பிரித்தானியாவில் கத்தியுடன் பேருந்தில் நுழைந்து தாக்குதல் நடத்த முயன்ற மர்ம நபரை ஆப்பிரிக்கர் ஒருவர் அடித்து ஓட விட்ட சம்பவம் வீடியோவாக வெளியாகியுள்ளது.

Stoke Newington பகுதியில் 149 எண் பேருந்திலே இச்சம்பவம் நடந்துள்ளது. சம்பவத்தின் போது மர்ம நபர் ஒருவன் கத்தியுடன் ஓட்டுநர் ஜன்னல் வழியாக பேருந்தில் நுழைந்துள்ளான்.

உடனே ஓட்டுநர் பேருந்தை சாலை ஓரத்தில் நிறுத்தியுள்ளார். பின்னர், பேருந்தில் எச்சரிக்கை ஒலியை எழுப்பியுள்ளார். இந்நிலையில், பேருந்திலிருந்து ஆப்பிரிக்கர் ஒருவர் தாக்குதல்தாரியுடன் சண்டையிட்டு அவனிடமிருந்த கத்தியை கைப்பற்றியுள்ளார்.

இதனையடுத்த அந்த மர்ம நபர் பேருந்திலிருந்து தப்பி ஓடியுள்ளான். சம்பவயிடத்திற்கு விரைந்த பொலிசார், காயமடைந்த ஆப்பரிக்கரை மருத்துவமனைக்கு கொண்டு சென்று சிகிச்சை அளித்துள்ளனர்.

மேலும், குறித்த செயலில் ஈடுபட்ட மர்ம நபர் குறித்த விசாரணை மேற்கொண்டு வருகின்றனர். மர்ம நபர் குறித்த தகவல் தெரிந்தவர்கள் தொடர்புக் கொள்ளும் படி பொலிசார் அறிவித்துள்ளனர்.

பெற்றோரின் கோரிக்கைகளை நிராகரித்து எட்டு மாதக் குழந்தையொன்றின் செயற்கை உயிர்காப்பு கருவியை அகற்றுவதற்கு லண்டன் நீதிமன்றம் உத்தரவிட்டது.

பிறக்கும்போதே மிக அரிதான மரபணுத் தாக்கத்தால் பீடிக்கப்பட்ட சார்லி கார்ட் என்ற ஆண் குழந்தை, பிறந்தது முதல் கடந்த எட்டு மாதங்களாக செயற்கை உயிர்காப்புக் கருவியின் உதவியுடன் உயிர்வாழ்ந்து வருகிறது.

மருத்துவ ரீதியாக, இதுபோன்ற நோயால் பாதிக்கப்பட்டவர்களை அந்நோயில் இருந்து மீட்க முடியாது. நோயாளி உயிருடன் மட்டுமே இருப்பார். வேறெந்த அசைவும் அவரிடம் இருக்காது.

இந்தக் குழந்தையின் செயற்கை உயிர்காப்புக் கருவியை அகற்றுவதன் மூலம், கௌரவமான மரணத்தை அதற்குப் பெற்றுத் தரவேண்டும் என்று, குழந்தைக்கு சிகிச்சையளித்து வரும் மருத்துவமனை நீதிமன்றில் மனுத் தாக்கல் செய்தது.

வழக்கை விசாரித்த நீதிபதி, பெற்றோரின் எதிர்ப்பையும் மீறி, உயிர்காப்புக் கருவியை அகற்ற மருத்துவமனைக்கு அனுமதியளித்தது.

இந்தத் தீர்ப்பை நீதிபதி வாசித்தபோது, ‘வேண்டாம்’ என்று அந்தக் குழந்தையின் பெற்றோர் கதறியழுதது அங்கு கூடியிருந்தோரைக் கண்கலங்கச் செய்தது.

