விஜேஷ் (36), பமிதா (35) தம்பதியினர் தங்களது 3 வயது மகள் லியாவுடன் வசித்துக் கொண்டு அங்கே பணியாற்றி வந்தனர்.
தசரா விடுமுறை தினமான கடந்த செவ்வாய்க்கிழமையன்று மூவரும் காரில் புறப்பட்டுச் சென்றுள்ளனர். இந்நிலையில், புதன்கிழமை காலையில் அப்பகுதியில் உள்ள ஒரு கூர்மையான வளைவுக்கு அருகில் இருந்த ஏரியில் கார் ஒன்று தலைகீழாகக் கவிழ்ந்து கிடப்பது கண்டுபிடிக்கப்பட்டது.
இது குறித்து தகவலறிந்து விரைந்த காவல்துறையினர் காரை மீட்டுப் பார்த்தபோது, அதற்குள் இருந்த விஜேஷ், பமிதா மற்றும் சிறுமி லியா ஆகிய மூவரும் பரிதாபமாக உயிரிழந்திருந்தது தெரிய வந்தது.
முதற்கட்ட விசாரணையின்படி, இரவு நேரத்தில் அப்பகுதியில் நிலவிய கடும் பனிமூட்டம் காரணமாகப் பார்வைத் தெளிவு குறைந்திருக்கலாம் என்றும்,
அப்போது ஓட்டுநர் சாலையைக் கவனிக்கத் தவறியதால் கட்டுப்பாட்டை இழந்த கார் ஏரிக்குள் பாய்ந்து கவிழ்ந்திருக்கக்கூடும் என்றும் காவல்துறையினர் தெரிவித்துள்ளனர். இச்சம்பவம் குறித்துக் காவல்துறையினர் தொடர்ந்து விசாரணை நடத்தி வருகின்றனர்.
களுத்துறையில் பணி முடித்துவிட்டு அலுவலகத்திலிருந்து வீடு திரும்பிக்கொண்டிருந்த அரச அதிகாரியின் மீது தாக்குதல் நடத்தப்பட்டு தங்க நகைகள் கொள்ளையடிக்கப்பட்டுள்ளன.
குறித்த அதிகாரியை ஆள் நடமாட்டம் இல்லாத வீதியில் பின்தொடர்ந்து மோட்டார் சைக்கிள் வந்த அடையாளம் தெரியாத நபர் திடீரென வழிமறித்து வாளால் தாக்கி அவர் அணிந்திருந்த தங்க நகைகளை கொள்ளையடித்து தப்பிச்சென்றுள்ளதாக தெரிவிக்கப்படுகின்றது.
மோட்டார் சைக்கிள் சாரதியை கைது செய்வதற்கான விசாரணையை அங்குருவடோட்டா பொலிஸார் தொடங்கியுள்ளனர். களுத்துறை, கல்பாத்தாவை சேர்ந்த பிரதேச செயலக அபிவிருத்தி உத்தியோகத்தரான 45 வயதான திருமண ஒரு குழந்தையின் தாய் மீதே இவ்வாறு தாக்குதல் நடத்தப்பட்டுள்ளது.
தனது அலுவலகத்திலிருந்து மோட்டார் சைக்கிளில் பணிகளை முடித்துவிட்டு பிரதேச செயலகத்திற்கு திரும்பிக்கொண்டிருந்தபோது இந்த சம்பவம் நிகழ்ந்துள்ளது.
இதன்போது தாக்குதலுக்கு உள்ளான அதிகாரி மேலதிக சிகிச்சைக்காக ஹொரணை மாவட்ட பொது வைத்தியசாலைக்கு மாற்றப்பட்டுள்ளார். சம்பவம் தொடர்பாக இதுவரை எந்த சந்தேகநபர்களும் கைது செய்யப்படவில்லை என்பதுடன், பொலிஸார் மேலதிக விசாரணைகளை மேற்கொண்டு வருகின்றனர்.
செயற்கை நுண்ணறிவு (AI) மூலம் உருவாக்கப்படும் ‘டீப்ஃபேக்’ (Deepfake) தொழில்நுட்ப மோசடிகள் குறித்து இலங்கை பொலிஸார் பொதுமக்களுக்கு எச்சரிக்கை விடுத்துள்ளனர்.
சமூக வலைத்தளங்களில் உள்ள புகைப்படங்கள் மற்றும் குறுகிய குரல் பதிவுகளைப் பயன்படுத்தி, உறவினர்கள் அல்லது நண்பர்களின் குரல் மற்றும் முகப்போலிகளை (Deepfake Videos & Voice Recordings) போலிச் சித்தரிப்பாக உருவாக்குகி மோசடி செய்பவர்கள் பணத்தைக் கோருகின்றனர்.
எனவே சந்தேகத்திற்குரிய அழைப்புகள் அல்லது காணொளி அழைப்புகள் வந்தால், உடனடியாகப் பணத்தையோ அல்லது வங்கிக் கணக்கு விபரங்களையோ வழங்க வேண்டாம்.
