வவுனியா ஈச்சங்குளம் பொலிஸ் பிரிவிற்குட்பட்ட பூம்புகார் கிராமத்தை சேர்ந்த சிறுவன் ஒருவன் நீரில் மூழ்கி மரணமான சம்பவம் அக் கிராமத்தையே சோகமயமாக்கியுள்ளது.

வவுனியா பூம்புகார் கண்ணகி வித்தியாலயத்தில் கல்வி பயிலும் தேவகுமார் அனோசன் என்ற 14 வயது சிறுவன் நேற்று மாலை 5 மணியளவில் தனது வீட்டிற்கு அருகில் உள்ள மூன்றுமுறிப்பு குளத்திற்கு சென்ற போது தவறுதலாக நீரில் வீழ்ந்து மூழ்கி மரணமானார்.

கூக்குரல் கேட்டதையடுத்து அவ்விடத்திற்கு விரைந்தவர்களால் காப்பாற்ற முயற்சி செய்தும் பலன் கிடைக்கவில்லை. குளத்திலிருந்து எடுக்கப்பட்ட சிறுவனின் சடலம் பிரேத பரிசோதனைக்காக வைத்தியசாலையில் வைக்கப்பட்டுள்ளது.

சம்பவம் தொடர்பான மேலதிக விசாரணைகளை பொலிசார் மேற்கொண்டு வருகின்றனர்.

வவுனியா நகரசபையின் அனுமதியின்றி வவுனியாவில் பல்வேறு இடங்களில் சர்கார் திரைப்படத்திற்கான முற்பதிவு டிக்கட்டுக்கள் விற்பனைகள் இடம்பெற்று வருகின்றன. டிக்கட்டுகளின் பின்புறத்தில் இளையதளபதி விஜய் நற்பணி மன்றம் வவுனியா எனவும் சின்னம் பொறிக்கப்பட்டுள்ளது.

இது தொடர்பாக வவுனியா விஜய் நற்பணி மன்றத்தின் தலைவரை தொடர்பு கொண்டு வினவியபோது,

எமது சங்கத்தின் கூட்டத்தில் எடுக்கப்பட்ட தீர்மானத்திற்கு அமைவாகவே நாங்கள் முற்பதிவு டிக்கட் விற்பனை செய்ய முடிவேடுத்துள்ளோம் .

முற்பதிவு டிக்கட்க்கு நகரசபைக்கு வரி செலுத்த தேவையில்லை. நாங்கள் விற்பனை செய்யும் டிக்கட்டுகளை வசந்தி திரையரங்குச் செல்லும்போது வழங்கினால் அங்கு வவுனியா நகரசபைக்கு வரி செலுத்தப்பட்ட (டிக்கட்டின் பின்பகுதியில் நகரசபையின் சின்னம் பொறிக்கப்பட்ட) டிக்கட் வழங்கப்படுமென தெரிவித்தார்.

இவ் விடயம் தொடர்பாக வவுனியா நகரசபையின் தலைவர் இராசலிங்கம் கௌதமனை தொடர்புகொண்டு கேட்டபோது,

வவுனியா நகரசபைக்குட்பட்ட பகுதியில் எந்தவொரு டிக்கட் விற்பனை செய்வதாகவிருந்தாலும் வவுனியா நகரசபைக்கு வரி செலுத்தப்பட்டு நகரசபையின் சின்னம் டிக்கட்டின் பின்பகுதியில் பொறிக்கப்பட வேண்டும் (முற்பதிவு டிக்கட் என்றாலும் வரி செலுத்துதல் வேண்டும்)

மற்றும் வவுனியா வசந்தி திரையரங்கிற்கு முன்பாக அமைந்துள்ள சர்கார் திரைப்படத்திற்கான பதாதைகளுக்கும் எவ்வித கட்டணங்களும் நகரசபைக்கு செலுத்தப்படவில்லை.

இவ் விடயம் தொடர்பாக எனக்கும் பல முறைப்பாடுகள் கிடைக்கப்பெற்றுள்ளன. முறைப்பாடுகள் தொடர்பாக விரைவாக கடும் நடவடிக்கை மேற்கொள்ளவுள்ளதாக தெரிவித்தார்.

வவுனியா இரண்டாம் குறுக்குத்தெரு வீதியில் இன்று (19.10.2018) மாலை 6.30 மணியளவில் இடம்பெற்ற வாகன விபத்தில் மூவர் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

வவுனியாவிலிருந்து இரண்டாம் குறுக்குத்தெரு வீதியூடாக பயணித்த வான் மீது நெல்லி ஸ்டார் ஹோட்டலுக்கு அருகே நாற்சந்தியில் சூசைப்பிள்ளையார் குளம் வீதியிலிருந்து வந்த முச்சக்கரவண்டி மோதி விபத்துக்குள்ளாளது.

இவ் விபத்தில் முச்சக்கரவண்டியில் பயணித்த மூவர் காயமடைந்த நிலையில் வவுனியா மாவட்ட பொது வைத்தியசாலையில் அனுமதிக்கப்பட்டுள்ளதாக சம்பவத்தினை நேரில் பார்த்த பொதுமக்கள் தெரிவித்தனர்.

சம்பவ இடத்திற்கு விரைந்த வவுனியா போக்குவரத்து பொலிஸார் மேலதிக விசாரணைகளை மேற்கொண்டு வருகின்றனர்.

