வவுனியா நகரசபை கலாச்சார மண்டபத்தில் இன்று (18.10) காலை 9.30 மணியளவில் வவுனியா பிரதேச செயலகம், இறம்பைக்குளம் ஈஷி மிஷன் பூரண சுவிஷேச சபை இணைந்து ஏற்பாடு செய்த உலக உளநல தினத்தை முன்னிட்டு இலவச கருத்தரங்கு ஒன்று இடம்பெற்றது.

இந்நிகழ்வில் வவுனியா பிரதேச செயாளர் கா.உதயராசா, வவுனியா சிரேஷ்ட பொலிஸ் அத்தியட்சகர் ரி.எஸ்.எம்.என்.தென்னக்கோன், உதவி பொலிஸ் அத்தியட்சகர், வவுனியா தலைமை பொலிஸ் நிலையப் பொறுப்பதிகாரி, இறம்பைக்குளம் ஈஷி மிஷன் பூரண சுவிஷேச சபையின் பிரதான பிஷப் பி.என்.இராஜசிங்கம்,

வவுனியா வைத்தியசாலையின் உளநலப்பிரிவு வைத்தியர் யுராஜ், வவுனியா வைத்தியசாலையின் சிரேஷ்ட உளநலப்பிரிவு வைத்தியர் சுதாகரன், வவுனியா தெற்கு தமிழ் பிரதேச சபைத்தலைர், வவுனியா நெடுங்கேணி பிரதேச சபைத்தலைவர், உறுப்பினர்கள், கிராம அலுவலர்கள், சமுர்த்தி உத்தியோகத்தர்கள், சமூக ஆர்வலர்கள், பொதுமக்கள் எனப்பலரும் கலந்துகொண்டனர்.

வவுனியாவில் முதற்தடவையான ஆரம்பிக்கப்பட்ட நிகழ்வுகளின் அடிப்படையில் பாடசாலைகள், கிராமங்கள் என தொடர்ந்து இவ்விழிப்புணர்வுக் கருத்தரங்குகள் தொடர்ந்து இடம்பெறவுள்ளது.

உளநல வைத்தியர்களின் ஆலோசனைகள், சிறப்புக் கருத்தரங்கு இடம்பெற்றதுடன் தற்கொலை தொடர்பான விழிப்புணர்வுகள், ஆலோசனைகளும் வழங்கப்பட்டவுள்ளன.

வவுனியாவில் சின்னக்குளம், நேரியகுளம் பகுதியில் நேற்றைய தினம் (17.10) துப்பாக்கி ரவையுடன் ஒருவர் கைது செய்யப்பட்டுள்ளார்.

நேற்று இரவு 10 மணியளவில் கஞ்சா வியாபாரம் செய்வதாக பொலிஸாருக்கு கிடைத்த இரகசிய தகவலின் அடிப்படையில் சின்னக்குளம் நேரியகுளம் பகுதியிலுள்ள வீட்டிற்கு சென்ற செட்டிக்குளம் பொலிசார் வீட்டினை சோதனை செய்த போது கிணற்றின் அருகே இருந்து T56 துப்பாக்கி ரவைகள் 22 வைத்திருந்ததன் குற்றச்சாட்டில் 52 வயது நபரை கைது செய்துள்ளனர்.

குறித்த நபர் குறிப்பிடுகையில் தான் மீன் பிடிக்க குளத்திற்கு சென்ற போது குளக்கரையில் பொதி செய்யப்பட்ட நிலையில் ரவைகள் காணப்பட்டதாகவும், அதனை தான் எடுத்து வந்து வீட்டு கிணற்றருகே வைத்ததாகவும் ஆரம்பகட்ட விசாரணைகளிலிருந்து தெரிய வருவதாக செட்டிகுளம் பொலிசார் தெரிவித்தனர்.

இது தொடர்பான மேலதிக விசாரணைகளை பொலிசார் மேற்கொண்டு வருகின்றனர். விசாரணைகளின் பின்னர் நீதிமன்றத்தில் முற்படுத்தவுள்ளதாக மேலும் தெரிவித்தனர்.

