என் சார்ந்தும், எமது கட்சி சார்ந்து உத்தியோகபூர்வமில்லாது வெளிவந்து கொண்டிருக்கும் அனைத்து தகவல்களும் செய்திகளும் உண்மைக்குப் புறம்பானவை என ஈழமக்கள் புரட்சிகர விடுதலை முன்னனியின் செயலாளரும், வன்னிப் பாராளுமன்ற உறுப்பினருமான சிவசக்தி ஆனந்தன் தெரிவித்துள்ளார்.

இன்று ஊடகங்களுக்கு அவர் அனுப்பி வைத்துள்ள அறிக்கையிலேயே இவ்வாறு தெரிவித்துள்ளார். அதில் மேலும் தெரிவிக்கப்பட்டுள்ளதாவது,

மத்திய அரசாங்கத்தில் ஏற்பட்டுள்ள நெருக்கடியான நிலைமைகள், அங்கு முன்னெடுக்கப்பட்டுக் கொண்டிருக்கும் நடவடிக்கைகள் தொடர்பில் ஈழமக்கள் புரட்சிகர விடுதலை முன்னணி தொடர்ச்சியான கரிசணை கொண்டிருக்கின்றது.

இந்த நிலைமைகள் தொடர்பில் எமது அரசியல் உயர்பீடம் கடந்த முதலாம் திகதி அன்று கூடி எடுக்கப்பட்ட தீர்மானத்திலிருந்து எள்ளளவும் மாறவில்லை என்பதை மீண்டும் பகிரங்கமாக தெரிவித்துக்கொள்கின்றது.

என் சார்ந்தும், எமது கட்சி சார்ந்து உத்தியோகபூர்வமில்லாது வெளிவந்து கொண்டிருக்கும் அனைத்து தகவல்களும் செய்திகளும் உண்மைக்குப் புறம்பானவை என்பதை இந்த இடத்தில் சுட்டிக்காட்ட விரும்புகின்றேன்.

எம்மை மையப்படுத்தி உறுதிப்படுத்தப்படாது வெளியிடப்படும் எந்த செய்திகளுக்கும், தகவல்களுக்கும் நாம் எந்தவகையிலும் பொறுப்பாளியாக முடியாது என்பதை இத்தருணத்தில் கூறுக்கொள்கின்றோம் என அதில் தெரிவிக்கப்பட்டுள்ளது.

எதிர்வரும் நாடாளுமன்ற அமர்வின் போது தமிழ் தேசியக் கூட்டமைப்பு, ஐக்கிய தேசிய கட்சிக்கு ஆதரவு வழங்காது முடிந்தால் நடுநிலை வகித்து காட்டட்டும் என பிரதி அமைச்சர் எஸ்.வியாழேந்திரன் தெரிவித்துள்ளார்.

அவ்வாறு நடுநிலை வகித்தால் தானும் அரசாங்கத்திற்கு ஆதரவு வழங்காது நடுநிலை வகிப்பதாகவும் அவர் கூறியுள்ளார்.

கொழும்பில் இன்று இடம்பெற்ற செய்தியாளர் சந்திப்பில் கலந்துகொண்டு பேசிய அவர் இதனை கூறியுள்ளார். தொடர்ந்தும் பேசிய அவர்,

“தான் ஜனாதிபதி வழங்கிய வாக்குறுதிக்கு அமையவே அரசாங்கத்திற்கு ஆதரவு வழங்கியுள்ளேன். இதில் பிரதமர் தரப்புடன் எந்த தொடர்பும் இல்லை.

கடந்த காலங்களில் எந்தவொரு நிபந்தனைகளும் இன்றி அரசாங்கத்திற்கு தமிழ் தேசியக் கூட்டமைப்பு ஆதரவு வழங்கி வந்தது. எனினும், தமிழ் மக்களின் பிரச்சினைகள் எவையும் தீர்க்கப்படவில்லை.

இந்நிலையிலேயே, ஜனாதிபதியிடம் 11 அம்சக் கோரிக்கையினை முன்வைத்து அரசாங்கத்திற்கு ஆதரவு வழங்கியுள்ளேன்.

