வவுனியா புதிய பேருந்து நிலையம் இயங்கும் திகதி தொடர்பில் எதிர்வரம் 21ஆம் திகதி அமைச்சர் அறிவிப்பார் என வடமாகாண சபை உறுப்பினர் செ.மயூரன் தெரிவித்துள்ளார்.

வவுனியா புதிய பேருந்து நிலையத்தினை இயக்குவது தொடர்பிலான கூட்டம் நேற்று மாலை மாவட்ட செயலகத்தில் இடம்பெற்றது.

இதன்பின்னர் ஊடகங்களுக்கு கருத்துரைப்பாதாக அமைச்சர் பா.டெனீஸ்வரன் தெரிவித்திருந்த போதிலும் மாற்று வழியினூடாக அவர் வெளியேறியிருந்தார்.

இந்த நிலையில் இங்கு கலந்துரையாடப்பட்ட விடயங்கள் தொடர்பாக வட மாகாணசபை உறுப்பினர் செ.மயூரனிடம் கேட்டபோது,

புதிய பேருந்து நிலையத்தினை ஆரம்பிப்பது தொடர்பாகவும் 60இற்கு 40 என்ற இணைந்த நேர அட்டவணை தொடர்பாகவும் இன்றைய கூட்டத்தில் கலந்துரையாடப்பட்டது.

அத்துடன், புதிய பேருந்து நிலையததில் இருந்து மாவட்டங்களுக்கு இடையிலானதும், மாகாணங்களுக்கு இடையிலானதுமான பேருந்து சேவைகளை மேற்கொள்வது எனவும் தற்போது நகர மத்தியில் உள்ள பேருந்து நிலையத்தில் இருந்து உள்ளூர் சேவையை செயற்படுத்துவது எனவும் இன்றைய கூட்டத்தில் தீர்மானிக்கப்பட்டது.

இந்த நடைமுறையை ஒரு மாத காலத்திற்கு செயற்படுத்துவது என இந்தக் கூட்டத்தில் கலந்துரையாடப்பட்டது. குறிப்பாக வர்த்தகர் சங்கத்தினர் புதிய பேருந்து நிலையத்திற்கு பேருந்துகள் முழுமையாக சென்றால் வர்த்தகர்கள் பாதிக்கப்படுவர் என்ற கோரிக்கையை இதன்போது முன்வைத்திருந்தனர். இதன் பிரகாரமும் இந்த தீர்மானம் எடுக்கப்பட்டது.

அதன்படி எதிர்வரும் வெள்ளிக்கிழமை தனியார் மற்றும் இலங்கை போக்குவரத்து சபையின் நேரக்காப்பாளர்களுக்கான கூட்டம் யாழ்ப்பாணத்தில் இடம்பெறவுள்ளது.

அதன் பின்னர் வவுனியாவில் உள்ள பேருந்து நிலையத்தில் இருந்து எப்போது சேவையை ஆரம்பிப்பது என்பது தொடர்பில் அமைச்சர் டெனீஸ்வரன் தீர்மானத்தினை எடுப்பார்.

இந்த செயற்பாட்டின்போது 60இற்கு 40 என்ற நேர அட்டவணையும் ஒரு மாத காலத்திற்கு பரீட்சாத்தமாக நடைமுறைப்படுத்தப்படும். இது எந்தளவிற்கு சாத்தியப்படும் என்பது தெரியவில்லை.

எனினும் சாத்தியப்பட்டால் அதனை நடைமுறைப்படுத்துவது எனவும் தீர்மானிக்கப்பட்டது.

இவற்றையும் தாண்டி இந்த பேருந்து நிலையத்தினை திறப்பதில் காணப்படும் இழுபறி நிலைக்கு பின்னால் பெரிய அரசியல் சக்தி செயற்பட்டுக் கொண்டிருக்கின்றது.

இல்லையானால் பெரும் தொகையில் கட்டப்பட்ட பேருந்து நிலையம் திறக்கப்படாமல் உள்ளமை தொடர்பில் அரசாங்கம் அக்கறையின்றியுள்ளது.

குறிப்பாக இலங்கை போக்குவரத்து சபையின் கீழ் இலங்கை மக்கள் காங்கிரஸ், சுதந்திரக்கட்சி, ஐக்கிய தேசியக் கட்சி என்பன தொழிற்சங்கங்களை உருவாக்கியுள்ளன.

