யாழ் பாடசாலை மாணவி ஒருவர் நேற்று தற்கொலை செய்துள்ளதாக ஊர்காவற்துறை பொலிஸார் தெரிவித்துள்ளனர்.

அண்மையில் வெளியான க.பொ.த சாதாரண தர பரீட்சையில் எதிர்பார்த்த பெறுபேறுகள் கிடைக்காமையினால் அவர் தற்கொலை செய்துள்ளார்.

யாழ்ப்பாணம், ஊர்காவற்துறை, வேலணை கிழக்கு பகுதியை சேர்ந்த மாணவியே இவ்வாறு உயிரிழந்துள்ளார். அவர் வீட்டின் அறையில் தூக்கிட்டு தற்கொலை செய்துள்ளார்.

வேலணை மத்திய கல்லூரியில் கல்வி பயிலும் அருட்பிரகாசம் ரேணுகா என்ற மாணவியே இவ்வாறு தற்கொலை செய்துள்ளார். அவருக்கு வயது 16.

எதிர்பார்த்த பெறுபேறுகள் கிடைக்காமையினால், குறித்த மாணவி கடும் மன வேதனையில் இருந்ததாக அயலவர்கள் தெரிவித்துள்ளனர்.

வெளியான பெறுபேறுகளுக்கு அமைய ஒரு ஏ சித்தி, ஒரு பீ சித்தி மற்றும் 6 சி மற்றும் ஒரு எஸ் சித்தியை பெற்றுள்ளார்.

டெங்கு நோய் தீவிரமாகப் பரவி வருவதையடுத்து நாட்டின் 12 மாவட்டங்கள் டெங்கு அபாய வலயங்களாகப் பிரகடனப்படுத்தப்பட்டுள்ளதாக சுகாதார அமைச்சு தெரிவித்துள்ளது.

கொழும்பு, கம்பஹா, களுத்துறை, காலி, மாத்தறை, அம்பாந்தோட்டை, மட்டக்களப்பு, திருகோணமலை, யாழ்ப்பாணம், கல்முனை, இரத்தினபுரி,கேகாலை ஆகிய 12 மாவட்டங்களே அபாய வலயங்களாகப் பிரகடனப்படுத்தப்பட்டுள்ளன.

கடந்த மூன்று மாதங்களில் நாடெங்கும் 24,562 டெங்கு நோயாளிகள் இனங்காணப்பட்டுள்ளதாகவும், அவர்களில் 40 பேர் மரணமடைந்துள்ளதாகவும் சுகாதார அமைச்சு சுட்டிக்காட்டியுள்ளது.

சுகாதார அமைச்சு கடந்த 29ஆம் திகதி ஆரம்பித்த தேசிய டெங்கு ஒழிப்புப் பணிகள் முழுவீச்சில் நடைபெற்று வருகின்றது.

முதல் நாளில் மாத்திரம் 83,274 இடங்கள் பரீட்சிக்கப்பட்டன எனவும், இந்த இடங்களில் 1,542 இடங்களில் டெங்கு குடம்பிகள் கண்டுபிடிக்கப்பட்டுள்ளதாகவும் கூறப்பட்டுள்ளது.

இதேவேளை, 3,389 பேருக்கு சிவப்பு அறிவித்தல் வழங்கப்பட்டுள்ளது எனவும், 162 பேருக்கு எதிராக வழக்குகள் தொடரப்பட்டுள்ளன எனவும் குறிப்பிடப்பட்டுள்ளது.

மேலும், பாடசாலைகள், கட்டட நிர்மாணங்கள் நடந்து வரும் இடங்கள், வணக்கஸ்தலங்கள் போன்றவற்றிலேயே டெங்கு நுளம்புகள் பெருகும் வாய்ப்புகள் அதிகமாகக் காணப்படுவதாக சுகாதார அமைச்சு சுட்டிக்காட்டியுள்ளது.

 
யாருமற்ற நிலையில் உயிரிழந்த நபரின் சடலத்தை பொறுப்பேற்ற முச்சக்கர வண்டி சாரதிகள், அவருக்கு இறுதிக் கிரியைகள் செய்து அடக்கம் செய்துள்ளனர்.

அனுராதபுரம் வைத்தியசாலையில் மூன்று நாட்கள் வைக்கப்பட்டிருந்த உயிரிழந்தவரின் உடலை, பொறுப்பேற்க யாரும் வரவில்லை. இந்நிலையில் அந்தப் பகுதி முச்சக்கரவண்டி சாதிகள், தமது தொழில் புரியும் இடத்திற்கு உடலை கொண்டுவந்து மத வழிப்பாடுகளை மேற்கொண்டதன் பின்னர் அடக்கம் செய்துள்ளனர்.

அனுராதபுர பேரூந்து நிலையத்திற்கு அருகில் உள்ள முச்சக்கர வண்டி சாரதிகளின் பங்குபற்றலுடன், நேற்றைய தினம் இந்த சம்பவம் இடம்பெற்றுள்ளது.

