இந்திய தலைநகர் டெல்லியில் 19 வயது இளைஞர் தனது தாய், தந்தை உள்ளிட்ட மொத்த குடும்பத்தையும் கொன்று தள்ளிய சம்பவத்தின் பின்னணித் தகவல் வெளியாகியுள்ளது. குறித்த வழக்கில் தீவிர விசாரணை மேற்கொண்ட பொலிசார் சூரஜ் வர்ம என்ற 19 வயது இளைஞரை கைது செய்துள்ளனர்.

டெல்லியின் வசந்த்கஞ்ச் பகுதியில் புதன் அன்று காலை 5 மணியளவில் தேசத்தையே நடுங்க வைத்த இச்சம்பவம் வெளியானது.

காலையில் குடியிருப்புக்கு வந்த பணியாளரே சடலங்களை முதலில் பார்த்துள்ளார். உடனடியாக பொலிசாருக்கு தகவல் தரவும், சம்பவப்பகுதிக்கு விரைந்து வந்த பொலிசார் விசாரணையை துரிதப்படுத்தியுள்ளனர்.

இந்த கொலை விவகாரத்தில் உயிர் தப்பிய சூரஜ்ஜிடம் பொலிசார் மேற்கொண்ட முதற்கட்ட விசாரணையில், கொள்ளை சம்பவத்திற்கு இடையே கொலை நடந்திருக்கலாம் என தெரிவித்துள்ளார். ஆனால் எந்த பொருளும் கொள்ளை போகாத நிலையில் சூரஜ்ஜின் வாக்குமூலம் பொலிசாருக்கு சந்தேகத்தை எழுப்பியுள்ளது.

மட்டுமின்றி குடும்பத்தில் உள்ள மூவரும் கொல்லப்பட்ட நிலையில் மகன் மட்டும் தப்பியதன் உண்மை காரணம் குறித்து தெளிவான பதிலை விசாரணை அதிகாரிகளுக்கு தெரிவிக்க சூரஜ் தவறியதாக கூறப்படுகிறது.

இதனையடுத்து சூரஜ்ஜை கைது செய்த பொலிசார், மீண்டும் விசாரித்துள்ளனர். இதில் திடுக்கிடும் தகவலை சூரஜ் வெளியிட்டுள்ளார்.

தமது பெற்றோர் எப்போதும் கல்வியில் கவனம் செலுத்த நிர்பந்தித்ததாகவும், நண்பர்களுடன் ஊர்சுற்ற அனுமதிப்பது இல்லை எனவும் சூரஜ் விசாரணை அதிகாரிகளிடம் தெரிவித்துள்ளார்.

கொலை நடந்த அன்று தந்தை மிதிலேஷ் தம்மை கடுமையாக தாக்கியதாகவும், கோபமாக திட்டியதாகவும் அவர் தெரிவித்துள்ளார்.

இதில் மனமுடைந்த சூரஜ் மொத்த குடும்பத்தையும் கொலை செய்ய திட்டமிட்டுள்ளார். இதனையடுத்து கடையில் சென்று கத்தி ஒன்றை வாங்கிய சூரஜ், அதிகாலை 3 மணியளவில் பெற்றோர் படுத்திருக்கும் அறைக்கு சென்று முதலில் தந்தையை கொடூரமாக கத்தியால் தாக்கி கொலை செய்துள்ளார்.

மிதிலேஷின் அலறல் கேட்டு கண் விழித்த தாயார் சியாவையும், பின்னர் சகோதரி நேஹாவையும் கொலை செய்துள்ளார். காலை 5 மணியளவில் குடியிருப்புக்கு வந்த பணியாளரிடம், கொள்ளை சம்பவத்தினிடையே பெற்றோர் கொல்லப்பட்டுள்ளதாக நம்ப வைத்துள்ளார்.

இதனிடையே கொலைக்கு பயன்படுத்திய கத்தியில் சூரஜ்ஜின் விரல் அடையாளம் பதிந்துள்ளதையும் பொலிசார் கண்டுபிடித்துள்ளனர். மேலும், கொலைக்கு பின்னர் ரத்தக்கறைகளை கழுவியதும் விசாரணையில் தெரியவந்துள்ளது.

திருவாரூரில் வரதட்சணை கேட்டு மனைவி குழந்தையை அரிவாளால் வெட்டி, மண்ணெண்ணெய் ஊற்றி எரிக்க முயன்ற கணவனை பொலிஸார் தீவிரமாக தேடி வருகின்றனர்.

திருவாரூர் மாவட்டம் வாசன் நகரில் வசித்து வருபவர் கிஷோர்ராஜா. இவர் கடந்த 2016-ம் ஆண்டு மன்னார்குடி பைங்காநாடு ஜெயநந்தினி என்பவரை திருமணம் செய்துகொண்டார். இந்த தம்பதியினருக்கு இரண்டு வயதில் ஆண் குழந்தை ஒன்று உள்ளது.

காட்டூரில் கார் பரிசோதனை மையம் நடத்தி வரும் கிசோர் தன்னுடைய தொழிலை விரிவுபடுத்துவதற்காக ஜெயநந்தினியிடம் ரூ.20 லட்சம் பணம் கேட்டுள்ளார். பணம் பெறுவதற்காக நந்தினியும் தன்னுடைய தாய் வீட்டிற்கு சென்றுவிட்டு நேற்றைய தினம் வீடு திரும்பியுள்ளார்.

