யாழ்ப்பாணம் – வண்ணார்பண்ணை, வடமேற்கு பத்திரகாளி அம்மன் கோவில் வீதியில் குடும்பம் ஒன்றில் ஏற்பட்ட வாள்வெட்டு சம்பவத்தில் மூன்று வயது குழந்தை உயிரிழந்ததுடன் கொலையாளி தானும் நஞ்சருத்தி தற்கொலை செய்து கொண்டுள்ளார்.

மேலும் தாய் ஒருவர் படுகாயமடைந்து யாழ். போதனா வைத்தியசாலையில் அனுமதிக்கப்பட்டுள்ளார்.

இதில் தாக்குதலை மேற்கொண்டு நஞ்சருந்தி தற்கொலை செய்து கொண்டவர் 33 வயதான ஈஸ்வர் என்று தெரியவந்துள்ளது.

வயதாகிய தனுசன் நிக்சையா என்ற குழந்தை உயிரிழந்துள்ளதுடன், 55 வயதுடைய பலமேஷ்வரி என்பவர் படுகாயமடைந்துள்ளார்.

உயிரிழந்த நபர் குறித்த தாயின் மூத்த மகனாவார். இவர் தனது மகள் முறையான சகோதரனின் மகளையும் தாயையும் கொடூரமாக வெட்டியுள்ளார். இது தொடர்பாக தெரிய வருகையில்,

தற்கொலை செய்து கொண்ட நபரின் தாயும், அவருடைய சகோதரனின் 3 வயது மகளும் வண்ணார்பண்ணை, வடமேற்கு பத்திரகாளி அம்மன் கோவில் வீதியில் உள்ள வீட்டில் தனிமையில் இருந்துள்ளனர்.

அப்போது குறித்த நபர் அங்கு சென்று, வீட்டில் இருந்த தாய் மற்றும் குழந்தை மீது கொடூரமாக கோடரியால் வெட்டி தாக்குதலை மேற்கொண்டுள்ளார்.

இதில் சம்பவ இடத்திலேயே குழந்தை உயிரிழந்துள்ளதுடன், தாயார், கழுத்து மற்றும் தலையில் படுகாயமடைந்த நிலையில் வைத்தியசாலை அவசர சிகிச்சை பிரிவில் அனுமதிக்கப்பட்டுள்ளார்.

மேலும் குறித்த கொலையாளியான ஈஸ்வர், நஞ்சை உட்கொண்டு தானும் தற்கொலை செய்து கொண்டுள்ளார். இவர் வைத்தியசாலைக்கு கொண்டு செல்லும் வழியில் உயிரிழந்துள்ளார்.

இந்த சம்பவத்துக்கான காரணம் வெளிவராத நிலையில், யாழ் பொலிஸார் மேலதிக விசாரணைகளை முன்னெடுத்து வருகின்றனர்.

நாட்டின் தொழில் துறைக்கு அமைய பல்கலைக்கழக பாட நெறிகளை அறிமுகப்படுத்துவதற்கும் வேலைவாய்ப்புக்களை அடையாளம் காண்பதற்கும் வாய்ப்பு ஏற்பட்டுள்ளதாக தொகை மதிப்பு புள்ளி விபரத் திணைக்களம் குறிப்பிட்டுள்ளது.

நாட்டில் முதன் முதலாக நடத்தப்பட்ட தொழில் கேள்வி தொடர்பான கணக்கெடுப்பில் தனியார்துறையில் மட்டும் சுமார் 4 இலட்சத்திற்கு மேற்பட்ட வெற்றிடங்கள் இருப்பதாக புள்ளிவிபர திணைக்களம் தெரிவித்துள்ளது.

தொகை மதிப்பு புள்ளி விபர திணைக்களம் கடந்த ஆண்டு இறுதியில் நடத்திய நாடு தழுவிய ரீதியிலான கணக்கெடுப்பில் இந்த விபரங்கள் பதிவாகியுள்ளன.

இக் கணக்கெடுப்பின் போது 3500 தனியார் நிறுவனங்களிடம் இருந்து தகவல் திரட்டப்பட்டதாகவும் அதில் 497302 பதவி வெற்றிடங்கள் காணப்படுவதாகவும் கண்டறியப்பட்டுள்ளது.

தற்போது தனியார் துறையில் சகல தரங்களிலும் கிட்டத்தட்ட 50 இலட்சம் ஊழியர்கள் பணியாற்றுவதுடன் பல்வேறு துறைகளில் 5 இலட்சம் வெற்றிடங்கள் நிலவுகின்றன என்கின்றன அந்தப் புள்ளிவிபரம்.

அதிகளவிலான வெற்றிடங்கள் தையலுடன் தொடர்பான துறையிலும், பாதுகாப்பு உத்தியோகஸ்தர் துறையிலும் காணப்படுகின்றது. இவற்றை தவிர இயந்திர பொறியியலாளர், கணக்கியல், தொழில்நுட்பவியலாளர் தொடர்பான உயர் தொழில் துறைகளிலும் வெற்றிடங்கள் காணப்படுவதாக கணக்கெடுப்பின் போது தெரியவந்துள்ளது.

