வவுனியா – யாழ். பிரதான வீதியில் வீதியோரத்தில் ஆனாதரவான நிலையிலிருந்த மோட்டார் சைக்கிள் ஒன்று பொலிசாரால் நேற்றிரவு மீட்கப்பட்டது. இது தொடர்பில் மேலும் தெரியவருவதாவது,

வவுனியா- யாழ். பிரதான வீதியோரத்தில் நிலத்தில் சரிந்து விழுந்த நிலையில் மோட்டார் சைக்கிள் ஒன்றும், ஹெல்மட், ஒரு சோடி பாட்டா என்பனவும் 3 மணித்தியாலத்திற்கும் மேலாக அவ்விடத்தில் காணப்பட்டுள்ளன.

அப்பகுதியில் செய்தி சேகரிப்புக்காக சென்றிருந்த ஊடகவியலாளர்கள் இது தொடர்பில் வவுனியா பொலிசாருக்கு தொலைபேசி மூலம் தெரியப்படுத்தியிருந்தனர்.

இதனையடுத்து சம்பவ இடத்திற்கு வந்த பொலிசார் அது தொடர்பில் விசாரணைகளை மேற்கொண்டதுடன், விபத்து ஏதாவது நடந்திருக்கலாம் என்னும் அடிப்படையில் வவுனியா வைத்தியசாலைக்கு சென்று விசாரணைகளை மேற்கொண்டிருந்தனர்.

எனினும் அப்பகுதியில் இருந்து விபத்துக்குள்ளாகி எவரும் வைத்தியசாலையில் அனுமதிக்கப்படவில்லை என தெரிவிக்கப்பட்டிருந்தது.

இதனையடுத்து குறித்த மோட்டார் சைக்கிள், ஹெல்மட் என்பன வவுனியா பொலிசாரால் மீட்கப்பட்டு கொண்டு செல்லப்பட்டுள்ளது.

இது எவ்வாறு அவ்விடத்தில் வந்தது என்பது தொடர்பில் பொலிசார் விசாரணைகளை மேற்கொண்டு வருகிறார்கள்.

 
வவுனியா ஈரப்பெரிய குளம் பகுதியில் நேற்று இரவு பலத்த மழை பெய்துள்ளதுடன், மினி சூறாவளி தாக்கியுள்ளதாகவும் தெரிவிக்கப்படுகின்றது.

இதன் காரணமாக வீதியோரங்களில் இருந்த மரங்கள் முறிந்து விழுந்துள்ளதுடன், வீடுகள் சிலவும் சேதமடைந்துள்ளதாக தெரிவிக்கப்படுகின்றது.

இந்நிலையில், A9 வீதியில் பாரிய மரம் ஒன்று விழுந்துள்ளதாகவும், இதனால் போக்குவரத்து தடைப்பட்டுள்ளதாகவும் தகவல்கள் தெரிவிக்கின்றன.

இதேவேளை, மரத்தை இராணுவத்தினரும் பொலிஸாரும் இணைந்து அப்புறப்படுத்தியுள்ளனர்.

 
மீள்குடியேற்ற செயலணியினனால் வழங்கப்படவுள்ள வீடுகளுக்கான புள்ளி வழங்களில் அநீதி இழைக்கப்பட்டிருக்குமாயின் அதிகாரிகளிடம் தயக்கமின்றி அதற்கான நீதியை கேட்டும் கிடைக்கவில்லையாயின் குறித்த விடயம் தொடர்பிலான உடன் நடவடிக்கைகளை தாம் முன்னெடுப்பதாக வன்னி மாவட்ட பாராளுமன்ற உறுப்பினரும் மாவட்ட அபிவிருத்திக்குழு இணைத்தலைவருமான கே.காதர் மஸ்தான் தெரிவித்தார்.

மீள் குடியேற்ற செயலணியின் உப குழுவில் இணைக்கப்பட்டுள்ள கே.கே.மஸ்தான் ஜனாதிபதியின் விசேட பணிப்பின் பெயரில் கிராமம் கிராமமாக சென்று மக்களுக்கு தெளிவுபடுத்தும் வேலைத்திட்டத்தின் ஒரு கட்டமாக நேற்று மன்னார் அடம்பன் பகுதியிலுள்ள கிராமங்களுக்கு சென்று மக்களுக்கு தெளிவுபடுத்தியதுடன் குறித்த வீட்டுத்திட்டத்தில் சில குளறுபடிகள் இடம்பெற்றுள்ளதாக மக்களால் முறையிடப்பட்டபோதே அவர் இதனை தெரிவித்தார்.

மேலும் குறித்த வீட்டுத்திட்டம் தொடர்பான புள்ளிகளையும் பெயர்களையும் பொது இடங்களில் ஒட்டுமாறும் இதன்மூலம் பாதிக்கப்பட்டவர்களது பிரச்சினைகள் வெளிக்கொணரப்படும் எனவும் அவர் குறிப்பிட்டார்.

ஜனாதிபதியின் நல்லாட்சியில் எந்த பொதுமகனும் பாதிக்கப்படக்கூடாது என்பதில் நானும் உறுதியாக இருக்கின்றேன் எனினும் என் அரசியல் பிரவேசத்திற்கு முன்னரான குறைகளை என்னிடம் அதிகம் சொல்லப்படுதாக தெரிவித்தார்.

என்னைப்பொறுத்த வரையில் என் மனசாட்சிக்கு ஏற்ப எனக்கு கொடுக்கப்பட்ட பொறுப்பை வெளிப்படைத்தன்மையுடையதாக செய்ய வேண்டும். எனக்கு அரசியல் மூலமாக பணம் சம்பாதிக்க வேண்டும் என்ற எந்த தேவையும் கிடையாது எனவே மக்களுக்கு எது கிடைக்கப்படுகிறதோ அது மக்களிடம் சரியாக கொண்டு சேர்க்கப்படவேண்டும் என்பதிலேயே நான் அவதானமாக இருக்கின்றேன்.

