ஹொரணை நோக்கிச் சென்ற பேருந்துடன் மோட்டார் சைக்கிள் மோதியதில் பாடசாலை மாணவன் ஒருவர் உயிரிழந்துள்ளார்.
பாணந்துறை – ஹொரண வீதியில் கொத்தலாவல சந்திக்கு அருகில் உள்ள துணை வீதியிலிருந்து பிரதான வீதிக்குள் நுழைந்த மோட்டார் சைக்கிள், ஹொரணை நோக்கிச் சென்ற பேருந்துடன் மோதியதில் விபத்து ஏற்பட்டுள்ளது.
காயமடைந்த மோட்டார் சைக்கிள் ஓட்டுநர் பண்டாரகம மருத்துவமனையில் அனுமதிக்கப்பட்டு, மேலதிக சிகிச்சைக்காக ஹொரணை மருத்துவமனையில் அனுமதிக்கப்பட்ட பின்னர் உயிரிழந்தார்.
உயிரிழந்தவர் பண்டாரகம, யட்டியான பகுதியைச் சேர்ந்த 17 வயதுடைய பாடசாலை மாணவன் என அடையாளம் காணப்பட்டுள்ளார்.
ஹொரணை மருத்துவமனை பிரேத அறையில் சடலம் வைக்கப்பட்டுள்ளது. பண்டாரகம பொலிஸார் மேலதிக விசாரணைகளை மேற்கொண்டு வருகின்றனர்.
இலங்கையில் இன்ப்ளூயன்ஸா ஏ மற்றும் பி தொற்றுகள் வேகமாக அதிகரித்து வருவதாக சுகாதார அதிகாரிகள் எச்சரிக்கை விடுத்துள்ளனர்.
இதில் சிறுவர்கள் மிகவும் பாதிக்கப்பட்டுள்ளதாக சுகாதார அதிகாரிகள் குறிப்பிட்டுள்ளனர். மழைக்காலங்களிலும், ஆண்டு இறுதியிலும் பருவகால தொற்றுநோய் மிகவும் தீவிரமாக இருக்கும்.
பகல்நேர பராமரிப்பு மையங்கள், பாலர் பாடசாலைகள் மற்றும் பாடசாலை சிறுவர்கள் பாதிக்கப்படக்கூடியவர்களாக உள்ளனர் என குழந்தை மருத்துவ ஆலோசகர் மருத்துவர் மகேஷக விஜயவர்தன தெரிவித்துள்ளார்.
பல சிறுவர்களுக்கு திடீர் காய்ச்சல், இருமல், தொண்டை வலி, மூக்கு ஒழுகுதல் மற்றும் சோர்வு ஏற்படுவதால் இந்த நோய் பல வடிவங்களில் தோன்றும்.
அதே நேரத்தில் சிலருக்கு சளி போன்ற அறிகுறிகள், காது தொற்று, சைனசிடிஸ் அல்லது மூச்சுத்திணறல், குறிப்பாக ஆஸ்துமா உள்ளவர்களுக்கு ஏற்படலாம்.
சிறுவர்களுக்கு வாந்தி மற்றும் வயிற்றுப்போக்கு ஏற்படலாம். சில சமயங்களில் நீரிழப்பு ஏற்படலாம்.
மேலும் அரிதான சந்தர்ப்பங்களில், இன்ப்ளூயன்ஸா நரம்பு மண்டலத்தை பாதிக்கலாம். 2 வயதுக்குட்பட்ட குழந்தைகள் மற்றும் நாள்பட்ட நோய்கள் உள்ள குழந்தைகள் நிமோனியா மற்றும் கடுமையான சுவாச சிக்கல்களுக்கு அதிக ஆபத்தை எதிர்கொள்கின்றனர்.
எனவே, பெற்றோர்கள் தங்கள் பிள்ளைகளின் அறிகுறிகளை உன்னிப்பாகக் கண்காணிக்க வேண்டும்.
விரைவான அல்லது கடினமான சுவாசம், தொடர்ச்சியான வாந்தி, பசியின்மை அல்லது அசாதாரண மயக்கம் உள்ளிட்ட கடுமையான நோயின் அறிகுறிகள் தோன்றினால் உடனடியாக மருத்துவ உதவியை நாட வேண்டும்.
அடிக்கடி கை கழுவுதல், இருமல் வரும்போது கைகளை வைத்து மறைத்தல், நோய்வாய்ப்பட்ட குழந்தைகளை முழுமையாக குணமடையும் வரை வீட்டிலேயே வைத்திருத்தல் போன்ற தடுப்பு நடவடிக்கைகள் பரவலைக் கட்டுப்படுத்துவதற்கு மிக முக்கியமானவையாகும்.
