அடைமழையால் ஏற்பட்ட வெள்ளம் மற்றும் மண்சரிவால் 15 ஆயிரத்துக்கும் மேற்பட்ட வீடுகள் பகுதியளவிலும், 2 ஆயிரத்து 500இற்கும் மேற்பட்ட வீடுகள் முழுமையாகவும் சேதமடைந்துள்ளன என்று அனர்த்த முகாமைத்துவ மத்திய நிலையம் இறுதியாக வெளியிட்ட அறிக்கையில் தெரிவிக்கப்பட்டுள்ளது.

அத்துடன், உயிரிழந்தவர்களின் எண்ணிக்கை 212 ஆக உயர்வடைந்துள்ளது. காணாமல் போயுள்ள 79 பேரைத் தேடும் பணி தொடர்கின்றது. 147 பேர் காயமடைந்துள்ளனர் என்றும் அந்த அறிக்கையில் தெரிவிக்கப்பட்டுள்ளது.

இடம்பெயந்தவர்களும், பாதுகாப்பான இடங்களில் தங்க வைக்கப்பட்டவர்களும் வீடுகளுக்குத் திரும்பி வருகின்றனர். இதனால் இடைத்தங்கல் முகாம்களில் தங்கியுள்ளோரின் எண்ணிக்கை 21 ஆயிரமாகக் குறைந்துள்ளது.

பகுதியளவில் சேதமடைந்துள்ள வீடுகளைத் திருத்தும் பணிகள் ஆரம்பிக்கப்பட்டுள்ளன. முழுமையாக தேசமடைந்துள்ள வீடுகளுக்கு அரசு நட்டஈடு வழங்கவுள்ளது.

அதேவேளை, வெள்ளத்தால் பாதிக்கப்பட்ட பகுதிகளில் விடுமுறை வழங்கப்பட்டிருந்த பாடசாலைகளின் கல்வி நடவடிக்கைகள் நேற்றிலிருந்து மீண்டும் ஆரம்பமாகின. எனினும், வெள்ளநீர் இன்னும் வழிந்தோடாத பகுதிகளிலுள்ள சில பாடசாலைகள் தொடர்ந்தும் பூட்டப்பட்டிருந்தன.

இரத்தினபுரி உள்ளிட்ட சில இடங்களில் மாணவர்கள் வர்ண உடையுடன் பாடசாலைகளுக்கு வருகின்றனர். சீருடை வழங்கப்படும்வரை வர்ண உடை பாவிப்பதற்குரிய அனுமதியை கல்வி அமைச்சு வழங்கியுள்ளது.

கொப்பி, புத்தகம் உள்ளிட்ட வசதிகளும் வெள்ளத்தால் பாதிக்கப்பட்டுள்ள மாணவர்களுக்கு செய்துகொடுக்கப்படவுள்ளது. ஆசிரியர்களுக்கும் கல்வி அமைச்சால் விசேட சலுகைகள் வழங்கப்பட்டுள்ளன.

வருடத்தின் இதுவரையான காலப்பகுதியில் 56,000 டெங்கு நோயாளர்கள் அடையாளங்காணப்பட்டுள்ளதாக சுகாதார அமைச்சின் தெற்று நோய்ப் பிரிவு தெரிவித்துள்ளது.

அதிகமான டெங்கு நோயாளர்கள் கொழும்பு மாவட்டத்திலேயே அடையாளங்காணப்பட்டுள்னர்.

கொழும்பு மாவட்டத்தில் பதிவாகிய டெங்கு நோயாளர்களின் எண்ணிக்கை 12,610 ஆகும். கொழும்பு மாவட்டத்தில் கடந்த மாதத்தில் மாத்திரம் 2,994 டெங்கு நோயாளர்கள் அடையாளங்காணப்பட்டுள்ளமை குறிப்பிடத்தக்கது.

