அனைத்து அரசியல் கைதிகளும் உடனடியாக விடுதலை செய்யபடல் வேண்டும் என்றும் அடிப்படையில் அரசியல் கைதிகள் சிறைச்சாலையில் முன்னெடுக்கும் தொடர்ச்சியான உண்ணாவிரதப் போராட்டத்திற்கு ஆதரவு தெரிவிக்கும் முகமாக வவுனியாவில் முன்னெடுக்கவுள்ள கவனயீர்ப்பு பேரணிக்கு புதிய ஜனநாயக மாக்சிச லெனினிசக் கட்சி தன்னுடைய முழு ஆதரவினை தெரிவிப்பதோடு அவ் கவனயீர்ப்புப் போராட்டத்தையும் முன்னெடுக்க சகல நடவடிக்கைகளையும் முன்னெடுக்கும் என அமைப்பின் வன்னி மாவட்டச் செயலாளர் என்.பிரதீபன் ஊடக அறிக்கையினை வெளியிட்டுள்ளார்.

மேலும் தேசிய இனப்பிரச்சினை மூலம் உருவான அரசியல் கைதிகளின் பிரச்சினை என்பது தொடர்ச்சியாக நீண்டு கொண்டிருக்கின்றது. இன்றைய நிலையில் இப்பிரச்சினையானது சட்டப் பிரச்சினையாக கருதாமல் அரசியல் பிரச்சினையாக கருதி தமிழ் மக்களின் வாக்குகளின் மூலம் ஆட்சி அதிகாரத்தில் இருக்கக்கூடியவர்கள் இப்பிரச்சினையை உடனடியாக தீர்த்துவைக்கக் கூடிய வழிகளை கண்டறிந்து அனைத்து அரசியல் கைதிகளின் விடுதலைக்கும் உதவ வேண்டுமென எமது அமைப்பு கோரிக்கை விடுவதோடு இம்மாதம் 22ம் திகதி சனிக்கிழமை 10 மணிக்கு வவுனியா மாவட்ட பொது அமைப்புக்களின் சார்பில் முன்னெடுக்கப்படவுள்ள பேரணியிலும் கவனயீர்ப்பிலும் இக்கோரிக்கைக்கு ஆதரவான அரசியற் கட்சிகள், பொது அமைப்புக்கள் உழைக்கும் மக்கள் அனைவரையும் கலந்து கொள்ளுமாறு எமது அமைப்பு அழைப்பு விடுக்கின்றது.

தொடர்புகளுக்கு : 077 3755626
தோழமையுடன்
என்.பிரதீபன்

திருகோணமலை – கிண்ணியா பகுதியிலிருந்து மத்திய கிழக்கு நாடொன்றுக்கு சென்ற 18 வயதுக்கும் குறைவான வயதுடைய சிறுமி அங்கிருந்து இலங்கைக்கு திருப்பி அனுப்பி வைக்கப்பட்டுள்ளார்.

குறித்த 18 வயதுக்கும் குறைவான வயதுடைய யுவதி மத்திய கிழக்கு நாட்டில் ஏற்பட்ட பிரச்சினை ஒன்றை அடுத்து அந்த நாட்டில் உள்ள இலங்கை தூதரகத்தின் காப்பகத்தில் தங்க வைக்கப்பட்டு, அங்கிருந்து இலங்கைக்கு திருப்பி அனுப்பி வைக்கப்பட்டுள்ளார்.

குறித்த யுவதி வெளிநாட்டுக்கு வீட்டுப் பணிப்பெண் தொழிலுக்கு அனுப்பி வைக்கப்பட்ட சம்பவம் குறித்து குற்றப் புலனாய்வு திணைக்கள அதிகாரிகள் விசாரணைகளை நடத்தி வருகின்றனர்.

மேலதிக விசாரணைகளின் அடிப்படையில், கடந்த வருடம் சவூதி அரேபியாவில் தலை துண்டித்து கொலை செய்யப்பட்ட றிசான என்ற பெண்ணை, அந்த நாட்டுக்கு அனுப்பி வைத்திருந்த வெளிநாட்டு வேலை வாய்ப்பு முகவர் நிறுவனமே இந்த யுவதியையும் போலி ஆவணங்களை தயார் செய்து, பணிப் பெண் தொழிலுக்கு அனுப்பி வைத்திருந்தமை கண்டறியப்பட்டுள்ளது.

யுவதி கடந்த 2000ஆம் ஆண்டு பிறந்துள்ளார். யுவதியை மருத்துவப் பரிசோதனைக்கு உட்படுத்திய மருத்துவர்கள் உண்மையான வயது 17 முதல் 18 ஆக இருக்கும் என கூறியுள்ளனர்.

வறிய குடும்பத்தை சேர்ந்த இந்த யுவதிக்கு பெற்றோரும் உள்ளதாக தெரியவந்துள்ளது.

அப்துல் மொஹமட் என்ற போலி பெயரில் சுமார் 10 வருடங்கள் சவூதியிலும் பெயர் அறியாத மத்திய கிழக்கு நாடொன்றிலும் பணிப்பெண்ணாக தொழில் புரிந்துள்ளார்.

