திருகோணமலை – கந்தளாய் பொலிஸ் பிரிவுக்குட்பட்ட பகுதியில் நிறுத்தி வைக்கப்பட்டிருந்த லொறியொன்றுக்கு அடையாளம் தெரியாத நபர்களினால் தீவைக்கப்பட்டுள்ளது.

இந்த சம்பவம் இன்று காலை இடம்பெற்றுள்ளதாக பொலிஸார் தெரிவித்துள்ளனர். சம்பவம் தொடர்பில் மேலும் தெரியவருவதாவது,

புத்தளம் பகுதியைச் சேர்ந்தவர்கள், கந்தளாய் பிரதேசத்தில் ஒப்பந்த அடிப்படையில் வீடுகளுக்கு கூரைகள், சிவிலிங் வேலைகள் போன்றவற்றினை தங்கி இருந்து செய்துவந்துள்ளனர்.

வாகனத்தினை வழமை போன்று வீதியில் நிறுத்தி வைத்து விட்டு, வீட்டில் தூங்கிக்கொண்டிருந்த நிலையிலே அதிகாலை வேளையில் லொறிக்கு தீவைக்கப்பட்டுள்ளதாக பொலிஸார் தெரிவித்துள்ளனர் சம்பவம் தொடர்பில் கந்தளாய் பொலிஸார் மேலதிக விசாரணைகளை மேற்கொண்டு வருகின்றனர்.

புஸ்ஸலாவ பிரதேசத்தில் பெண் ஒருவர் வினோத சம்பவம் ஒன்றுக்கு முகம் கொடுத்துள்ளார். இந்த பெண், கடையில் இருந்து 6000 ரூபாய்க்கு கொள்வனவு செய்து வந்த பொருட்களை வீடு முழுவதும் திருடர்கள் வீசி சென்றுள்ளதனை அவதானித்துள்ளார்.

கடைக்கு சென்று பொருட்கள் கொள்வனவு செய்த பினனர் அதனை வீட்டினுள் வைத்து விட்டு அருகில் உள்ள மகள் வீட்டிற்கு சென்றுளளார்.

பின்னர் வீடு திரும்பிய போது வீடு முழுவதும் தான் கொள்வனவு செய்த பொருட்கள் வீசப்பட்ட நிலையில் காணப்பட்டுள்ளது.

இந்த செயலை தனது வீட்டிற்குள் புகுந்த திருடன் செய்துள்ளதாக குறித்த பெண் எண்ணியுள்ளார். பின்னர் கோபத்துடன் திருடனை தேட அவர் ஆரம்பித்துள்ளார்.

கோபமாக இருந்த பெண் திருடர்களை பார்த்தவுடன் சிரிக்க ஆரம்பித்து விட்டார் என தெரிவிக்கப்படுகின்றது.

வீட்டுக்குள் புகுந்தது திருடர்கள் அல்ல குரங்குகள் என தெரியவந்துள்ளதுடன், அவர் கொள்வனவு செய்த கோதுமைமா முழுவதையும் குரங்குகள் தலையில் கொட்டி கொண்டுள்ளதாக குறித்த பெண் தெரிவி்த்துள்ளார்.

சமூக வலைத்தளங்கள் மீதான தடை காரணமாக அரசாங்கத்தின் வருமானம் பாரியளவில் அதிகரித்துள்ளதாக ஜனாதிபதி மைத்திரிபால சிறிசேன தெரிவித்துள்ளார்.

ஜப்பானில் உள்ள இலங்கையர்களை சந்தித்து, அவர்கள் மத்தியில் உரையாற்றிய போதே அவர் இதனைத் தெரிவித்துள்ளார்.

சமூக வலைத்தளங்கள் மீதான தடை காரணமாக அரச நிறுவனங்களின் வருமானம் உயர்வடைந்துள்ளது.

ஸ்ரீ லங்கா டெலிக்கொம் மற்றும் தொலைத் தொடர்புகள் ஒழுங்குப்படுத்தல் ஆணைக்குழு என்பனவற்றுக்கு நாளொன்றுக்கு 200 மில்லியனுக்கு அதிகமான வருமான அதிகரித்துள்ளதாக ஜனாதிபதி குறிப்பிட்டுள்ளார்.

