யாழ்.மாவட்டத்திற்கு தண்ணீர் விநியோகஸ்தர் உரிமம் தருகிறோம் என கூறி பலரிடம் பணத்தை கொள்ளையிட்டவர்கள் யாழ்.நல்லூர் சுற்றாடலில் உள்ள விடுதி ஒன்றில் வைத்து பாதிக்கப்பட்டவர்களால் பிடிக்கப்பட்டு நையப்புடைக்கப்பட்டுள்ளனர்.

அக்குவா சேவ் என்ற பெயரில் போத்தலில் அடைக்கப்பட்ட குடிநீர் தயாரிக்கும் நிறுவனம் சார்ந்தவர்கள் தமது தண்ணீரை யாழ்.மாவட்டம் முழுவதற்கும் விநியோகம் செய்வதற்கான உரிமத்தை வழங்குவதாக கூறி யாழ்.மாவட்டத்தில் சுமார் 30 பேருக்கு மேற்பட்டவர்களிடம் பணத்தை பெற்றுள்ளனர்.

அவ்வாறு பணம் வழங்கிய பலருக்கு தண்ணீர் வழங்கப்படாததுடன், சிலருக்கு வழங்கப்பட்ட தண்ணீர் சுகாதார நியமங்களுக்கு அமைவாக இல்லை என கூறி நுகர்வோர் அதிகார சபையினால் தடை செய்யப்பட்டுள்ளது.

இந்நிலையில் பாதிக்கப்பட்டவர்கள் குறித்த நிறுவனத்துடன் தொடர்பு கொண்டபோது பலர் அச்சுறுத்தப்பட்டுள்ளனர்.

இதனால் பணத்தை இழந்த பலர் அமைதியாக இருந்த நிலையில் பாதிக்கப்பட்டவர்கள் அண்மையில் ஒன்று கூடி தீர்மானித்ததற்கு அமைவாக மேற்படி தண்ணீர் தயாரிப்பு நிறுவனத்தை சேர்ந்தவர்களை யாழ்.நல்லூர் சுற்றாடலில் உள்ள விடுதி ஒன்றுக்கு அழைத்து ஒருவருக்கு புதிதாக விநியோகஸ்தர் உரிமம் பெறுவதுபோல் பாவனை செய்து மேற்படி நிறுவனத்தின் முக்கியஸ்தர்கள் இருவரை பாதிக்கப்பட்ட வர்த்தகர்கள் மடக்கிப் பிடித்துள்ளனர்.

நேற்று இரவு 7 மணிக்கு குறித்த நிறுவனத்தை சார்ந்தவர்களை மடக்கிப் பிடித்த பாதிக்கப்பட்டவர்கள் அவர்களை நையப்புடைத்ததன் பின்னர் பொலிஸாரிடம் ஒப்படைத்துள்ளனர்.

இதேவேளை பொலிஸாருக்கு தகவல் கொடுக்கப்பட்டு 1 மணி நேரத்தின் பின்னதாகவே சம்பவ இடத்திற்கு பொலிஸார் வந்து விசாரணைகளை நடத்தி மேற்படி நிறுவனத்தை சேர்ந்த இருவரையும் கைது செய்துள்ளனர்.

இதேவேளை யாழ்.மாவட்டத்தில் 2011ம் ஆண்டு தொடக்கம் மேற்படி தண்ணீர் தயாரிப்பு நிறுவனம் இவ்வாறு விநியோகஸ்தர் உரிமம் வழங்குவதாக கூறி ஏமாற்றி வந்துள்ளது.

மேலும் பாதிக்கப்பட்டவர்கள் பணம் செலுத்தியமைக்கான சான்றுகள் மற்றும் வழங்கப்பட்ட தண்ணீர் விற்பனைக்கு தடை செய்யப்பட்டமைக்கான சான்றுகள் அனைத்தையு ம் வைத்திருக்கின்றனர்.

அதேபோல் யாழ்.மாவட்டத்தில் மட்டும் அண்ணளவாக சுமார் 3 தொடக்கம் 4 கோடி ரூபாய் பணத்தை மேற்படி தண்ணீர் நிறுவனம் மோசடி செய்துள்ளதாக பாதிக்கப்பட்டவர்கள் குற்றஞ்சாட்டுகின்றனர்.

அடுத்து வரும் நாட்களில் அதிக மழைவீழ்ச்சி பதிவாகுமானால் நாட்டில் அரிசி தட்டுப்பாடுஏற்படுபடலாம் என விவசாய திணைக்கத்தின் காலநிலை தொடர்பான அதிகாரியான ரஞ்சித்புன்யவர்தன எச்சரிக்கை விடுத்துள்ளார்.

சீரற்ற காலநிலை காரணமாக ஏற்பட்ட அனர்த்தங்களால் 2 லட்சம் ஹெக்டெயர் பரப்படையநெல் உற்பத்தி பாதிக்கப்பட்டுள்ளதாகவும் அவர் சுட்டிக்காட்டியுள்ளார்.

இந்தநிலையில் அரிசி தட்டுப்பாடு நிலை ஏற்படலாம் என அவர் கூறியுள்ளார்.

எனவே, இந்தப் பிரச்சினைக்கு தீர்வாக வேறு உற்பத்திகள் தொடர்பில் விவசாயிகள்கவனம் செலுத்த வேண்டும் எனவும் ரஞ்சித் புன்யவர்தன ஆலோசனை வழங்கியுள்ளார்.

 
காலி- பத்தேகம பகுதியில் விபத்துக்குள்ளாகி வீழ்ந்த எம்.ஐ-17 உலங்குவானூர்தியை இலங்கை விமானப்படையினரால் மீட்டெடுக்கப்பட்டுள்ளது.