அதிக ஆபத்துள்ள சிறுவர்களுக்கு தடுப்பூசிகள் கிடைக்கின்றன மற்றும் பரிந்துரைக்கப்படுகின்றன. பெரும்பாலான சிறுவர்கள் வீட்டிலேயே எளிய கவனிப்புடன் குணமடைகிறார்கள்.
ஆனால் எச்சரிக்கை அறிகுறிகள் அல்லது அடிப்படை நிலைமைகள் உள்ளவர்களுக்கு ஆரம்பகால மருத்துவ கவனிப்பு அவசியம்.
இந்த தொற்றுநோயின் போது ஏற்படும் சிக்கல்களுக்கு எதிராக விழிப்புணர்வு மற்றும் தடுப்பு நடைமுறைகள் சிறந்த பாதுகாப்பாகும்” என அவர் மேலும் தெரிவித்துள்ளார்.
இலங்கையில் கடன் அட்டைகளை வைத்திருப்பவர்கள், கடந்த ஆகஸ்ட் மாதத்தில் செலவினங்களை அதிகரித்ததாக தரவுகள் கூறுகின்றன. இது வளர்ந்து வரும் நுகர்வோர் நம்பிக்கை மற்றும் மேம்பட்ட வருமானத்தை பிரதிபலிப்பதாக தெரிவிக்கப்பட்டுள்ளது.
கடந்த ஜூலை மாதத்தில் கடன் அட்டைகளின் கடன் தொகை ரூ.2.89 பில்லியனாக உயர்ந்துள்ளது, இது ஜூலையில் பதிவான ரூ.373 மில்லியனிலிருந்து கூர்மையான அதிகரிப்பாகும்.
இந்த நிலையில், ஆகஸ்ட் மாதத்தில், கடன் அட்டைகள் மூலமான கடனில் ஏற்பட்ட திடீர் அதிகரிப்புடன், மாத இறுதிக்குள் மொத்த நிலுவையில் உள்ள கடன் அட்டை கடன் மொத்தமாக ரூ.164.17 பில்லியனாக அதிகரித்துள்ளது.
கடன் அட்டைகளுக்கான வட்டி விகிதங்கள் ஆண்டுக்கு சுமார் 26 சதவீதமாக இருந்தாலும், அவற்றின் கடனில் ஏற்பட்ட சமீபத்திய உயர்வு, நுகர்வோர் அத்தியாவசியப் பொருட்களுக்கு அதிகமாகச் செலவிடுவதை காட்டுகிறது.
அத்துடன், படிப்படியாக பொழுதுபோக்கு, உணவு மற்றும் ஓய்வு நடவடிக்கைகள் போன்ற விருப்பமான வகைகளுக்குத் திரும்புவதையும் பிரதிபலிப்பதாக ஆய்வுகள் கூறுகின்றன.
நைஜீரியாவின் மத்திய நைஜர் மாநிலத்தில் பெட்ரோல் லொறி ஒன்று விபத்துக்குள்ளானதில், குறைந்தது 42 பேர் கொல்லப்பட்டுள்ளதாக சர்வதேச ஊடகங்கள் செயதி வெளியிட்டுள்ளன.
பல்வேறு அளவிலான காயங்களுடன் மேலும் 52 பேர் தற்போது மருத்துவமனையில் சிகிச்சை பெற்று வருவதாக நைஜர் மாநில அவசர சேவைத் தலைவர் அப்துல்லாஹி பாபா அரா தெரிவித்துள்ளார்.
நைஜர் மாகாணத்தின் கட்சா பகுதியில் உள்ள வீதியில் சென்று கொண்டிருந்தபோது எதிர்பாராத விதமாக சாரதியின் கட்டுப்பாட்டை இழந்த லொறி வீதியில் கவிழ்ந்து விபத்தில் சிக்கியது.
இதனால் டேங்கர் லொறியில் இருந்த பெட்ரோல் கசிந்து வெளியேறியது. அப்போது ஏற்பட்ட தீ விபத்தில் லொறி வெடித்துச் சிதறியுள்ளது.
இந்த சம்பவத்தில் வீதியின் அருகே நின்றுகொண்டிருந்தவர்கள், வாகனங்களில் பயணித்தவர்கள் என 42 பேர் பரிதாபமாக உயிரிழந்துள்ளனர்.