இதில், அரசியல் கைதிகள் விவகாரம், காணி விடுவிப்பு, வேலையற்ற பட்டதாரிகள் விவகாரம், பெண் தலைமைத்துவ குடும்பங்கள் உள்ளிட்ட பல்வேறு விடங்கள் உள்ளடங்குகின்றன.

தான் அரசாங்கத்திற்கு ஆதரவு வழங்கினாலும், பிரதமர் மகிந்த ராஜபக்சவுக்கு எதிராக முன்வைக்கப்பட்டுள்ள யுத்தக் குற்றச்சாட்டுகள் தொடர்பில் தொடர்ந்தும் குரல்கொடுப்பேன்.

தமிழ் தேசியக் கூட்டமைப்புக்குள் பல்வேறு பிரச்சினைகள் காணப்படுகின்றன. அவைகள் தீர்க்கப்படவில்லை. இந்நிலையிலேயே கூட்டமைப்பில் இருந்து வெளியேறி அரசாங்கத்திற்கு ஆதரவு வழங்கியுள்ளேன்.

தான் அரசாங்கத்திற்கு ஆதரவு வழங்கியமைக்கு கிழக்கு மாகாண தமிழ் மக்கள் ஆதரவான கருத்துக்களையும், வாழ்த்துக்களையும் கூறி வருகின்றனர்.

தனக்கு எதிராக தமிழ் தேசியக் கூட்டமைப்பு எடுக்கும் எந்தவொரு நடவடிக்கைகளையும் எதிர்கொள்ள தயாராகவே இருக்கின்றேன்.

இதேவேளை, எதிர்வரும் நாடாளுமன்ற அமர்வின் போது தமிழ் தேசியக் கூட்டமைப்பு, ஐக்கிய தேசியக் கட்சிக்கு ஆதரவு வழங்காது முடிந்தால் நடுநிலை வகித்து காட்டட்டும்.

அவ்வாறு நடுநிலை வகித்தால் தானும் அரசாங்கத்திற்கு ஆதரவு வழங்காது நடுநிலை வகிப்பதாக” அவர் மேலும் கூறியுள்ளார்.

தமிழ் தேசிய கூட்டமைப்பு தமிழ் மக்களின் எதிர்கால நலனை கருத்தில் கொண்டு செயற்பட வேண்டும் என நாடாளுமன்ற உறுப்பினர் நாமல் ராஜபக்ச குறிப்பிட்டுள்ளார்.

தனது உத்தியோகபூர் டுவிட்டர் தளத்தில் இன்றைய தினம் இட்டுள்ள பதிவில் அவர் இந்த விடயத்தை தெரிவித்துள்ளார்.

மேலும், கூட்டமைப்பில் உள்ள சில தனி மனிதர்களின் சுய நல தேவைகளுக்காக ஒட்டு மொத்த தமிழ் சமூத்தின் அடையாளமாக திகளும் தமிழ் தேசியக் கூட்டமைப்பை சிலரிடம் அடகு வைப்பது தமிழ் சமூகத்தை ஏமாளிகள் ஆக்கும் செயல் என கூறியுள்ளார்.

அத்துடன், தமிழ் மக்களின் அடிப்படை சிக்கல்களை தீர்க்கும் வகையில் பெறுமதியான கலந்துரையாடல்களை உருவாக்க எமது தரப்பு தயாராக உள்ளது.

நீண்ட நாள் கைதிகளாக உள்ள முன்னாள் போராளிகள் தொடர்பில் ஜனாதிபதி @MaithripalaS மற்றும் பிரதமர் @PresRajapaksa தொடர்ந்து கவனம் செலுத்தி விரைவில் தகுந்த முடிவை அறிவிப்பர் எனவும் அவர் தனது மற்றொரு பதிவில் சுட்டிக்காட்டியுள்ளார்.

அமைச்சு பதவியை பெற்றுக் கொள்வதை விட ஜனாதிபதி தேர்தலில் போட்டியிடுவது எனது நோக்கம் என முன்னாள் பாதுகாப்பு செயலாளர் கோத்தபாய ராஜபக்ஷ தெரிவித்துள்ளார்.

