டெல்லியில் ஒரே குடும்பத்தை சேர்ந்த 11 பேர் சடலமாக கண்டெடுக்கப்பட்ட சம்பவத்தில் சாமியார் ஒருவருக்கு தொடர்பு இருப்பது தெரியவந்துள்ளது.

டெல்லி புராரி பகுதியில் உள்ள ஒரு வீட்டிலிருந்து 11 சடலங்கள் கண்டெடுக்கப்பட்டது, அந்த வீட்டில் பொலிஸ் விசாரணையில் நிறைய கடிதங்கள், டைரிகள் கைப்பற்றப்பட்டுள்ளது.

அதில் எப்படி தற்கொலை செய்தால் மோட்சம் கிடைக்கும், எந்த நேரத்தில் தற்கொலை செய்ய வேண்டும் என்றெல்லாம் எழுதப்பட்டிருந்தது. அத்துடன் அவர்களது குடியிருப்பில் இருந்து வெளியே துருத்தியபடி 11 குழாய்கள் இருந்ததும் கண்டுபிடிக்கப்பட்டது.

இந்நிலையில் துணி துவைக்கும் இடத்தில் செல்போன் ஒன்று சைலண்ட் மோடில் இருந்துள்ளது, அதை சுவற்றுடன் டேப் போட்டு ஒட்டி வைத்துள்ளனர்.

அதாவது, முக்தி அடையும் சடங்கிற்கு செல்போன் ஆகாது, அதை பக்கத்தில் வைத்துக்கொள்ளக்கூடாது என சாமியார் ஒருவர் சொல்லி இருக்கிறார்.

மேலும் டைரி குறிப்பிலும், நல்ல பூஜை செய்து கடவுளுடன் ஐக்கியம் ஆனவர்கள், உங்களுக்கு தூக்கு மூலம் மரணம் வராது, அப்படி சடங்கும் செய்யும் பட்சத்தில் தவறாக ஏதும் நடந்தால் கடைசி நேரத்தில் சாமியார் வந்து காப்பாற்றுவார் என குறித்த சாமியார் கூறியதாகவும் எழுதப்பட்டுள்ளது.

எனவே சாமியாருடனான செல்போன் உரையாடல் தொடர்பான ரெக்கார்டுகள் கைப்பற்றப்பட்டுள்ளன, அவரை தேடி கண்டுபிடிக்கும் முயற்சியில் பொலிசார் ஈடுபட்டுள்ளனர்.

தமிழகத்தில் மனைவியின் நடத்தையில் சந்தேகமடைந்த கணவன் 2 வயது பெண் குழந்தையை கிணற்றில் வீசி கொன்ற சம்பவம் பரபரப்பை ஏற்படுத்தியுள்ளது.

விழுப்புரத்தின் கள்ளக்குறிச்சி அருகே 60 அடி ஆழமுள்ள தரை கிணறு உள்ளது, இங்கே நேற்று முன்தினம் 2 வயது மதிக்கத்தக்க பெண் குழந்தை ஒன்று சடலமாக மிதந்துள்ளது.

இதை பார்த்த ஊர்மக்கள் உடனடியாக கீழ்குப்பம் பொலிசுக்கு தகவல் அளித்தனர், விரைந்து வந்த அதிகாரிகள் குழந்தையை மீட்டு அரசு மருத்துவமனைக்கு அனுப்பிவைத்தனர்.

விசாரணை நடத்தியதில் அருள்மணி- அஞ்சலை தம்பதியின் குழந்தை என தெரியவந்தது.

அவர்களது வீட்டுக்கு சென்ற போது வீடு பூட்டியிருந்ததுடன், அருள்மணி காட்டுப்பகுதியில் பதுங்கியிருப்பதாக பொலிசுக்கு தகவல் கிடைத்தது, உடனடியாக அவரை மடக்கி பிடித்தனர்.

விசாரணையில் அவர் கூறியதாவது, எனக்கும் அஞ்சலைக்கும் மூன்று ஆண்டுகளுக்கு முன்னர் திருமணம் நடந்தது, 2 வயதில் அனுசியா என்ற குழந்தையும் உண்டு.

ஆனால் என் மனைவியின் நடத்தையில் சந்தேகம் இருந்ததால் அடிக்கடி எங்களுக்குள் சண்டை வந்தது.