கடந்த ஆண்டு அக்டோபரில், வடமேற்கு நைஜீரியாவின் ஜிகாவா மாநிலத்தில் எரிபொருள் லொறி வெடித்ததில் 153 பேர் கொல்லப்பட்டமை குறிப்பிடத்தக்கது.
யாழில் ஒருநாள் காய்ச்சல் காரணமாக இளம் குடும்பஸ்தர் ஒருவர் உயிரிழந்துள்ளார். குறித்த சம்பவமானது நேற்று முன்தினம் (21.10) இடம்பெற்றுள்ளது.
கைதடியைச் சேர்ந்த சிவபாலசிங்கம் காந்தரூபன் (வயது 42) என்ற ஒரு பிள்ளையின் தந்தையே இவ்வாறு உயிரிழந்துள்ளார்.
இது குறித்து மேலும் தெரியவருகையில், இவர் நேற்றையதினம் தனது தாயாரின் வீட்டில் இருந்தவேளை திடீரென காய்ச்சலும் வயிற்றோட்டமும் ஏற்பட்டது.
இந்நிலையில் புத்தூர் வைத்தியசாலையில் சிகிச்சை பெற்று வீடு திரும்பினார். இதனையடுத்து, வீட்டுக்கு வந்த அவர் கதிரையில் இருந்தவாறே உயிரிழந்துள்ளார்.
அவரது சடலம் மீதான மரண விசாரணைகளை திடீர் மரண விசாரணை அதிகாரி ஆ.ஜெயபாலசிங்கம் மேற்கொண்டார். நிமோனியா தொற்றினால் மரணம் சம்பவித்துள்ளதாக உடற்கூற்று பரிசோதனைகளில் தெரியவந்துள்ளது.
முல்லைத்தீவு – புதுக்குடியிருப்பு பிரதேச செயலக பிரிவிற்குட்பட்ட மந்துவில் பகுதியில் தோட்டக்காணியில் வெங்கணாந்தி பாம்பு ஒன்று நேற்றையதினம் பிடிக்கப்பட்ட சம்பவம் இடம்பெற்றுள்ளது
தோட்டக்காணியை உரிமையாளர் துப்பரவு செய்து கொண்டிருந்தபோது, பாம்பு ஒன்று எதனையோ விழுங்கிய நிலையில் அசைய முடியாது தடுமாறிக் கிடந்துள்ளது.
இதனை அவதானித்த உரிமையாளர் உடனடியாக முல்லைத்தீவு வனஜீவராசிகள் திணைக்கள அதிகாரிகளுக்கு தகவல் வழங்கியதையடுத்து, அவர்கள் சம்பவ இடத்துக்கு வந்து பாம்பினை பாதுகாப்பாக மீட்டு வேறு பகுதியில் விடுவித்துள்ளனர்.
தற்போது மழைக்காலம் நிலவி வருவதால் பாம்புகள் அடிக்கடி வெளிப்புற பகுதிகளுக்கு வரக்கூடிய வாய்ப்பு உள்ளதால், மக்கள் தங்கள் வீடுகளிலும் தோட்டங்களிலும் அவதானமாக இருக்குமாறு அதிகாரிகள் எச்சரிக்கை விடுத்துள்ளனர்.
யாழ்ப்பாணம் – வடமராட்சி – கிழக்கு வெற்றிலைக்கேணி பகுதியில் 44 வயதுடைய குடும்பஸ்தர் இன்று அதிகாலை உயிரிழந்துள்ளார். சம்பவம் குறித்து மேலும் தெரிய வருகையில்,
இன்று அதிகாலை வெற்றிலைக்கேணியில் இருந்து படகுமூலம் கடலுக்கு மீன்பிடி நடவடிக்கைக்காகச் சென்ற குடும்பஸ்தருக்கு திடீர் சுகவீனம் ஏற்பட்டுள்ளது.
குறித்த குடும்பஸ்தர் தனக்கு சுகவீனம் ஏற்பட்டுள்ளதாக தனது மனைவிக்கு தொலைபேசிமூலம் தெரிவித்து உதவிக்கு சிலரை அழைத்துள்ளார்.
உடனடியாக இன்னொரு படகுமூலம் கடலுக்கு உதவிக்கு சென்றவர்கள் குறித்த மீனவரை மீட்டு கரைக்கு கொண்டு வந்ததுடன் வைத்தியசாலையில் அனுமதித்தனர். குறித்த நபரை பரிசோதித்த வைத்தியர் ஏற்கனவே மீனவர் உயிரிழந்ததாக தெரிவித்துள்ளார்.
