சென்னை மதுரவாயல் அருகே, வானகரம் மீன் சந்தையில் கொள்ளையன் ஒருவனை ரத்தம் சொட்ட வெட்டிக் கொல்லப்பட்ட சம்பவம் அதிர்ச்சியை ஏற்படுத்தியுள்ளது.

மதுரவாயல் அடுத்த வானகரம், மீன் சந்தை அருகே இளைஞர் ஒருவர் பலத்த வெட்டுக்காயங்களுடன் கொலை செய்யப்பட்டு இருப்பதாக பொலிசாருக்கு தகவல் கிடைத்தது.

இதையடுத்து சம்பவ இடத்திற்கு விரைந்து சென்ற பொலிசார் கொலை செய்யப்பட்டு கிடந்த நபரின் உடலை மீட்டு பிரேத பரிசோதனைக்கு அனுப்பி வைத்துள்ளனர்.

இதனையடுத்து நடந்த விசாரணையில், கொலை செய்யப்பட்டவர் விருகம்பாக்கம், காந்தி நகரை சேர்ந்த மணிகண்டன் (எ) புறாமணி(21) என்பதும், இவர் மீது விருகம்பாக்கம் காவல் நிலையத்தில் வழிப்பறி, செயின் பறிப்பு, செல்போன் பறிப்பு உள்ளிட்ட வழக்குகள் நிலுவலையில் உள்ளதும் தெரியவந்தது.

மேலும் நேற்று இரவு தனது நண்பரை பார்த்து விட்டு வருவதாக கூறி விட்டு வெளியே சென்றவர் வீடு திரும்பவில்லை எனவும் கூறப்படுகிறது.

இதையடுத்து சம்பவம் நடந்த இடத்தில் நண்பர்களுடன் உட்கார்ந்து மது அருந்தி உள்ளார்.

அப்போது ஏற்பட்ட முன் விரோதம் காரணமாக மணியை மர்மநபர்கள் ஓட, ஓட விரட்டி கொலை செய்து விட்டு தப்பி சென்றுள்ளது பொலிஸ் விசாரணையில் தெரியவந்துள்ளது.

கடந்த சில வாரங்களுக்கு முன்பு எந்த திருட்டு வழக்கிலும் ஈடுபடமாட்டேன் என்று கூறி மணி விருகம்பாக்கம் காவல் நிலையத்தில் எழுதி கொடுத்து விட்டு வந்துள்ளார்.

அதன் பிறகு கோடம்பாக்கத்தில் நடந்த குற்ற சம்பவத்தில் கொள்ளையர்களை பிடிக்க மணி உதவியதாக கூறப்படுகிறது.

இதன் காரணமாக கொலை நடந்ததா? அல்லது வேறு காரணங்கள் ஏதாவது உள்ளதா? என்ற கோணத்தில் பொலிசார் விசாரணை மேற்கொண்டு வருகின்றனர்.

கேரள மாநிலம் திருவனந்தபுரம் அருகே, பெண்ணொருவர் தனது கள்ளக்காதலனுடன் இருசக்கர வாகனத்தில் சென்று நகை பறித்து வந்த சம்பவம் பரபரப்பை ஏற்படுத்தியுள்ளது.

திருவனந்தபுரம் அருகே உள்ள மாவேலிக்கரை மற்றும் சுற்றுப்பகுதியில், சாலையில் நடந்து செல்லும் பெண்களிடம் நகை பறிக்கும் சம்பவங்கள் அடிக்கடி நடைபெற்றது.

இது தொடர்பாக பொலிசாருக்கு புகார்கள் குவிந்தன. பாதிக்கப்பட்டவர்களில் 50க்கும் மேற்பட்டோர் புகார் தெரிவித்ததால், பொலிசார் தீவிர வேட்டையில் இறங்கினர்.