அத்துடன், சம்பந்தப்பட்ட நபரை வேறு ஒரு நம்பகமான தொடர்பு ஊடகம் (Phone Call / Direct Contact) மூலம் தொடர்பு கொண்டு உறுதிப்படுத்திக் கொள்ளுமாறும் பொலிசார் அறிவுறுத்தியுள்ளனர்.
கடவுச்சொற்கள் (Passwords) மற்றும் OTP எண்களை எவருடனும் பகிர்ந்து கொள்ள வேண்டாம் என்றும் அவர்கள் வலியுறுத்தியுள்ளனர்.
இணையத்தளங்களில் பரவலாகப் பயன்படுத்தப்படும் PHP நிரலாக்க மொழியில் இரண்டு பாரிய பாதுகாப்புக் குறைபாடுகள் கண்டறியப்பட்டதைத் தொடர்ந்து, உலகின் பல நாடுகளில் உள்ள நிறுவனங்கள் தமது இணையத்தளங்களைத் தற்காலிகமாக முடக்கியுள்ளன.
இந்தப் பாதுகாப்புக் குறைபாடுகளுக்கான புதுப்பிப்புகளை PHP Foundation வெளியிட்டுள்ளதாக வெளிநாட்டு ஊடகங்கள் தெரிவிக்கின்றன.
எனினும், உடனடியாகப் பாதுகாப்புப் புதுப்பிப்புகளைச் செயல்படுத்த முடியாத நிறுவனங்கள், தமது கட்டமைப்புகள் பாதுகாப்பான நிலையை அடையும் வரை இணையத்தளங்களை முடக்கி வைக்குமாறு இணையப் பாதுகாப்பு அமைப்புகள் பரிந்துரைத்துள்ளன.
பின்லாந்து அரசாங்கத்தின் பொதுவான இணையச் சேவைகளும், நெதர்லாந்தின் இணையப் பாதுகாப்பு அமைப்பின் இணையத்தளமும் தற்காலிகமாக முடக்கப்பட்டுள்ளன.
அத்துடன், எடின்பரோ நகர சபையின் இணையத்தளம் மற்றும் விக்கிப்பீடியாவின் சில சேவைகளையும் பயனர்கள் தற்காலிகமாக அணுக முடியாத நிலை ஏற்பட்டுள்ளதாக வெளிநாட்டு ஊடகங்கள் தெரிவிக்கின்றன.
பிபிசியின் சில நிகழ்ச்சிகளுக்கான இணையத்தளங்களும் செயலிழந்துள்ள போதிலும், அவை PHP பாதுகாப்புக் குறைபாடுகளுடன் தொடர்புடையவை என்பது இதுவரை உறுதிப்படுத்தப்படவில்லை எனக் கூறப்படுகிறது.
அமெரிக்காவின் தேசிய பாதுகாப்பு முகமை (NSA), பிரித்தானியாவின் தேசிய இணையப் பாதுகாப்பு மையம் (NCSC) மற்றும் ஐரோப்பிய ஒன்றியத்தின் இணையப் பாதுகாப்பு அதிகாரிகளும் PHP பயன்படுத்தும் நிறுவனங்கள் உடனடியாகப் பாதுகாப்புப் புதுப்பிப்புகளைச் செயல்படுத்துமாறு அறிவுறுத்தியுள்ளனர்.
இந்தப் பாதுகாப்புக் குறைபாடுகளைப் பயன்படுத்தி, அங்கீகரிக்கப்படாத நபர்கள் கணினிக் கட்டமைப்புகளுக்குள் ஊடுருவி, சேவையகங்களில் உள்ள கோப்புகள் மற்றும் தரவுகளை அணுகுவதுடன், தீங்கிழைக்கும் மென்பொருட்களை நிறுவவும் வாய்ப்புள்ளதாக நிபுணர்கள் எச்சரித்துள்ளனர்.
CERT-EU அமைப்பின் இடர் மதிப்பீடுகளின்படி, பயனர்களின் அனுமதியின்றி தொலைவிலிருந்து கணினிக் குறியீடுகளைச் செயல்படுத்தும் அபாயமும் காணப்படுவதாகத் தெரிவிக்கப்பட்டுள்ளது.
Calif மற்றும் Wiz ஆகிய இணையப் பாதுகாப்பு நிறுவனங்களின் ஆய்வாளர்கள் இந்தப் பாதுகாப்புக் குறைபாடுகளைக் கண்டறிந்துள்ளதாகக் கூறப்படுகிறது.
இதற்காக, OpenAI ஆரம்பித்துள்ள “Patch the Planet” திட்டத்தின் கீழ் மேம்பட்ட செயற்கை நுண்ணறிவுக் கருவிகள் பயன்படுத்தப்பட்டுள்ளதாகவும் தெரிவிக்கப்படுகிறது.