என்னுடைய சேவைகள் எனக்கு ஆதரவு வழங்கிய மக்களுக்கு மட்டுமல்ல மாறாக எல்லா மக்களுக்கும் கிடைக்கப்படுபவை கொடுக்கப்படும் இவ்வாறு கிராமம் கிராமமாக செல்லும்பொழுதுதான் தெரிகிறது தமக்கு கிடைக்கப்பெறுவவேண்டிய பல சலுகைகள் அரசியல் மூலமாக இல்லாமலாக்கப்பட்டிருக்கின்றது என்று எனவே இனியும் அந்த தவறுகள் நடக்க இடமளிக்கப்படாது என அவர் மேலும் தெரிவித்தார்.

 
புத்தாண்டு தினத்திலும் தமக்கு தீர்வும் இல்லை, நிம்மதியும் இல்லை என தெரிவித்து காணாமல் ஆக்கப்பட்டோரின் உறவுகள் வவுனியாவில் ஆர்ப்பாட்டத்தில் ஈடுபட்டனர்.

காணாமல் ஆக்கப்பட்டோரின் உறவினர்கள் வவுனியா கந்தசாமி ஆலய முன்றலில் ஒன்றுகூடி காணாமல் ஆக்கப்பட்ட தமது உறவுகளுக்கு பதில் தா என இறைவனிடம் மன்றாடி அழுது புலம்பி வழிப்பட்ட பின் அங்கிருந்து பசார் வீதி வழியாக ஊர்வலமாகச் சென்று வைத்தியசாலை சந்தியை அடைந்து அங்கிருந்து A9 வீதியில் ஊர்வலமாகச் சென்று 50வது நாளாக சுழற்சி முறை உணவு தவிர்ப்பு போராட்ட களத்தை அடைந்தது.

ஆர்ப்பட்டத்தில் ஈடுபட்டவர்கள் நல்லாட்சி அரசே காணாமல் போனோருக்கு பதில் என்ன, மைத்திரி அரசே எமது பிள்ளைகளுக்கு பதில் கூறு, சம்மந்தன் ஐயா எமது போராடத்திற்கு பதில் என்ன.., நீங்களோ கொண்டாட்டத்தில் நாங்களோ தெருவில், எமது போராட்டம் 50 நாளைக் கடந்து விட்டது தீர்வு என்ன என கோசங்களை எழுப்பியவாறு ஆர்ப்பாட்டத்தில் ஈடுபட்டனர்.

இதில் காணாமல் ஆக்கப்பட்டோரின் உறவுகள், பொது அமைப்புக்களின் பிரதிநிதிகள் எனப்பலரும் கலந்து கொண்டனர்.

 
வவுனியாவில் காணாமல் ஆக்கப்பட்டவர்களின் உறவினர்களினால் மேற்கொள்ளப்பட்டு வரும் சுழற்சி முறையிலான உணவு தவிர்ப்புப் போராட்டம் இன்றுடன் 50வது நாளை எட்டியுள்ளது.

வவுனியா செய்தியாளர் பாஸ்கரன் கதீஷனின் வேண்டுகோளுக்கினங்க கனடா கியூபிக் மொன்றியல் நகரை சேர்ந்த பாராவூர்தி சாரதி ( Truck Driver) ஜனார்தனினால் காணாமல் போன உறவினர்களுக்கு நேற்று (13.04.2017) இருபத்தைந்து புத்தாடைகள் வழங்கப்பட்டது.

இன்று பிறந்துள்ள தமிழ் சிங்கள புத்தாண்டு தினத்தில் நாங்கள் அனைவரும் புத்தாடைகள் அணியும் போது தமது உறவுகளை தொலைத்து நிற்கும் காணாமல் போன உறவுகளும் புத்தாண்டில் புத்தாடைகள் அணிய வேண்டும் என்ற ஒர் எண்ணத்திலேயே இப் புத்தாடைகள் வழங்கப்பட்டன.

 
பாடசாலை செல்லும் வசதியற்ற தரம் 4,6,7,8,9, உயர் தரத்தில் கல்வி கற்கும் மாணவர்கள் தாம் பாடசாலைக்கு நடந்து செல்வதாகவும் வசதியற்ற நிலையில் கல்வியை மேற்கொண்டு வருவதாகவும் தெரிவித்ததையடுத்து வன்னி மாவட்ட நாடாளுமன்ற உறுப்பினர் கே. காதர் மஸ்தான் தனது ஊதிய நிதியிலிருந்து ஆறு துவிச்சக்கரவண்டிகள் வழங்கிவைக்கப்பட்டன.

கனகராஜன்குளம், மாதர்பணிக்கர்மகிழங்குளம், நானாட்டான், பாலமோட்டை ஆகிய பகுதிகளைச் சேர்ந்த மாணவர்களுக்கு தனது குருமன்காடு அலுவலகத்தில் வைத்து நேற்று (13.04) காலை 10.30 மணியளவில் துவிச்சக்கரவண்டிகள் வழங்கிவைக்கப்பட்டது

இந்நிகழ்வில் பிரதேச செயலக சிறுவர் நன்னடத்தை உத்தியோகத்தர்கள் திரு. ஜெயகெனடி, மாணவர்களின் பெற்றோர்கள், நாடாளுமன்ற உறுப்பினரின் அலுவலக உத்தியோகத்தர்கள் எனப் பலரும் கலந்து கொண்டனர்.