மேலும், தமது அரசியல் செயற்பாடுகளுக்காக தொழிற்சங்கங்களை தவறாக பயன்படுத்துகின்றனர் என வட மாகாண சபை உறுப்பினர் செ.மயூரன் குறிப்பிட்டுள்ளார்.

 
வவுனியாவில் தொடரும் கடும் வறட்சியான காலநிலை காரணமாக மக்கள் குடிநீரைப் பெற்றுக் கொள்ளுதல் மற்றும் விவசாய நடவடிக்கைகளில் பாதிப்புக்களை எதிர் நோக்கியுள்ளனர்.

வவுனியா மாவட்டத்தில் கடந்தகால நெற்செய்கைக் காலப்பகுதியில் இருந்து கடுமையான வறட்சியான காலநிலை நீடித்து வருகிறது. இதனால் விவசாயிகளின் தோட்டச் செய்கை நடவடிக்கைகள், சிறுபோக நெற்செய்கை என்பன பாதிப்படைந்துள்ளதுடன் அவை கடுமையான வெப்பம் காரணமாக கருகி காட்சியளிக்கின்றன. இதனால் மக்கள் நாளாந்த குடும்பச் செலவுகளை போக்குவதற்கு கூட சிரமப்படுகின்றனர்.

விவசாயத்துடன் இணைந்ததாக கால்நடை வளர்ப்பில் ஈடுபடும் மக்கள் தமது கால்நடைகளுக்கு மேய்ச்சல் தரை இன்றி அவதிப்படுவதையும், வறட்சி காரணமாக மைதானம் போன்று காட்சியளிக்கும் குளப்பகுதிகளை கால்நடைகளுக்குரிய மேய்ச்சல் தரைகளாக பயன்படுத்துவதையும் அவதானிக்க முடிகிறது.

வவுனியாவின் பல பகுதிகளில் மக்கள் குடிநீரைப் பெற்றுக் கொள்வதிலும், கிணறுகளில் தண்ணீர் வற்றியும் காணப்படுகின்றது. இவ்வாறாக பல பிரச்சனைகளை எதிர்நோக்கியுள்ளனர்.

 
வவுனியா மாவட்ட சமூகசேவை அலுவலகம் மூலம் கொக்குவிலைச் சேர்ந்த லண்டன் வாழ் நலன் விரும்பிகளான திரு திருமதி குமார் வத்ஸி குடும்பம் , திரு.செல்வநாதன் குடும்பம் , அமரர் சிவானந்தனின் பேரப் பிள்ளைகள் இணைந்து பல தடவைகள் வாழ்க்கையின் விரக்தி நிலைக்கு சென்று காப்பற்றப்பட்ட திருமதி ம. சுபாசினியின் குடும்பத்திற்கு வாழ்வாதார உதவிகள், உலர் உணவுப்பொதிகள், பிள்ளைகளுக்கான பாதணிகள், புத்தகப்பைகள், சீருடைக்கான துணிகள் மற்றும் துவிச்சகக்கர வண்டி என்பன வழங்கி வைத்தனர்.

சுபாசினி தொடர்பான பிரச்சனை அயலவர்கள் மூலம் மாவட்ட சமூக சேவை அலுவலகத்திற்கு தெரியப்படுத்தப்பட்டதைத் தொடர்ந்து இப்பெண்ணின் பிரச்சனையை முகப்புத்தகம் மூலம் தெரியப்படுத்தியவேளை சமூக ஆர்வலர்கள் மூலம் குறித்த பொருட்கள் மாவட்ட சமூகசேவை அலுவலகத்தின் ஊடாக வழங்கி வைக்கப்பட்டன.

மேலும் நாளாந்தம் இவரின் பிள்ளைகள் காலை ஆகாரம் இன்றி பாடசாலை வருவதால் காலை உணவுக்கான ஏற்பாட்டினையும் நாளாந்தம் வழங்க பாடசாலை அதிபர் ஊடாக நடவடிக்கை மேற்கொள்ளப்பட்டுள்ளது.

நேற்று (18.07.2017) செவ்வாய்க்கிழமை வவுனியா மூன்றுமுறிப்பு பாடசாலையில் நடைபெற்ற நிகழ்வு பாடசாலை அதிபர் கே .பொன்னம்பலம் தலைமையில் நடைபெற்றது.