வவுனியா புளியங்குளம் பகுதியில் இன்று(18.10) காலை 4.45 மணியளவில் இடம்பெற்ற விபத்தில் ஒருவர் பலியாகியதுடன் மூவர் படுகாயமடைந்துள்ளனர். குறித்த விபத்து சம்பவம் தொடர்பாக தெரியவருகையில்,

கொழும்பில் இருந்து யாழ்ப்பாணம் நோக்கி தண்ணீர் ஏற்றிச்சென்ற குளிரூட்டப்பட்ட ஹென்டர் ரக வாகனமும் ஹெக்கிராவையில் இருந்து மல்லாவி நோக்கி நெல்லு வெட்டும் இயந்திரத்தை ஏற்றிசென்ற உழவியந்திரமும் மோதியதிலேயே இவ் விபத்து இடம்பெற்றுள்ளது.

புளியங்குளம் எரிபொருள்நிரப்பு நிலையத்திற்கு அண்மையில் நெல்லு வெட்டும் இயந்திரத்தை ஏற்றிய உழவியந்திரம் தரித்து நின்ற சயமத்தில் கொழும்பில் இருந்து வந்த தண்ணீர் ஏற்றி வந்த குளிரூட்டப்பட்ட ஹென்டர் ரக வாகனம் மோதியதிலே குறித்த விபத்து இடம்பெற்றிருப்பதாக ஆரம்ப கட்ட விசாரணையில் தெரிய வருவதாக பொலிஸார் தெரிவித்தனர்.

விபத்தில் தண்ணீர் போத்தல்கள் ஏற்றி சென்ற வாகனத்தில் பயணம்செய்த யாழ்பாணத்தை சேர்ந்த மரியதாஸ் நிறோசன் மரணமடைந்துள்ளதுடன், செ.அஜந்தன் என்பவரின் கை ஒன்று துண்டிக்கபட்டுள்ளது.

உழவியந்திரத்தில் இருந்த இளைஞன் படுகாயமடைந்ததுடன் இன்றுமொருவர் சிறு காயங்களிற்கு உள்ளாகியுள்ளார். விபத்து தொடர்பான மேலதிக விசாரணைகளை புளியங்குளம் பொலிசார் மேற்கொண்டு வருகின்றனர்.

வவுனியா வடக்கு பிரதேச செயலகத்திற்குட்பட்ட காஞ்சிரமோட்டை கிராமம் மற்றும் வெடுக்குநாறி மலைப்பகுதிகளுக்கு வட மாகாணசபை அவைத்ததலைவர் சி.வி.கே. சிவஞானம் தலைமையிலான 12 மாகாணசபை உறுப்பினர்கள் அடங்கிய குழு நேற்று (17.10) விஜயம் செய்துள்ளனர்.

வவுனியா வடக்கில் பழைய கிராமமான காஞ்சிரமாட்டை கிராமத்தில் வாழ்ந்த சுமார் 300 குடும்பத்தினர் யுத்தம் காரணமாக அங்கிருந்து இடம்பெயர்ந்து இந்தியாவிற்கும் நாட்டின் பல இடங்களுக்கும் இடம்பெயர்ந்திருந்தனர்.

இந் நிலையில் 2011 ஆம் ஆண்டுகளுக்கு பின் நாடு திரும்பிய இம் மக்களுடன் உள் நாட்டில் இடம்பெயர்ந்த மக்களுமாக உறவினர்கள் வீடுகளில் தங்கியிருந்து கடந்த 5 மாதங்களுக்கு முன் காஞ்சிரமோட்டை கிராமத்தில் குடியேற்றப்பட்டனர்.