இருசக்கர வாகனத்தில் தலைகவசம் அணிந்து வந்த ஒரு ஆணும், பெண்ணும் தங்களிடம் முகவரி கேட்பது போல் நடித்து, தங்களை ஏமாற்றி நகைகளை பறித்து சென்றதாக புகார் கூறியவர்கள் பொலிசாரிடம் கூறியிருந்தனர்.

அதன் அடிப்படையில் இந்த சம்பவங்களை ஒரே கும்பல் தான் செய்திருக்கக் கூடும் என பொலிசார் முடிவு செய்தினர். அதன் பின்னர், மாவேலிக்கரை பகுதியில் உள்ள கண்காணிப்பு கமெராவில், நகை திருட்டு காட்சி ஒன்று பதிவாகி இருந்தது.

அதில் தெரிந்த வாகனத்தின் பதிவு எண்ணை வைத்து பொலிசார் விசாரணை நடத்தியதில், அது போலி பதிவு எண் என்பது தெரிய வந்தது. இதனால் குற்றவாளிகளை பிடிப்பதில் பொலிசாருக்கு சிக்கல் ஏற்பட்டது.

இந்நிலையில், மாவேலிக்கரை கல்லூரி சாலையில் ஒரு பெண்ணிடம் நகை பறிக்க முயன்றவர்களை, பொதுமக்கள் மடக்கி பிடித்து பொலிஸில் ஒப்படைத்தனர்.

பொலிசார் அவர்களிடம் விசாரணை நடத்தியபோது, ஹரிப்பாடு பகுதியைச் சேர்ந்த விஜூ(33) மற்றும் மாவேலிக்கரையைச் சேர்ந்த சுனிதா(36) என்பதும், அவர்கள் கள்ளக்காதலர்கள் என்பதும் தெரிய வந்தது.

மூன்று குழந்தைகளுக்கு தாயான சுனிதா, தனது கணவரை பிரிந்து வாழ்ந்து வந்துள்ளார். இந்நிலையில், வேலைக்கு சென்ற இடத்தில் விஜூயுடன் பழக்கம் ஏற்பட்டு கள்ளக்காதலாக மாறியுள்ளது. மேலும் இவர்கள் இருவரும் ஆடம்பர வாழ்க்கைக்கு ஆசைப்பட்டு நகை பறிப்பு சம்பவத்தில் ஈடுபட்டுள்ளனர்.

இவர்கள் அடிக்கடி தங்களின் வாகனத்தின் பதிவு எண்களையும், நிறத்தையும் மாற்றிவிட்டு இந்த சம்பவத்தில் ஈடுபட்டு வந்ததால் பொலிசாரிடம் பிடிபடாமல் இருந்துள்ளனர்.

சென்னையில் அமைந்துள்ள புழல் சிறையில் ஆயுள் கைதிகள் தங்கள் அறைகளை உல்லாச விடுதி போன்று மாற்றியுள்ளது புகைப்படமாக வெளியாகி பரபரப்பை ஏற்படுத்தியுள்ளது.

தமிழகத்தில் உள்ள முக்கிய சிறைகளில் செல்போன், போதை மருந்து புழக்கம் தாராளமாக இருப்பதாக சமீப காலமாக குற்றச்சாட்டு இருந்து வருகிறது.

இந்த நிலையில் தமிழகம் முழுவதும் உள்ள சிறைகளில் அதிரடி சோதனை நடத்தப்பட்டு வருகிறது.

அதன் ஒருபகுதியாக புழல் சிறையிலும் சோதனை நடத்தப்பட்டது. அப்போது கைதிகளிடம் இருந்து செல்போன்கள், கஞ்சா உள்ளிட்ட பொருட்களும் பறிமுதல் செய்யப்பட்டன.

கைப்பற்றப்பட்ட செல்போன்களில் இருந்த புகைப்படங்கள் தற்போது வெளியாகி இருக்கிறது. அதன்மூலம் கைதிகள் சிறையில் சொகுசு வாழ்க்கை வாழ்ந்து வருவதும் அம்பலமாகி இருக்கிறது.