அத்துடன் கம்பஹா மாவட்டத்தில் வருடத்தின் இதுவரையான காலப்பகுதியில் 8,324 டெங்கு நோயாளர்கள் அடையாளங்காணப்பட்டுள்ளதுடன் திருகோணமலை மாவட்டத்தில் 4,256 டெங்கு நோயாளர்கள் அடையாளங்காணப்பட்டுள்ளதாக சுகாதார அமைச்சின் தெற்று நோய்ப் பிரிவு தெரிவித்துள்ளது.

கட்டுநாயக்க சர்வதேச விமான நிலையத்தில் கட்டாரில் இருந்து வரும் பயணிகள் நாணயங்களை மாற்றீடு செய்வதில் பிரச்சினைகளை எதிர்நோக்கியுள்ளதாக தெரியவந்துள்ளது.

விமான நிலையத்திலுள்ள வங்கிகளில் கட்டார் ரியாலை இலங்கை ரூபாயாக மாற்றித்தர மறுக்கின்றமையே இதற்குக் காரணம் என, பயணிகள் முறையிட்டுள்ளதாக, விமான நிலையத்தின் கடமை நேர முகாமையாளர் குறிப்பிட்டுள்ளார்.

இதேவேளை. ஐக்கிய அரபு இராச்சியம், சவூதி அரேபியா, எகிப்து, பஹ்ரைன் உள்ளிட்ட மத்திய கிழக்கின் சில நாடுகள் கட்டாருடனான இராஜதந்திர உறவுகளை துண்டிப்பதாக அறிவித்துள்ளன என, நேற்றையதினம் செய்திகள் வௌியாகின.

தீவிரவாதத்திற்கு கட்டார் ஆதரவளிப்பதாக குற்றம்சாட்டியே அவர்கள் இந்த நடவடிக்கையை மேற்கொண்டுள்ளனர் என வௌிநாட்டு ஊடகச் செய்திகள் குறிப்பிட்டுள்ளன.

இதனையடுத்து, அந்தநாட்டுக்கான விமான சேவைகளை இடைநிறுத்துவதாக எமிரேட், பிளை துபாய், எதிஹாத் எயார்லைன்ஸ் ஆகியன அறிவித்தமையும் குறிப்பிடத்தக்கது.

நாட்டில் சில வர்த்தக நிலையங்களில் முட்டையின் விலையில் பாரிய வீழ்ச்சி ஏற்பட்டுள்ளதாக தெரிவிக்கப்படுகின்றது.

இதன்படி 15 ரூபாவாக இருந்த முட்டையின் விலை தற்போது 8 ரூபாவாக விற்கப்படுகின்றது.

இதனால் தங்களுக்கு 15,000 தொடக்கம் 20,000 ரூபா வரையில் நஷ்டம் ஏற்பட்டுள்ளதாக வர்த்தகர்கள் தெரிவித்துள்ளனர்.

மேலும், முட்டை ஒன்றின் உற்பத்தி விலை 11 ரூபாவாக இருக்கின்ற போது, அதன் விற்பனை விலை 8 ரூபாவாக இருப்பதால் தங்கள் மிகுந்த அசௌகரியங்களை எதிர்நோக்குவதாக வர்த்தகர்கள் கூறியுள்ளனர்.

அடுப்பில் இருந்து இறக்கி வைக்கப்பட்டு, கொதி நிலையில் காணப்பட்ட பருப்புக்கறி சட்டிக்குள் விழுந்து, ஒன்பது மாதக் குழந்தை, எரிகாயங்களுக்கு உள்ளான சம்பவம், மாங்குளம் பகுதியில் சனிக்கிழமை இடம்பெற்றுள்ளது.

குழந்தை மாங்குளம் ஆதார வைத்தியசாலையில் அனுமதிக்கப்பட்ட பின்னர், மேலதிக சிகிச்சைக்காக, யாழ். போதனா வைத்தியசாலைக்கு மாற்றப்பட்டுள்ளது.
சுலக்ஷன் அபிசாந் என்ற ஒன்பது மாதக் குழந்தையே இவ்வாறு எரிகாயங்களுக்கு உள்ளாகியுள்ளது.