எனவே கடந்த 3 நாட்களுக்கு முன் மனைவி கோபித்துக்கொண்டு குழந்தையுடன் அவளது அம்மா வீட்டுக்கு சென்றுவிட்டார்.

அங்கே சென்று சண்டையிட்டேன், குழந்தையை பார்க்கும்போதெல்லாம் எனக்கு பிறந்ததாக இருக்காது என ஆத்திரம் வந்தது. இதனால் குழந்தையை கிணற்றில் வீசி கொன்றுவிட்டேன் என தெரிவித்துள்ளார்

இந்திய தலைநகர் டெல்லியை உலுக்கிய 11 பேர் தற்கொலை சம்பவத்தில் தோண்ட தோண்ட திடுக்கிடும் தகவல்கள் வெளிவந்த வண்ணம் உள்ளது.

இதில் ஒன்று அவர்களது குடியிருப்பில் இருந்து வெளியே துருத்தியபடி 11 குழாய்களை விசாரணை அதிகாரிகள் கண்டுபிடித்துள்ளனர்.

ஆனால் அந்த குழாய்களில் எதுவும் தண்ணீர் செல்லும்படி இணைக்கப்படவில்லை. புராரி குடும்பம் தற்கொலை செய்து கொள்வதற்கு முன்னர் எழுதிய டைரி குறிப்புகள் வெளியாகி அதிர்வலைகளை ஏற்படுத்திய நிலையில், தற்போது 11 குழாய்களின் மர்மம் குறித்து விசாரணை அதிகாரிகள் குழப்பத்தில் உள்ளனர்.

தலைநகர் டெல்லியை உலுக்கிய இந்த கூட்டு தற்கொலை சம்பவத்தில் 77 வயது நாராயன் தேவி என்பவர் மட்டுமே கழுத்து நெரிபட்டு இறந்துள்ளதாக பொலிஸ் தரப்பு தெரிவிக்கின்றது.

எஞ்சிய 10 பேரும் கழுத்தில் கயிறு கட்டி தற்கொலை செய்து கொண்டுள்ளனர். மேலும் தற்கொலை செய்து கொண்ட 57 வயது பிரதிபாவின் மகள் 33 வயதான பிரியங்காவுக்கு கடந்த மாதந்தான் நிச்சயதார்த்தம் முடிந்துள்ளது.

விசாரணை அதிகாரிகளால் கைப்பற்ற டைரி குறிப்புகள் மற்றும் கடிதங்களில், அவர்கள் திட்டமிட்டு நாள் குறித்து தற்கொலை செய்து கொண்டது நிரூபணமாகியுள்ளது. ஆனால் மர்மமான அந்த குழாய்கள் தொடர்பில் விசாரணை அதிகாரிகள் குழம்பிப்போயுள்ளனர்.

11 குழாய்களில் 4 நேராகவும், நான்கு வளைவாகவும், ஒரு குழாய் தனியாகவும் பொருத்தப்பட்டுள்ளது.

இது அவர்களின் ஆவி வெளியே செல்ல அமைக்கப்பட்டிருக்கலாம் என அப்பகுதி மக்கள் சிலர் சந்தேகம் எழுப்பியுள்ளனர்.

இந்த கூட்டு தற்கொலை சம்பவத்தில் சிக்காத நாராயண் தேவியின் இன்னொரு மகனும் மகளும் குறித்த தகவல் கேட்டு அதிர்ச்சியில் உள்ளதாக பொலிஸ் தரப்பு தெரிவித்துள்ளது.

டெல்லியில் ஒரே குடும்பத்தை சேர்ந்த 11 பேர் வீட்டில் இறந்து கிடந்த நிலையில் அவர்கள் எழுதி வைத்த முழு டயரி குறிப்புகளின் விவரங்கள் வெளியாகியுள்ளது.

டெல்லி புராரி பகுதியில் ஒரே குடும்பத்தை சேர்ந்த 11 பேர் சடலமாக கண்டெடுக்கப்பட்டனர்.

அவர்கள் வீட்டிலிருந்து பொலிசார் கைப்பற்றிய டயரியில் எப்படி தற்கொலை செய்து கொள்வது? எந்த நாளில் செய்யலாம்? உள்ளிட்ட பல்வேறு குறிப்புகளை இறப்பதற்கு முன் அவர்கள் எழுதி வைத்துள்ளதாகக் கூறப்படுகிறது.