அறைக்குள் கட்டில் போடப்பட்டு அதில் சொகுசு மெத்தையும் போடப்பட்டு இருக்கிறது. விலை உயர்ந்த தலையணைகளும் காணப்படுகின்றன.

இதனால் கைதிகள் உரிய அதிகாரிகளுக்கு லஞ்சம் வழங்கி தாங்கள் கேட்டதையெல்லாம் பெற்று சொகுசு வாழ்க்கை வாழ்ந்து வருவது அம்பலமாகியுள்ளது.

மட்டுமின்றி சிறையில் உள்ள கைதிகள் சிலர் தங்களது செல்போன்களை பயன்படுத்தி வெளிநாடுகளில் உள்ள கடத்தல் கும்பலுடன் பேசியுள்ளதும் வெளிச்சத்துக்கு வந்துள்ளது.

சிறையில் இருக்கும் ரவுடிகள் அங்கிருந்தபடியே கொலைக்கு சதி திட்டம் தீட்டுவதாகவும் குற்றச்சாட்டுகள் உள்ளன. இந்த நிலையில் புழல் சிறையில் இருந்து வெளிநாடுகளுக்கும் கைதிகள் போன் செய்து பேசி இருக்கும் தகவல் கடும் அதிர்ச்சியை ஏற்படுத்தியுள்ளது.

மத்திய பிரதேச மாநிலத்தில் கைது செய்யப்பட்ட குற்றவாளி ஆதேஷ் காம்ரா, லாரி ஓட்டுநர் மற்றும் கிளீனர் என 33 பேரை நான் தான் கொலை செய்தேன் என குற்றத்தை ஒப்புக்கொண்டுள்ளார்.

மத்திய பிரதேச மாநிலம் போபால் பகுதியில் கடந்த ஆகஸ்ட் 13-ம் தேதி நடத்தப்பட்ட இரட்டை கொலை வழக்கு மற்றும் கொள்ளை சம்பவம் தொடர்பாக ஜாஸ்கரன் என்ற 40 வயது நபர் விசாரணைக்கு அழைத்து செல்லப்பட்டார்.

அங்கு ஜாஸ்கரன் மற்றும் மற்ற குற்றவாளிகளிடம் மேற்கொள்ளப்பட்ட விசாரணையில், ஜாஸ்கரன் பல்வேறு குழுக்களுடன் இணைந்து 14 கொலை சம்பவங்களில் ஈடுபட்டிருந்தது தெரியவந்தது.

இதனையடுத்து பொலிஸார் விசாரணையை தீவிரப்படுத்தினர். அதில், ஜாஸ்கரன் என்பவரின் உண்மையான பெயர் ஆதேஷ் காம்ரா என்பதும், அவர் சொந்தமாக தையல் கடை ஒன்று நடத்தி வருவதும் தெரியவந்தது.

அதன்பேரில் கடந்த 8-ம் தேதி நீதிமன்றத்தில் ஆஜர்படுத்திய பொலிஸார் சிறைக்காவலில் எடுத்து விசாரிக்க அனுமதி பெற்றனர். அங்கு மேற்கொள்ளப்பட்ட விசாரணையில் குற்றவாளி ஆதேஷ், தான் 33 பேரை கொலை செய்ததாக ஒப்புக்கொண்டார்.

இதுகுறித்து குற்றவாளி கொடுத்த வாக்குமூலத்தில், என்னுடைய அப்பா ஓய்வு பெற்ற ராணுவ அதிகாரி. சிறுவயதில் இருந்தே அவர் என்னிடம் பாசம் காட்டியதில்லை. வீட்டில் அதிகமான விதிகளை பயன்படுத்துவார்.என்னுடைய குழந்தை பருவத்திலிருந்தே என்னை கடுமையாக தாக்கி வளர்த்து வந்தார். எனக்கு இந்த கொலை செய்யும் எண்ணம் எப்பொழுது வந்தது என்றே தெரியவில்லை.