பிரேத பரிசோதனையின் பின்னர் சடலம் உறவினர்களிடம் ஒப்படைக்கப்படவுள்ளது இரண்டு பிள்ளைகளின் தந்தையான மீனவரின் இழப்பு அப்பகுதியில் பெரும் சோகத்தை ஏற்படுத்தியுள்ளது.
காஸாவில் பிறந்த பெண் குழந்தைக்கு ‘சிங்கப்பூர்’ என அவரின் தந்தை ஹம்தன் பெயர் சூட்டியுள்ளார்.
போர் காலத்தில் சிங்கப்பூரைச் சேர்ந்த அறக்கட்டளை ஒன்று மனிதாபிமான அடிப்படையில் செய்த உதவிகளுக்காக அவர்களை கௌரவிக்கும் விதமாக அந்நாட்டின் பெயரை அவர் சூட்டியுள்ளார்.
இஸ்ரேல்- ஹமாஸ் இடையிலான கடந்த இரண்டு வருடத்திற்கு மேலாக நடைபெற்ற சண்டை, அமெரிக்க ஜனாதிபதி டொனால்ட் ட்ரம்ப் முயற்சியால் முடிவுக்கு வந்துள்ளது.
இஸ்ரேல்- ஹமாஸ் இடையே போர் நிறுத்த உடன்பாடு ஏற்பட்டுள்ளது. பல நாட்டின் தலைவர்கள் முன்னிலையில் அமைதி ஒப்பந்தம் கையெழுத்திடப்பட்டது.
2045ஆம் ஆண்டுக்குள் இலட்சக்கணக்கான மக்கள் விண்வெளியில் வசிப்பார்கள் என பிரபல தொழிலதிபர் ஜெப் பெஜோஸ் தெரிவித்துள்ளார். இத்தாலிய தொழில்நுட்ப வார விழாவில் கலந்து கொண்டு உரையாற்றுகையில் அவர் இதனைக் குறிப்பிட்டுள்ளார்.
அடுத்த ஓரிரு தசாப்தங்களில் இலட்சக்கணக்கான மக்கள் விண்வெளியில் வசிப்பார்கள், இது வேகமாக நடக்கப்போகிறது.
இது தேவை காரணமாக நடக்காது. மக்களாகவே விரும்பி விண்வெளியில் வசிப்பார்கள் என அவர் குறிப்பிட்டுள்ளார்.
இதேவேளை செயற்கை நுண்ணறிவு உள்ளிட்டவை நமது வளர்ச்சியை ஆதரிக்கின்றன எனவும் அவர் சுட்டிக்காட்டினார்.
பிரான்ஸில் இருந்து சுமார் 13 நாடுகளை சைக்கிளில் கடந்து சுமார் 10,000 கிலோமீட்டர் பயணம் செய்த இளைஞர் நேற்று மதியம் யாழ்ப்பாணத்தை வந்தடைந்துள்ளார்.
பாரிஸில் இருந்து யாழ்ப்பாணம் என்ற தலைப்பில் இந்தப் பயணம் மேற்கொள்ளப்பட்டுள்ளது. பிரான்ஸில் வசிக்கும் நல்லூரை சேர்ந்த, 28 வயது இளைஞர் சூரன் என்பவரால் இந்த பயணம் மேற்கொள்ளப்பட்டது.
யாழ்ப்பாணம் வந்தடை பிரான்ஸ் வாழ் இளைஞனுக்கு வரவேற்று அளிக்கப்பட்டது. தனது பயணம் குறித்து ஊடகங்களிடம் பேசிய அவர், “கடந் செப்டம்பர் முதலாம் திகதியன்று பாரிஸிலிருந்து இந்தப் பயணத்தை ஆரம்பித்தேன்.
பிரான்ஸ், ஜெர்மனி, ஒஸ்ரியா, ஸ்லோவாக்கியா, ஹங்கேரி, செர்பியா, பல்கேரியா, துருக்கி, ஜோர்ஜியா, கஜகஸ்தான், உஸ்பெகிஸ்தான், ஆப்கானிஸ்தான் மற்றும் இந்தியா வழியாகப் பயணம் செய்து, இன்று யாழ்ப்பாணத்தை அடைந்துள்ளேன். இதற்காக சுமார் 10,000 கிலோமீட்டர் தூரத்திற்கு சைக்கிளில் பயணித்தேன்.
எனது குடும்பத்துடன் மீண்டும் இணைவது மட்டுமல்லாமல், யாழ்ப்பாணத்தின் கலாச்சார முக்கியத்துவத்தை உலகிற்கு எடுத்துக்காட்டுவதும் எனது நோக்கமாகும்.