அதில், சொர்க்கத்தை அடையும் வழி என்று கடந்த ஆண்டு நவம்பர் மாதம் எழுதப்பட்டுள்ளது. மேலும் தற்கொலை செய்வது வியாழக்கிழமை அல்லது ஞாயிற்றுக்கிழமைதான் செய்ய வேண்டும்.

தற்கொலை செய்யும் போது, விளக்குகள் அனைத்தும் குறைந்த வெளிச்சத்தில் இருக்க வேண்டும். நள்ளிரவு 12 மணியில் இருந்து ஒரு மணிக்குள்தான் தற்கொலை இருக்க வேண்டும். தற்கொலை செய்யும் போது, அனைவரின் கண்களும் கட்டப்பட வேண்டும், பூஜ்ஜியத்தைத் தவிரவேறு எதையும் பார்க்கக் கூடாது

தற்கொலைக்குப் புடவை அல்லது கயிறு பயன்படுத்தலாம். வீட்டில் இருக்கும் பாட்டியை தரையில் கீழே படுக்கவைத்து தற்கொலை செய்யவைக்கலாம் என்று எழுதப்பட்டுள்ளது.

இதுதவிர கடைசி நாளுக்கு முன்பு 7 நாட்கள் பூஜை செய்ய வேண்டும், சடங்குகளை முறையாக கடைபிடிக்க வேண்டும் என்றும் இதற்கு இடையில் ஆத்மா வெளியே வந்தால், உடனடியாக சாக வேண்டும் என்றும் எழுதப்பட்டுள்ளது.

இவை அனைத்தும் கடந்த மாதம் 26ம் திகதி எழுதப்பட்டுள்ளது. மேலும், ஜூன் 30ம் திகதி இரவு அனைவரும் கடவுளைச் சந்திக்கச் செல்கிறோம். தற்கொலை செய்யும் போது அனைவரும் நாற்காலியைப் பயன்படுத்த வேண்டும். கைகள், கால்கள், வாய்,கண்கள் கட்டப்பட்டு இருந்தால்தான் சொர்க்கத்தை அடைய முடியும் எனவும் அந்த டைரியில் குறிப்பிடப்பட்டுள்ளது.

அதுமட்டுமல்லாமல் 11 பேரும் தாங்கள் இறந்தபின் தங்களுடைய கண்களைத் தானமாக வழங்கிவிடுங்கள் எனவும் எழுதிவைக்கப்பட்டுள்ளது.

மத்திய பிரதேசத்தில் 8 வயது சிறுமி துஸ்பிரயோகம் செய்யப்பட்டது தொடர்பாக, என் மகன் குற்றவாளி என நிரூபிக்கப்பட்டால் துக்கு தண்டனை வழங்குங்கள் என குற்றவாளியின் தந்தை கூறியுள்ளார்.

மத்தியப்பிரதேசத்தில் கடந்த ஜூன் 26-ம் தேதி பள்ளி சென்ற 8 வயது சிறுமி, தந்து தந்தையின் வருகைக்காக பள்ளியின் வெளியே காத்துக்கொண்டிருந்துள்ளார். அப்போது இருசக்கர வாகனத்தில் வந்த, இரு காமுகர்கள் சிறுமியை கடத்தி பாலியல் துஷ்பிரயோகம் செய்ததோடு, உண்மையை வெளியில் சொல்லிவிட கூடாது என்பதற்காக கழுத்தையும் அறுத்து, லட்சுமண் தார்வாஜா பகுதியில் நின்று கொண்டிருந்த பேருந்து ஒன்றில் வீசி சென்றுள்ளனர்.

நீண்ட நேரமாகியும் சிறுமி வீடு திரும்பாததால், பயத்தில் உறைந்த பெற்றோர்கள் காவல்நிலையத்தில் புகார் அளித்துள்ளனர். இதனைடிப்படையில் காவல்துறையினர் தீவிர விசாரணை மேற்கொள்ளும்பொழுது, பேருந்து ஒன்றிலிருந்து குழந்தை அழும் சத்தம் கேட்டுள்ளது.