இந்நிலையில் நடத்தட்ட கணக்கெடுப்பின் அடிப்படையில் நாட்டின் தொழில் துறைக்கு அமைய பல்கலைக்கழக பாட நெறிகளை அறிமுகப்படுத்துவதற்கு வேலைவாய்ப்புக்களை அடையாளம் காண்பதற்கும் வாய்ப்பு ஏற்பட்டுள்ளதாக தொகை மதிப்பு புள்ளி விபரத் திணைக்களம் தெரிவித்துள்ளது.

நாட்டின் கல்வி முறையின் அடிப்படையில் மாணவர்கள் கற்றல் செயற்பாட்டில் ஈடுபட்டு சிறந்த பெறுபேற்றினைப் பெற்றாலும் அவர்கள் தங்களுக்கான திறன்களை வளர்த்துக் கொள்வதில் பின் நிற்கிறார்கள்.

குறிப்பாக, வேலை வாய்ப்புக்கு ஏற்ற முறையிலான கல்வித்திட்டங்கள் இல்லாமையினாலேயே நமது மாணவர்க்ள இந்த நிலைக்குத் தள்ளப்படுகிறார்கள் என்று விமர்சகர்கள் குறிப்பிடுகிறார்கள்.

ஆகவே, வேலை வாய்ப்புக்கு ஏற்ற முறையிலான கல்வியமைப்பும் கொண்டுவரப்படவேண்டியது இன்றைய தொழில்நுட்பப் புரட்சியில் இன்றியமையாத காரணியாக மாறியுள்ளது என்கிறார்கள் கல்வியியலாளர்கள்.

70 வயதான தனது தாயை பாலியல் துஷ்பிரயோகத்திற்கு உட்படுத்திய ஒருவரை மாத்தறை – வெலிகம பொலிஸார் கைது செய்துள்ளனர்.

இந்நிலையில், கைது செய்யப்பட்டுள்ள சந்தேகநபரை மாத்தறை நீதிமன்றில் முன்னிலைப்படுத்துவதற்கான நடவடிக்கைகளை மேற்கொண்டுள்ளதாகவும் பொலிஸார் கூறியுள்ளனர்.

இந்த சம்பவம், வெலிகம – முகுதுகமுவ, விஜேரத்ஹேன பகுதியில் இடம்பெற்றுள்ளது. சம்பவத்தில் பாதிக்கப்பட்டுள்ள பெண் வைத்தியசாலையில் அனுமதிக்கப்பட்டுள்ளதாக பொலிஸார் தெரிவித்துள்ளனர்.

குறித்த சந்தேகநபர் 13 ஆண்டுகளாக சிறையிலிருந்த நிலையில், கடந்த மாதமே விடுதலை செய்யப்பட்டிருந்ததாக தெரிவிக்கப்படுகின்றது.

தனது சகோதரியின் மகளை துஷ்பிரயோகத்திற்கு உட்படுத்திய குற்றச்சாட்டில் அவருக்கு சிறைதண்டனை விதிக்கப்பட்டிருந்தது.

இந்நிலையிலேயே குறித்த நபர் தனது தாயையும் துஷ்பிரயோகத்திற்கு உட்படுத்தியுள்ளதாக தெரிவிக்கப்பட்டுள்ளதுடன், சந்தேகநபர் அங்கிருந்து தப்பிச் சென்றுள்ளதாகவும் தெரிவிக்கப்படுகின்றது.

இதனையடுத்து பிரதேசவாசிகள் வழங்கிய தகவலை அடுத்து பொலிஸார் சந்தேகநபரை கைது செய்துள்ளமை குறிப்பிடத்தக்கது.

பெண்களை அவமதிக்கும் வகையில் பொறிக்கப்பட்டிருக்கும் விளம்பர பதாகைகளை அகற்றுமாறு பிரதியமைச்சர் ஹர்ஷ டி சில்வா தெரிவித்துள்ளார்.

இது குறித்து அவர் தனது டுவிட்டர் பக்கத்தில் பதிவொன்றையும் வெளியிட்டுள்ளார். ராஜகிரியவில், பெண்களை அவமரியாதைப்படுத்தும் வகையில் பொருத்தப்பட்டுள்ள பதாகையை அகற்றப்பட வேண்டும் என அவர் கூறியுள்ளார்.

குறித்த விளம்பரப் பதாகை பிரபல உடற்பயிற்சி கூடத்தினால் பொருத்தப்பட்டுள்ளது. இதில் பெரல் ஒன்றும், இது பெண்களுக்குரிய தோற்றம் அல்ல என்ற வாசகமும் பொறிக்கப்பட்டுள்ளதுடன், பெண்கள் ‘பெரல்’ போல் இருக்கக்கூடாது என்ற விளம்பரம் காட்சிப்படுத்தப்பட்டுள்ளது.