யாழ்ப்பாணத்தில் சுற்றுலாவை மேம்படுத்துவதற்கும், உலகளாவிய தமிழ் புலம்பெயர்ந்தோர் தங்கள் தாயகத்துடன் வலுவான உணர்ச்சி மற்றும் கலாச்சார தொடர்புகளைப் பேணுவதற்கு ஊக்கமளிப்பதற்கும் ஒரு அர்த்தமுள்ள வாய்ப்பை உருவாக்க விரும்புவதாக” அவர் மேலும் தெரிவித்துள்ளார்.
தமிழ் சினிமாவின் புகழ் பெற்ற இசையமைப்பாளர்களில் ஒருவரான தேவாவின் சகோதரும், பிரபல இசையமைப்பாளருமான சபேஷ் இன்று (23) காலமானார்.
உடல்நலக்குறைவு காரணமாக சிகிச்சை பெற்று வந்த சபேஷ், இன்று சென்னை ஆழ்வார்திருநகரில் உள்ள இல்லத்தில்உயிரிழந்தார். அவருக்கு வயது 68.
தேவாவின் சகோதரர்களான சபேஷ் மற்றும் முரளி ஆகியோர் சேர்ந்து சபேஷ்-முரளி என்ற இரட்டை இசையமைப்பாளர் குழுவாக பல படங்களுக்கு இசையமைத்துள்ளனர்.
மேலும் இவர்கள் தேவாவின் திரைப்படங்களில் இசை உதவி பணிகளையும் செய்துள்ளனர். அவரது மறைவுக்கு திரையுலக பிரபலங்கள் இரங்கல் தெரிவித்து வருகின்றனர்.
சமுத்திரம், மாயாண்டி குடும்பத்தார், தவமாய் தவமிருந்து, பொக்கிஷம் உள்ளிட்ட படங்களுக்கு சபேஷ் இசையமைத்துள்ளார். சமீபத்தில் தனது சகோதரர் தேவா தேசிய விருது பெறாதது குறித்து சபேஷ் வருத்தம் தெரிவித்திருந்தார் என்பது குறிப்பிடத்தக்கது.
சிவகங்கை மாவட்டத்தில் நடந்த துயர சம்பவம் பெரும் அதிர்ச்சியையும், சோகத்தையும் ஏற்படுத்தியுள்ளது. திருமணமான முதல் வருட தலை தீபாவளியை மகிழ்ச்சியுடன் கொண்டாடிய புதுமணப் பெண் ஒருவர், கணவர் வேலைக்கு புறப்படுவதாக கூறியதைத் தொடர்ந்து ஏற்பட்ட வாக்குவாதத்தால் மனமுடைந்து தூக்கிட்டு தற்கொலை செய்து கொண்டார்.
சிவகங்கை மாவட்டம் எஸ்.புதூர் அருகே உள்ள குன்னத்தூர், களத்துப்பட்டி கிராமத்தைச் சேர்ந்த விவசாயி மச்சக்காளையின் இரண்டாவது மகள் ரூபிகா (21).
கடந்த ஜூலை மாதம் திண்டுக்கல் மாவட்டம் ரெட்டையாம்பட்டியைச் சேர்ந்த பாண்டி என்பவருடன் திருமணம் நடைபெற்றது. பாண்டி திருச்சியில் உள்ள ஒரு தனியார் நிதி நிறுவனத்தில் பணிபுரிந்து வந்தார்.
புதுமணத் தம்பதிகள் தீபாவளியைத் தலை தீபாவளியாக கொண்டாடும் நோக்கில் கடந்த அக்டோபர் 19ம் தேதி ரூபிகாவின் ஊரான களத்துப்பட்டிக்கு வந்தனர்.
குடும்பத்தினர் மற்றும் உறவினர்களுடன் இணைந்து தலைதீபாவளியை மகிழ்ச்சியுடன் கொண்டாடிய பின்னர், பாண்டி நேற்று மீண்டும் பணிக்கு திரும்புவதாக கூறியதில், ரூபிகா அதற்கு எதிர்ப்பு தெரிவித்ததாக கூறப்படுகிறது.
“தலை தீபாவளிக்கு வந்தவுடனேயே ஏன் உடனே வேலைக்கு செல்ல வேண்டும்?” என்ற விவாதம் தம்பதியருக்குள் வாக்குவாதமாக மாறியதாக தகவல்கள் தெரிவிக்கின்றன.