 
மன்னாரில் நேற்று மாலை பெய்த கடும் மழையின் காரணமாக, அங்குள்ள தாழ் நில பிரதேசத்தில் காணப்படும் பல குடியிருப்புக்கள் நீரில் மூழ்கியுள்ளதாக தெரிவிக்கப்படுகின்றது.

அண்மையில் காணிகள் வழங்கப்பட்டு, குடியமர்த்தப்பட்ட சில கிராமங்களும் நீரில் மூழ்கியுள்ளதாக தெரிவிக்கப்படுகின்றது.

மன்னார் பிரதேசச் செயலாளர் பிரிவிற்குட்பட்ட சாந்திபுரம், ஜீவபுரம், ஜிம்ரோன் நகர், எமில் நகர் போன்ற கிராமங்களில் உள்ள வீடுகளும், பாதைகளும் நீரில் மூழ்கி உள்ளதாக அப்பகுதியில் இருக்கும் எமது செய்தியாளர் தெரிவித்துள்ளார்.

இதனால் குறித்த கிராமங்களில் உள்ள பல குடும்பங்கள் பாதிக்கப்பட்டுள்ளதுடன், தொடர்ச்சியாக மழை நீடித்தால் குறித்த கிராமங்களில் உள்ளவர்கள் இடம்பெயர வேண்டிய சூழ்நிலை ஏற்படும் எனவும் தெரிவிக்கப்படுகின்றது.

இலங்கையில் சமூக வலைத்தளங்களுக்கு விதிக்கப்பட்டுள்ள கட்டுப்பாடுகள் தொடர்பில் பேஸ்புக் நிறுவனம் வருத்தம் தெரிவித்துள்ளது.

பேஸ்புக் நிறுவனத்தின் பிரதிநிதிகள் சிலரை, இலங்கை அரசாங்க அதிகாரிகள் சந்தித்ததாக அந்த நிறுவனம் உறுதி செய்துள்ளது.

இது தொடர்பாக பேஸ்புக் நிறுவனத்திடம் மின்னஞ்சல் வாயிலாக ஊடகம் ஒன்று கேள்வி எழுப்பியுள்ளது. அதற்கு பதிலளித்த பேஸ்புக் நிறுவனத்தின் பேச்சாளர்,

“பேஸ்புக் பயனர்களின் பாதுகாப்பு எங்களுக்கு மிகவும் முக்கியமான விடயமாகும். கோபம் மற்றும் வன்முறையை ஏற்படுத்தும் விடயங்களுக்கு எதிராக எங்களால் தெளிவான சட்டம் இயற்றப்பட்டுள்ளது. பேஸ்புக்கில் அவ்வாறான விடயங்களை நீக்குவதற்கு எங்களால் நடவடிக்கை மேற்கொள்ளப்பட்டுள்ளது.

இலங்கையின் நிலைமைக்காக பதிலளிக்கும் நாம், பேஸ்புக்கில் பதிவாகும் அவ்வாறான விடயங்களை அடையாளம் காணுவதற்கும், நீக்குவதற்கும் அரசாங்கம் மற்றும் அரச சார்பற்ற அமைப்புகளுடன் தொடர்புகளை ஏற்பட்டுத்தியுள்ளோம்.

முக்கிய தொடர்பு மற்றும் கருத்துக்களை வெளியிடுவதற்கு உள்ள உரிமையை நீக்கி சமூகவலைத்தளங்கள் மீது விதிக்கப்பட்டுள்ள கட்டுப்பாடுகள் தொடர்பில் நாம் வருத்தமடைகிறோம். விரைவில் பேஸ்புக் வழமைக்கு திரும்பும்” என அவர் மேலும் தெரிவித்துள்ளார்.

இலங்கையில் இணையவழி வர்த்தக நடவடிக்கைகளிற்கு புதிய சட்டங்களை அமுலாக்குவதற்கு தீர்மானிக்கப்பட்டுள்ளது.

இலங்கை நுகர்வோர் பாதுகாப்பு அதிகார சபை இதற்கான நடவடிக்கைகளை எடுத்து வருவதாக தெரிவிக்கப்பட்டுள்ளது.

ஈகொமர்ஸ் எனப்படும் மின்வர்த்தகம் தொடர்பாக இலங்கையில் உள்ள சட்டத்திட்டங்களும், ஒழுங்குவிதிகளும் போதுமானதாக இல்லை.