அங்கு ரத்த வெள்ளத்தில் மிதந்த குழந்தையை மீட்டு மருத்துவமனைக்கு அனுப்பி வைத்தனர். 3 மணி நேர சிகிச்சைக்கு பின்னர் செய்தியாளர்களை சந்தித்த மருத்துவர், டெல்லியை உலுக்கிய நிர்பயா வழக்கு போன்றே சிறுமியும் சிதைக்கப்பட்டிருப்பதாக தெரிவித்தார்.

இதனையடுத்து சமூக ஆர்வாளர்கள், அரசியல் தலைவர்கள், பொதுமக்கள் என பலரும் குற்றவாளிக்கு எதிராக கடும் கண்டனங்களை தெரிவிக்க ஆரம்பித்தனர். இதற்கிடையில் விரைந்த செயல்பட்ட காவல்துறையினர் குற்றவாளிகள், இர்பான் மற்றும் அவரது நண்பர் ஆசிப் ஆகியோரை கைது செய்து சிறையில் அடைத்தனர்.

இந்த நிலையில், எனது மகன் குடிகாரன். அவன் ஒரு அப்பாவி என்று நான் நினைக்கவில்லை. அவன் மீது தவறு உறுதி செய்யப்பட்டால் தூக்கு தண்டனையை நிறைவேற்றுங்கள் என குற்றவாளியின் தந்தை ஆவேசமாக கூறியுள்ளார்.

முன்னதாக சிறுமியின் தந்தை, தனக்கு இழப்பீடு எதுவும் வேண்டாம் குற்றவாளிக்கு தூக்குத்தண்டனை வழங்கினால் போதும் என கூறியிருந்தது குறிப்பிடத்தக்கது.

கேரளாவில் கல்லூரி ஒன்றில் புதியவர்களை வரவேற்கும் வாசகம் எழுதுவதில் ஏற்பட்ட மோதலில் எஸ்எப்ஐ மாணவர் ஒருவர் கொல்லப்பட்டார்.

எர்ணாக்குளம் மகாராஜா கல்லூரி வளாக சுவரில் புதிய மாணவர்களை வரவேற்கும் வாசகங்கள் எழுதுவதில் போட்டி நிலவியதாகக் கூறப்படுகிறது.

இந்த மோதல் கலவரமாக வெடித்த நிலையில் இளங்கலை இரண்டாம் ஆண்டு படிக்கும் எஸ்எப்ஐ மாணவர் சங்கத்தைச் சேர்ந்த மாணவர் அபிமன்யூ கேம்பஸ் முன்னணி மாணவர்களால் அடித்துக் கொல்லப்பட்டார்.

இன்னொரு எஸ்எப்ஐ உறுப்பினரான அர்ஜுன் (19) மோதலில் படுகாயங்களுடன் கவலைக்கிடமான நிலையில் மருத்துவமனையில் சேர்க்கப்பட்டுள்ளார்.

கேம்பஸ் முன்னணி, தேசிய வளர்ச்சி முன்னணி சங்கங்களைச் சேர்ந்த மூன்று மாணவர்கள் இச்சம்பவம் தொடர்பாக கைது செய்யப்பட்டுள்ளனர்.

மீதமுள்ள சந்தேகப்படும்படியான நபர்களை தேடும் பணி தொடர்ந்து நடைபெற்று வருவதாக பொலிசார் தெரிவித்துள்ளனர்.

திருநெல்வேலி மாவட்டத்தில் அரசு பேருந்து ஓட்டுநராக பணியாற்றும் முத்துக்கிருஷ்ணன் என்பவர் விபத்தில் இறந்துபோனார்.

தகவல் அறிந்த பொலிசார் அவரது உடலை மீட்டு மதுரை ராஜாஜி அரசு மருத்துவமனைக்கு அனுப்பி வைத்தனர். இறந்துபோன முத்துகிருஷ்ணனின் மனைவி சந்திரா கர்ப்பமாக இருந்துள்ளார்.

இதனிடையே மரணமடைந்த முத்துக்கிருஷ்ணின் இரண்டு கண்களும் உயிர்த் துடிப்பிலிருப்பதையறிந்த மருத்துவர்கள் உடனடியாக அவரது மனைவி சந்திராவைத் தொடர்புகொண்டு முத்துக்கிருஷ்ணனின் இரண்டு கண்களையும் தானமாகக் கேட்டிருக்கிறார்கள்.