வாக்குவாதத்திற்குப் பிறகு பாண்டி வேலைக்கு புறப்பட்டு சென்றார். இதனால் மன உளைச்சலுக்கு ஆளான ரூபிகா, குடும்பத்தினர் இல்லாத நேரத்தில் வீட்டில் சேலையால் தூக்கிட்டு தற்கொலை செய்து கொண்டார்.
இது குறித்த தகவல் அறிந்த புழுதிபட்டி போலீசார் சம்பவ இடத்துக்கு விரைந்து சென்று ரூபிகாவின் சடலத்தைக் கைப்பற்றி வழக்குப்பதிவு செய்து மேற்கொண்டு விசாரணை நடத்தி வருகின்றனர்.
புதுமணத் தம்பதிகளின் மகிழ்ச்சி நிறைந்த தங்கள் தலைதீபாவளிக் கொண்டாட்டம், இப்படி துயரமாக மாறியிருப்பது கிராம மக்களிடையே வேதனையை ஏற்படுத்தியுள்ளது.
தென் கொரியாவின் ஓசான் நகரில், 20 வயதுடைய ஒரு பெண் கரப்பான் பூச்சியை கொல்ல முயற்சித்ததில், தனது அடுக்குமாடிக் குடியிருப்பில் தீ விபத்து ஏற்பட்டது.
கீழ்தள வணிக வளாகங்கள் மற்றும் மேல்தளங்களில் 30க்கும் மேற்பட்ட குடியிருப்புகள் கொண்ட இந்த அடுக்குமாடியில், அந்த பெண் தற்காலிக ஃபிளேம்த்ரோவை பயன்படுத்தி பூச்சியை கொல்ல முயன்ற போது தீ விரைவாக பரவி குடியிருப்பை ஆழமாக பாதித்தது.
இந்த தீ விபத்தில், அந்தக் குடியிருப்பில் வசித்து வந்த 30 வயது சீனப் பெண் ஒருவர் தீ மற்றும் அதிக புகை காரணமாக சிக்கி, மருத்துவமனையில் அனுப்பப்பட்டாலும் உயிரிழந்தார்.
குறைந்தபட்சம் 8 பேர் பாதிக்கப்பட்டுள்ளதாகவும், தீ விபத்திற்கும் அலட்சியத்திற்கும் பொறுப்பாக அந்த இளம் பெண் மீது வழக்கு பதிவு செய்யப்பட்டுள்ளதாக போலீசார் தெரிவித்துள்ளனர்.
சமூக ஊடகங்களில், வீடுகளில் பயன்படுத்தப்படும் தீவிர கரப்பான் பூச்சி கொல்லும் முறைகள் அதிகமாக பிரபலமாகி வருகின்றன.
இதேபோல் முன்னொரு சில சம்பவங்களிலும் தீ விபத்து ஏற்பட்டுள்ளது. 2018ஆம் ஆண்டு ஆஸ்திரேலியாவில், 2023ஆம் ஆண்டு ஜப்பானில் அதேபோல் முயற்சிகள் தீ விபத்திற்கான காரணமாக இருந்ததாக பதிவாகியுள்ளது.
விருதுநகர் மாவட்டம் சிவகாசி அருகே பழைய வெள்ளையாபுரம் கிராமத்தில் வீரமணி குடும்பத்திடம் நிகழ்ந்த துயர சம்பவம் அப்பகுதி மக்களை அதிர்ச்சியில் ஆழ்த்தியுள்ளது.
வீரமணி மகள் பவானி (17), சிவகாசியில் உள்ள நர்சிங் கல்லூரியில் படித்து வந்தார். கடந்த 18-ஆம் தேதி வீட்டில் தூய்மைப் பணிகள் நடக்கும் போது, கனமழையால் வீட்டின் பக்க மண் சுவர் இடிந்து விழுந்தது.
இந்த இடிபாட்டில் பவானி கட்டிட இடிபாடுகளுக்குள் சிக்கி படுகாயம் அடைந்தார். உடனடியாக பெற்றோர் மற்றும் அக்கம்பக்கத்தினரால் மீட்கப்பட்ட அவர், மேல் சிகிச்சைக்காக மதுரை அரசு மருத்துவமனையில் சேர்க்கப்பட்டார்.
தீவிர சிகிச்சை அளிக்கப்பட்டும் பவானி உயிரிழந்தார். திருத்தங்கல் காவல்துறை சம்பவம் குறித்து வழக்குப்பதிவு செய்து விசாரணை நடத்தி வருகிறது.
இந்நிலையில், அப்பகுதி மக்கள் மாணவியின் குடும்பத்திற்கு அரசு மற்றும் மாவட்ட நிர்வாகம் உரிய நிவாரணம் வழங்க வேண்டும் என கோரிக்கை விடுத்துள்ளனர்.