இந்தப் பாதுகாப்புக் குறைபாடுகள் ஒரு தசாப்தத்திற்கும் மேலாகக் கண்டறியப்படாமல் இருந்ததாகக் கூறப்படுகிறது. இணையத்தளங்களில் சுமார் 70 சதவீதமானவை இதனால் பாதிக்கப்படக்கூடும் என Wiz நிறுவனம் மதிப்பிட்டுள்ள போதிலும், இந்த மதிப்பீடு சுயாதீனமாக உறுதிப்படுத்தப்படவில்லை என அறிக்கையில் குறிப்பிடப்பட்டுள்ளது.
PHP Foundation, அண்மைய PHP பதிப்புகளுக்கு மட்டுமே பாதுகாப்புப் புதுப்பிப்புகளை வெளியிட்டுள்ளதால், PHP 8.1 அல்லது அதற்கு முந்தைய பதிப்புகளைப் பயன்படுத்துபவர்கள் புதிய பதிப்பிற்கு மேம்படுத்திக்கொள்ளுமாறு அறிவுறுத்தப்பட்டுள்ளனர்.
PHP என்பது WordPress, Drupal மற்றும் Joomla போன்ற இணையத்தள முகாமைத்துவக் கட்டமைப்புகள் உள்ளிட்ட பல்வேறு இணையச் சேவைகள் மற்றும் பயன்பாடுகளை உருவாக்கப் பயன்படுத்தப்படும் பிரபலமான நிரலாக்க மொழியாகும்.
PHP மென்பொருளைப் பயன்படுத்தி உருவாக்கப்பட்ட அமைப்புகளில் பாதுகாப்புக் குறைபாடுகள் காணப்படுவதாக இலங்கை கணினி அவசர தயார்நிலை பிரிவு (Sri Lanka CERT) அவசர எச்சரிக்கை விடுத்துள்ளது.
இந்த பாதுகாப்புக் குறைபாடுகள் மூலம் அனுமதி அற்ற அணுகல் (unauthorized access), தரவு திருட்டு (data theft) மற்றும் அமைப்புகளின் செயல்பாடுகள் முடங்குதல் போன்ற பாதிப்புகள் ஏற்படக்கூடும்.
எனவே, PHP மூலம் இயங்கும் அமைப்புகளை உடனடியாக அடையாளம் கண்டு, அவற்றின் மென்பொருள் பதிப்புகளைச் சரிபார்த்து, அதிகாரப்பூர்வ PHP இணையதள வழிகாட்டலின்படி பாதுகாப்புப் புதுப்பிப்புகளைச் செய்யுமாறு, இணைய உரிமையாளர்கள் கேட்டுக்கொள்ளப்பட்டுள்ளனர்.
கணினி பதிவுகளை (system logs) ஆய்வு செய்யுமாறும், உடனடியாகப் புதுப்பிக்க முடியாத அதிக ஆபத்துள்ள அமைப்புகளுக்கான இணைய அணுகலைக் கட்டுப்படுத்துமாறும், இலங்கை கணினி அவசர தயார்நிலை பிரிவு அறிவுறுத்தியுள்ளது.
முல்லைத்தீவு பகுதியில் இடம்பெற்ற மோட்டார் சைக்கிள் விபத்தில் காயமடைந்து மூளைச்சாவடைந்த தாய் ஒருவரின் இரண்டு சிறுநீரகங்களும் தானமாக வழங்கப்பட்டுள்ளன.
வவுனியா வைத்தியசாலையில் இடம்பெற்ற இந்த உறுப்பு தானத்தின் மூலம் இரண்டு நோயாளிகளுக்கு சிறுநீரகங்கள் பொருத்தப்பட்டு மறுவாழ்வு அளிக்கப்பட்டுள்ளது.
முல்லைத்தீவு, உடுப்புக்குளம் நான்காம் கட்டைப் பகுதியைச் சேர்ந்த 53 வயதுடைய தாய், கடந்த 15ஆம் திகதி தனது மகனுடன் மோட்டார் சைக்கிளில் மாஞ்சோலை பகுதியில் பயணித்துக்கொண்டிருந்தபோது, எதிர்பாராத விதமாக தவறி விழுந்து விபத்துக்குள்ளானார்.
அந்த விபத்தின்போது தலையில் பலத்த காயமடைந்து சுயநினைவை இழந்த அவர், உடனடியாக அருகில் இருந்த வைத்தியசாலையில் அனுமதிக்கப்பட்ட நிலையில், மேலதிக தீவிர சிகிச்சைக்காக யாழ்ப்பாணம் போதனா வைத்தியசாலைக்கு மாற்றப்பட்டார்.
அங்கு அளிக்கப்பட்ட தீவிர சிகிச்சைகளும் பலனளிக்காத நிலையில், அவர் வவுனியா வைத்தியசாலைக்கு மாற்றப்பட்டார்.