தமது குழந்தையின் சிகிச்சைக்காக இணையதளம் மூலம் சுமார் ஒன்றரை மில்லியன் யூரோக்களைத் தாம் திரட்டியிருப்பதாகவும், அமெரிக்க மருத்துவமனை ஒன்று இந்தக் குழந்தைக்கான சிகிச்சையை வழங்கத் தயாராக இருப்பதாகவும் அவர்கள் நீதிமன்றில் தெரிவித்திருந்தனர்.

என்றபோதும் நீதிபதிகள் பெற்றோருக்கு எதிரான தீர்ப்பையே வழங்கினர்.

இந்தத் தீர்ப்பை எதிர்த்து மேன்முறையீடு செய்வதா, இல்லையா என்று பெற்றோர் தமது தரப்பு சட்டத்தரணிகளுடன் ஆலோசனை செய்து வருகின்றனர்.

அமெரிக்கா விரும்பும் எந்தவொரு தாக்குதலுக்கும் பதிலடி கொடுக்க தயார் நிலையில் இருப்பதாக வடகொரியாவின் அரச செய்தி நிறுவனமான கே.சி.என்.ஏ. செய்தி வெளியிட்டுள்ளது.

அத்துடன், கடற்படை குழுவொன்றை கொரிய தீபகற்பத்திற்கு அனுப்பி வைத்த அமெரிக்காவுக்கு எச்சரிக்கை விடுப்பதாகவும், அந்நாட்டு பாதுகாப்பு அமைச்சின் பேச்சாளர் ஒருவரை மேற்கோள்காட்டி இந்த செய்தி வெளியிடப்பட்டுள்ளது.

குறித்த செய்தியில் மேலும் தெரிவிக்கப்பட்டுள்ளதாவது, அமெரிக்கா தாக்குதல்களை நடத்தினால், வடகொரியா அணுவாயுத தாக்குதல்களை நடத்த நேரிடும்.

எந்தவொரு அழுத்தங்களையும் எதிர்கொள்ள வடகொரியா தயார் நிலையில் உள்ளது. அத்துடன், எதிரியின் நடமாட்டங்களை தொடர்ச்சியாக வடகொரியா கண்காணித்து வருகின்றது என அந்த செய்தியில் மேலும் தெரிவிக்கப்பட்டுள்ளது.

இதேவேளை, அவுஸ்திரேலியாவுக்கு செல்ல திட்டமிட்டிருந்த விமானங்களைத் தாங்கிய போர்க் கப்பலுடன் கார்ல் வின்ஸன் தாக்குதல் குழுவை அமெரிக்கா கொரிய தீபகற்பத்தை நோக்கி அனுப்பியது.

அமெரிக்காவின் இந்த நடவடிக்கையை கண்டித்து வடகொரியா தற்போது எச்சரிக்கை விடுத்துள்ளது. இதனிடையே, அமெரிக்காவுக்கும் தமக்கும் இடையிலான சிரியா தொடர்பிலான இராணுவத் தொடர்பை துண்டித்துக்கொள்வதாக ரஷ்யா தெரிவித்துள்ளது.

சிரியா மீதான அமெரிக்காவின் ஏவுகணை தாக்குதலை தொடர்ந்து ரஷ்யா இதனை தெரிவித்துள்ளது. இதன்படி, அமெரிக்காவுடன் நேரடி மோதலுக்கு தாம் தயாராக இருப்பதாக ரஷ்ய ஜனாதிபதி தெரிவித்துள்ளார்.

இந்நிலையில், அமெரிக்க ஜனாதிபதி டொனால்ட் ட்ரம்புடனான தமது தொடர்பு சீரடையும் என்பதில் நம்பிக்கையில்லை என ரஷ்ய ஜனாதிபதி விளாடிமீர் புட்டின் தெரிவித்துள்ளார்.

ரஷ்யா மற்றும் அமெரிக்காவுக்கு இடையில் சிரியா தொடர்பில் “குறுக்கிடாத வழித்தடங்கள்” (Deconfliction channels) என்ற ஒரு நடைமுறை 2015ஆம் ஆண்டு முதல் பின்பற்றப்படுகின்றது.