இராணி பேர்த்த பதக்கம் வழங்கும் விழாவானது சுவிட்சர்லாந்து- பேர்ண் மேற்குப்பகுதியில் Bienzgut, Heuboden என்ற இடத்தில் மிகச்சிறப்பாக நடைபெற்றது.
இந்தப் பதக்கம் வழங்கும் நிகழ்வானது தற்போது இரண்டு ஆண்டுகளுக்கு ஒருமுறை நடைபெறுகின்றது. 2025 ஆம் ஆண்டு இந்தப் பதக்கமானது இருவருக்கு கிடைத்துள்ளது.
இந்தநிலையில், இணையர் நந்தினி முருகவேள். சுவிற்சர்லாந்து தலைநகர் பேர்ண் நகரசபையின் சமுதாய அரசபணியாளர்களில் ஈழத்தமிழரான பேர்ண் வள்ளுவன் பள்ளி ஆசிரியை நந்தினி முர்கவேளுக்கு பேர்ண் நகரின் 2025 ஆம் ஆண்டிற்கான முடியரசி (இராணி) என்ற பட்டம் வழங்கி நகரசபை மதிப்பளித்துள்ளது.
இவர் பேர்ண் நகரப்பகுதியிலும், பேரண்மேற்குப்பகுதியிலும், தனது சமுகாயத்தின் ஒருங்கிணைப்புக்காக அவர் அயராது பாடுபடுகிறார்.
சமூக-பண்பாட்டு நடவடிக்கைகளில் ஓர் பாலமாக தனது சமுதாயத்துடன் இருக்கின்றார்.பெண்களுக்கான பல திட்டங்களுக்கு பொறுப்பாகக் கடமையாற்றகின்றார். வயோதிபர்களுக்குப் பொறுப்பாகக் கடமையாற்றுகின்றார்.
பொதுவாக பேர்ண் நகரப்பதியிலும் பேர்ண் மேற்குப்பகுதியிலும் அவர் ஓர் முக்கியமான ஆளாக தமிழ்மக்களுக்கும்,ஏனையோருக்கும் கடமையாற்றுகின்ற ஓர் சிறந்த சமூகசேவையாளராகவும், காணப்படுகின்றார்.
இதற்கு அப்பால் தேவைப்படும் இடங்களில் மகிழ்ச்சியாக இலவசமாக தனது சேவையை தமிழ்மக்களுக்கு ஆற்றி வருகின்றார். தனது கணவருடன் பேர்ண் வள்ளுவன் பள்ளியையும் நடத்தி வருகின்றார்.
இவ்வாறான பல செயற்பாடுகளையும் திறமையாக செயற்படுத்தி வருவதால் அவரை இந்த ஆண்டு நாங்கள் தெரிவு செய்திருக்கின்றோம் என்று இவ் விழாவினை ஏற்பாடு செய்திருந்த நகரசபை அமைப்பின் தலைவர் தெரிவித்திருந்தார்.
அத்தோடு, பீட்டர் பிளேசர் என்பவர் பல ஆண்டுகளாக மக்களுக்குத் தேவையான பல்வேறு திட்டங்களில் அயராது தன்னிச்சையாக செயற்பட்டு வருகின்றார்.
இவர் SP கட்சியின் ஓர் முக்கியமான உறுப்பினர்.இவரின் பிரதான பணிகளாக முக்கியமான திட்டங்களை உருவாக்குதல்,அவற்றை நடைமுறைப்படுத்தல். இவை போன்ற மக்களுக்குத் தேவையான திட்டங்களை நீண்டகாலமாக விருப்புடன் செயற்படுத்தி வருகின்றார்.
இவ்வாறான மக்களுக்குத் தேவையான ஓர் சிறந்த மனிதரையும் தெரிவு செய்திருக்கின்றோம் என நகரசபை அமைப்பின் தலைவர் தெரிவித்துள்ளார்.
பேர்ண் மேற்குப்பகுதியில் அனைத்து சமூகசேவையாளர்களுக்கும் பொறுப்பாகக் கடமையாற்றும் VBG அரச அமைப்பின் மேலதிகாரி ஸ்டெபானி ஷார் (Steffi) தனது உரையில் 2000 ஆம் ஆண்டு சுவிசிற்கு வருகைதந்த நந்தினி மிக விரைவாக யேர்மன்மொழியைக் கற்று ஏனைய கற்கை நெறிகளையும் யேர்மன் மொழியில் கற்று முடித்தார்.