சர்வதேச ஊடகம் ஒன்றுக்கு வழங்கிய நேர்காணலில் இந்த விடயத்தை கோத்தபாய குறிப்பிட்டுள்ளார்.

உள்நாட்டு மோதல் கொழும்பையும் அதன் புறநகர்பகுதிகளையும் நாளாந்த கார்க்குண்டுகள்,தற்கொலை படை தாக்குதல்கள் மூலம் போர்க்களமாக மாற்றியிருந்தது. இதனை சர்வதேசத்தினர் புரிந்து கொள்ளவில்லை.

விடுதலைப்புலிகள் மிகப்பெரும் பகுதியை தமது கட்டுப்பாட்டின் கீழ் வைத்திருந்தனர். படையினருக்கு சமமான ஆயுதங்களை வைத்திருந்தனர்.

இலங்கையிலோ அல்லது வேறு எந்த நாட்டிலோ யுத்தம் என்பது சிறந்த விடயமில்லை அது அருவருப்பான விடயம். நாங்கள் யுத்தத்தை உருவாக்கவில்லை. மஹிந்த உருவாக்கவில்லை, மஹிந்த ராஜபக்ச அதனை முடித்து வைத்தார்.

புதிய அரசாங்கம் மீண்டும் கடன்களிற்காக சீனாவை நாடும் என தெரிவிக்கப்படுவதில் உண்மையில்லை.

நாங்கள் எந்த நாட்டிற்கும் சார்பாக நடக்கவில்லை, இலங்கையுடன் இணைந்து பணியாற்ற விரும்பும் எவருடனும் நாங்கள் இணைந்து பணியாற்ற விரும்புகின்றோம். நாங்கள் சர்வதேச அமைப்புகளுடனும் இணைந்து பணியாற்ற விரும்புகின்றோம் ஆனால் அவர்கள் நியாயமாக நடந்துகொள்வில்லை என கோத்தபாய ராஜபக்ச தெரிவித்துள்ளார்.

இதேவேளை, சிறப்பு அதிரடி படையினர் தீவிர பாதுகாப்பில் இருந்தபடியே கோத்தபாய இந்த விடங்களை குறிப்பிட்டார் என குறித்த ஊடகம் குறிப்பிட்டுள்ளது.

முக்கிய அமைச்சுகளிற்கும் பதவிகளுக்கும் குடும்ப வாரிசுகளை நியமிக்கும் பாரம்பரியத்தை கொண்ட நாட்டிற்கு இதுவொன்றும் புதிய விடயமல்ல.

ராஜபக்ச குடும்பத்தவர்கள் மீண்டும் இலங்கை அரசியலில் ஆதிக்க செலுத்துவதற்கு தயாராவதை இது புலப்படுத்துகின்றது என சர்வதேச ஊடகமான புளும்பேர்க் குறிப்பிட்டுள்ளது.

-தமிழ்வின்-

வரவு செலவுத் திட்டத்ததை சமர்ப்பிப்பதற்கு தயாராகி வருவதால் நாடாளுமன்றத்தை கூட்டுவதற்கு தாமதமாகுவதாக பிரதமர் மஹிந்த ராஜபக்ச தெரிவித்துள்ளார்.

அல்ஜெஸீரா ஊடகத்துடன் இடம்பெற்ற செவ்வியின் போதே மஹிந்த இதனை குறிப்பிட்டுள்ளார்.

தற்போது வரையிலும் நாடாளுமன்றத்தில் 113 என்ற பெரும்பான்மை கிடைத்துள்ளதாக மஹிந்த குறிப்பிட்டுள்ளார்.

அரசியலமைப்பிற்கு உட்பட்டே தனக்கான பிரதமர் நியமனம் வழங்கப்பட்டது. தான் தொடர்ந்து பிரதமராக செயற்படுவதாகவும் மஹிந்த ராஜபக்ச கூறியுள்ளார்.

