மஹியங்கனை – குடாலுணுக கிராமத்தில் 9 வயது சிறுமியொருவர் நேற்று (17.06.2016) மாலை கொலை செய்யப்பட்டமை தொடர்பில், பொலிஸார் விரிவான விசாரணைகளை ஆரம்பித்துள்ளனர்.

சிரேஷ்ட பொலிஸ் அத்தியட்சகர் ஒருவரின் கீழ் விசாரணைகள் முன்னெடுக்கப்படுவதாக, சிரேஷ்ட பொலிஸ் அத்தியட்சகர் அஜித் ரோஹன கூறினார்.

மஹியங்கனை – ரிதிமாலியத்த – குடாலுணுக கனிஷ்ட வித்தியாலயத்தில் தரம் 4 இல் கல்வி பயின்ற மல்கி சதமிலியின் சடலம், நேற்று மாலை 5 மணியளவில் கண்டெடுக்கப்பட்டது.

சிறுமியின் வீட்டில் இருந்து ஒன்றரை கிலோமீற்றர் தொலைவிலுள்ள, உல்ஹிடிய ஓயாவிற்கு அருகிலிருந்து சடலம் கண்டெடுக்கப்பட்டது.

பாடசாலை நிறைவடைந்து வீட்டிற்குச் செல்லும் இடைப்பட்ட நேரத்திலேயே சிறுமி படுகொலை செய்யப்பட்டிருக்கலாம் என பொலிஸார் சந்தேகிக்கின்றனர்.

வழமையாக பஸ்ஸில் இருந்து இறங்கி சகோதரியுடன் சைக்கிளில் வீட்டிற்குச் செல்லும் சதமிலி, நேற்றைய தினம் ஏதோவொரு காரணத்தினால் சகோதரியைத் தவறவிட்டுள்ளார்.

பிற்பகல் இரண்டு மணி கடந்தும் சிறிய மகள் வீட்டிற்கு வராதமையினால், பெற்றோர் அயலவர்களின் உதவியுடன் மகளைத் தேடிச் சென்றுள்ளனர்.

மாலை 5 மணியளவில் சிறுமியின் சடலத்தை நீரோடையொன்றில் அவர்கள் கண்டனர்.

சதமிலியின் சடலம் கண்டெடுக்கப்பட்ட சந்தர்ப்பத்தில் கைகள் கட்டப்பட்டிருந்ததுடன், பாதணிகள் மற்றும் பாடசாலை பை ஆகியன சிறுமியின் சடலம் கண்டெடுக்கப்பட்ட இடத்திற்கு சற்று தொலைவில் இருந்து மீட்கப்பட்டன.

சடலம் கண்டெடுக்கப்பட்ட இடத்திற்கு நேற்றிரவு சென்றிருந்த நீதவான், முதற்கட்ட விசாரணைகளை நிறைவு செய்து, பிரதேச பரிசோதனைகளுக்காக மஹியங்கனை வைத்தியசாலைக்கு சடலத்தை அனுப்பி வைத்தார்.

சதமிலியை துஷ்பிரயோகத்திற்குட்படுத்தி, கொலை செய்திருக்கலாம் என பொலிஸார் சந்தேகிப்பதுடன், குற்றவாளிகளைத் தேடி நேற்றிரவு முதல் பொலிஸார் விசாரணைகளை முன்னெடுத்து வருகின்றனர்.

மோப்ப நாயின் ஊடாக பொலிஸார் சோதனை நடவடிக்கைகளை முனனெடுத்த சந்தர்ப்பத்தில், சடலம் மீட்கப்பட்ட இடத்திலிருந்து இரண்டு கிலோமீற்றர் தூரத்திலுள்ள, சதமிலி கல்வி பயின்ற பாடசாலைக்கு அருகில் மோப்ப நாய் நின்றதாக பொலிஸார் கூறினர்.

இந்தோனேஷியாவின் அச்சே கடற்பரப்பில் நிர்க்கதிக்குள்ளான இலங்கை புகலிடக் கோரிக்கையாளர்களை தரை இறங்க இந்தோனேஷிய அரசாங்கம் அனுமதியளித்துள்ளது.