குழந்தையை அருகில் இருத்தி விட்டு, தாயார் சமையில் வேலையில் கவனம் செலுத்தியுள்ளார். இதன்போது, அடுப்பில் சமைக்கப்பட்ட பருப்புக் கறியை கொதி நிலையில் இறக்கி கீழே வைத்து விட்டு இதர வேலையில் ஈடுபட்டுள்ளார்.

இதன்போது, தவறுதலாக குழந்தை பருப்புக் கறி சட்டிக்குள் விழுந்துள்ளது

பருத்தித்துறையில் இளைஞர் ஒருவர் கத்திக் குத்துக்கு இலக்காகி உயிரிழந்துள்ளார் என பொலிஸார் தெரிவித்துள்ளனர். அலவாய் வடக்கு பிரதேசத்தை சேர்ந்த இளைஞரே இவ்வாறு கொலை செய்யப்பட்டுள்ளார்.

26 வயதான குறித்த இளைஞன் கொடூரமான முறையில் கத்தியால் குத்தி கொலை செய்யப்பட்டுள்ளதாக பொலிஸார் தெரிவித்துள்ளனர்.

சம்பவம் தொடர்பில் அதே பிரதேசத்தை சேர்ந்த 38 வயதுடைய நபர் ஒருவர் கைது செய்யப்பட்டுள்ளார்.

பண பிரச்சினை காரணமாக இந்த கொலை சம்பவம் இடம்பெற்றுள்ளதாக பொலிஸார் குறிப்பிட்டுள்ளனர்.

இந்த நிலையில் சம்பவம் தொடர்பில் மேலதிக விசாரணைகள் ஆரம்பிக்கப்பட்டுள்ளதாக பொலிஸார் குறிப்பிட்டுள்ளனர்.

உயிரிழந்தவரின் உடல் மந்திகை வைத்தியசாலையில் வைக்கப்பட்டுள்ளதாக தெரிவிக்கப்படுகின்றது.

தம்புள்ளை பொருளாதார மத்திய நிலையத்திற்கு யாழ்ப்பாணத்தில் இருந்து பாரிய பூசணிக்காய்கள் கிடைத்துள்ளன.

சந்தையில் ஒரு கிலோ கிராம் பூசணிக்காய் 110 முதல் 120 ரூபாய் விலையில் விற்பனை செய்யப்பட்டு வருகின்றன.

இந்த பூசணிக்காய்களுக்குள் பாரிய அளவிலான பூசணிக்காய் ஒன்று சிக்கியுள்ளது. அதன் நிறை 28 கிலோ 100 கிராம் ஆகும்.

இந்த பூசணிக்காய் கிட்டத்தட்ட 3160 ரூபாய்க்கு விற்பனை செய்யப்பட்டுள்ளதாக சந்தை தகவல்கள் தெரிவிக்கின்றன.

பாரியளவில் பூசணி கிடைத்தமையால் நல்ல விலைக்கு விற்க முடிந்ததாக தம்புள்ளை சந்தை வர்த்தகர் தெரிவித்துள்ளார். இது குறித்து வர்த்தகர்கள் மகிழ்ச்சியை வெளிப்படுத்தியுள்ளனர்.

ரயில் பாதையில் தலையை வைத்து தற்கொலை செய்து கொண்ட மாணவி தொடர்பில் சமூக வலைத்தளங்களில் தவறான விடயங்கள் பரப்பப்பட்டு வருவதாக கவலை வெளியிடப்பட்டுள்ளது.

கடந்த இரண்டு நாட்களுக்கு முன்னர் பேராதனை பல்கலைக்கழக மாணவி ஒருவர் ரயில் பாதையில் தற்கொலை செய்து கொண்டார்.

அவர் தொடர்பில் போலி தகவல்கள் வெளியிடுவதனால் நண்பர்கள் மிகவும் மன வருத்தத்தில் உள்ளதாக தெரிவிக்கப்படுகின்றது.

இந்த நிலையில் அவரது நெருங்கிய நண்பர் ஒருவர் தனது நண்பி தவறான முறையில் விமர்சிக்கப்படுவது தொடர்பில் பேஸ்புக் பக்கத்தில் நீண்ட பதிவொன்றை வெளியிட்டுள்ளார்.