எனினும் அவர்கள் அங்கு வாழ்வதற்கு வன இலாகாவினர் அனுமதி மறுத்து வந்திருந்ததுடன் குறித்த பகுதி வன வளத்திணைக்களத்திற்குரிய பகுதி என தெரிவித்து குடியேறிய மக்களுக்கு தொடர்ச்சியாக இடையூறுகளை ஏற்படுத்தி வந்திருந்தனர். இதன் காரணமாக அம் மக்களுக்கு தேசிய வீடமைப்பு அதிகாரசபையால் வழங்கப்பட்ட வீட்டுத்திட்டங்களும் நிறுத்தி வைக்கப்பட்டுள்ளது.

இந் நிலையில் வட மாகாணசபையின் கவனத்திற்கு மாகாணசபை உறுப்பினர் ஜி.ரி.லிங்கநாதன் கொண்டு வந்ததை அடுத்து வடமாகாண சபையின் அவைத்தலைவர் சி.வி.கே.சிவஞானம் தலைமையில் வடக்கு விவசாய அமைச்சர் க.சிவநேசன், உறுப்பினர்களான சபா. குகதாஸ், எம்.கே.சிவாஜிலிங்கம், இ.ஜெயசேகரன், அ.பரஞ்சோதி, ப.அரியரட்ணம், கே.தர்மலிங்கம், வ.கமலேஸ்வரன், ஆ.புவனேஸ்வரன், து.ரவிகரன், சு.பசுபதிப்பிள்ளை ஆகிய 12 மாகாணசபை உறுப்பினர்கள் அடங்கிய குழு குறித்த பகுதிக்கு வருகை தந்து மக்களுடன் கலந்துரையாடி நிலைமைகளை பார்வையிட்டிருந்தனர்.

இதன்போது அப்பகுதியில் இடிந்து போயுள்ள நாவலர் பண்ணை அரசினர் கலவன் பாடசாலையினையும் பார்வையிட்டிருந்ததுடன் அதனை மீள் இயக்குவதற்கான நடவடிக்கைகளையும் எடுப்பது தொடர்பாகவும் மாகாணசபை உறுப்பினர்கள் முடிவெடுத்திருந்தனர்.

இதன்போது கருத்து தெரிவித்திருந்த அவைத்தலைவர் சி.வி.கே.சிவஞானம், குறித்த பகுதியில் மக்கள் வாழ்ந்ததற்கான பல அடையாளங்கள் உள்ளது. எனினும் வன வளத்திணைக்களம் மக்களை அங்கு குடியேற தடை விதித்து வருகின்றனர்.

இது தொடர்பாக ஜனாதிபதியும் பிரதமரும் கவனம் செலுத்தி இந்தியாவில் இருந்து வந்த மக்களின் நலனில் அக்கறை காட்ட வேண்டும். அத்துடன் இவ்விடயம் தொடர்பாக இந்தியாவின் கவனத்திற்கும் கொண்டு செல்வோம் என தெரிவித்தார்.

வவுனியாவில் திருவள்ளுவர் சிலை திரைநீக்கம் செய்யும் நிகழ்வும், தெற்கு வலயக்கல்விப் பணிப்பாளரை கௌரவிக்கும் நிகழ்வும் இன்று (17.10) இலங்கை திருச்சபை கலவன் பாடசாலையில் அதிபர் இ.நவரட்ணம் தலைமையில் இடம்பெற்றது.

வவுனியா குடியிருப்பில் அமைந்துள்ள இலங்கை திருச்சபை கலவன் பாடசாலையில் நிர்மாணிக்கப்பட்ட திருவள்ளுவர் சிலை தெற்கு வலயக்கல்வி பணிப்பாளர் முத்து ராதாகிருஸ்ணனால் திறந்து வைக்கப்பட்டது.

அத்துடன் தெற்கு வலயக்கல்வி பணிப்பாளர் முத்து ராதாகிருஸ்ணன் துறைசார் ரீதியாக பதவி உயர்வு பெற்றுள்ளமையால் அவரை கௌரவிக்கும் முகமாக பாடசாலை அதிபர் மற்றும் ஆசிரியர்களால் மாலை அணிவத்து பொன்னாடை போர்த்தி பாண்டுவாத்தியங்கள் முழங்க பாடசாலைக்கு அழைத்து வரப்பட்டார்.

