நஞ்சு ஊட்டப்பட்ட மிருகங்களின் இறைச்சியை உட்கொள்ள வேண்டாம் என வனவிலங்கு பாதுகாப்புத் திணைக்களம் தெரிவித்துள்ளது. ஹம்பாந்தோட்டை மாவட்டத்தில் வன விலங்குகளை வேட்டையாடுவதற்கு சிலர் நஞ்சு வகைகளை பயன்படுத்துகின்றனர் திணைக்களம் குறிப்பிட்டுள்ளது.

வேட்டையாடப்படும் இறைச்சி வகைகளை உட்கொள்ளும் போது எச்சரிக்கையுடன் செயற்பட வேண்டுமென மக்களிடம் கோரப்பட்டுள்ளது. மாவட்டத்தில் நிலவி வரும் கடும் வரட்சி காரணமாக தாகத்தை தீர்த்துக் கொள்ள வரும் மிருகங்களை நஞ்சூட்டி வேட்டையாடப்படுகின்றது.

இவ்வாறு நஞ்சூட்டி வனவிலங்ககளை கொன்றவர்கள் சட்டத்தின் முன் நிறுத்தப்பட்டுள்ளனர் என வனவிலங்கு பாதுகாப்பு திணைக்களத்தின் பதில் பணிப்பாளர் டப்.எஸ்.கே. பதிரத்ன தெரிவித்துள்ளார்.இவ்வாறான சம்பவங்கள் பதிவானால் உடனடியாக 1992 என்ற அவசர அழைப்பு இலக்கத்திற்கோ அல்லது 011-2888585 என்ற இலக்கத்திற்கோ தொடர்பு கொண்டு அறிவிக்குமாறு கோரிக்கை விடுத்துள்ளார்.

தரம் ஒன்றுக்கு மாணவர்களை சேர்க்கும் சுற்று நிருபத்தில் திருத்தம் கொண்டு வரப்பட்டுள்ளதாக கல்வியமைச்சு அறிவித்துள்ளது.தரம் ஒன்றுக்கான மாணவர்களை சேர்ப்பது தொடர்பில், அண்மித்த பாடசாலை உள்ளிட்ட அனைத்து வகையீடுகள் குறித்த நேர்முகத் தேர்வுகளின் போதும் பழைய மாணவர் சங்கத்தின் பிரதிநிதி ஒருவரை நியமிக்கக் கூடிய வகையில் சுற்றுநிருபத்தில் திருத்தம் செய்யப்பட்டுள்ளது.

இதுவரை காலமும் பழைய மாணவர் என்ற அடிப்படையிலான வகையீட்டின் கீழ் விண்ணப்பத்தவர்களின் நேர்முகத் தேர்வு மற்றும் மேன்முறையீடு ஆகிய வகையீடுகளின் போதான குழுவில் மட்டுமே பழைய மாணவர் சங்க உறுப்பினர்கள் அங்கம் வகிக்க முடியும் என்பது குறிப்பிடத்தக்கது.

அடுத்த ஆண்டுக்கு தரம் ஒன்றுக்கான மாணவர்களை சேர்ப்பது தொடர்பில் இந்த சுற்றுநிருபத்தில் திருத்தம் செய்யப்பட்டுள்ளது.ஏற்கனவே விண்ணப்பங்கள் கோரப்பட்டுள்ள நிலையில் இந்த திருத்தம் செய்யப்பட்டுள்ளது.கடந்த 30ம் திகதியுடன் விண்ணப்பம் செய்வதற்கான காலம் முடிவடைந்துள்ளமை குறிப்பிடத்தக்கது.

இரத்தினபுரி – நிவித்திகலை தமிழ் பாடசாலை ஒன்றில் மாணவிகள் மூவர் கடத்தப்பட்டுள்ளதுடன், அதில் இருவர் இரத்தினபுரி பஸ் நிலையத்துக்கு அருகில் அநாதரவான நிலையில் பொலிஸாரினால் கண்டுபிடிக்கப்பட்டு, பாடசாலையில் ஒப்படைக்கப்பட்டுள்ளனர். குறித்த மூன்று மாணவியரும் எவ்வாறு கடத்தப்பட்டனர் என்பது பற்றி பொலிஸாரின் விசாரணைகளில் இருந்து தெரியவந்துள்ளது.