கணவனைப் பறி கொடுத்த சோகத்திற்கிடையே சந்திராவும் அதற்குச் சம்மதித்து, தனது கண்வரின் கண்களை தானமாக வழங்கியுள்ளார்.

நான்கு நாட்களே பிரசவத்திற்கு உள்ள நிலையில், அடுத்தவர் வாழ்வில் ஒளி விளக்கேற்றி வைத்த அவரின் தானக் கொடை அந்தப் பகுதியினரை நெகிழச் செய்திருக்கிறது.

கேரளாவில் 5 பாதிரியார்களால் மிரட்டி பாலியல் பலாத்காரத்திற்கு உள்ளாக்கப்பட்டதாக கூறி சமூக வலைதளங்களில் வைரலாகும் புகைப்படம் ஒரு மருத்துவரது என தகவல் வெளியாகியுள்ளது.

கேரளாவில் பத்தனம்திட்டா பகுதியில் குடியிருக்கும் மருத்துவர் அஞ்சு ராமச்சந்திரன் என்பவருக்கு கேரள பாதிரியார்களின் லீலைகள் மிகவும் தாமதமாகவே தெரியவந்துள்ளது.

அதுவும் பாதிரியார்களால் சீரழிக்கப்பட்ட பெண் என இவரது புகைப்படம் சமூக வலைதளங்களில் பலரது கவனத்தையும் ஈர்த்த பின்னரே.

ஜூன் 25 ஆம் திகதி இவரது முன்னாள் சக மருத்துவர் ஒருவர் தொலைபேசியில் அழைத்து குறித்த புகைப்பட விவகாரத்தை தெரிவித்தபோது, உண்மையில் மருத்துவர் அஞ்சு ராமச்சந்திரன் அதிர்ச்சியில் உறைந்துபோயுள்ளார்.

இவர் மட்டுமல்ல, இவரது கணவருக்கும் குறித்த பாதிரியார்களின் புகைப்படங்களுடன் அஞ்சு ராமச்சந்திரன் புகைப்படமும் இணைக்கப்பட்டு ஒரு வாட்ஸ் ஆப் தகவலும் கிடைத்துள்ளது.

மருத்துவர் அஞ்சு ராமச்சந்திரனுக்கு இவ்வாறு புகைப்பட சிக்கல் ஏற்படுவது இது முதன் முறையல்ல.

கடந்த 2017 ஆம் ஆண்டு இவரது பேஸ்புக் பக்கத்தில் இருந்த புகைப்படத்தை எடுத்து அதன் தலைப்பகுதியை பயன்படுத்தி ஒரு ஆபாச புகைப்படத்துடன் இணைத்து சமூக வலைதளத்தில் வெளியிடப்பட்டது.

பின்னர் அதே புகைப்படம் கேரளாவுக்கு கிடைத்த புது ஆபாச நடிகை என்ற பெயரில் பலரது கவனத்தையும் ஈர்த்துள்ளது.

சில மாதங்களுக்கு முன்னர் பொலிசில் சிக்கிய ஆபாச நடிகையின் உரையாடல் என்ற பெயரில் இவரது புகைப்படத்தை இணைத்து வீடியோ ஒன்று சமூக வலைதளத்தில் வைரலாகியுள்ளது.

இதனால் கடுமையான மன உளைச்சலுக்கு உள்ளான மருத்துவர் அஞ்சு ராமச்சந்திரன் உடனடியாக பொலிசாருக்கு தகவல் அளித்துள்ளதுடன் சைபர் பிரிவினருக்கும் புகார் அளித்துள்ளார்.

இந்த விவகாரம் இத்துடன் முடிவுக்கு வரும் என நம்புவதாக தெரிவித்துள்ள மருத்துவர் அஞ்சு, இதுபோன்ற விவகாரங்களால் பேஸ்புக்கில் உள்ள அனைத்து தனியான புகைப்படங்களையும் தாம் அகற்றியுள்ளதாகவும் தெரிவித்துள்ளார்.

டெல்லியில் ஒரே வீட்டிற்குள் 11 பேர் தற்கொலை செய்து கொண்ட விவகாரத்திற்கு மத நம்பிக்கை காரணமா என பொலிசார் விசாரணை நடத்தி வருகிறார்கள்.