கனடாவில் நடைபெற்ற அமெரிக்கன் காற்பந்தாட்ட கழக மட்டப் போட்டித் தொடரில் இலங்கைத் தமிழர்கள் சாதனை படைத்துள்ளனர்.

கல்கரி சிட்டி ஷீப்ஸ் கழகம், டிவிசன் 3 சாம்பியன் பட்டத்தை வென்றெடுத்துள்ளது. இந்த கழகத்தின் பயிற்றுவிப்பாளராக இலங்கையை பூர்வீகமாகக் கொண்ட அமோஸ் டன்ஸ்டன் கடமையாற்றி வருகின்றார்.

அமோஸின் சகோதரர் ஆரோன் டன்ஸ்டன் இந்த அணியில் முக்கிய வீரராக இடம்பெற்றுள்ளார். இந்தப் போட்டித் தொடரின் இறுதிப் போட்டியில் கல்கரி ஷீப்ஸ் கழகம் அபார வெற்றியை பதிவு செய்தது.

இந்த போட்டியில் கோல்ட்ஸ் அணியை 40 க்கு 16 என்ற புள்ளிகள் அடிப்படையில் ஷீப்ஸ் கழகம் வீழ்த்தி வெற்றி பெற்றது.

கல்கரி ஷீப்ஸ் கழகம் முதல் தடவையாக லீக் சுற்றில் பங்கேற்றிருந்துடன் சம்பியன் பட்டத்தையும் வென்றெடுத்துள்ளது.

ஷீப்ஸ் அணியில் இலங்கையை பூர்வீகமாகக் கொண்ட வர்னக்க இளந்தார்கே என்ற வீரரும் விளையாடியிருந்தார் என்பது குறிப்பிடத்தக்கது.

அரசியல் ஸ்திரமின்மை காரணமாக நாட்டில் முக்கிய பங்கு வகிக்கும் கொழும்பு பங்குச் சந்தை நேற்று சரிவு கண்டுள்ளது.

21.92 மற்றும் எஸ் அண்ட் பி குறியீட்டெண், இலங்கை ரூபா 20 இன் பெறுமதி 12.64 ஆக குறைந்துள்ளது.

பங்கு சந்தையின் அனைத்து விலை சுட்டியும் நேற்று 6,114.13 ஆக இருந்தது, 6,092 ஆக குறைவடைந்துள்ளது.

இலங்கை 20 குறியீடானது இந்த மாதத்தின் இறுதிக்குள் 3,221.07 ஆகயிருந்வை 3,208.43 ஆக வீழ்ச்சியடைந்துள்ளது.

அதேசமயம் பங்கு சந்தையின் அனைத்து விலை 0.39 சதவீதமாக இருந்தவை 0.36 ஆக குறைந்துள்ளது.

நாடாளுமன்றத்தில் தற்போதும் தன்னிடமே பெரும்பான்மை உள்ளதாக பதவி கவிழ்க்கப்பட்ட முன்னாள் பிரதமர் ரணில் விக்ரமசிங்க தெரிவித்துள்ளார்.

அல்ஜசீரா தொலைக்காட்சியில் இடம்பெற்ற செவ்வியின் போதே ரணில் இதனை குறிப்பிட்டுள்ளார்.

சட்டவிரோதமான முறையில் அமைக்கப்பட்ட அரசாங்கத்திடம் பெரும்பான்மை பலம் இல்லை. அதன் காரணமாகவே நாடாளுமன்றம் இன்னும் கூட்டப்படவில்லை என அவர் தெரிவித்தார்.

நாடாளுமன்றத்தை மீளவும் கூட்டும் வரை தான் அலரி மாளிகையை விட்டு வெளியேறப் போவதில்லை உறுதிபட ரணில் தெரிவித்துள்ளார்.

இதேவேளை பெரும்பான்மையை நிரூபிக்கக் கூடிய நிலை தனக்கு ஏற்பட்டுள்ளதாகவும், நாடாளுமன்றம் விரைவில் கூட்டப்படும் என புதிய பிரதமர் மஹிந்த ராஜபக்ஷ தெரிவித்துள்ளமை குறிப்பிடத்தக்கது.