தற்போது கடத்தப்பட்டுள்ள மாணவியின் தாயார் வைத்தியசாலையில் அனுமதிக்கப்பட்டுள்ளதாக கூறி குறித்த மாணவியை வைத்தியசாலைக்கு அழைத்து வருமாறு தாய் தகவல் அனுப்பியுள்ளதாக தெரிவித்து நபர் ஒருவர் பாடசாலைக்கு சென்றுள்ளார். எனினும் பாடசாலை நேரத்தில் பெற்றோர், பாதுகாவலர் இல்லாமல் மாணவியை அனுப்ப பாடசாலை நிர்வாகமும், ஆசிரியர்களும் மறுப்பு தெரிவித்துள்ளனர்.

இதேவேளை பாடசாலை முடியும் வரை காத்திருந்த சந்தேகநபர் குறித்த 3 மாணவிகளையும்முச்சக்கரவண்டி ஒன்றில் அழைத்துச் சென்றுள்ளதுடன், இரண்டு மாணிவிகளை இரத்தினபுரி நகரில் விட்டுவிட்டு மற்றைய மாணவியை கடத்திச் சென்றிருப்பதாக பொலிஸார் குறிப்பிட்டுள்ளனர்.

இதேவேளை சந்தேகநபர் கடந்த சில தினங்களுக்கு முன்பு நிவித்திகல, சிந்துருப்பிட்டிய தனியார் தேயிலைத் தோட்டத்திற்கு வந்துள்ளதாகவும், சந்தேகநபரின் வீட்டுக்கு அண்மையிலே குறித்த மாணவியின் வீடும் இருப்பதாக இரத்தினபுரி பொலிஸார் தெரிவித்துள்ளனர்.

அத்துடன் இரத்தினபுரி நகரில் நிர்க்கதியான நிலையில் காணப்பட்ட மாணவிகள் இருவரையும் வைத்திய பரிசோதனைக்காக இரத்தினபுரி வைத்தியசாலையில் அனுமதித்துள்ளதாகவும், இது தொடர்பில் மேலதிக விசாரணைகளை நிவித்திகல பொலிஸார் முன்னெடுத்து வருவதுடன், மற்றைய மாணவிகளிடம் விசாரணைகளை ஆரம்பித்துள்ளதாக தெரிவித்துள்ளனர்.

தற்போது வரை சொந்த இடங்கள் இல்லாமல் இருக்கும் அரச பணியாளர்களுக்கு இடங்களைப் பெற்றுக்கொடுக்கும் வேலைத்திட்டம் ஆரம்பிக்கப்பட்டுள்ளதாக வீடமைப்பு அமைச்சர் சஜித் பிரேமதாஸ தெரிவித்துள்ளார்.எதிர்வரும் இரண்டு நாட்களில் இந்த வேலைத்திட்டம் முன்னெடுக்கப்படும் எனவும்அவர் குறிப்பிட்டுள்ளார்.

அம்பலாந்தொட்டை பிரதேசத்தில் நேற்று இடம்பெற்ற நிகழ்வொன்றில் கலந்துக்கொண்ட போதே அவர் இதனைத் தெரிவித்துள்ளார்.இதேவேளை இந்த நிகழ்வில் கலந்துக்கொண்ட அமைச்சர் வஜிர அபேவர்தன நாடு பூராகவும்உள்ள அபிவிருத்தி பணியாளர்களின் செயற்பாடுகளை அதிகரிக்க எதிர்காலத்தில் எதிர்பார்த்துள்ளதாகவும் தெரிவித்துள்ளமை குறிப்பிடத்தக்கது.