இந்த நிலையில், குடும்பத்தினரின் சம்மதத்துடன், அவரது இரண்டு சிறுநீரகங்களும் வவுனியா வைத்தியசாலையில் வைத்து தானமாக அளிக்கப்பட்டன.
இதன் மூலம் உயிருக்கு ஆபத்தான நிலையில் இருந்த 2 நோயாளிகளுக்கும் அந்தத் தாயின் சிறுநீரகங்கள் பொருத்தப்பட்டு, மறுவாழ்வுக்கான வாய்ப்பு அளிக்கப்பட்டது.
ஒரு குடும்பத்துக்கு ஈடுசெய்ய முடியாத இழப்பை ஏற்படுத்திய இந்த விபத்து, மற்றொரு புறத்தில் இரண்டு உயிர்களுக்கு புதிய நம்பிக்கையை வழங்கியுள்ளது.
இலங்கைக்கு அருகில் காணப்படும் தாழ் அமுக்க மண்டலம் தற்போது நாட்டின் வடமேற்கு திசையை நோக்கி நகர்ந்து கொண்டிருக்கின்றது என்று வானிலை அவதானிப்பு நிலையத்தின் கணிப்பீட்டுப் பிரிவின் பணிப்பாளர் மெரில் மெண்டிஸ் தெரிவித்துள்ளார்.
இதன் காரணமாக, நாட்டின் பெரும்பாலான பகுதிகளில் கடுமையான மேகமூட்டத்துடன் கூடிய வானிலை நிலவுவதுடன், பல மாகாணங்களில் பலத்த மழையும் பெய்யக்கூடும் என்றும் குறிப்பிட்டுள்ளார்.
மேல், சபரகமுவ, மத்திய, வடமேற்கு, தெற்கு மற்றும் வடக்கு மாகாணங்களில் இடைக்கிடையே மழையோ அல்லது இடியுடன் கூடிய மழையோ பெய்யக்கூடும்.
குறிப்பாக, மாலையிலோ அல்லது இரவிலோ நாட்டின் பல பகுதிகளில் மழை அல்லது இடியுடன் கூடிய மழை தொடரும் சாத்தியம் உள்ளது.
இதில் மேல், சபரகமுவ, மத்திய மற்றும் வடமேற்கு மாகாணங்களில் சில இடங்களில் 100 மில்லிமீற்றருக்கும் அதிகமான பலத்த கனமழை பதிவாகலாம் என்று எதிர்பார்க்கப்படுகின்றது.
இத்தகைய வானிலை மாற்றங்கள் காரணமாகப் பொதுமக்கள் அனைவரும் இது குறித்து விசேட கவனம் செலுத்துமாறு அறிவுறுத்தப்படுகின்றார்கள்.
இந்த வளிமண்டலவியல் முறைமையின் தாக்கம் இன்றைய நாள் முழுவதும் நீடிக்கும் என எதிர்பார்க்கப்படுவதோடு, நாளையும் இந்த நிலை தொடரக்கூடும் என்று மெரில் மெண்டிஸ் மேலும் சுட்டிக்காட்டியுள்ளார்.
கடற்பிரதேசங்களைப் பொறுத்தவரை, மேற்கு, தெற்கு மற்றும் வடக்குக் கடல் பகுதிகளிலும் இடைக்கிடையே மழையோ அல்லது இடியுடன் கூடிய மழையோ பெய்யக்கூடும் என்பதால், கடற்றொழிலாளர்களும் கடற்படைச் சமூகத்தினரும் மிகுந்த அவதானத்துடன் செயற்படுமாறு கேட்டுக்கொள்ளப்பட்டுள்ளனர்.
மேலும், இலங்கையை அண்மித்த பகுதிகளில் அயன அயல் இணைப்பு வலயம் தீவிரமடைந்துள்ளதால், எதிர்கால வானிலை அறிவிப்புகள் தொடர்பில் பொதுமக்கள் அவதானமாக இருக்குமாறு வானிலை அவதானிப்பு நிலையம் கேட்டுக்கொண்டுள்ளது.
புதிய இணைப்பு : இன்று (22.10.2026) முதல் மின் துண்டிப்பை நடைமுறைபடுத்துவதற்கான தேவைப்பாடுகள் இல்லை என தேசிய மின் கட்டமைப்பு செயல்பாட்டு நிறுவனம் (NSO) அறிவித்துள்ளது.
லக்விஜய மின் உற்பத்தி நிலையத்தின் இரண்டாவது மின் உற்பத்தி அலகு, 270 மெகாவாட் முழுமையான உற்பத்தித் திறனுடன் மீண்டும் செயற்படத் தொடங்கியுள்ளது.
இதன் காரணமாக, இன்று (22) முதல் மின் தேவை முகாமைத்துவ நடவடிக்கைகள் அவசியமில்லை என தேசிய மின் கட்டமைப்பு செயற்பாட்டாளர் அறிவித்துள்ளார்.
