ரயில் தொழிற்சங்கங்கள் எதிர்வரும் ஜூன் 4ஆம் திகதி நள்ளிரவு 12 மணிமுதல் 24 மணித்தியாலய வேலைநிறுத்தப் போராட்டத்தில் குதிக்கப்போவதாக அறிவித்துள்ளன.

சம்பள நிர்ணயத்தை மீள்நிர்மாணம் செய்தல் மற்றும் ஓய்வூதியம் பெரும் வயதெல்லையை 63 வயது வரை அதிகரிக்குமாறு கோரியே ரயில் தொழிற்சங்கங்கள் மேற்படி வேலை நிறுத்தப் போராட்டத்தில் ஈடுபடப்போவதாக அறிவித்துள்ளன.

ரயில் தொழிற்சங்கங்கள் ஒன்றியத்தின் ஒருங்கிணைப்பாளர் லால் ஆரியரத்ன இந்தத் தகவலைத் தெரிவித்துள்ளார்.

இம்மாதம் 5ஆம் திகதி சைட்டம் எனப்படும் மாலபே தனியார் மருத்துவக் கல்லூரிக்கு எதிர்ப்புத் தெரிவித்து அரச வைத்திய அதிகாரிகள் சங்கத்துடன் இணைந்து ரயில் தொழிற்சங்கங்கள் போராட்டத்தில் குதித்திருந்தன.

இதன் காரணமாக நாட்டில் ரயில் போக்குவரத்து முற்றிலும் தடைப்பட்டிருந்தது. இந்நிலையில், மீண்டும் எதிர்வரும் ஜூன் 4ஆம் திகதி நள்ளிரவு முதல் 24 மணிநேர போராட்டத்தை மேற்கொள்ளவுள்ளதாக ரயில் தொழிற்சங்கங்கள் அறிவித்துள்ளமை தொடர்பில் மக்கள் அதிருப்தியடைந்துள்ளனர்.

சப்புகஸ்கந்த, ஹெய்ந்தூவ பகுதியில் வீடு ஒன்றின் மீது மண் திட்டு சரிந்து வீழ்ந்ததன் காரணமாக இரண்டு பெண்கள் பலியாகினர்.

இதேவேளை, தெவினுவர பகுதியில் இடம்பெற்ற பிறிதொரு மண்சரிவு அனர்த்தத்தில் இன்னொரு பெண்ணும் உயிரிழந்ததாக அத தெரண செய்தியாளர் தெரிவித்தார்.

இந்த நிலையில், வெள்ளப்பெருக்கு ஏற்பட்டுஏற்பட்டுள்ள காலி, களுத்துறை, மாத்தறை மற்றும் ஹம்பாந்தோட்டை மாவட்டங்களில் மீட்பு பயணிகளுக்காக படகுகள் மற்றும் உலங்கு வானூர்திகள் பயன்படுத்தப்பட்டுள்ளன.

இந்த பணிகளில் ராணுவமும், வான்படையும், கடற்படையினரும் ஈடுபடுத்தப்பட்டுள்ளனர்.

இதனிடையே, தங்காலை, ரண்ன பகுதியிலும் – கதிர்காமம் பிரதான வீதி மற்றும் தங்காலை- திஸ்ஸமஹாராம – வீரகெட்டிய வீதிகளிலும் வெள்ளநீர் நிரம்பியுள்ளதாக தெரிவிக்கப்பட்டுள்ளது.

குவைத்திற்கு சென்று சித்திரவதைகளுக்குள்ளான இலங்கை பணிப்பெண்கள் 120 பேர் நேற்று முன்தினம் (24.05) நாடு திரும்பினர்.

இவர்களில் 52 பேர் நேற்று அதிகாலை நாட்டிற்கு வருகை தந்ததாக வெளிநாட்டு வேலைவாய்ப்புப் பணியகம் தெரிவித்தது. மீதமானோர் நேற்று பிற்பகல் தாயகம் திரும்பினர்.

குவைத்தில் பல்வேறு துன்புறுத்தல்களை எதிர்கொண்ட குறித்த பணிப்பெண்கள், குவைத் தூதரகத்தின் தடுப்பு முகாமில் தங்க வைக்கப்பட்டிருந்தனர்.

மேலும், 50 இலங்கை பணிப்பெண்கள் அங்கு தடுத்து வைக்கப்பட்டுள்ளதாக வெளிநாட்டு வேலைவாய்ப்புப் பணியகம் குறிப்பிட்டது.

இதனைத் தவிர, குவைத் தொழில் அமைச்சின் கீழுள்ள தடுப்பு முகாமில் 91 இலங்கை பணிப்பெண்கள் தடுத்து வைக்கப்பட்டுள்ளனர்.