இதில் விசேட விருந்தினராக கலந்து கொண்ட வவுனியா பொது வைத்தியசாலை உளவள வைத்தியநிபுணர் வைத்தியகலாநிதி சி.சிவதாஸன் மாணவர்கள் மத்தியில் அவர்களுக்கான ஆற்றுப்படுத்துகை விழிப்புணர்வு உரையினை நிகழ்த்தினார்.

‘மாணவர்கள் தமது நுண்ணறிவு கல்வியறிவு என்பவற்றை வளர்த்து வரும் அதேவேளை புறச்சூழல்களால் பாதிக்கப்படாது தம்மைக் காத்துக்கொள்ள வேண்டும் . ஐந்தாம் ஆண்டு புலமைப்பரிசில் மாணவர்களுக்கு அதிக அழுத்தம் கொடுப்பதை ஆசிரியர்கள் தவிர்க்க வேண்டும் . மதுபோதை மற்றும் தீய பழக்கங்ளை மாணவர்கள் புறந்தள்ளப்பழகவேண்டும் . எல்லாவற்றுக்கும் தலை அசைப்பதை விட சிலவற்றை மறுக்கப் பழக வேண்டும் என்ற கருத்தை வலியுறுத்தினார்.

அதிபர் தனது உரையில் சுபாசினியின் குடும்பம் பல சவால்களை சந்தித்து வருவதை நாம் நன்கு அறிவோம் . இவர்களுக்கு இந்த உதவி அவசியமானதுடன் அவசரமானதும் ஆகும். சுபாசினியின் 3 பிள்ளைகளும் கல்வி கற்கக்கூடியவர்கள்.

இவர்களுக்கு காலை உணவு கூட பெரும் போராட்டம். அதிகநாட்கள் தாமதமாகியே பாடசாலை வந்திருக்கிறார்கள் . இந்த நிலையில் மாவட்ட சமூக சேவை அலுவலகர் எஸ்.எஸ்.வாஸன் மேற்கொண்ட இந்த முயற்சிக்கும் இந்த உதவியைச் செய்த லண்டன் வாழ்நலன் விரும்பிகளுக்கும் எமது மனமார்ந்த நன்றிகளைத் தெரிவித்துக்கொள்கிறோம் என்றார்.

நிகழ்வில் நான்காம் ஆண்டு ஆங்கிலமொழி கல்வியில் திறமையான மாணவர்களை ஊக்குவிக்கும் வகையில் 5 திறமையான மாணவர்களுக்கு ஆங்கில பயிற்சி நூல் வழங்கி வைக்கப்பட்டது. பாடசாலை உப அதிபர்கள் வி.சற்குணராசா திருமதி விஜயராணி நிலாநேசன், அபிவிருத்தி உத்தியோகத்தர்கள் எஸ்.கே.வசந்தன், செல்வி கலைவாணி, தாதிய உத்தியோகத்தர் சுதாகரன் சமூக நலன் உத்தியொகத்தர் விஜிதரன் சமூக ஆர்வலர் புருசோத்தமன் பாடசாலை ஆசிரியர்கள் மாணவர்கள் ஆகியோரும் கலந்து கொண்டனர்.

 
வடமாகாணசபை உறுப்பினர் மயில்வாகனம் தியாகராசா தனக்கு குறித்தொதுக்கப்பட்ட 2017ம் ஆண்டுக்கான பிரமாண அடிப்படையிலான மூலதன நன்கொடை நிதியிலிருந்து வவுனியா மாவட்டத்தில் வவுனியா நகரசபை, வவுனியா தமிழ் பிரதேசசபை மற்றும் வவுனியா வடக்கு பிரதேசசபை, செட்டிகுளம் பிரதேசசபைகளுக்குள் உள்ளடங்கும் கிராமங்களில் மிகவும் அடிப்படை வசதிகுறைந்த கொட்டில்களில் குடியிருக்கும் மக்களுக்கு கூரை சீற் கூரைத்தகரம் மலசலகூடம் அமைத்தலுக்கான உதவிகளை வழங்கினார்.

இன் நிகழ்வில் வவுனியா நகரசபை செயலாளர், வவுனியா தெற்கு தமிழ் பிரதேசசபை செயலாளர், வவுனியா வடக்கு பிரதேசசபை செயலாளர், அலுவலக உத்தியோகத்தர்கள் எனப்பலரும் கலந்துகொண்டார்கள்.