முதலாம் இணைப்பு : நுரைச்சோலை மின் உற்பத்தி நிலையத்தில் மின் உற்பத்திப் பணிகள் இன்று முதல் (22) மீண்டும் தொடங்கும் என தெரிவிக்கப்பட்டுள்ளது.
கடந்த சனிக்கிழமை, பிரதான மின் அமைப்பில் ஏற்பட்ட திடீர் கோளாறு காரணமாக, நாடு முழுவதும் மின்சாரம் துண்டிக்கப்பட்டது.
அதன் தாக்கத்தால் நுரைச்சோலையில் உள்ள ஒரு மின்னாக்கியும் செயலிழந்தது.
மின்வெட்டு : இருப்பினும், நுரைச்சோலை மின் உற்பத்தி நிலையம் இன்று முதல் தேசிய மின் கட்டமைப்புடன் இணைக்கப்பட உள்ளதால், மேலும் மின்வெட்டு தேவைப்படாது என தெரிவிக்கப்பட்டுள்ளது.
நுரைச்சோலை லக்விஜய நிலக்கரி மின் உற்பத்தி நிலையத்தின் முதலாவது மின்னாக்கியில் ஏற்பட்ட திடீர் தொழில்நுட்பக் கோளாறு மற்றும் திட்டமிடப்பட்ட பராமரிப்புப் பணிகள் காரணமாக, இலங்கையின் தேசிய மின் கட்டமைப்புக்கு வழங்கும் மின்சாரத்தில் பெரும் தட்டுப்பாடு ஏற்பட்டுள்ளது.
இதனால், தேசிய மின் அமைப்பு 250 மெகாவாட் மின் உற்பத்தித்திறனை இழந்துள்ளது.
இந்த 3 மின்னாக்கிகளில் 2, பராமரிப்புப் பணிகள் காரணமாக செயலிழக்க செய்யப்பட்டிருந்த நிலையில், நாடு முழுவதும் மின்வெட்டு ஏற்பட்டது.
இந்நிலையில், நுரைச்சோலை மின் உற்பத்தி நிலையம் இன்று முதல் தேசிய மின் கட்டமைப்புடன் இணைக்கப்பட உள்ளதால், மேலும் மின்வெட்டு தேவைப்படாது என தெரிவிக்கப்பட்டுள்ளது.
கேகாலை, வறக்காப்பொல பிரதேசத்தில் கிணற்றில் விழுந்த தனது பூனையை மீட்க முயற்சித்த பெண் கிணற்றுக்குள் விழுந்து உயிரிழந்துள்ளார்.
இரவில் தனது தந்தையுடன் இணைந்து பூனையை வெளியே எடுப்பதற்காக கிணற்றுக்குள் எட்டிப் பார்த்த போது விபரீத நிலைக்கு முகம் கொடுத்துள்ளார்.
உயிரிழந்தவர் வறக்காப்பொல பிரதேசத்தை சேர்ந்த 32 வயதுடைய கே. பி. தினேத்ரி இமேஷிகா உதானி என்ற திருமணமாகாதவராகும்.
அவர் தனது தந்தை, தாய் மற்றும் இளைய சகோதரருடன் ஒரே வீட்டில் வசித்து வந்ததுடன், நிட்டம்புவ களகெடிஹேன பகுதியில் அமைந்துள்ள கையுறை தயாரிப்பு நிறுவனமொன்றில் ஊழியராக பணியாற்றி வந்துள்ளார்.
நேற்று முன்தினம் இரவு 10 மணியளவில் பூனை கிணற்றுக்குள் விழுந்த சத்தம் கேட்டவுடன் தனது தந்தையுடனும் கிணற்றிற்கு சென்றுள்ளார்.
கிணறு தரை மட்டத்திலிருந்து சுமார் மூன்று அடி உயரத்தில் பாதுகாப்புச் சுவர் கட்டப்பட்ட ஒன்றாக இருந்தபோதிலும், அவர் தனது கைத்தொலைபேசியின் டோர்ச் லைட்டை ஒளிரவிட்டு கிணற்றின் உட்பகுதியைப் பரிசோதித்துள்ளார்.
கிணற்றில் விழுந்து கிடந்த பூனையைக் கண்ட தந்தையும் தினேத்ரியும், அதை வெளியே எடுப்பதற்காக முயற்சியில் ஈடுபட்டுள்ளனர்.
அதற்கமைய, டோர்ச் லைட்டை பிடித்திருந்த பெண் திடீரென கிணற்றிற்குள் தவறி விழுந்துள்ளதாக பொலிஸார் தெரிவிக்கின்றனர்.
கிணற்றுக்குள் விழுந்த பெண்ணை உறவினர்கள் உடனடியாக வெளியே எடுத்து நிட்டம்புவ வதுபிட்டிவல வைத்தியசாலையில் அனுமதிக்க நடவடிக்கை எடுத்துள்ளார். எனினும் ஏற்கனவே அவர் உயிரிழந்துள்ளதாக வைத்தியர்கள் தெரிவித்துள்ளனர்.