இதன் பின்னர் ஓமானில் வீட்டுப் பெண்ணாக தொழில் புரியும் போது ஏற்பட்ட பிரச்சினை ஒன்றை அடுத்து அங்குள்ள இலங்கை தூதரகத்தின் காப்பகத்தில் தங்க வைக்கப்பட்டிருந்த நிலையில், கடந்த 19 ஆம் திகதி இலங்கைக்கு அனுப்பி வைக்கப்பட்டுள்ளார்.

விமான நிலைய குற்றப் புலனாய்வு திணைக்கள அதிகாரிகளுக்கு கிடைத்திருந்த தகவலின் அடிப்படையில், யுவதியை கைது செய்து மேலதிக விசாரணைகளை அதிகாரிகள் மேற்கொண்டுள்ளனர்.

விசாரணைகளுக்கு அமைவாக அடுத்த கட்ட நடவடிக்கையாக, இந்த சம்பவம் தொடர்பாக வெளிநாட்டு வேலைவாய்ப்பு முகவர் நிறுவனத்தை சேர்ந்த ஒருவர் கைது செய்யப்பட்டுள்ளதுடன் குற்றப் புலனாய்வு திணைக்களம் மேலதிக விசாரணைகளை நடத்தி வருகின்றது.

வியட்நாம் நடைபெற்ற பகிரங்க மெய்வல்லுனர் சம்பியன்ஷிப் போட்டித் தொடரில் இலங்கையைப் பிரிதிநிதித்துவப்படுத்தி ஆண்களுக்கான 10 ஆயிரம் மீற்றர் ஓட்டப் போட்டியில் பங்குகொண்ட கே. சண்முகேஸ்வரன் தங்கப் பதக்கத்தை வென்றார்.

இதன்படி, இலங்கை சார்பாக தான் பங்குபற்றிய முதல் சர்வதேசப் போட்டியில் தங்கப் பதக்கத்தை வென்று மெய்வல்லுனர் அரங்கில் மிகவும் குறுகிய காலத்தில் அதிசிறந்த பெறுபேறையும் சண்முகேஸ்வரன் பெற்றுக்கொண்டார்.

வியட்நாம் மெய்வல்லுனர் சங்கத்தினால் ஏற்பாடு செய்யப்பட்ட வியட்நாம் பகிரங்க மெய்வல்லுனர் சம்பியன்ஷிப் போட்டித் தொடர் வியட்நாமின் ஹோச்சிமிங் நகரில் நடைபெற்றது.

இதில் இலங்கை சார்பாக 4 வீரர்கள் பங்கேற்றிருந்தனர்.

இதில் போட்டிகளின் இரண்டாவது நாள் நடைபெற்ற ஆண்களுக்கான 10 ஆயிரம் மீற்றர் ஓட்டப் போட்டியில் கலந்துகொண்ட சண்முகேஸ்வரன், போட்டித் தூரத்தை 31 நிமிடங்களும் 01.25 செக்கன்களில் நிறைவு செய்து முதலிடத்தைப் பெற்றுக்கொண்டார். இது அவரது இவ்வருடத்துக்கான அதிசிறந்த நேரப் பதிவாகும்.

ஹட்டன் – வெலி ஓயாவைப் பிறப்பிடமாகக் கொண்ட 26 வயதுடைய கே. சண்முகேஸ்வரன், கடந்த 3 வருடங்களாக அரை மரதன் மற்றும் 10 ஆயிரம் மீற்றர் உள்ளிட்ட நீண்ட தூர போட்டிகளில் பங்குபற்றி தேசிய மட்டத்தில் பல வெற்றிகளைப் பதிவுசெய்திருந்தார்.

அதிலும் குறிப்பாக, கடந்த 4 வருடங்களாக இலங்கை பிரபல மெய்வல்லுனர் பயிற்றுவிப்பாளரான சஜித் ஜயலாலிடம் பயிற்சிகளைப் பெற்று வருகின்ற சண்முகேஸ்வரன்,

இவ்வருட முற்பகுதியில் நடைபெற்ற இராணுவ தொண்டர் படையணி மெய்வல்லுனர் மற்றும் முப்படையினருக்கான மெய்வல்லுனர் போட்டித் தொடர்களில் ஆண்களுக்கான மரதன் ஓட்டப் போட்டிகளில் பங்குபற்றி தங்கப் பதக்கங்களை வென்றிருந்தமை குறிப்பிடத்தக்கது.

இந்த நிலையில், இந்தோனேஷியாவின் பாலம்பேங் நகரில் அடுத்த மாதம் நடைபெறவுள்ள ஆசிய விளையாட்டு விழாவுக்கு இலங்கை மெய்வல்லுனர் வீரர்களைத் தெரிவுசெய்வதற்கான தகுதிகாண் போட்டிகளின் இரண்டாவதும், இறுதியுமான கட்டம் கடந்த மே மாதம் கொழும்பு சுகததாஸ விளையாட்டரங்கில் நடைபெற்றது.