அதனைத் தொடர்ந்து தெற்கு வலயக்கல்வி பணிப்பாளரால் பாடசாலை வளாகத்தில் நிர்மாணிக்கப்பட்ட திருவள்ளுவர் சிலை திரை நீக்கம் செய்து வைக்கப்பட்டது.

நிகழ்வில் கலந்துகொண்டு உரையாற்றிய தெற்கு வலயக்கல்வி பணிப்பாளர் முத்து ராதாகிருஸ்ணன் நடைபெறவுள்ள க.பொ.த சாதாரணதரப் பரீட்சையில் மாணவர்கள் மனவிருப்பதுடன் ஆசிரியர்களின் பங்களிப்புடன் கல்விகற்றால் நிச்சயமாக அதிகூடிய பெறுபேறுகளை பெற முடியும். ஆகவே இந்த சந்தர்ப்பத்தை ஆசிரியர்களும் மாணவர்களும் சரியாக பயன்படுத்த வேண்டும் என தெரிவித்தார்.

வவுனியா மாவட்டத்தில் 8,583 பேர் வறட்சியால் பாதிக்கப்பட்டுள்ளதாக அனர்த்த முகாமைத்துவ பிரிவு தகவல் வெளியிடப்பட்டுள்ளது.

வவுனியா மாவட்டத்திலுள்ள நான்கு பிரதேச செயலகப்பிரிவுகளிலும் 2370 குடும்பங்களைச் சேர்ந்த 8583 பேரே பாதிக்கப்பட்டுள்ளதாக வவுனியா மாவட்ட அனர்த்த முகாமைத்துவ பிரிவு தெரிவித்துள்ளது.

தகவல் அறியும் சட்டத்தினூடாக கேட்கப்பட்ட தகவல்களுக்கு வழங்கப்பட்ட பதிலில் மேலும் தெரிவிக்கப்பட்டுள்ளதாவது,

வறட்சி நிவராண செயற்பாடுகள் 2018 வவுனியா மாவட்டத்திலுள்ள செட்டிகுளம், நெடுங்கேணி, வவுனியா தெற்கு, வவுனியா ஆகிய நான்கு பிரதேச செயலகப்பிரிவுகளிலும், புரட்டாசி மாதம் வரை வறட்சியினால் பாதிக்கப்பட்டு குடிநீர் தட்டுப்பாட்டை எதிர்நோக்கியுள்ள 2370 குடும்பங்களை சேர்ந்த 8583 பேருக்கு ஏப்ரல் மாதத்திலிருந்து புரட்டாசி மாதம் வரையான காலப்பகுதிகளில் குடிநீர் விநியோகிக்கப்பட்டுள்ளது.

இக்குடிநீர் விநியோகத்திற்காக 1.742 மில்லியன் ஒதுக்கீட்டினை தேசிய அனர்த்த நிவாரண சேவைகள் நிலையம் வழங்கியுள்ளதுடன் புரட்டாசி மாதம் வரை அதற்கான மொத்த செலவீனம் 616.774.7 மில்லியனாக காணப்படுகின்றது.

மேலும் வறட்சி உலர் உணவு நிவாரணம் முதலாம் கட்டம், வறட்சியினால் பாதிக்கப்பட்ட விவசாய கூலியாட்கள் மற்றும் மேட்டு நில பயிர்ச் செய்கையாளர்களுக்கான நிவாரண உதவிகள் இரண்டாம் கட்டம், வறட்சியினால் பாதிக்கப்பட்டு குடிநீர் விநியோகம் நடைபெறும் பிரதேசங்களில் காணப்படும் பொதுக்கிணறுகள் ஆழப்படுத்தல் நடவடிக்கை மேற்கொள்ளப்பட்டுள்ளதாகவும் மேலும் தெரிவிக்கப்பட்டுள்ளது.