கிட்டத்தட்ட 10 வருடங்களுக்கு அதிக காலம் அனுராதபுரத்தில் உள்ள பேரூந்து நிலையத்திற்கு அருகில் வெற்றிலை விற்பனை செய்த ஒருவரின் சடலமே இவ்வாறு அடக்கம் செய்யப்பட்டுள்ளது..

உயிரிழந்தவர் அனுராதபுரத்தை சேர்ந்தவர் அல்ல எனவும், கடந்த 10 வருடங்களுக்கு முன்னர் கலேவல பிரதேசத்தில் இருந்து வருகைத்தந்து, பழைய பேரூந்து நிலையத்திற்கு அருகில் உள்ள வீதியில் சிறிய கடையொன்றில் வெற்றிலை விற்பனை செய்துள்ளார். அவர் கலே மாமா என்ற பெயரில் அழைக்கப்பட்டுள்ளார்.

நோயில் பாதிக்கப்பட்டு உயிரிழந்தவரின் உடலை ஏற்றுக் கொள்வதற்கு ஒருவரும் இல்லாத காரணத்தினால் அரசாங்கத்தின் செலவில் உடலை அடக்கம் செய்வதற்கு நடவடிக்கை மேற்கொள்ளப்பட்டுள்ளது.

குறித்த சந்தர்ப்பத்தில் பேரூந்து நிலையத்திற்கு அருகில் முச்சக்கர வண்டி சாரதிகள், அருகில் உள்ள வர்த்தகரின் நிதி உதவியுடன் உடலை அடக்கம் செய்துள்ளனர்.

இந்த சம்பவத்தில் முச்சக்கர வண்டி சாரதிகள் நாட்டிற்கே எடுத்துக்காட்டாகியுள்ளனர் என அங்கு மத வழிப்பாட்டினை மேற்கொண்ட தேரர் ஒருவர் தெரிவித்துள்ளார்.

இரண்டு நாட்களுக்கு மேல் காய்ச்சல் நீடித்தால் உடன் அரசாங்க வைத்தியசாலைக்கு சென்று அங்கு கடமையாற்றும் மருத்துவர் ஒருவரிடம் ஆலோசனை பெற்றுக் கொள்ளுமாறு மக்களுக்கு அறிவுறுத்தல் விடுக்கப்பட்டுள்ளது.

சுகாதார சேவைப் பணிப்பாளர் நாயகம் டாக்டர் ஜயசுந்தர பண்டார இந்த அறிவுறுத்தலை ஊடகங்களின் ஊடாக விடுத்துள்ளார்.

தற்போது நாடு முழுவதிலும் வைரஸ் காய்ச்சல் பரவி வருகின்றது எனவும் அது சாதாரண ஓர் காய்ச்சல் நிலையாகும் எனவும் அவர் தெரிவித்துள்ளார்.

காய்ச்சல் ஏற்பட்டால் அரசாங்க வைத்தியசாலை ஒன்றில் சிகிச்சை பெற்றுக் கொள்வதே சிறந்த வழியாகும் என அவர் குறிப்பிட்டுள்ளார்.

தலைவலி, இருமல், தடிமன் மற்றும் உடல் வலி போன்ற நோய்க் குறிகள் காணப்பட்டால் அது வைரஸ் காய்ச்சலாக இருக்கக் கூடும் என தெரிவித்துள்ளார்.

காய்ச்சலினால் பாதிக்கப்பட்டவர்கள் மருத்துவர்களினால் பரிந்துரைக்கப்படும் மருந்து மாத்திரைகளை உட்கொள்வதுடன், போதியளவு ஓய்வு எடுத்துக் கொள்ள வேண்டியது அவசியம் என அறிவுறுத்தப்பட்டுள்ளது.

நாடாளுமன்றில் நேற்று இடம்பெற்ற நிகழ்வொன்றினால் சிறு சலசலப்பு ஏற்பட்டுள்ளது. நாடாளுமன்றத்தின் நடுவில் பொருத்தப்பட்டுள்ள அதிக சக்தி கொண்ட அலங்கார மின் விளக்கு திடீரென விழும் நிலைக்கு சென்றுள்ளது.

செப்பு மற்றும் பிற உலோகங்களால் நிர்மாணிக்கப்பட்டு வெள்ளி முலாம் பூசப்பட்ட மின்விளக்கு பொருத்தப்பட்டுள்ளது. இந்த மின் விளக்கு மாதம் ஒரு முறை கீழே இறக்கி அதனை சுத்தப்படுத்தும் நடவடிக்கைகள் மேற்கொள்ளப்பட்டு மீண்டும் இருந்த இடத்திலேயே பொருத்தப்படும்.

அதனை கீழே இறக்கும் போதும் உரிய உயரத்தில் நிறுத்தப்படும் பின்னர் ஏணியின் உதவியுடன் அதனை சுத்தப்படுத்தும் நடவடிக்கைகள் மேற்கொள்ளப்படும்.

மின் மோட்டார் ஊடாக மேலே கீழே இறக்கி ஏற்றப்படும் குறித்த மின் விளக்கினை இருந்த இடத்தில் பொருத்தப்பட்ட சந்தர்பத்தில் திடீரென பூமிக்கு இரண்டு அடி மட்டம் வரையில் கீழே வேகமாக இறங்கியுள்ளது.