கர்ப்பிணிப் பெண் ஒருவர், 9 சிறார்கள் உள்ளிட்ட 44 பேர் இந்தப் படகில் உள்ளதாக இந்தோனேஷிய அதிகாரிகளை மேற்கோள்காட்டி சர்வதேச ஊடகங்கள் செய்தி வெளியிட்டுள்ளன.

அவுஸ்திரேலியா செல்லும் நோக்கில் தமிழகத்திலிருந்து புறப்பட்ட இலங்கையர்களின் படகு, இயந்திரக் கோளாறு காரணமாக இந்தோனேஷியாவின் அச்சே கடற்பரப்பில் நிர்க்கதிக்குள்ளானது.

தத்தளித்துக் கொண்டிருந்த இந்த படகு தொடர்பாக தகவல் அறிந்த இந்தோனேஷிய கடற்படையினர் விரைந்து சென்று விசாரணை நடத்தினர். இருப்பினும், படகில் இருந்த எவரையும் தரை இறங்க அவர்கள் அனுமதிக்கவில்லை.

இந்நிலையில், கரை சேரும் நோக்கில் கடலில் குதித்தவர்களை, இந்தோனேசிய கடற்படையினர் வானை நோக்கி துப்பாக்கியால் சுட்டு எச்சரித்தனர்.

இதனால், புகலிடக் கோரிக்கையாளர்கள் கடந்த ஒரு வார காலமாக படகில் தத்தளித்து வந்தனர். அவர்களை மீண்டும் தமிழகத்திற்கு அனுப்பும் முயற்சியும் முன்னெடுக்கப்பட்டது.
இந்நிலையில், ஐ.நா. உள்ளிட்ட சர்வதேச அமைப்புகள் இந்தோனேஷிய அரசுடன் பேச்சுவார்த்தை நடத்தியது.

இதனால் படகில் இருந்த 44 ஈழத் தமிழ் அகதிகளையும் தற்போது தமது நாட்டில் தரை இறங்குவதற்கு இந்தோனேஷிய அரசு அனுமதித்துள்ளது. அவர்களை ஐ.நா. பிரதிநிதிகள் சந்தித்துப் பேச உள்ளனர்.

யாழ். துரையப்பா மைதானம் வெறும் செங்கல் மற்றும் மணலால் கட்டப்பட்டதல்ல. இது இருநாட்டினதும் ஒருங்கிணைப்பு உத்வேகம் மற்றும் பொருளாதார வளர்ச்சியின் அடையாளமாகும் என இந்திய பிரதமர் நரேந்திர மோடி தெரிவித்துள்ளார்.

இந்தியா சார்பில் 15 கோடி ரூபா செலவில் யாழ்ப்பாணத்தில் புதுப்பிக்கப்பட்டுள்ள விளையாட்டு அரங்கத்தை டெல்லியில் இருந்த படியே பிரதமர் நரேந்திர மோடி காணொளி காட்சி மூலம் இன்று காலை 10 மணியளவில் திறந்து வைத்து உரையாற்றும் போதே மேற்கண்டவாறு தெரிவித்தார்.

காணொளி காட்சி மூலம் அவர் மேலும் தெரிவிக்கையில்,

கடந்த வருடம் இலங்கை சென்ற போது யாழ்ப்பாண மக்கள் என்னை அன்போடு வரவேற்றமை மறக்க முடியாத சம்பவமாகும். இலங்கை மக்களுடன் ஒன்றிணைந்த செயற்படுவதனால் இந்நாள் எனக்கு மறக்க முடியாத அனுபவத்தை தருகின்றது.

இந்த நிகழ்வானது இலங்கை மற்றும் இந்தியாவிற்கான உறவை பலப்படுத்தும். ஐ.நாவின் யோகா தினத்திற்கு இலங்கைதான் முதலில் ஆதரவளித்தது.

நாம் இலங்கையின் அனைத்து அபிவிருத்தி நடவடிக்கைகளுடனும் இணைந்து செயற்பட தயாராக இருப்பதாகவும் அவர் தெரிவித்தார்.