தமிழகத்தில் 5 மாதங்களுக்கு முன்னர் இளைஞரை எரித்துக் கொன்ற வழக்கில் முக்கிய குற்றவாளியை பொலிசார் கைது செய்துள்ளனர்.

தமிழகத்தின் கன்னியாகுமரி மாவட்டத்தில் கடந்த ஏப்ரல் முதல் திகதி மொத்தமாக எரிந்த நிலையில் ஆணின் சடலம் ஒன்று பொலிசாரால் கைப்பற்றப்பட்டது.

சடலத்தின் ஒரு கையில் ஆரியா என பச்சைகுத்தப்பட்டிருந்ததை அடுத்து கொல்லப்பட்ட நபர் கேரள மாநிலத்தவராக இருக்கலாம் என சந்தேகம் தெரிவித்த பொலிசார், தொடர்ந்து மேற்கொண்ட விசாரணையில் கொல்லப்பட்ட இளைஞர் கேரள மாநிலம் வலியதுறை பகுதியைச் சேர்ந்த ஆகாஷ் என தெரியவந்தது.

கொல்லப்பட்ட இளைஞர் பல்வேறு வாகன கொள்ளை வழக்கில் ஈடுபட்டவர் என விசாரணையில் தெரியவந்தது. கொள்ளையிட்ட பணத்தை பங்கிடுவதில் ஏற்பட்ட வாக்குவாதத்தில் ஆகாஷை அவரது நண்பர்கள் அனு மற்றும் ஜித்து என்பவர்களே கொலை செய்துள்ளனர்.

மார்ச் மாதம் 30 ஆம் திகதி அனுவின் காதலி ரேஷ்மா தமது குடியிருப்புக்கு விருந்துக்கு வரும்படி அனுவை அழைத்துள்ளார்.

இந்த நிலையில் விருந்துக்கு சென்ற அனுவுக்கு மதுவில் தூக்க மருந்து கலந்து அளித்துள்ளனர். பின்னர் அனுவும் ஜித்துவும் சேர்ந்து ஆகாஷை கழுத்தை நெரித்து கொலை செய்துள்ளனர்.

பின்னர் தமிழகத்தின் கன்னியாகுமரி மாவட்டத்தில் சென்று அங்குள்ள காட்டுப்பகுதியில் சடலத்தை பெட்ரோல் ஊற்றி எரித்துள்ளனர்.

இந்த வழக்கில் தற்போது முக்கிய குற்றவாளியான அனுவும், அவரது காதலி ரேஷ்மாவும் கைது செய்யப்பட்டுள்ளனர்.

இந்தியாவின் தெலுங்கானாவில் ஏற்கனவே திருமணமான நபரை மாணவி மணந்த நிலையில் இருவரும் தற்கொலை செய்து கொண்டுள்ளனர்.

கிருஷ்ணா மாவட்டத்தை சேர்ந்தவர் ஸ்ரீலட்சுமி. கல்லூரி மாணவியான இவர் தினமும் கல்லூரிக்கு ஆட்டோவில் சென்றுள்ளார். அப்போது ஆட்டோ ஓட்டுனர் திருமால் ராவுடன் ஸ்ரீலட்சுமிக்கு நட்பு ஏற்பட்ட நிலையில் காதலாக மாறியுள்ளது.

திருமாலுக்கு ஏற்கனவே திருமணமாகி குழந்தைகள் இருப்பதை அறிந்தும் ஸ்ரீலட்சுமி அவரை காதலித்தார். இருவரும் திருமணம் செய்ய முடிவெடுத்து தங்கள் குடும்பத்தாரிடம் இது குறித்து கூற அவர்கள் எதிர்ப்பு தெரிவித்துள்ளனர்.

இதையடுத்து ஸ்ரீலட்சுமியும், திருமாலும் தற்கொலைக்கு முயன்று காப்பாற்றப்பட்டனர். ஆனாலும் திருமணம் செய்வதில் உறுதியாக இருந்ததால் இரு குடும்பத்தாரும் அவர்களை வீட்டை விட்டு துரத்தினார்கள்.