இவர்கள் அனைவரையும் நாட்டிற்கு அழைத்து வர நடவடிக்கை எடுத்துள்ளதாக வெளிநாட்டு வேலைவாய்ப்புப் பணியகம் தெரிவித்தது.

மட்டக்களப்பு, ஏறாவூர் சுகாதார வைத்திய அதிகாரிப் பிரிவுக்கு உட்பட்ட மீராகேணி ஸக்காத் கிராமத்தில் இன்று (25) பகல் தண்ணீர் வாளிக்குள் விழுந்து மூன்று வயதுடைய பெண் குழந்தை ஒன்று உயிரிழந்துள்ளது எனப் பொலிஸார் தெரிவித்தனர்.

மீராகேணி ஸக்காத் கிராமத்தைச் சேர்ந்த பாத்திமா வாஜீகா என்ற குழந்தையே இவ்வாறு உயிரிழந்துள்ளார்.

பெரிய வாளிக்குள் தண்ணீர் நிரப்பப்பட்டிருந்த நிலையில், அதில் இந்தக் குழந்தை உட்பட மூன்று குழந்தைகள் குளித்து விளையாடிக் கொண்டிருந்துள்ளனர். இதன்போது, இந்தக் குழந்தை தண்ணீரினுள் அமிழ்ந்து மூச்சுத் திணறியுள்ளது.

குளித்து விளையாடிக்கொண்டிருந்த ஏனைய குழந்தைகளின் அலறல் சத்தம் கேட்டு வீட்டார் ஓடிச் சென்று, தண்ணீரினுள் அமிழ்ந்து கிடந்த இந்தக் குழந்தையை மீட்டெடுத்து, ஏறாவூர் ஆதார வைத்தியசாலையில் அனுமதித்துள்ளனர்.

இருப்பினும், அவ்வேளையில் குழந்தை உயிரிழந்து காணப்பட்டது என வைத்தியசாலைத் தகவல்கள் தெரிவிக்கின்றன.

இலங்கையில் சட்டவிரோதமான முறையில் தங்கியிருந்த ஜேர்மன் நாட்டவர் நீதிமன்ற உத்தரவுக்கு அமைய நாடு கடத்தப்பட்டுள்ளார்.

இப்ராஹிம் அல்சதுரி என்ற ஜேர்மனியர் வீசா இன்றி இலங்கையில் நீண்டகாலம் தங்கியிருந்த நிலையில், அவரை நாடு கடத்துமாறு களுத்துறை மேலதிக நீதவான் சந்திம எதிரிமான்ன உத்தரவிட்டுள்ளார்.

இலங்கை பெண் ஒருவருடன் ஏற்பட்ட காதல் காரணமாக அவர் வீசா இன்றி தங்கியிருந்ததாக நீதிமன்றில் அறிவிக்கப்பட்டுள்ளது.

நீதிபதியின் உத்தரவிற்கமைய விசேட பாதுகாப்புடன், குறித்த ஜேர்மன் பிரஜை நாடு கடத்தப்பட்டுள்ளதாக குடிவரவு குடியகல்வு அதிகாரி எல்.எஸ்.ஹெட்டியாராச்சி களுத்துறை நீதிமன்றில் நேற்று அறிவித்துள்ளார்.

இப்ராஹிம் அல்சதுரி என்ற ஜேர்மனியர் பயாகல பிரதேசத்தை சேர்ந்த பெண் ஒருவரை காதலித்துள்ள நிலையில் அவருடன் நீண்ட காலமாக வசித்து வந்துள்ளார்.

விசா இன்றி வெளிநாட்டவர் ஒருவர் நீண்ட காலமாக இலங்கையில் தங்கியிருப்பது தொடர்பில் பயாகல பொலிஸாரினால் நீதிமன்றுக்கு அறிவிக்கப்பட்டது. இதனையடுத்து களுத்துறை மற்றும் மாலிகாந்த நீதிமன்றத்தினால் அவரை நாடு கடத்துமாறு உத்தரவிடப்பட்டுள்ளது.

இந்த நபர் கைது செய்யப்பட்டு மிரிஹான தடுப்பு நிலையத்தில் தடுத்து வைக்கப்பட்டிருந்த போதிலும் அவர் அங்கிருந்த தப்பி சென்று காதலியிடம் சென்றுள்ளார்.

எனினும் அவரை மீண்டும் கைது செய்த பொலிஸார் நீதிமன்றில் ஆஜர்படுத்திய நிலையில் நீதிமன்றம் இந்த உத்தரவை பிறப்பித்துள்ளது.