உயிரிழந்த பெண் கிணற்றுக்குள் விழும் போது கொன்கிரீட் பகுதியில் தலை பலமாக மோதியதால் ஏற்பட்ட பலத்த காயம் காரணமாக மரணம் ஏற்பட்டுள்ளதாக தெரிவிக்கப்பட்டுள்ளது.
இதுங்களை எல்லாம் நிற்க வைத்து சுட வேண்டும் என்று சமூக வலைத்தளங்களில் நெட்டிசன்கள் கொந்தளிக்கின்றனர். குழந்தையைப் பத்திரமாக பார்த்துக் கொள்வதை விட செல்ஃபி மோகம் தலைவிரித்து ஆடுகிறது.
கடற்கரையில் பெற்றோர் ரீல்ஸ் எடுப்பதில் கவனம் செலுத்தியபோது, குழந்தையைப் பெரிய அலை கடலுக்குள் இழுத்துச் சென்றதாகக் கூறப்படும் சம்பவம் அதிர்ச்சியை ஏற்படுத்தியுள்ளது.
பெற்றோரின் கவனக்குறைவால் குழந்தை ஆபத்தில் சிக்கியதைப் பார்த்த அருகில் இருந்த நபர் ஒருவர் உடனடியாகச் செயல்பட்டு, குழந்தையைப் பத்திரமாக மீட்டதாகத் தகவல்கள் தெரிவிக்கின்றன. இந்தச் சம்பவம் தொடர்பான காட்சிகள் சமூக வலைதளங்களில் பரவி வருகின்றன.
குழந்தையைப் பாதுகாப்பதில் கவனம் செலுத்தாமல் ரீல்ஸ் எடுப்பதில் ஈடுபட்டதாகக் கூறப்படும் பெற்றோருக்கு நெட்டிசன்கள் கண்டனம் தெரிவித்து வருகின்றனர்.
கடற்கரையில் குழந்தைகளுடன் செல்லும்போது, அலைகளின் வேகம் மற்றும் கடல் நீரோட்டத்தின் ஆபத்தை உணர்ந்து, குழந்தைகளைத் தொடர்ந்து கண்காணிக்க வேண்டியதன் அவசியத்தை இச்சம்பவம் உணர்த்துகிறது.
அவுஸ்திரேலியாவில் பெண் ஒருவரை தகாத செயற்பாட்டுக்கு உட்படுத்திய இலங்கையர் ஒருவர் நீதிமன்றத்தால் குற்றவாளியாக அறிவிக்கப்பட்டுள்ளார்.
மெல்பேர்ன் நகரை சேர்ந்த கிரிக்கெட் பயிற்சியாளரும் இலங்கை ஏ அணியின் முன்னாள் வீரருமான 51 வயதுடைய சுரஞ்சித் சில்வா, பிராட்மெடோஸ் நீதவான் நீதிமன்றத்தில் குற்றவாளியாக அறிவிக்கப்பட்டுள்ளார்.
2025ஆம் ஆண்டு ஜனவரி மாதம் 26 ஆம் திகதி சன்பரி பகுதியில் பெண்ணிடம் தவறாக நடந்து கொண்டதாக அவருக்கு எதிராக குற்றச்சாட்டுகள் சுமத்தப்பட்டிருந்தன. எனினும் குற்றச்சாட்டை மறுத்த இலங்கையர் வழக்கை விசாரணைக்கு உட்படுத்துமாறு கோரிய போதிலும், சாட்சி விசாரணைகளின் பின்னர் நீதிமன்றம் அவரை குற்றவாளியாக அறிவித்துள்ளது.
நீதிமன்றத்தில் வாசிக்கப்பட்ட பாதிக்கப்பட்ட பெண்ணின் வாக்குமூலம் அவர் முகங்கொடுத்த தீவிர மன உளைச்சலை வெளிப்படுத்தியது. தனது அனுமதியின்றி தனிப்பட்ட சுதந்திரத்திலும் உடலிலும் கைவைக்க யாருக்கும் உரிமையில்லை அவர் சுட்டிக் காட்டியுள்ளார்.
இச்சம்பவத்திற்கு பின்னர் தான் தீவிரமான பாதுகாப்பற்ற தன்மைக்கும் மன பயத்திற்கும் ஆளானதாகக் குறிப்பிட்டார். மனிதர்களை நெருங்கி பழகும் போதே கடுமையான தயக்கம் ஏற்படும் அளவிற்கு இச்சம்பவம் தாக்கம் செலுத்தியதாக பாதிக்கப்பட்ட பெண் தனது வாக்குமூலம் மூலம் நீதிமன்றத்தில் உறுதிப்படுத்தினார்.