மின் விளக்கினை பொருத்தும் நடவடிக்கையில் ஈடுபட்ட ஊழியர் உடனடியாக செயற்பட்டு, மின்விளக்கினை மீண்டும் பொருத்துவதற்கு நடவடிக்கை மேற்கொண்டுள்ளனர்.

சம்பவத்தில் பதறக்கமடைந்த பிரதி சபாநாயகர் திலங்க சுமத்திபால அந்த இடத்திற்கு வருகைத்தந்து மின் விளக்கை பொருத்து வரும் கண்கானிப்பு நடவடிக்கைகளை மேற்கொண்டுள்ளனர்.

இந்த நடவடிக்கைகள் நிறைவடையும் வரையில் நாடாளுமன்றத்திற்குள் எந்தவொரு உறுப்பினரையும் செல்ல அனுமதிக்கப்படவில்லை என தெரிவிக்கப்படுகின்றது.

 
கிளிநொச்சியைச் சேர்ந்த பாஸ்கரன் சியானுகா என்ற மாணவியின் உரையை கேட்ட ஜனாதிபதி அவரை அருகில் அழைத்து உரையாடியுள்ளார்.

தேசிய பால்சார் உற்பத்தி கைத்தொழிலுக்கு பாரிய முதலீட்டை சேர்க்கும் வகையில் மீரிகம பிரதேசத்தில் அமைக்கப்பட்டுள்ள கொத்மலை புதிய பாற்பண்ணையை ஜனாதிபதி மைத்திரிபால சிறிசேன நேற்று திறந்து வைத்தார்.

நினைவுப்பலகையை திரைநீக்கம் செய்து புதிய பாற்பண்ணையை திறந்து வைத்து அதனை பார்வையிட்டுள்ளார்.

இதன்போது “சருதின” நிகழ்ச்சித்திட்டத்தின் கீழ் புலமைப் பரிசில்களும், மடிக் கணனிகளும் ஜனாதிபதியினால் வழங்கி வைக்கப்பட்டன. இந்த புலமைப்பரிசிலை பெற்ற கிளிநொச்சி பாரதி வித்தியாலயத்தைச் சேர்ந்த பாஸ்கரன் சியானுகா என்ற மாணவியினால் உரையொன்று ஆற்றப்பட்டது.

பின்னர் குறித்த மாணவியை தமது அருகில் அழைத்த ஜனாதிபதி அம்மாணவியிடம் பாடசாலையின் விபரங்களைக் கேட்டறிந்தார்.

தனது பாடசாலையில் காணப்படும் சில குறைகளை அந்த மாணவி ஜனாதிபதியிடம் தெரிவித்ததுடன், அவற்றை நிவர்த்திப்பதற்கான நடவடிக்கைகளை மேற்கொள்வதாக ஜனாதிபதி உறுதியளித்துள்ளார்.

குறித்த நிகழ்வில் அமைச்சர்களான அர்ஜூன ரணதுங்க, பீ.ஹெரிசன், லுவிஸ் பேஜ், பிரதி தலைவர் ரஞ்சித் பேஜ் உள்ளிட்டோர் பங்குபற்றி இருந்தமை குறிப்பிடத்தக்கது.

பண்டிகைக் காலத்தை முன்னிட்டு விசேட போக்குவரத்து சேவைகள் முன்னெடுக்கப்படவுள்ளன.

அதற்கமைய, கொழும்பிலிருந்து சொந்த ஊருக்குத் திரும்பும் பயணிகளின் நலன்கருதி எதிர்வரும் 7 ஆம் திகதி தொடக்கம் விசேட ரயில் சேவைகள் முன்னெடுக்கப்படவுள்ளதாக ரயில்வே திணைக்களம் குறிப்பிட்டது.

கொழும்பு கோட்டையிலிருந்து பண்டாரவளை, மஹவ, யாழ்ப்பாணம், கண்டி, காலி மற்றும் மாத்தறை ஆகிய நகரங்களுக்கு விசேட சேவைகள் முன்னெடுக்கப்படவுள்ளதாக ரயில்வே போக்குவரத்து அத்தியட்சகர் விஜய சமரசிங்க தெரிவித்தார்.

இதேவேளை, எதிர்வரும் வெள்ளிக்கிழமை (07) முதல் விசேட பஸ் சேவைகளும் ஆரம்பிக்கப்படவுள்ளன.

இந்த பஸ் சேவைகள் எதிர்வரும் 21 ஆம் திகதி வரை இடம்பெறுவதற்கான நடவடிக்கை முன்னெடுக்கப்பட்டிருப்பதாக இலங்கை போக்குவரத்து ஆணைக்குழுவின் தலைவர் எம்.ஏ.பி.ஹேமச்சந்திர குறிப்பிட்டார்.

1955 என்ற துரித தொலைபேசி இலக்கத்தினூடாக பயணிகள், போக்குவரத்து சேவைகள் தொடர்பில் அறிந்துகொள்ள முடியும் எனவும் அறிவிக்கப்பட்டுள்ளது.