2005 முதல் 2006 வரை லாரிகளை திருடி மட்டுமே விற்று வந்தேன். அதனால் பொலிஸார் என்னை கைது செய்து சிறையில் அடைத்தனர். அதன் பின்னர் தான் பொலிஸார் அடையாளம் கண்டுபிடிக்கலாம் இருப்பதற்கும் தடையங்களை அழிக்க முயற்சி செய்தேன்.

அதன்படி 2007 முதல் 2018 வரை அதிகமான லாரிகளை திருடி 2 முதல் 3 லட்சம் வரை விற்றேன். இதற்காக சாலைகளில் செல்லும் அதிகமான லாரி ஓட்டுனர்களை நண்பர்களாக பிடித்தேன். அவர்களுடன் சாலை ஓரத்தில் இருக்கும் உணவகங்களில் சாப்பிடுவேன்.

அப்படி சாப்பிடும்போது அவர்களுக்கு தெரியாமல் உணவில் மயக்க மருந்தினை கலந்து விடுவேன். பின்னர் அவர்கள் மயங்கியதும், காரில் அவர்களை ஏற்றிக்கொண்டு, ஆள் நடமாட்டம் இல்லாத பகுதிக்கு லாரியை ஒட்டி செல்வேன்.

அங்கு அவர்களை கொலை செய்து புதைத்து விடுவேன். இதுபோன்று மகாராஷ்டிரா, ஒடிசா, சத்தீஸ்கர் மற்றும் மத்திய பிரதேசத்தில் 33 பேரை கொலை செய்துள்ளேன் என வாக்குமூலம் கொடுத்துள்ளார்.

இந்த சம்பவம் பெரும் பரபரப்பை ஏற்படுத்தியிருக்கும் நிலையில், பொலிஸார் விசாரணையை தீவிரப்படுத்தியுள்ளனர்.

ராஜிவ் காந்தி கொலை வழக்கில் தண்டனை பெற்ற 7 பேரை விடுதலை செய்ய வேண்டும் என்ற தமிழக அரசின் பரிந்துரை அறிக்கையை மத்திய உள்துறை அமைச்சகத்துக்கு தமிழக கவர்னர் நேற்று அனுப்பி வைத்தார்.

இதனால் பேரறிவாளன் உள்ளிட்டவர்கள் விடுதலையில் திடீர் சிக்கல் ஏற்பட்டுள்ளது.

முன்னாள் பிரதமர் ராஜிவ் காந்தி கொலை வழக்கில் தண்டனை பெற்ற பேரறிவாளன், முருகன், சாந்தன், நளினி, ராபர்ட் பயாஸ், ஜெயக்குமார், ரவிச்சந்திரன் ஆகிய 7 பேரும் 27 ஆண்டுகளுக்கு மேலாக சிறையில் உள்ளனர்.

இவர்களை கருணை அடிப்படையில் விடுதலை செய்ய வேண்டும் என்று தமிழக சட்டமன்றத்தில் தீர்மானம் நிறைவேற்றி மத்திய அரசுக்கு அனுப்பி வைக்கப்பட்டது. ஆனாலும், மத்திய அரசு இவர்களை விடுதலை செய்வதில் தயக்கம் காட்டியது. இது சம்பந்தமான வழக்கு உச்ச நீதிமன்றத்தில் நடந்து வந்தது.

இந்நிலையில், கடந்த 7ம் தேதி உச்ச நீதிமன்றம், `ராஜிவ் காந்தி கொலை வழக்கு குற்றவாளிகளை விடுதலை செய்வது குறித்து முடிவெடுக்க தமிழக அரசுக்கு முழு அதிகாரம் உண்டு’ என்று தீர்ப்பு அளித்தது.

இதையடுத்து, தமிழக அமைச்சரவை கூட்டம் முதல்வர் எடப்பாடி பழனிசாமி தலைமையில் கடந்த ஞாயிற்றுக்கிழமை நடந்தது. இந்த கூட்டத்தில், உச்ச நீதிமன்றத்தின் தீர்ப்பின் அடிப்படையில் பேரறிவாளன், சாந்தன், முருகன், நளினி உள்பட 7 பேரை `முன் விடுதலை செய்ய வேண்டும்’ என்று தீர்மானம் நிறைவேற்றப்பட்டது.