கடந்த இரண்டு வாரங்களுக்கு முன்னர் தென் மாகாணம் முழுவதும் பெய்த கன மழையினால் வெள்ளப்பெருக்கும், மண் சரிவும் ஏற்பட்டது. இந்நிலையில் மக்கள் இடம்பெயர்ந்து செல்ல வேண்டிய நிலைக்குத் தள்ளப்பட்டனர்.

ஆயிரக் கணக்கான மக்கள் வெள்ளத்திற்குள்ளும், மண் சரிவிற்குள்ளும் மாட்டிக் கொண்டனர். அவர்களை மீட்பதற்காக முப்படையினரும் களத்தில் இறக்கப்பட்டனர்.

இந்நிலையில், கடந்த திங்கட்கிழமை காலையில் பறந்து கொண்டிருந்த போது, எம்.ஐ-17 உலங்குவானூர்தியில் தொழில்நுட்பக்கோளாறு ஏற்பட்டதையடுத்து, விமானி அதனை மரங்கள் நிறைந்த பகுதி ஒன்றில் தரையிறக்கினார்.

இதனால் உலங்குவானூர்தி சேதமடைந்தது. இதனையடுத்து பார ஊர்தியில் சென்ற படையினர், உலங்கு வானூர்தியின் பாகங்களை அகற்றிவிட்டு அதனை மீட்டெடுத்துக் கொண்டு சென்றனர்.

மத்திய, சப்ரகமுவ, மேல், வடமேல், தென் மாகாணங்களில் இன்றும் மழை பெய்யக்கூடும்என்று வளிமண்டலவியல் திணைக்களம் எதிர்வு கூறியுள்ளது.

இன்றைய காலநிலை தொடர்பில் கருத்து வெளியிட்ட வானிலை அதிகாரி மொஹமட் சாலிஹீன், மத்திய, சப்ரகமுவ, மேல், வடமேல், தென் ஆகிய மாகாணங்களில் இடையிடையே மழைபெய்யும். கிழக்கு, ஊவா மாகாணங்களிலும் வவுனியா மாவட்டத்திலும் இடியுடன் கூடிய மழைபெய்யும்.

மாத்தளை, பொலனறுவை, வவுனியா ஆகிய மாவட்டங்களில் மழை பெய்யும்போது மணிக்கு 50கிலோ மீற்றர் வேகத்தில் காற்று வீசக்கூடும்.

கடற்பிராந்தியங்களும் சற்றுகொந்தளிப்பாகக் காணப்படும் என்று குறிப்பிட்டார். அத்துடன், தென்மேற்குப் பருவப்பெயர்ச்சி காலநிலையின்போது, வடக்கு, கிழக்கில்வரட்சியான காலநிலையே நிலவும். எனவே, யாழ். மாவட்டம் உட்பட வடக்கின் சில பகுதிகளில் தொடர்ச்சியாக வரட்சிநிலவும் என்று கூறப்படுகின்றது.

சுதந்திகா ஜயசிங்க நாளை வேண்டுமானாலும் விளையாட்டுத்துறை அமைச்சுக்கு வந்து தனது பணிகளைச் செய்யலாம் என்று விளையாட்டுத்துறை அமைச்சரும் அமைச்சரவை இணைப்பேச்சாளருமான தயாசிறி ஜயசேகர தெரிவித்தார்.

ஒலிம்பிக் பதக்கத்தை விற்பனை செய்யப்போவதாக சுசந்திகா ஜயசிங்க விடுத்துள்ள அறிவிப்பு குறித்து வினவியபோதே அவர் இதனைக் கூறினார். அவர் மேலும் தெரிவிக்கையில்,

“விளையாட்டு நிதியத்திலிருந்து சுசந்திகா ஜயசிங்கவுக்கு 80 ஆயிரம் ரூபா கொடுப்பனவு வழங்கப்பட்டுள்ளது. விளையாட்டு நிதியத்தின் பணத்திலிருந்து இப்படியான கொடுப்பனவுகளைச் செய்யமுடியாது.

எனவே, முன்னணி விளையாட்டு வீரர்களுக்கு மாதம் 75 ஆயிரம் ரூபா கொடுப்பனவுடன் வாகன வசதிகளையும் செய்துகொடுப்பதற்கான அமைச்சரவைப் பத்திரத்தை நான் அமைச்சரவையில் சமர்ப்பித்தேன். 60 ஆயிரம் ரூபாவை வழங்கவே அமைச்சரவை அனுமதி வழங்கியது. இதனால்தான் சுசந்திகா ஜயசிங்க இப்படி சொல்கின்றார்.

பதக்கத்தை விற்பனைசெய்யவேண்டியதில்லை. அமைச்சுக்கு வந்து அவர் கடமைகளைப் பொறுப்பேற்கலாம். சம்பளமும் நிறுத்தப்படவில்லை” என்றார்.

பருத்தித்துறை – அல்வாய் வடக்கு பகுதியில் கூரிய ஆயுதத்தால் தாக்கப்பட்டு இளைஞர் ஒருவர் கொலை செய்யப்பட்டுள்ளார்.

பணம் தொடர்பில் ஏற்பட்ட முரண்பாடே இதற்குக் காரணம் என பொலிஸார் குறிப்பிட்டுள்ளனர்.

மேலும், சம்பவத்தில் பலியானவர் அல்வாய் வடக்கு பகுதியைச் சேர்ந்த 26 வயதான ஒருவராகும். அத்துடன், கொலையாளி என சந்தேகிக்கப்படும் அதே பகுதியைச் சேர்ந்த ஒருவர் கைதுசெய்யப்பட்டுள்ளார்.

பேதுருதுடுவ பொலிஸார் இது குறித்த மேலதிக விசாரணைகளை மேற்கொண்டு வருகின்றனர்.