பின்னர் ஸ்ரீலட்சுமியும், திருமாலும் கோவிலில் திருமணம் செய்த நிலையில் தங்களின் உறவினர்களை அங்கு அழைத்தனர். ஆனால் உறவினர்கள் திருமணத்தை எதிர்த்ததால் அங்கு வரவில்லை. இதனால் மனமுடைந்த ஸ்ரீலட்சுமியும், திருமாலும் விஷம் குடித்தனர்.

பின்னர் மருத்துவமனையில் சேர்க்கப்பட்ட இருவரும் சிகிச்சை பலனின்றி உயிரிழந்துள்ளனர்.

அப்பா எப்பம்மா வருவாரு? வெளிநாட்டில் தந்தை இறந்தது தெரியாமல் எதிர்பார்ப்பில் மகன் : மனம் உருகும் பின்னணி!!

சவுதி அரேபியாவில் இந்தியர் ஒருவர் 10 நாட்களுக்கு முன்னர் உயிரிழந்த நிலையில் சடலத்தை பெறமுடியாமல் இந்தியாவில் உள்ள குடும்பத்தார் தவித்து வருகிறார்கள்.

உத்தரபிரதேசத்தை சேர்ந்தவர் இர்பான் (27). இவருக்கு நர்கீஸ் (25) என்ற மனைவியும் சோகில் (5) என்ற மகனும் உள்ளான்.

குடும்ப வறுமை காரணமாக இர்பான் இரு மாதங்களுக்கு முன்னால் சவுதியின் Dammam நகரில் கார் ஓட்டுனர் பணியில் சேர்ந்துள்ளார்.

இந்நிலையில் கடந்த 11-ஆம் திகதி மின்சாரம் தாக்கி இர்பான் உயிரிழந்துள்ளார். அவர் இறந்து பத்து நாட்கள் ஆகியும் சடலத்தை சொந்த ஊருக்கு கொண்டு வரமுடியாமல் குடும்பத்தார் தவித்து வருகிறார்கள்.

இது குறித்து நர்கீஸ் கூறுகையில், தன்னுடைய அப்பா இறந்துவிட்டதை சோகிலால் உணரமுடியவில்லை. அவர் எப்போது வருவார் என எதிர்பார்த்து கொண்டிருக்கிறான்.

இர்பான் சடலத்தை சொந்த ஊருக்கு கொண்டு வர ஒன்றரை லட்சம் பணம் கேட்கிறார்கள், ஆனால் எங்களிடம் பணம் இல்லை.
எங்கள் எம்.எல்.ஏ, சவுதியில் உள்ள இந்திய தூதரகம் ஆகியவற்றின் உதவியை நாடியும் எதுவும் நடக்கவில்லை என கூறியுள்ளார்.

இது குறித்து எம்.எல்.ஏ தாகூர் திரேந்திரா கூறுகையில், சவுதியில் உள்ள இந்திய தூதரகத்தில் இது குறித்து பேசி வருகிறேன்.
இது இயற்கைக்கு மாறான மரணம் என்பதால் பொலிசார் விசாரணை நடக்கிறது.

வெளிநாட்டு வழிமுறைகள் காரணமாக இர்பான் சடலத்தை கொண்டுவருவதில் சிக்கல் உள்ளது என கூறியுள்ளார்.

இந்தியாவின் ஹைதராபாத்தை சேர்ந்த நபர் தற்கொலை செய்து கொண்ட நிலையில் மனைவி மாமனார், மாமியார் தான் அதற்கு காரணம் என வீடியோவில் கூறியுள்ளார்.

ஸ்ரீகாந்த் (25) என்ற இளைஞர் தனியார் நிறுவனத்தில் பணிபுரிந்து வந்தார். இந்நிலையில் நேற்று தனது வீட்டிலிருந்து வெளியில் வந்த ஸ்ரீகாந்த் தீக்குளித்து தற்கொலை செய்து கொண்டார். இறப்பதற்கு முன்னர் 37 நிமிட வீடியோவை அவர் பதிவு செய்திருந்தார்.