ரஞ்சித் சில்வா சார்பில் முன்னிலையான வழக்கறிஞர் இது தவறான கணப்பொழுதில் நிகழ்ந்த ஒரு பிழையாகும். பிரதிவாதி அவுஸ்திரேலியாவில் நிரந்தர வதிவிட உரிமையைக் கொண்டவர் என்பதால் இத்தீர்ப்பு அவரது வணிகத்திற்கும் விசா நிலைக்கும் பாதகமாக அமையக்கூடும்.
அவருக்கு முன்னர் குற்றப் பின்னணிகள் எதுவும் இல்லை என குறிப்பிட்டார். எனினும் அவருக்கு எந்த தரப்பிலும் அனுதாபங்கள் கிடைக்கவில்லை என தெரிவிக்கப்படுகின்றது.
பத்து ஆண்டுகளுக்கு முன்பு அவுஸ்திரேலியாவில் குடியேறிய இரண்டு பிள்ளைகளின் தந்தையான சுரஞ்சித் சில்வா, அங்கு இரண்டாம் மட்டத் தகுதி பெற்ற கிரிக்கெட் பயிற்சியாளராவார். சுரஞ்சித் சில்வா பிணையில் விடுவிக்கப்பட்டுள்ள போதிலும், எதிர்வரும் 26 ஆம் தண்டனை வழங்கப்படும் என அறிவிக்கப்பட்டுள்ளது.
துபாய் சர்வதேச விமான நிலையத்தில் கடந்த ஒக்டோபர் 11 அன்று காணாமல் போன, இலங்கைப் பயணியான அவீஷ்கா கௌமதிக்குச் சொந்தமான ‘சூட்டி’ என்ற செல்லப்பிராணிப் பூனை பத்திரமாக மீட்கப்பட்டுள்ளது.
விமான நிலையத்தின் பொருட்கள் பரிமாறும் பட்டை குகைப்பகுதிக்குள் வைத்து துபாய் விமான நிலையக் குழுவினரால் கண்டுபிடிக்கப்பட்டுள்ளது. 2026, ஒக்டோபர் 11 அன்று இலங்கைக்கு விமான மூலம் தன் பூனையை அழைத்துச் சென்றபோது, ஏற்பட்ட பதற்றமான சூழலில் பூனை கூண்டிலிருந்து தப்பியோடியது.
இதனால் தனது பயணத்தை ரத்து செய்த உரிமையாளர், தனது செல்லப்பிராணியைத் தேடி விமான நிலையத்திலேயே தங்கியிருந்து பெரும் சிரமங்களை எதிர்கொண்டிருந்தார். விமான நிலையக் குழுவினரின் இடைவிடாத அர்ப்பணிப்பு மற்றும் கூட்டு முயற்சியால் ‘சூட்டி’ பத்திரமாக மீட்கப்பட்டுள்ளது.
இன்று (21.10.2026) நள்ளிரவு முதல் பரோட்டா, முட்டை ரொட்டி உள்ளிட்ட சிற்றுண்டிகளின் விலை அதிகரிக்கப்படும் என அகில இலங்கை உணவக உரிமையாளர்கள் சங்கம் அறிவித்துள்ளது.
இதன்படி, பரோட்டா, முட்டை ரொட்டி உள்ளிட்ட சிற்றுண்டிகளின் விலை 5 ரூபாவினால் அதிகரிக்கப்படவுள்ளது. குறித்த விலை அதிகரிப்பு இன்று நள்ளிரவு முதல் நடைமுறைக்கு வரவுள்ளதாகச் சங்கம் குறிப்பிட்டுள்ளது.
நேற்று(20) நள்ளிரவு முதல் நடைமுறைக்கு வரும் வகையில் கோதுமை மா ஒரு கிலோகிராமின் விலையை 13 ரூபாவினால் அதிகரிக்க இறக்குமதியாளர்கள் தீர்மானித்திருந்தனர்.
கோதுமை மாவு விலை உயர்வைக் கருத்தில் கொண்டு சிற்றுண்டிகளின் விலையை அதிகரிக்க முடிவு எடுக்கப்பட்டுள்ளதாக சங்கம் அறிவித்துள்ளது.
நாட்டில் தற்போது நடைமுறையிலுள்ள மின் தடை தொடருமான என்பது தொடர்பில் தீர்மானம் எட்டப்படவில்லை என இலங்கை பொதுப் பயன்பாடுகள் ஆணைக்குழுவின் பேச்சாளர் தெரிவித்துள்ளார்.
நுரைச்சோலை அனல் மின் உற்பத்தி நிலையத்தில் ஏற்பட்ட கோளாறு காரணமாக, நாடளாவிய ரீதியில் மூன்று நாட்களுக்கு கட்டம் கட்டமாக ஒரு மணி நேர மின் விநியோகத் தடையை நடைமுறைப்படுத்த பொதுப் பயன்பாடுகள் ஆணைக்குழு அனுமதி வழங்கியிருந்தது.