அப்போது கிஷோர், மாமியார், மாமனார், நாத்தனார் ஆகியோர் நந்தினியிடம் பணம் கேட்டுள்ளனர். தற்போது பணம் இல்லை என நந்தினி கூற, ஆத்திரமடைந்த கிசோர் அரிவாளால் நந்தினியை வெட்டியுள்ளார். இதனையடுத்து உடனடியாக நந்தினி மற்றும் அவருடைய குழந்தையின் மீது மண்ணெண்னையை ஊற்றிய மாமியாரும், நாத்தனாரும் இருவரையும் எரித்து கொலை செய்ய முயற்சித்துள்ளார்.

உடனே கூச்சலிட்டு அக்கம்பக்கத்தினரின் உதவியுடன் அங்கிருந்து தப்பித்த நந்தினி அரசு மருத்துவமனையில் அனுமதிக்கப்பட்டார். இதற்கிடையில் சம்பவம் அறிந்த வந்த பொலிஸார் வழக்கு பதிவு செய்து, தலைமறைவான கிசோர் மற்றும் அவருடைய குடும்பத்தாரை தீவிரமாக தேடி வருகின்றனர்.

ராமநாதபுரம் மாவட்டத்தை சேர்ந்த நளாயினி என்பவருக்கு, ஆனந்த பிரகாஷ் என்பவருடன் கடந்த 2016 ஆம் ஆண்டு திருமணம் நடந்துள்ளது.

திருமணமான 21 ஆவது நாளில், சவுதி அரேபியாவுக்கு ஆனந்த பிரகாஷ் சென்று விட்டார். தற்போது, தனது மனைவியை சவுதிக்கு அழைத்து செல்வதற்கான ஏற்பாடுகளை ஆனந்த பிரகாஷ் செய்து வந்துள்ளார். விமான டிக்கெட்டை அவர் அனுப்பிய நிலையில் கடந்த 7ம் தேதியில் இருந்து நளாயினி மாயமாகியுள்ளார்.

இதையடுத்து தேடுதல் வேட்டைக்கு பின்னர் அவர்கள் இருவரை மீட்டு ஏர்வாடி காவல்நிலையத்திற்க்கு கொண்டு வந்து அவரது பெற்றோருக்கு தகவல் கொடுத்தனர்.

பெண்ணோ என் கணவருடன் வாழ விருப்பமில்லை. நான் என்னுடைய பெற்றோருடன் சென்றால் கொன்றுவிடுவார்கள், நான் காதலனுடன் தான் செல்வேன் என்று தெரிவித்தார்.

இதன் பின்னர், காவல்துறையினர் நளாயினியை அவரது கள்ள காதலனுடன் அனுப்பி வைத்தனர். அதையடுத்து பெண்வீட்டார் காவல்துறையினரிடம் கடும் வாக்குவாதத்தில் ஈடுபட்டனர்.

அதற்கு காவல்துறை சார்பு ஆய்வாளர் சரவணன், பெண்ணிற்கு வயது 22 ஆகிறது. அவர் யாருடன் செல்ல வேண்டும் என்று விரும்பிகிறாரோ அவருடன் தான் நாங்கள் அனுப்ப முடியும். நீதிமன்றமே கள்ளகாதலுக்கு தடையில்லை என்று தீர்ப்பு கூறியுள்ளது. நான் என்ன செய்ய முடியும் என்று கூறியுள்ளார்.

பஞ்சாப்பில் பயங்கரவாதிகளுடன் நடந்த துப்பாக்கி சண்டையில் தமிழக ராணுவ வீரர் ஜெகன் பலியாகியுள்ளார். கன்னியாகுமரி மாவட்டத்தை சேர்ந்த வேலப்பரின் மகன் ஜெகன் (வயது 38). இவர் கடந்த 18 ஆண்டுகளாக ராணுவத்தில் பணிபுரிந்து வந்தார்.

இவருக்கும், தெற்குசூரங்குடி பகுதியை சேர்ந்த சுபி என்பவருக்கும் கடந்த 10 மாதங்களுக்கு முன்பு திருமணம் நடந்தது. தற்போது சுபி 8 மாத கர்ப்பமாக உள்ளார்.

இந்நிலையில் பஞ்சாப்பில் நக்சலைட் பயங்கரவாதிகளுக்கும், இந்திய ராணுவ வீரர்களுக்கும் இடையே துப்பாக்கி சண்டை நடந்தது. இந்த சண்டையில் ஜெகனும் ஈடுபட்டு இருந்தார். அப்போது பயங்கரவாதிகள் சுட்டத்தில் துப்பாக்கி குண்டு பாய்ந்து ஜெகன் சம்பவ இடத்திலேயே பரிதாபமாக இறந்தார்.

இதைக்கேட்டு அதிர்ச்சி அடைந்த ஜெகனின் மனைவி மற்றும் குடும்பத்தினர் கதறி அழுதனர். ஜெகனின் உடல் இன்று சொந்த ஊர் கொண்டு வரப்படும் என எதிர்பார்க்கப்படுகிறது.

ஜெகனின் தந்தை வேலப்பன் ஏற்கனவே இறந்துவிட்டார். தாயார் சீதாலட்சுமி, ஜெகனுக்கு 2 சகோதரிகளும், ஒரு சகோதரனும் உள்ளனர்.

சிறு வயதில் இருந்தே குடும்ப பாரத்தை சுமந்த ஜெகன், இரண்டு சகோதரிகளையும் திருமணம் செய்து கொடுத்த பின்புதான் தனது 38-வது வயதில் திருமணம் செய்து கொண்டார். ஆனால், அந்த வாழ்க்கையும் இப்படி 10 மாதத்தில் முடிவுக்கு வந்துள்ளது.