நாடாளுமன்ற உறுப்பினர் சிவசக்தி ஆனந்தன் மீது 150 கோடி ரூபா நஸ்டஈடு கேட்டு மானநஸ்ட வழக்கை தாக்கல் செய்ய தீர்மானித்துள்ளதாக நாடாளுமன்ற உறுப்பினர் செல்வம் அடைக்கலநாதன் தெரிவித்துள்ளார்.

பிரதமர் மகிந்த ராஜபக்சவிற்கு ஆதரவு தெரிவிப்பதற்கு 150 கோடி செல்வம் அடைக்கலநாதன் பெற்றதாக நாடாளுமன்ற உறுப்பினர் சிவசக்தி ஆனந்தன் தெரிவித்துள்ள கருத்து தொடர்பாக அவரிடம் கேட்டபோதே இவ்வாறு கூறியுள்ளார்.

தொடர்ந்தும் கருத்து தெரிவித்த அவர், நேற்றைய தினம் ஊடகமொன்றிற்கு சிவசக்தி ஆனந்தன் நான் 150 கோடி பெற்றுக் கொண்டதாகவும் அது இந்தியாவிலிருந்து உறுதிப்படுத்தப்பட்டதாகவும் ஒரு செய்தியை வெளியிட்டு இருந்தார்.

இது சம்பந்தமாக அவருக்கு எதிராக நான் நீதிமன்றம் செல்ல இருக்கின்றேன். மானநஷ்ட வழக்கு போடுவதற்கான முயற்சியை நான் எனது வழக்கறிஞர்களோடு கலந்துரையாடி வருகின்றேன்.

அந்தவகையிலேயே 150 கோடி நஷ்டஈட்டை அவரிடம் கோருவதற்காக நிச்சயமாக நான் நீதிமன்றம் செய்வேன். நீதிமன்றத்திலேயே அவர் அதனை நிரூபிக்கட்டும் என்பது என்னுடைய கருத்தாக இருக்கின்றது.

மஹிந்த ராஜபக்சவை பொருத்தமட்டில் இன்று அவர் மனித உரிமை மீறல் தொடர்பில் விசாரணை செய்யப்பட வேண்டியவர். ஐ.நா தீர்மானத்தில் அவருடைய பெயரும் இருக்கிறது.

எங்களுடைய மக்கள் அவர் மீண்டும் ஆட்சியை பெறக்கூடாது என்பதில் மிகவும் ஆளுமையோடு செயற்பட்டு புதிய ஜனாதிபதியை கொண்டு வந்திருந்தார்கள். அந்த புதிய ஜனாதிபதி கூட தற்போது மாறுபட்ட கருத்துக்களை சொல்லி இருக்கின்றார்.

சமஷ்டி முறையை கொடுக்க முடியாது. வடக்கு கிழக்கை இணைக்க முடியாது. அவ்வாறு கொடுப்பதாக இருந்தால் தனது இறப்புக்குப் பிறகு தான் அதை கொடுக்க முடியும் என தெரிவித்துள்ளார்.

தமிழ் மக்களின் வாக்குகளை பெற்றுக் கொண்ட அவர் இவ்வாறு சொல்லியிருக்கின்றார்.

எங்களைப் பொறுத்தமட்டில் நாங்கள் நடுநிலை வகித்தாலும் வாக்களித்து மஹிந்த ராஜபக்சவை ஆட்சி அமைப்பதற்கான ஒரு செயலை செய்து எங்களுடைய அழிக்கப்பட்ட மக்களுடைய மற்றும் உரிமைக்காக போராடுகின்ற எங்களுடைய மக்களுக்கு துரோகம் செய்ய மாட்டோம்.

அந்த வகையில் இதுவரைக்கும் யாராவது என்மீது விரலை நீட்டி நான் மகிந்த ராஜபக்சவிடமோ ஜனாதிபதியிடமோ ரணில் விக்கிரமசிங்கவிடமோ பணத்தை பெற்றிருப்பதாக உறுதிப்படுத்தினால் சிறப்பாக இருக்கும்.