அந்த பதிவில், “தரணி அல்லது BPK. அப்படி தான் நாம் அவரை அழைப்போம். அவர் எந்த நேரமும் சிரித்த முகத்துடன் இருக்கும் ஒரு பெண். இன்று சமூக வலைத்தளங்களில் அதிகம் பேசப்படும் ஒருவராக மாறியுள்ளார்.

அவரது மரணத்தை பலர் விற்பனை செய்ய முயற்சிக்கின்றார்கள். பலர் அவர் தற்கொலை செய்து கொண்ட புகைப்படங்களை பகிர்ந்து வருகின்றார்கள். பல பேஸ்புக் பக்கங்களில் அவரது மரணத்திற்கு கதை ஒன்றை உருவாக்கி விமர்சித்து வருகின்றனர்.

இவற்றில் பல கதைகள் பிழையானவை. தரணியை உண்மையாக நேசிப்பவர்களுக்கு, அவரது மரணத்தினால் வருத்தத்தில் உள்ளவர்களுக்கு இவ்வாறான விடயங்கள் மேலும் வருத்தமளிக்கின்றது.

உண்மையாக சிலர் வெளியிட்டுள்ள பின்னூட்டங்களை பார்ப்பதற்கு அசிங்கமாக உள்ளது. அவர்களில் பலர் குறைந்த பட்சம் அவரை பார்த்ததில்லை, பேசியதில்லை எனினும் மரணம் குறித்து கருத்து வெளியிட்டுள்ளனர்.

ஒரு தவறான தீர்மானத்தினால் அவரது வாழ்க்கை முடிவுக்கு வந்து விட்டது. எனினும் ஒரு தவறினால் அவர் இதுவரை அவரது நண்பர்கள் மற்றும் குடும்பத்திற்கு செய்த நல்ல விடயங்களை மறந்துவிட முடியாது.

அவரது தற்கொலை புகைப்படங்கள் பகிர்வதனை தவிர்த்து கொள்ளுமாறு அனைவரிடம் தயவாக கேட்டு கொள்கின்றேன். அவற்றில் நீங்கள் எதிர்பார்ப்பது என்ன? அவதானம் குறித்து காட்டுவதற்கு முயற்சிக்கின்றீர்கள்? உண்மையாக நல்ல மனது இருந்தால் அந்த அப்பாவி சிரிப்புடனான அழகான புகைப்படங்களை பகிருங்கள்.

தரணி முட்டாள் பெண் அல்ல, அவர் பல்கலைக்கழத்திற்கு வரும் அளவிற்கு திறமையானவர், விசேட பட்டதாரி பட்டம் ஒன்றையும் வெற்றிகரமாக அவர் பெற்று கொண்டார்.

எனினும் ஒரு வருத்தமான விடயம் அவரது வாழ்க்கையை அழித்து விட்டது. எங்களிடம் இருந்து அவரை தூரப்படுத்தியது . அவரை விமர்சிப்பதற்கு முன்னர், உங்கள் வாழ்க்கையில் எத்தனை முறை உடைந்து போனீர்கள் என்ற விடயத்தை நினைவில் வைத்து கொள்ளுங்கள்.

எனினும் நீங்கள் அதனை தாங்கி கொண்டு வாழ்வதனாலேயே இந்த பதிவை வாசிக்கின்றீர்கள். எனினும் தரணியினால் அவரை கட்டுப்படுத்தி கொள்ள முடியவில்லை. நாம் அனைவரும் மனிதர்கள். நாங்களும் தவறு செய்கின்றோம்.

சில விடயங்கள் பெரிய பிரச்சினையாகி விட்டால் அதனால் துன்பங்களை அனுபவிக்கின்றோம். இறுதியாக தரணி பட்டம் பெற்ற தினத்தன்று, பட்டம் பெறுவதற்கு முன்னர் தனது சந்தர்ப்பத்திற்காக சிரித்த முகத்துடன் காத்திருந்த புகைப்படத்தை பதிவிடுகின்றேன்… என குறிப்பிட்டு அவர் புகைப்படம் ஒன்றையும் பதிவிட்டுள்ளார்.