இதில் ஆண்களுக்கான 10 ஆயிரம் மீற்றர் ஓட்டப் போட்டியில் பங்குகொண்ட சண்முகேஸ்வரன், குறித்த போட்டியை 31 நிமிடங்களும் 16.84 செக்கன்களில் நிறைவு செய்து முதலிடத்தைப் பெற்றுக்கொண்டமை குறிப்பிடத்தக்கது.

பாடசாலைக்கு சென்று கொண்டிருந்த ஆசிரியை மீதும் பாடசாலையின் பிரதி அதிபர் மீதும் அடையாளம் தெரியாத நபர்களால் சரமாரியான தாக்குதல் மேற்கொள்ளப்பட்டுள்ளதோடு ஆசிரியை அணிந்திருந்த சுமார் 10 பவுண் தங்கத்தாலிக் கொடியும் பறித்துச் செல்லப்பட்டுள்ளதாக மூதூர் பொலிஸார் தெரிவித்தனர்.

வழமை போன்று இன்று மோட்டார் சைக்கிளில் பாடசாலைக்கு சென்று கொண்டிருந்தபோது பாடசாலைக்கு மிக அருகில் வைத்து இந்த தாக்குதல் சம்பவம் இடம்பெற்றுள்ளது.

இதில் இறால்குழி கஜமுகா வித்தியாலய ஆசிரியை மீதும் அப்பாடசாலையின் பிரதி அதிபர் மீதுமே தாக்குதல் மேற்கொள்ளப்பட்டுள்ளதாக பொலிஸார் தெரிவித்துள்ளனர்.

கத்தி வெட்டுக்கும் தடியடித் தாக்குதலுக்கும் உள்ளாகிய நிலையில் படுகாயமடைந்த ஆசிரியையும் பிரதி அதிபரும் உடனடியாக மூதூர் ஆதார வைத்தியசாலையில் அனுமதிக்கப்பட்டுள்ளனர்.

அவசர பொலிஸ் தொடர்பு இலக்கமான 119இற்கு அழைப்பு விடுத்து தகவல் சொல்லப்பட்டதன் பேரில் ஸ்தலத்திற்கு விரைந்த பொலிஸார் விசாரணைகளை மேற்கொண்டு தடயங்களைப் பதிவு செய்துள்ளனர்.

நயினை நாகபூஷணி அம்மன் ஆலயத்தில் ஏற்பட்ட அதிசயத்தை காண பெருமளவு பக்தர்கள் படையெடுத்து வருகின்றனர்.

ஆலயத்திலுள்ள நாகப் பாம்பு ஒன்று அம்மனுக்கு பூக்களை கொண்டு பூஜை செய்யும் அதிசய சம்பவம் இடம்பெற்றுள்ளது.
அம்மன் ஆலயத்திற்கு அருகிலுள்ள செடிகளிலுள்ள பூக்களை பாம்பு கொண்டு வந்துள்ளது.

இந்த அதிசய சம்பவத்தை கேட்டு பெருமளவு பக்தர்கள் ஆலயத்தில் ஒன்று கூடியுள்ளனர். அண்மைக்காலமாக தாயகத்திலுள்ள ஆலயங்களில் பல்வேறு விதமான அதிசய சம்பவங்கள் இடம்பெற்று வருகின்றன.

குறிப்பாக வரலாற்று சிறப்புமிக்க நயினை நாகபூஷணி அம்மன் ஆலயத்தில் பல்வேறு அதிசயங்கள் ஏற்பட்டு வருகின்றன.

இந்நிலையில் தற்போது பாம்பின் தெய்வீக செயற்பாடு அங்குள்ள பக்தர்களை பெரிதும் பரவசத்தில் ஆழ்த்தியுள்ளது.

கடந்த வருடம் புல் வெட்டும் இயந்திரத்தில் சிக்கி 3 கால்களையும் இழந்த நாயின் தற்போதைய நிலையை வெளிப்படுத்தும் புகைப்படங்கள் வெளியாகியுள்ளன.

தெஹிஅத்தகண்டிய பிரதேசத்தில் புல் வெட்டு இயந்திரத்தில் சிக்கிய நாய் ஒன்று 3 கால்களையும் இழந்துள்ளது.

கால்களை இழந்து ஆபத்தான நிலையில் இருந்த நாயின் உயிரை தம்மிக்க பண்டார அமரசிங்க என்ற இளைஞன் நாயை காப்பாற்றியுள்ளார்.

பாதிப்படைந்த நாய் தற்போது, Animal SOS Sri Lanka என்ற பாதுகாப்பு நிலையத்தில் மகிழ்ச்சியாக வாழ்ந்து வருகின்றது.

நாய்க்கு ஏற்பட்ட இந்த சோகமான சம்பவத்திற்கு ஒரு வருடம் நிறைவடைந்து நிலையை முன்னிட்டு புகைப்படங்கள் இணைக்கப்பட்டுள்ளது.