அதனைவிடுத்து வதந்திகளை பரப்பி மக்களை திசை திருப்ப கூடாது. அந்த வகையிலே மனசாட்சிக்கும் மக்களுக்கும் என்னைப் பொறுத்தமட்டில் நான் செயலாற்றி வருகிறேன்.

இந்த விடயத்திலே அரசாங்கத்திற்கு சோரம் போகின்ற என்னுடைய செயற்பாடு ஒரு போதும் இருந்ததில்லை.

இந்தவகையிலே சிவசக்தி ஆனந்தன் மீது மானநஷ்ட வழக்கு நிச்சயமாக தொடர்வேன். அந்த நீதிமன்றத்தில் நிரூபிக்க வேண்டும் நான் மஹிந்த ராஜபக்சவிடம் 150 கோடி வேண்டியதாக தெரிவித்ததை.

கூட்டமைப்பை பொறுத்த வரையும் யாரும் அரசாங்கத்திற்கு சோரம் போகவில்லை. வியாழேந்திரன் மக்களுக்கு துரோகம் செய்திருக்கிறார். அவருடைய சுயநலம் காரணமாக அவர் செயல்பட்டிருக்கிறார்.

இந்த விடயத்திலே எங்களைப் பொறுத்தவரைக்கும் மஹிந்த வந்தால் என்ன ரணில் தான் இருந்தாலும் என்ன என்பதை விட ஜனநாயகம் மறுக்கப்பட்டு வருகின்றது. அதனை காப்பதற்கு நாங்கள் செயல்பட்டாக வேண்டும்.

இன்று ஜனாதிபதி தவறான ஒரு முடிவை எடுத்திருக்கிறார். அந்த வகையில் வியாழேந்திரன் அதனை அனுபவிப்பார். ஏனெனில் பதவி என்பது ஒரு குறிப்பிட்ட காலத்திற்கு தான் இருக்கப் போகின்றது.

இன்று இருக்கின்ற நிலவரப்படி பார்க்கின்றபோது ஜனநாயக முறையை தவறாக பயன்படுத்தியதாக அதற்கு எதிராக செய்யப்படுவதற்கான வாய்ப்புகள் அதிகமாக இருக்கிறது.

அந்த வகையில் வியாழேந்திரன் கிழக்கு மாகாண மக்களுக்கு துரோகமான செயலை செய்திருக்கிறார். கட்சி அவருக்கு எதிராக நிச்சயமாக நடவடிக்கை எடுக்கும். அந்த வகையில் அவர் செயற்பட்டது மிகவும் தவறானது மிக ஆக்ரோசமாக பேசிய ஒரு நபர் இன்று அந்த மக்களை ஏமாற்றியிருக்கின்றார்.

எனவே அவரை உடனடியாக கட்சியில் இருந்து நீக்க வேண்டும் என்ற தீர்மானத்தை நாங்கள் அதாவது தமிழ் தேசியக் கூட்டமைப்பு கொண்டுவர இருக்கின்றோம்.

தமிழ் தேசிய கூட்டமைப்பை பொறுத்த வரையும் இனி வரும் கட்சி மாறி செல்லமாட்டார்கள். வதந்தியை பரப்புபவர்களுக்கு ஒரு விடயத்தை சொல்லிக்கொள்ள விரும்புகிறேன்.

தமிழ் தேசிய கூட்டமைப்பினை சேர்ந்தவர்கள் யாரும் மகிந்த ராஜபக்சவின் அணியில் சேருவதற்கான வாய்ப்புகள் இல்லை என்பதை உறுதியாகச் சொல்லிக் கொள்ள விரும்புகிறேன்.

வியாழேந்திரனை தவிர எவரும் அங்கு செல்ல மாட்டார்கள். ஆகவே வதந்திகளை பரப்ப வேண்டாம் என்பதையும் கேட்டுக்கொள்கிறேன். இவ்வாறு வதந்தியை பரப்புவது அபகீர்த்தியை ஏற்படுத்துவதாகவே அமையும் என மேலும் தெரிவித்துள்ளார்.