அரச வங்கி அதிகாரியாக தன்னை காட்டிக் கொண்டு பண மோசடியில் ஈடுபட்ட நபர் ஒருவர் கைது செய்யப்பட்டுள்ளார்.கலனேவ-கும்புக்வேவ பிரதேசத்தில் உள்ள பெண்ணொருவரிடம் குறித்த நபர் பண மோசடி செய்துள்ளதாகவும், குறித்த பெண் வழங்கிய முறைப்பாட்டிற்கு அமைய இந்த நபரை கைது செய்துள்ளதாகவும் கல்னேவ பொலிஸார் தெரிவித்துள்ளனர்.

அத்துடன், இந்த சந்தேகநபரிடம் இருந்த போலி ஆவணங்களையும்,மோட்டார் சைக்கிள்ஒன்றையும் பொலிஸார் கைப்பற்றியுள்ளதாக குறிப்பிட்டுள்ளனர்.இதேவேளை, சந்தேகநபரை இன்றைய தினம் கெக்கிராவ நீதவான் நீதிமன்றில்ஆஜர்படுத்தவுள்ளதாக பொலிஸார் தெரிவித்துள்ளனர்.

இலங்கையில் ஆறு பேரில் ஒருவருக்கு ஏதேனும் நீண்ட நாள் நோய் காணப்படுவதாக ஆய்வு ஒன்றின் மூலம் தெரியவந்துள்ளது. அதாவது இலங்கையின் மொத்த சனத்தொகையில் 18 வீதமானவர்கள் ஏதேனும் ஓர் வகை நீண்ட கால நோய்களினால் பீடிக்கப்பட்டுள்ளனர்.

இலங்கை குடிசன மதிப்பீட்டு புள்ளி விபரவியல் திணைக்களத்தினால் இந்த மதிப்பீட்டு ஆய்வு செய்யப்பட்டுள்ளது.

நீரிழிவு, இரத்த அழுத்தம், மாரடைப்பு, புற்று நோய், பக்கவாதம், உள நோய், மூட்டு வலி உள்ளிட்ட நீண்ட கால நோய்களினால் இவர்கள் பாதிக்கப்பட்டுள்ளனர்.

இதேவேளை, 15 வயதுக்கும் குறைந்த சிறுவர் சிறுமியருக்கு அதிகளவில் தொற்று நோய்களே பரவுகின்றன என தெரிவிக்கப்படுகிறது.

தமிழகத்தில் வைத்தியசாலையில் குழப்பம் விளைவித்த இலங்கை அகதி ஒருவரை பொலிஸார் நேற்று கைது செய்துள்ளனர்.

திருமங்கலம் அருகே உச்சப்பட்டி இலங்கை அகதிகள் முகாமை சேர்ந்த அகதி ஒருவரே இவ்வாறு கைது செய்யப்பட்டுள்ளதாக இந்திய ஊடகங்கள் செய்தி வெளியிட்டுள்ளது.

குறித்த முகாமில் வசிக்கு ஸ்டீபன் என்பவருக்கும் அவரது மனைவிக்கும் இடையில் கடந்த 2ஆம் திகதி தகராறு ஏற்பட்டுள்ளது.
இதில் காயமடைந்த மனைவி திருமங்கலம் அரச வைத்தியசாலையில் சிகிச்சை பெற்று வரும் நிலையில், அவரை பார்க்க ஸ்டீபன் நேற்று வைத்தியசாலைக்கு சென்றுள்ளார்.

வைத்தியசாலையில் வைத்தும் தகராற்றில் ஈடுபட்டு மனைவியை தாக்கியுள்ளார். இதனையடுத்து வைத்தியசாலை ஊழியர்கள் அவரை தடுக்க முயன்றுள்ளனர்.

எனினும், வைத்தியசாலை ஊழியர்களை அவர் அச்சுறுத்தியுள்ளார். இதனையடுத்து பொலிஸாருக்கு வழங்கிய தகவலுக்கு அமைய சந்தேக நபரை பொலிஸார் கைது செய்துள்ளதாக தெரிவிக்கப்பட்டுள்ளது.