வவுனியா பொது வைத்தியசாலை சுகாதாரத்துறை தொழிற்சங்கம் ஒன்றிணைந்து இன்று மதியம் 12 மணியிலிருந்து 1மணிவரையான மதிய நேர இடைவேளையின் போது கவனயீர்ப்புப் போராட்டம் ஒன்றினை மேற்கொண்டுள்ளனர். இது குறித்து வைத்தியசாலையின் தொழிற்சங்கத்தினர் தெரிவிக்கும்போது,

நிலுவையிலுள்ள அனைத்துக் கொடுப்பனவுகளையும் உடனே வழங்குமாறு கோரி வவுனியா பொது வைத்தியசாலையில் பணிபுரிகின்ற அனைத்து சுகாதார சேவைகள் பணியாளர்கள் இணைந்து ஒரு எதிர்ப்பு நடவடிக்கையினை மேற்கொண்டுள்ளார்கள்.

எங்களுடைய உணவு இடைவேளையின் போது நோயாளர்களின் மருத்துவத்திற்கு எவ்வித பாதிப்புக்களும் இன்றி இந்தப் போராட்டத்தினை முன்னெடுத்துள்ளோம்.

கடந்த மூன்று வருடங்களாக வருட இறுதியின்போது எங்களுடைய மேலதிக நேரக்கொடுப்பனவுகளும் ஏனைய கொடுப்பனவுகளும் சிலவேளை இடை நிறுத்தப்படுகின்ற ஒரு நடவடிக்கை இடம்பெற்று வருகின்றது.

மாகாணசபைக்கு ஒதுக்கப்படுகின்ற நிதி போதாது என்பதை ஒரு காரணமாக வைத்து இச்சம்பவம் இடம்பெற்று வருகின்றது. வடமாகாணத்தில் மட்டும் தான் இவ்வாறான பிரச்சினைகள் நிலவுகின்றது.

ஏனைய மாகாணங்களில் பெரும்பாலும் கொடுப்பனவுகள் உரிய முறையில் வழங்கப்பட்டுக்கொண்டிருக்கின்றது. ஒவ்வொரு வருடமும் இந்தப்பிரச்சினைகள் வருகின்றபோதும் இது வராமல் தடுப்பதற்கான எவ்வித பொறிமுறைகளும் இதுவரைக்கும் ஏற்படுத்தப்பட்டதாகத் தெரியவில்லை.

எனவே முன்கூட்டியே திட்டமிடுகின்றபோது இதனைத்தடுத்திருக்க முடியும். மூன்றாவது வருடமும் இதனை நாங்கள் எதிர்கொள்கின்றபோதும் இனிவரும் காலங்களில் இவ்வாறான பிரச்சினைகள் வரக்கூடாது அதற்குரிய முன்கூட்டி திட்டமிடும் நடவடிக்கைகளை அதிகாரிகள் உடனடியாக மேற்கொள்ளவேண்டும் என்பதை வலியுறுத்தியும் எதிர்வரும் 25ஆம் திகதிக்கு முன்னதாக நிலுவையிலுள்ள அனைத்துக்
கொடுப்பனவுகளும் உடனே வழங்கவேண்டும் என்று கோரியும் இன்றைய எதிர்ப்பு நடவடிக்கையினை மேற்கொண்டுள்ளோம்.

வடமாகாணத்தில் வைத்தியர்களுக்கு வைத்திய நிபுனர்களுக்கும் பாரிய பற்றாக்குறை ஒன்று நிலவி வருகின்றது. இப்பகுதிக்கு எவரும் கடமைக்கு வருவதற்கு விருப்பம் தெரிவிக்கவில்லை. எனவே அப்பிரச்சினை இவ்வாறான நடவடிக்கைகள் மூலம் மேலும் மேலும் தீவிரமடையும்.

இதனைக்கருத்திற்கொண்டு உடனடியாக இதற்கு நடவடிக்கை மேற்கொள்ள வலியுறுத்தியும் எதிர்காலத்தில் எங்களுடைய கொடுப்பனவுகளை கிரமமின்றி வழங்கி வைத்தியர்கள், வைத்திய தாதிகள் மருந்தகர்கள், ஆய்வுகூட தொழிநுட்பவியலாளர்கள், ஏனைய அனைத்து சுகாதார சேவைகள் தொழிற்சங்கம் இணைந்து இந்நடவடிக்கையில் ஈடுபட்டுள்ளனர்.

25ஆம் திகதிக்கு முன்னர் எமது கொடுப்பனவுகள் வழங்கப்படாவிட்டால் வேலை நிறுத்தப் போராட்டம் ஒன்றினை மேற்கொள்வுள்ளோம் என்பதை முன்கூட்டியே தெரிவித்து இதன் மூலம் நோயாளர்களுக்கு ஏற்படுகின்ற அசௌகரியங்களுக்கு மன்னிப்பைக் கோருகின்றோம் என்று மேலும் தெரிவித்துள்ளனர்.

அத்துடன் ஆர்ப்பாட்டத்தில் ஈடுபட்டவர்கள் எதிர்ப்பு சுலோகங்களைத் தாங்கியவாறு போராட்டத்தில் கலந்துகொண்டனர்.