தேசிய மின் கட்டமைப்பு செயற்பாட்டு நிறுவனத்தின் கோரிக்கைக்கு அமைய இந்த அனுமதி வழங்கப்பட்டிருந்தது. இதன்படி, மாலை 4.30 மணி முதல் இரவு 9 மணி வரையான காலப்பகுதியில் இந்த மின் விநியோகத் தடை நடைமுறைப்படுத்தப்படுகிறது.
இவ்வாறான சூழலில் இந்த மின் தடை தொடருமா என்பது தொடர்பில் ஊடகமொன்றுக்கு வழங்கிய பதிலிலே அவர் இந்த விடயத்தை கூறியுள்ளார்.
இதன்போது அவர் மேலும் தெரிவிக்கையில், தற்போது நடைமுறையில் உள்ள ஒரு மணி நேர மின் விநியோகத் தடையைத் தொடர்ந்து நீடிப்பதா, இல்லையா என்பது தொடர்பில் இதுவரை எந்தத் தீர்மானமும் எடுக்கப்படவில்லை.
இது தொடர்பான கோரிக்கை தேசிய மின் கட்டமைப்பு செயற்பாட்டு நிறுவனத்தினால் இதுவரை முன்வைக்கப்படவில்லை. எனினும், அவ்வாறான கோரிக்கை முன்வைக்கப்படும் பட்சத்தில், இலங்கை பொதுப் பயன்பாடுகள் ஆணைக்குழு கூடி ஆராய்ந்து தீர்மானம் எடுக்கும் என குறிப்பிட்டுள்ளார்.
சென்னை தாம்பரம் அருகே, படப்பையில் திருமணமான4 மாதங்களேயான புதுமணப்பெண் தற்கொலை செய்துகொண்ட சம்பவம் தொடர்பாக அவரது கணவர் மணிமங்கலம் பொலிஸாரால் கைது செய்யப்பட்டுள்ளார்.
குறித்த தம்பதியினருக்கு கடந்த 4 மாதங்களுக்கு முன்பு இருவீட்டாரின் சம்மதத்துடன் காதல் திருமணம் நடைபெற்றுள்ளது. திருமணத்திற்குப் பிறகு கணவர் , தனது மனைவியின் நடத்தை மீது சந்தேகம் கொண்டு அடிக்கடி தகராறில் ஈடுபட்டு வந்ததாகக் கூறப்படுகிறது.
அடிக்கடி செல்போனை வாங்கி, யார் யாரிடம் எல்லாம் பேசியுள்ளார் என சோதனை செய்து, கடுமையான வார்த்தைகளால் பேசியதாகக் கூறப்படுகிறது. இதனால் கடும் மன உளைச்சலுக்கு ஆளான பெண் வீட்டில் யாரும் இல்லாத நேரத்தில் தூக்கிட்டு தற்கொலை செய்து கொண்டதாக தெரிவிக்கப்பட்டுள்ளது.
இந்த சம்பவம் தொடர்பாக வழக்குப்பதிவு செய்து விசாரணை மேற்கொண்ட மணிமங்கலம் பொலீசார் தற்போது பெண்ணின் கணவர் தீபக்கை கைது செய்துள்ளனர். அவர்மீது தற்கொலைக்குத் தூண்டுதல், மனரீதியான கொடுமை செய்தல் ஆகிய பிரிவுகளின் கீழ் வழக்குப் பதிவு செய்யப்பட்டுள்ளது.
ஒரு கிலோகிராம் கோதுமை மாவின் விலை நேற்று (20.10.2026) நள்ளிரவு முதல் அமுலுக்கு வரும் வகையில் 13 ரூபாவினால் அதிகரிக்கப்படவுள்ளதாக இறக்குமதியாளர்கள் தெரிவித்துள்ளனர். சந்தையில் நிலவும் நிலவரம் மற்றும் உற்பத்திச் செலவுகள் அதிகரித்துள்ளமையைக் கருத்திற் கொண்டு இந்த விலை உயர்வு மேற்கொள்ளப்பட்டுள்ளதாகத் தெரிவிக்கப்படுகிறது.
இதனைத்தொடர்ந்து இன்று (21.10) நள்ளிரவு முதல் பரோட்டா, முட்டை ரொட்டி உள்ளிட்ட சிற்றுண்டிகளின் விலை அதிகரிக்கப்படும் என அகில இலங்கை உணவக உரிமையாளர்கள் சங்கம் அறிவித்துள்ளது.
இதன்படி, பரோட்டா, முட்டை ரொட்டி உள்ளிட்ட சிற்றுண்டிகளின் விலை 5 ரூபாவினால் அதிகரிக்கப்படவுள்ளது. குறித்த விலை அதிகரிப்பு இன்று நள்ளிரவு முதல் நடைமுறைக்கு வரவுள்ளதாகச் சங்கம் குறிப்பிட்டுள்ளது.