இவ்வாறு பெண்களை அவமதிக்கும் விளம்பரங்களை அனுமதிக்க மாட்டேன். இதனை அகற்றுமாறு நகர சபையிடம் கோரியுள்ளேன் என பிரதியமைச்சர் ஹர்ஷ டி சில்வா குறிப்பிட்டுள்ளார்.

நாட்டில் நிலவிய அசாதாரண சூழ்நிலை காரணமாக பல்லாயிரக்கணக்கானோர் இந்தியாவில் தஞ்சமடைந்தனர். இவர்களில், 61,845 பேர் தமிழ்நாட்டில் 24 மாவட்டங்களிலுள்ள 107 முகாம்களில் தங்கியுள்ளதாக ஈழ அகதிகள் மறுவாழ்வு மையத்தின் பொருளாளர் எஸ்.சி. சந்திரஹாசன் தெரிவித்துள்ளார்.

இந்தியாவில் தமிழ்நாட்டில் மாத்திரமே இலங்கை அகதிகளுக்கான முகாம்கள் காணப்படுவதாகவும் அவர் சுட்டிக்காட்டினார்.

இந்தியாவில் தஞ்சமடைந்துள்ள இலங்கை அகதிகளில் உள ரீதியாகப் பாதிக்கப்பட்டுள்ளவர்கள் தொடர்பிலும் ஈழ அகதிகள் மறுவாழ்வு மையம் கவனம் செலுத்தியுள்ளது.

அகதி முகாம்களில் அதிகளவிலான தற்கொலைகள் இடம்பெறுவதாக ஈழ அகதிகள் மறுவாழ்வு மையத்தின் பிரதான வைத்திய அதிகாரி எஸ்.நடராஜன் தெரிவித்தார்.

அவ்வாறான தற்கொலைகளைத் தடுப்பதற்காக முகாம்களிலுள்ள மக்களுக்கு ஆரம்ப ஆற்றுப்படுத்தல் திட்டங்கள் முன்னெடுக்கப்படுவதாக அவர் சுட்டிக்காட்டினார்.
முகாம்களில் மக்களின் மன அழுத்தத்தை குறைக்கும் நடவடிக்கைகளும் இடம்பெற்று வருவதாக அவர் தெரிவித்தார்.

இதேவேளை, இந்தியாவில் வாழும் இலங்கை அகதிகள் இந்தியப் பிரஜாவுரிமையைப் பெற்றுக்கொள்வதற்கான வாய்ப்புகள் இல்லை என எஸ்.சி. சந்திரஹாசன் குறிப்பிட்டார்.

இந்த நிலையில், 2011 ஆம் ஆண்டிலிருந்து கடந்த வருடத்தின் இறுதி வரை 2,573 குடும்பங்கள் நாடு திரும்பியுள்ளதாக மீள்குடியேற்ற அமைச்சு தெரிவித்தது.

யாழ்ப்பாணம், கிளிநொச்சி, வவுனியா, முல்லைத்தீவு மற்றும் திருகோணமலை மாவட்டங்களைச் சேர்ந்த சுமார் 6,900 அகதிகள் நாடு திரும்பியுள்ளதாக அமைச்சின் மேலதிக செயலாளர் தெரிவித்தார்.

எவ்வாறாயினும், தமிழகத்தின் முகாம்களில் இன்னல்களை எதிர்நோக்கிய மக்கள் தாயகம் திரும்பிய போதிலும் எதிர்பார்ப்புகள் ஈடேறாத நிலையிலேயே வாழ்ந்து வருகின்றனர்.

வவுனியா செட்டிக்குளம் பிரதேச செயலகத்திற்குட்பட்ட நேரியகுளம் பகுதியில் இந்தியாவிலிருந்து நாடு திரும்பிய சுமார் 35 குடும்பங்கள் வாழ்ந்து வருகின்றன.

பல்வேறு வாக்குறுதிகள் வழங்கப்பட்ட போதிலும், இதுவரை எந்தவித வசதிகளும் தமக்கு ஏற்படுத்திக்கொடுக்கப்படவில்லை என அவர்கள் சுட்டிக்காட்டினர்.

நாடு திரும்பிய மக்களுக்காக முன்னெடுக்கப்பட்டுள்ள திட்டங்கள் தொடர்பில் மீள்குடியேற்றம் மற்றும் புனர்வாழ்வு அமைச்சிடம் நியூஸ்பெஸ்ட் வினவியது.

2016 ஆம் ஆண்டில் 630 பேருக்கும் 2017 ஆம் ஆண்டில் 300 பேருக்கும் வீடுகள் வழங்கப்பட்டுள்ளதாக மீள்குடியேற்ற அமைச்சின் மேலதிக செயலாளர் தெரிவித்தார்.

இந்தியாவிலிருந்து நாடு திரும்பியுள்ள மக்களுக்கான அடிப்படை வசதிகள் அனைத்தும் பூர்த்தி செய்யப்படும் எனவும் மீள்குடியேற்ற அமைச்சின் மேலதிக செயலாளர் தெரிவித்தார்.