முல்லைத்தீவு, மாங்குளம் – மல்லாவி பகுதியில் இன்று காலை இடம்பெற்ற வீதி விபத்தில் தாய் ஒருவர் உயிரிழந்துள்ளதாக பொலிஸார் தெரிவித்துள்ளனர்.

மாங்குளத்தில் உள்ள பாடசாலைக்கு மகனை விடுவதற்காக வந்தவேளை வீதியின் ஓரம் நிறுத்தி வைக்கப்பட்டிருந்த டிப்பர் ரக வாகனத்தில் மோதியே குறித்த தாய் உயிரிழந்துள்ளார்.

குறித்த விபத்தில் உயிரிழந்தவர் 4ஆம் கட்டை அம்பாள்புரம் பகுதியை சேர்ந்த இரண்டு பிள்ளைகளின் தாயாரான 38 வயதுடைய இரவிக்குமார் இன்பமலர் ஆவர்.

உயிரிழந்தவரின் மகனான 14 வயதுடைய இரவிக்குமார் சங்கீதன் படுகாயமடைந்த நிலையில் மாங்குளம் வைத்தியசாலைக்கு எடுத்துச்செல்லப்பட்டு அங்கிருந்து மேலதிக சிகிச்சைக்காக வவுனியாவில் இருந்து அனுராதபுர வைத்தியசாலைக்கு மாற்றப்பட்டுள்ளார்.

குறித்த விபத்து தொடர்பிலான மேலதிக விசாரணைகளை மாங்குளம் பொலிஸார் மேற்கொண்டு வருகின்றமை குறிப்பிடத்தக்கது.

கிளிநொச்சி பொலிஸ் பிரிவிற்குட்பட்ட உமையாள்புரம் பகுதியில், இனந்தெரியாத ஆண்ஒருவரின் சடலம் மீட்கப்பட்டுள்ளது

குறித்த பகுதிக்கு மாடு கட்டச் சென்ற பெண் ஒருவர் வழங்கிய தகவலின்பிரகாரம், குறித்தசடலம் இன்று (செவ்வாய்க்கிழமை) முற்பகல் கண்டுபிடிக்கப்பட்டுள்ளது

பற்றைக்குள் மறைத்து வைக்கப்பட்டிருந்த குறித்த சடலம் அடையாளம் காண முடியாதஅளவிற்கு உருக்குலைந்துள்ளதாக தெரிவித்துள்ள கிளிநொச்சி பொலிஸார், கொலையாஅல்லது தற்கொலையா என பல கோணங்களில் மேலதிக விசாரணைகளை முன்னெடுத்துள்ளனர்

நாட்டில் கடந்த ஏழு மாதங்களில் இடம்பெற்ற விபத்துகளில் 50 சதவீதமானவர்கள் மோட்டார் சைக்கிள் விபத்துகளால் உயிரிழந்துள்ளனர் என வீதி பாதுகாப்பு அதிகார சபை தெரிவித்துள்ளது.

இதனை வீதி பாதுகாப்பு அதிகார சபையின் தலைவர் சிசிர கொடகொட தெரிவித்துள்ளார். இந்நிலையில் குறித்த காலப்பகுதியில் 666 பேர் மோட்டார் சைக்கிள் விபத்தினால் உயிரிழந்துள்ளனர்.

குறித்த விபத்துகளில் பகல் வேளைகளில் இடம்பெற்ற விபத்துகளில் 355 பேர் உயிரிழந்துள்ளதுடன், இரவு வேளைகளில் இடம்பெற்ற விபத்துகளில் 311 பேர் வரையில் உயிரிழந்துள்ளனர். இதேவேளை இரவு வேளைகளில் விபத்து ஏற்படுவதற்கன பிரதான காரணம் மது பாவனை எனவும் அவர் சுட்டிக்காட்டினார்.

இதேவேளை மோட்டார் சைக்கிள் விபத்துகளால் ஏற்படும் உயிரிழப்புக்கு மற்றுமொரு பிரதான காரணியாக தரமற்ற மோட்டார் சைக்கிள் தலைக்கவசம் எனவும் அவர் தெரிவித்துள்ளார்.

யுத்த வடுக்களை சுமந்தபடி நாட்டிலிருந்து வெளியேறி இந்தியாவில் தஞ்சமடைந்தவர்களில் சுமார் 90 பேர் இன்று தாயகம் திரும்புகின்றனர்.

ஐக்கிய நாடுகளின் அகதிகளுக்கான உயர்ஸ்தானிகராலயத்தின் வசதிப்படுத்தலின் கீழ் இவர்கள் தாயகம் திரும்புவதாக மீள்குடியேற்ற அமைச்சு குறிப்பிட்டுள்ளது.

45 ஆண்களும், 45 பெண்களும் தங்களின் சுய விருப்பின் பேரில் நாடு திரும்புவதாக மீள்குடியேற்ற அமைச்சின் செயலாளர் வேலாயுதன் சிவஞானஜோதி தெரிவித்துள்ளார்.

திருச்சியிலிருந்து 54 அகதிகள், இலங்கை விமான சேவைக்கு சொந்தமான யூ.எல் – 132 இலக்க விமானத்தில் இன்று நாடு திரும்புவதாகவும் அவர் கூறியுள்ளார்.

இதேவேளை, 36 அகதிகள் சென்னையிலிருந்து யூ.எல். – 122 இல்க விமானத்தினூடாக இன்று நண்பகல் நாட்டிற்கு வருகை தரவுள்ளனர்.

நாடு திரும்பும் அகதிகளுக்கு இலவச விமான பயணச் சீட்டு வழங்கப்படுவதுடன், வாழ்வாதாரத்திற்கான தேவையான ஆரம்ப கொடுப்பனவு வழங்கப்படுவதாக மீள்குடிறே்ற அமைச்சு தெரிவித்துள்ளது.

இந்த அகதிகளின் சொத்துக்கள் அழிவடைந்திருப்பின் அதனை உரிய முறையில் மீள பெற்றுக் கொடுப்பதற்கும் மீள்குடியேற்ற அமைச்சு நடவடிக்கை எடுத்துள்ளது.

நாட்டில் ஏற்பட்டுள்ள சுமூகமான சூழ்நிலையை அடுத்து, தமிழகத்திலிருந்து 2015 ஆம் ஆண்டுக்கு பின்னர் இதுவரையான காலப்பகுதிக்குள் 4945 அகதிகள் தாயகம் திரும்பியுள்ளனர்.

இதேவேளை, இந்தியாவிலுள்ள 150 அகதிகள் முகாம்களில் 65000 இற்கும் மேற்பட்ட இலங்கை அகதிகள் வாழ்வதுடன், பலர் தங்களின் உறவினர்கள் நண்பர்களின் வீடுகளில் தஞ்சமடைந்துள்ளமை குறிப்பிடத்தக்கது.