புராரி பகுதியில் 2 அடுக்குகளை கொண்ட வீட்டில், பாவனேஷ் மற்றும் அவரது சகோதரர் லலித் பாட்டியா ஆகியோர் குடும்பத்துடன் வசித்து வந்தனர்.

பாவனேஷ் பலசரக்கு கடையும், லலித் பாட்டியா தச்சுவேலையும் செய்து வந்துள்ளனர். நேற்று காலை 7.30 மணி வரை ஆகியும் கடை திறக்கப்படாததால், அருகே உள்ளவர்கள் பாவனேஷ் வீட்டு கதவை தட்டியுள்ளனர். தகவல் அறிந்து வந்த பொலிசார் கதவை உடைத்து பார்த்தபோது 11 பேர் இறந்து கிடந்தனர்.

பாவனேஷ் தாய் நாராயன் தேவி கழுத்து அறுக்கப்பட்டு தரையில் இறந்து கிடந்தார். அவரது மகள் பிரதீபா, இரு மகன்கள் பாவனேஷ் மற்றும் லலித் பாட்டியா, பாவனேஷ் மனைவி சவிதா, அவரது 3 குழந்தைகள் மீனு, நிதி, துரவ் மற்றும் லலித் பாட்டியாவின் மனைவி டினா, மகன் ஷிவம் ஆகியோர் கண்கள், கால்கள் கட்டிய நிலையில் தூக்கில் தொங்கியபடி சடலமாக கிடந்தனர்.

வீட்டில் உள்ள பொருட்கள், பெண்கள் அணிந்திருந்த நகைகள் அனைத்தும் அப்படியே இருந்தது. கொள்ளையடிக்கும் நோக்கில் இச்சம்பவம் நடைபெறவில்லை என முடிவுக்கு வந்த பொலிசார் வீட்டிலிருந்து கைப்பற்றப்பட்டுள்ள சில குறிப்புகளின் அடிப்படையில், குடும்பத்தினர் அனைவரும் ஒட்டுமொத்தமாக குறிப்பிட்ட மதநம்பிக்கையை பின்பற்றியது தெரியவந்துள்ளது.

அந்த வீட்டில் கைப்பற்றப்பட்ட குறிப்பில், வாய், கண்கள், கைகளை கட்டிக்கொண்டு தற்கொலை செய்து கொண்டால் பயத்தை வென்று விடலாம், ஆலமரத்தை ஏழு நாட்கள் பயபக்தியுடன் வழிபடுங்கள், யாராவது வீட்டுக்கு வந்தால் அடுத்தநாள் இதை செய்யுங்கள் என்று குறிப்பிடப்பட்டிருந்ததாக பொலிசார் தெரிவித்துள்ளனர்.

இதனிடையே குடும்பத்தினர் வளர்த்து வந்த நாய் மட்டும், மாடியில் கொண்டுபோய் விடப்பட்டுள்ளது.

கீழே இருந்த நாயை கொலையாளி மேலே கொண்டுபோய் விட்டிருக்கலாம் என்றும் பொலிசார் சந்தேகிக்கின்றனர்.

பொலிசார் கூறுகையில், இந்த குடும்பத்தை சேர்ந்த யாரோ மூவர் தற்கொலை செய்ய முடிவெடுத்துள்ளனர், ஆனால் அதன் பின்னர் குடும்பத்தினரை கொல்ல திட்டமிட்டுள்ளதாக தெரிகிறது.

நாயை மாடியில் கொண்டு போய் விட்ட நபரின் கைரேகையை சேகரித்துள்ளோம், இதனை ஆய்வு செய்தபின்னரே அது யார் என்பது தெரியவரும் என கூறியுள்ளனர்.

மதநம்பிக்கையா, கடன்தொல்லையா அல்லது வேறு எதாவது பிரச்சனைக்காக மொத்த குடும்பத்தாரும் தற்கொலை செய்து கொண்டனரா என்று பொலிசார் விசாரணை மேற்கொண்டு வருகின்றனர்.

அந்த குடும்பத்தை சேர்ந்த யாரோ ஒருவருக்கு ஏற்பட்ட மனஉளைச்சல் காரணமாக மொத்த குடும்பத்தையும் கொலை செய்து தானும் தற்கொலை செய்து கொண்டாரா என்ற கோணத்திலும் விசாரணை நடத்தப்பட்டு வருகிறது.