கணிசமான இடைவெளி இருப்பதை உறுதி செய்துகொள்ள வேண்டும். ஒருவருக்கொருவர் தாக்கக் கூடாது. சிரியாவில் இரு வல்லரசுகளும் மேற்கொள்ளும் விமான தாக்குதல்கள் தங்களுக்கிடையே நேரடி மோதலாக உருவாகிவிடக் கூடாது என்பதே இந்த ஏற்பாட்டிற்கு முக்கிய காரணம்.

இக் காரணங்களின் அடிப்படையிலேயே ரஷ்ய ஜனாதிபதி இந்த முடிவினை எடுத்துள்ளார். இந்நிலையில், சிரிய வான் பரப்பில் அமெரிக்கா மற்றும் ரஷ்ய போர் விமானங்கள் நெருங்கி வரக்கூடும் எனவும், இதனால் விபத்துக்கள் ஏற்பட கூடும் எனவும் சர்வதேச ஊடகங்கள் செய்தி வெளியிட்டுள்ளன.

அவுஸ்திரேலிய ஆய்வகம் ஒன்றில் கடந்த வருடம் நடத்தப்பட்ட அதிரடிச் சோதனையின்போது கைப்பற்றப்பட்ட, போதைக்கு அடிமையான மலைப்பாம்பு தற்போது இயல்பு நிலைக்குத் திரும்பியுள்ளது.

சட்டவிரோத நடவடிக்கைகளில் ஈடுபடுபவர்கள் பாம்பு போன்ற விஷ ஜந்துக்களை தமது பாதுகாப்புக்காக வைத்திருப்பது வழக்கமாகிவிட்டது. அதன்படி, ஆறடி நீளமுள்ள இந்த மலைப்பாம்பை, கடந்த வருடம் ஆய்வகம் ஒன்றில் அதிகாரிகள் கைப்பற்றினர். பாதுகாப்புக்காக வளர்க்கப்பட்டுவந்த அந்தப் பாம்பிடம் போதைக்கு அடிமையானதன் அறிகுறிகள் தென்பட்டதைக் கண்டு அதிர்ச்சியுற்ற அதிகாரிகள், அப்பாம்புக்கு மறுவாழ்வளிக்கத் திட்டமிட்டனர்.

இதற்காக, பதினான்கு சிறைக் கைதிகளைத் தெரிவுசெய்து அவர்கள் மூலம் இந்தப் பாம்பு பராமரிப்புக்கு உட்படுத்தப்பட்டது. கடந்த ஏழு மாதங்களாக ‘மறுவாழ்வு’ பெற்று வந்த மலைப்பாம்பு தற்போது இயல்பு நிலைக்குத் திரும்பியுள்ளதாக மருத்துவ ரீதியாக உறுதி செய்யப்பட்டுள்ளது.

இதுபற்றி அறிந்த ஒருவர், குறித்த பாம்பை செல்லப்பிராணியாக வளர்க்க விரும்பினார். இதையடுத்து, அதற்கான நீதிமன்ற அனுமதிக்கு கோரிக்கை விடப்பட்டுள்ளது. அந்தக் கோரிக்கை நீதிமன்றால் ஏற்றுக்கொள்ளப்பட்ட பின், பாம்பு விடுதலை செய்யப்படவுள்ளது.

அவுஸ்திரேலியாவில், விலங்குகளுக்கு மறுவாழ்வளிப்பதற்காக கைதிகளைப் பயன்படுத்தும் திட்டம் கடந்த இருபது ஆண்டுகளாக நடைமுறையில் இருந்து வருகிறது. விலங்குகளுடன் பொறுமையாகவும், சகிப்புத்தன்மையுடனும் நடந்துகொள்வது கைதிகள் மனங்களில் மாற்றங்களை ஏற்படுத்துவதாகவும், இதன்மூலம் கைதிகள் திருந்தி பொதுவாழ்வில் இலகுவாகக் கலந்துகொள்ள முடிகிறது என்றும் நம்பப்படுகிறது.