2006 ஆம் ஆண்டிலிருந்து இன்றுவரை அரசாங்க பல்பண்பாட்டு மொழிபெயர்ப்பாளராக கடமையாற்றகின்றார்.இவர் பாடசாலை வைத்தியசாலை, நீதிமன்றம், பொலிஸ்துறை பெண்கள் பாதுகாப்பு விடுதி எனப் பல்வேறு அரச நிறுவனங்களில் மொழிபெயர்ப்பை மேற்கொள்கின்றார்.
அத்துடன் ஓர் கணக்காய்வாளராகவும் கடமையாற்றுகின்றார். 2010 ஆம் ஆண்டிலிருந்து சுவிஸ் நாட்டு அரசாங்கத்தால் அறிமுகம் செய்யப்பட்ட கர்ப்பிணிப் பெண்களுக்கான மகப்பேற்றுக்கான ஆயத்தங்களை மேற்கொள்ளும் வகுப்புக்களுக்கான ஓர் ஒருங்கிணைப்பாளராகவும், மொழிபெயர்ப்பாளராகவும் கடமையாற்றுகின்றார்.
அதே ஆண்டில் உருவாக்கப்பட்ட பெண்களுக்கான கலந்துரையாடல் என்னும் திட்டத்திற்கு பொறுப்பாக கடமையாற்றவதுடன் வயோதிபர்களுக்கான பல திட்டங்களுக்குப் பொறுப்பாகக் கடமையாற்றுகின்றார்.அத்துடன் பேர்ண் மேற்குப் பகுதியின் சமூகசேவையாளராகவும்,ஆலோசகராகவும், செயலாளராகவும் என்னுடன் கடமையாற்றுகின்றார்.
பேர்ண் வள்ளுவன் பள்ளியின் ஆசிரியையாகவும் கடமையாற்றுகின்றார்.இவர் எந்த வேலையை செய்தாலும் முழுமனதுடன், நம்பிக்கையுடன்,மேற்கொள்ளார்.
இவர் அதிகளவு மணித்தியாலங்களை தன்னுடைய நாட்டு மக்களுக்காக இலவசமாக ஆற்றுவார். இவரின் சேவை பெருமைக்குரியதும், பாராட்டுக்குமுரியதாகும். இவருடைய குடும்பம் மிக அழகானதாகும் எனத் தெரிவித்துள்ளார்.
அத்தோடு,செந்தமிழ் அருட்சுனையரும், சமய உளவள ஆற்றுப்படுத்துநருமாகிய தர்மலிங்கம் சசிக்குமார் கருத்துத் தெரிவிக்கையில், இணையர் நந்தினி முருகவேள் எங்களுடன் நீண்டகாலமாக இணைந்து பல திட்டங்களில் கடமையாற்றுகின்றார்.
எங்களுடைய ஓர் முக்கியமான திட்டமாக எதிர்காலத்தில் சுவிட்சர்லாந்து பேர்ன் மாநிலம் வாழும் தமிழர்கள் முதுமையில் இணக்கமாக மகிழ்வுடன் வாழக்கூடிய ஓர் மூதாளர் இல்லம் அமைப்பது தமிழ்க்குடில் தொடர்பானதாகும்.
இணயர் நந்தினி முருகவேள் தனது உரையில், இன்று நான் பேர்ண் நகரசபையால் மதிப்பளிப்பினைப் பெற்றுக்கொள்கின்றேன். என்றால் அதற்கு பலர் காரணம். முதலில் என்னுடைய பெற்றோர்கள். என்னுடைய தந்தை கிருஸ்ணசாமி,என்னுடைய தாயார் அன்னலட்சுமி.
இலங்கையில் சிறுவயதிலிருந்து என்னுடைய பல்கலைக்கழக கற்கைநெறி வரை என்னுடன் அயராது பாடுபட்டவர்கள். என்னுடைய அப்பாவும் ஓர் சிறந்த சமுதாயப்பணியாளர்.
என்னுடைய 5 சகோதரிகளும் அன்றும்,இன்றும், என்றும் எனக்கு ஊக்குவிப்பாக,ஒத்துழைப்பாக இருக்கிறார்கள்.அடுத்து என்னுடைய கணவரும்,இரண்டு பிள்ளைகளும், என்னுடன் கடமையாற்றும் எனது தோழி Steffi என்னுடைய தனிப்பட்ட வாழ்க்கையிலும், எனது வேலையிலும் மிகவும் உதவியாக இருப்பார் எனத் தெரிவித்துள்ளார்.