அமைச்சரவையில் எடுக்கப்பட்ட பரிந்துரை கடிதத்தை கவர்னர் பன்வாரிலால் புரோகித்துக்கு தமிழக அரசு கடந்த ஞாயிறு மாலையே அனுப்பி வைத்தது. இந்த கடிதத்தை பெற்றுக்கொண்ட தமிழக கவர்னர், ராஜிவ் காந்தி கொலை வழக்கில் தண்டனை பெற்ற 7 பேரை விடுதலை செய்வதற்கான அறிவிப்பை உடனடியாக வெளியிடுவார் என்று பரவலாக கருத்து நிலவியது. ஆனால் கடந்த 5 நாட்களாக தமிழக கவர்னர் அரசின் தீர்மானத்தின் மீது எந்த உத்தரவும் பிறப்பிக்காமல் உள்ளார்.

இந்த பரபரப்பான சூழ்நிலையில், தமிழக கவர்னர் பன்வாரிலால் புரோகித், ராஜிவ் காந்தி கொலை வழக்கில் குற்றம் சாட்டப்பட்ட 7 பேர் விடுதலை குறித்த தமிழக அமைச்சரவையின் பரிந்துரை அறிக்கையை நேற்று மத்திய உள்துறை அமைச்சகத்துக்கு அனுப்பி வைத்துள்ளதாக கவர்னர் மாளிகையை மேற்கோள்காட்டி தகவல்கள் வெளியானது.

இதுகுறித்து அவர்களிடம் கேட்டபோது, “ராஜிவ் காந்தி கொலை வழக்கில் குற்றம் சாட்டப்பட்ட 7 பேரை விடுதலை செய்ய வேண்டும் என்று தமிழகஅமைச்சரவை கவர்னருக்கு பரிந்துரை அளித்துள்ளது. இதுகுறித்து கவர்னர் சட்ட நிபுணர்களுடன் ஆலோசனை நடத்தினார். நாட்டின் பிரதமரை கொலை செய்ததாக இவர்கள் மீது குற்றம் சாட்டப்பட்டுள்ளதால் இந்த பிரச்னையை கவர்னர் கவனமாக கையாள்வார்.

தற்போது, தமிழக அரசின் பரிந்துரையை தமிழக கவர்னர் மத்திய உள்துறை அமைச்சகத்திற்கு அனுப்பி வைத்துள்ளார். காரணம், இந்த 7 பேர் விடுதலையில் தமிழக அரசு விடுதலை செய்ய முன் வந்தாலும், மத்திய அரசு தொடர்ந்து தயக்கம் காட்டி வந்தது.

அதேபோன்று தற்போது காங்கிரஸ் கட்சியில் உள்ள சிலரும் இவர்களது விடுதலைக்கு எதிர்ப்பு தெரிவித்து வருகிறார்கள். இதுபோன்ற பிரச்னைகள் உள்ளதால், அனைவரிடமும் கலந்து ஆலோசித்த பிறகு தமிழக கவர்னர் பன்வாரிலால் ஒரு முடிவை எடுப்பார்.

தற்போது மத்திய உள்துறை அமைச்சகம் என்ன முடிவு எடுக்கிறதோ அந்த முடிவின்படிதான் தமிழக கவர்னரும் செயல்படுவார்” என்றார்.

தமிழக கவர்னரின் இந்த முடிவால், ராஜிவ் காந்தி கொலை வழக்கில் குற்றம் சாட்டப்பட்டுள்ள பேரறிவாளன், முருகன், நளினி உள்ளிட்ட 7 பேர் விடுதலையில் திடீர் சிக்கல் ஏற்பட்டுள்ளது.

– தினகரன்-