இந்தநிலையில் இதற்கான புதிய ஒழுங்குவிதிகளையும், கட்டுப்பாடுகளையும் உருவாக்குவதற்காக, சர்வதேச வர்த்தக மையத்துடன் இணைந்து, இலங்கை நுகர்வோர் அதிகார சபை நடவடிக்கைகளை எடுக்கிறது.

இதற்காக கொழும்பில் இன்றும் நாளையும் முக்கிய பேச்சுவார்த்தைகள் நடைபெறவுள்ளதாகவும், இதில் சர்வதேச வர்த்தக மையத்தின் பிரதிநிதிகளும் கலந்து கொள்வதாகவும் தெரிவிக்கப்படுகிறது.

பேஸ்புக் தடையை நீக்குவது குறித்த முக்கியமான தீர்மானம் இன்றையதினம் மேற்கொள்ளப்படவுள்ளது.

இதற்காக இலங்கை வந்துள்ள பேஸ்புக் நிறுவனத்தின் பிரதிநிதிகள், பிரதமரையும், ஜனாதிபதியின் செயலாளரையும் சந்தித்து கலந்துரையாடவுள்ளனர்.

பேஸ்புக் உள்ளிட்ட சமூக வலைத்தளங்களில் தணிக்கையை மேற்கொள்வதற்கு அரசாங்கம் எதிர்பார்த்துள்ளது.

குறிப்பாக சமூக வலைத்தளங்களில் பகிரப்படுகின்றன கருத்துக்களுள் இனவன்முறைகளை தூண்டுவனவற்றை அடையாளம் கண்டு நீக்குவதற்கான முறைமையை அமுலாக்கவும் அரசாங்கம் தீர்மானித்துள்ளது.

இந்தவிடயங்களில் இன்று இணக்கம் காணப்படும் பட்சத்தில், நாளை முதல் சமூக வலைத்தளங்கள் மீதான தடை நீக்கப்படும் என்று எதிர்பார்க்கப்படுகிறது.

 
நாடு கடத்தலுக்காக விமானத்தில் ஏற்றப்பட்ட தமிழ் குடும்பம் ஒன்று மீண்டும் இறக்கப்பட்டுள்ளதாக அவுஸ்ரேலிய ஊடகம் ஒன்று செய்தி வெளியிட்டுள்ளது.

அவுஸ்ரேலியாவில் இருந்து இலங்கைக்கு நாடு கடத்துவதற்காக விமானத்தில் ஏற்றப்பட்ட நான்கு பேர் கொண்ட தமிழ்க் குடும்பம் ஒன்றே கடைசி நேரத்தில் கீழே இறக்கப்பட்டுள்ளது.

அவுஸ்ரேலியாவில் இணைப்பு நுழைவிசைவு காலாவதியான நிலையில் நடேசலிங்கம், அவரது மனைவி பிரியா மற்றும் குழந்தைகளான கோபிகா மற்றும் தருணிகா ஆகியோர் நாடு கடத்தலுக்கு முகங்கொடுத்துள்ளனர்.

குறித்த நால்வரும் நாடு கடத்தப்படுவதற்காக அவுஸ்ரேலிய அதிகாரிகளால் குடிவரவுத் தடுப்பு முகாமில் தடுத்து வைக்கப்பட்டிருந்தனர்.

இவர்களை நாடு கடத்துவதை தடுக்கக் கோரி அவுஸ்ரேலியாவில் போராட்டங்கள் முன்னெடுக்கப்பட்டு வந்ததுடன், சட்ட நடவடிக்கைகளும் முன்னெடுக்கப்பட்டன.

இந்த நிலையில் நேற்றிரவு இவர்கள் நால்வரும் நாடு கடத்தப்படுவதற்காக பேர்த் விமான நிலையத்துக்கு கொண்டு செல்லப்பட்டு, வேறு பல இலங்கையர்களுடன் சிறப்பு விமானம் ஒன்றில் ஏற்றப்பட்டனர்.

பின்னர் சிறிது நேரத்தில் அவுஸ்ரேலிய அதிகாரிகள் அவர்களை விமானத்தில் இருந்து இறக்கிக் கொண்டு சென்றனர்.

கடைசி நேரத்தில் முன்னெடுக்கப்பட்ட சட்ட நடவடிக்கைகளை அடுத்தே அவர்களை நாடு கடத்தும் நடவடிக்கை இடைநிறுத்தப்பட்டதாக அந்நாட்டு ஊடகங்கள் தகவல் வெளியிட்டுள்ளன.