அதில், நானும் என் மனைவி ஸ்ரீஹர்ஷாவும் கலப்பு திருமணம் செய்த நிலையில் எங்களுக்குள் பிரச்சனை ஏற்பட்டது. ஸ்ரீஹர்ஷாவும் அவரது பெற்றோரும் என்னை துன்புறுத்தினார்கள், என் தற்கொலைக்கு அவர்களே காரணம்.

என் மனைவியை வேண்டுமென்றே என்னிடம் இருந்து பிரித்த அவர் குடுமபத்தார், கருக்கலைப்பு செய்யவும் வற்புறுத்தினார்கள் என கூறியுள்ளார்.

இது குறித்து பொலிசார் கூறுகையில், ஸ்ரீகாந்தை ஸ்ரீஹர்ஷா பிரிந்தபின்னர் பொலிசில் ஒரு புகார் கொடுத்தார்.

அதாவது தனது அந்தரங்க புகைப்படத்தை ஸ்ரீகாந்த் இணையத்தில் வெளியிட்டதாக புகார் அளித்தார்.

இது மற்றும் ஆறு வழக்குகள் ஸ்ரீகாந்த் மீது நிலுவையில் இருந்தன, சம்பவம் குறித்து விசாரித்து வருகிறோம் என கூறியுள்ளனர்.

தெலுங்கானா மாநிலத்தில் சாதி மறுப்பு திருமணத்தால் கணவரை இழந்த அம்ருதாவை, சாதிய அநீதிகளுக்கு எதிராக குரல் கொடுத்து வரும் கௌசல்யா சந்தித்து ஆறுதல் கூறியுள்ளார்.

தெலுங்கானா மாநிலத்தில் கடந்த சில நாட்களுக்கு முன்னர், சாதி மறுப்பு திருமணம் செய்ததால் பிரணய் என்ற இளைஞர் வெட்டிக்கொலை செய்யப்பட்ட சம்பவம் பெரும் அதிர்வலைகளை ஏற்படுத்தியது.

பிரணயை கொலை செய்த வழக்கில் அவரது மனைவி அம்ருதாவின் தந்தை, சித்தப்பா மற்றும் சிலரை பொலிசார் கைது செய்து விசாரித்து வருகின்றனர். அம்ருதா தற்போது தனது மாமியார் வீட்டில் இருக்கிறார்.

இந்நிலையில், தமிழகத்தின் திருப்பூர் மாவட்டத்தைச் சேர்ந்தவரும், சாதி மறுப்பு திருமணத்தால் தனது கணவரை இழந்தவருமான கௌசல்யா தெலுங்கானாவிற்கு சென்று அம்ருதாவை தனது வழக்கறிஞருடன் சந்தித்துள்ளார்.

அம்ருதாவிடம் பேசிய கௌசல்யா தைரியமாக இருக்க வேண்டும் என்று ஆறுதல் கூறினார். மேலும், தனது கணவர் படுகொலை செய்யப்பட்ட வீடியோவை அம்ருதாவிடம் காட்டினார்.

பின்னர் கௌசல்யாவிடம், ‘எத்தனை பேரை தான் தண்டிப்பது. உங்கள் கணவர் கொலை செய்யப்பட்டதற்கு சாதி தான் காரணமா?’ என அம்ருதா கேட்டார். அதற்கு ’சாதி மட்டும் தான் காரணம்’ என கௌசல்யா பதிலளித்தார்.

மேலும் பேசிய அம்ருதா, ‘பிரணய் கொலைக்கு காரணமான 7 பேரையும் தூக்கில் போட வேண்டும். எனது சித்தப்பா வெளியே வந்தால் எனக்கும், எனது குழந்தையின் உயிருக்கும் ஆபத்து ஏற்படும்’ என கூறியுள்ளார்.

அதைக் கேட்ட கௌசல்யா, ‘நீங்கள் நடந்ததை எல்லாம் நீதிமன்றத்தில் கூறுங்கள், அவர்களுக்கு கடுமையான தண்டனை கிடைக்கும்’ என தெரிவித்தார். தனது பெற்றோரின் ஜாமீன் மனுவை கௌசல்யா 58 முறை எதிர்த்ததாக அவரது வழக்கறிஞர் அம்ருதாவிடம் கூறினார்.