யாழ்.நகரப்பகுதியில் இன்று காலை இடம்பெற்ற கோர விபத்தொன்றில் திருமண வீட்டிற்கு சென்ற தாய் ஸ்தலத்தில் பலியானதுடன் அவரது மகள் படுகாயமடைந்து யாழ்.போதனா வைத்தியசாலையில் அனுமதிக்கப்பட்டுள்ளார்.

இந்த பரிதாப சம்பவம் இன்று சனிக்கிழமை காலை 8.45 மணியளவில் யாழ்ப்பாணம் மூன்றாம் குறுக்கு தெருவில் மனித உரிமை ஆணைக்குழுவின் அலுவலகத்திற்கு முன்பாக இடம்பெற்றுள்ளது.

திருமண வீடு ஒன்றிற்கு செல்வதற்காக தாயை மகள் மோட்டார் சைக்கிளில் ஏற்றிச் சென்றுள்ளார்.

மோட்டார் சைக்கிளை ஒழுங்கையிலிருந்து பிரதான வீதிக்கு செலுத்திய போது, வேகமாக வந்த இராணுவத்தின் தண்ணீர் பவுசர் மோட்டார் சைக்கிள் மீது மோதியுள்ளது.

தாய் சம்பவ இடத்திலேயே பலியானதுடன் மகள் படுகாயங்களுடன் யாழ்.போதனா வைத்தியசாலையில் அனுமதிக்கப்பட்டுள்ளார்.

விபத்தில் சத்திராஜா சவுந்திராணி என்ற தாயே ஸ்தலத்தில் உயிரிழந்துள்ளதோடு, சங்கீதா என்ற 23 வயதுடைய மகளே படுகாயமடைந்துள்ளார்.

விபத்து தொடர்பில் பொலிஸார் மேலதிக விசாரணைகளை முன்னெடுத்துள்ளனர்.

இந்தோனேசியாவின் ஆச்சே மாகாண கடற்கரையில் தரைதட்டியுள்ள இலங்கைத் தமிழ் அகதிகள் படகை அனைத்துலக கடற்பரப்புக்குள் தள்ளிச் செல்லும் இந்தோனேசியாவின் முடிவுக்கு கடுமையான எதிர்ப்புக்கள் கிளம்பியுள்ளள.

சட்டவிரோத கடற்பயணத்தை மேற்கொண்டு அவுஸ்திரேலியாவுக்கு பயணமான இலங்கை அகதிகள் படகு இயந்திரக் கோளாறு காரணமாக இந்தோனேசியாவின் ஆச்சே மாகாணத்தில் தரைதட்டியது.

குறித்த அகதிகள் விவகாரத்தை இந்தோனேசியா மனிதாபிமானற்ற வகையில் அணுகுவதாக அனைத்துலக மனித உரிமை அமைப்புகள் கண்டித்துள்ளன.

அனைத்துலக மன்னிப்புச் சபை, மனித உரிமைகள் கண்காணிப்பகம் மற்றும் இந்தோனேசியாவின் தொண்டர் நிறுவனங்களும், இதுகுறித்து கடுமையான எதிர்ப்பைத் தெரிவித்துள்ளன.

அத்துடன், மனிதாபிமான அடிப்படையில் படகில் உள்ள அகதிகளை தரையிறங்க அனுமதிக்குமாறு கோரிக்கை விடுத்துள்ளன.

இதேவேளை, அகதிகளுக்கான ஐ.நா முகவரமைப்பு பிரதிநிதிகள் குறித்த படகின் அருகே சென்று பார்வையிட்ட போதிலும், உள்ளே சென்று பார்வையிடுவதற்கு இந்தோனேசிய அதிகாரிகள் அவர்களை அனுமதிக்கவில்லை என தகவல்கள் தெரிவிக்கின்றன.

குறுவிட்ட, எக்னெலிகொட, துன்கெல பிரதேசத்தில் இரண்டு சடலங்கள் மீட்கப்பட்டுள்ளன. பொலிஸ் அவசர இலக்கத்திற்கு கிடைத்த அழைப்பின் பின்னர் மேற்கொண்ட தேடுதலில் சடலம் கண்டுபிடிக்கப்பட்டுளள்து.

குறுவிட்ட, பாதகம, கலுகெலே பிரதேசத்தைச் சேர்ந்த 25 வயதுடைய இளைஞர் ஒருவரும், குறுவிட்ட, கந்தன்கொட பிரதேசத்தைச் சேர்ந்த 22 வயதுடைய யுவதி ஒருவருமே சடலமாக கண்டெடுக்கப்பட்டுள்ளனர்.

அவர்கள் இருவரும் பயணித்ததாக கூறப்படும் மோட்டார் சைக்கிள் ஒன்றும் மீட்கப்பட்டதாக பொலிஸார் தெரிவித்தனர்.

இரத்தினபுரி வைத்தியசாலை திடீர் மரண விசாரணை அதிகாரியினால் மரண விசாரணை மேற்கொள்ளப்பட்டுள்ளது.

 
முல்லைத்தீவு மாவட்டத்தின்புதுக்குடியிருப்பு றெட்பானா பகுதியில் மோட்டார் சைக்கில் ஒன்றும் பேருந்து ஒன்றும் நேருக்கு நேர் மோதி விபத்துக்குள்ளானதில் சம்பவ இடத்தில் ஒருவர் பலியாகியுள்ளார்.

பரந்தனிலிருந்து முல்லைத்தீவு நோக்கி சென்ற பேருந்து எதிர்த் திசையில் வந்த மோட்டார் சைக்கிளை மோதித் தள்ளியதிலேயே இச்சம்பவம் நடந்துள்ளது.

பலியானவர் தொடர்பான விபரம் இதுவரையில் தெரியவில்லை விபத்து தொடர்பாக புதுக்குடியிருப்பு பொலிசார் விசாரணைகளை மேற்கொண்டு வருகின்றனர்.

வெலிக்கடை சிறைச்சாலையானது களுத்துறைக்கு கொண்டு செல்லப்படவுள்ளதாகதெரிவிக்கப்பட்டுள்ளது.தற்போது வெலிக்கடையில் உள்ள சிறைச்சாலையானது அங்கிருந்துஅப்புறப்படுத்தப்பட்டு களுத்துறை மாவட்டத்தில் அமைப்பதற்கு ஏற்பாடுகள்செய்யப்பட்டு வருவதாக பிரதமர் ரணில் விக்கிரமசிங்க தெரிவித்துள்ளார்.

இன்று கொழும்பில் இடம்பெற்ற நிகழ்வொன்றிலேயே பிரதமர் இதனைத் தெரிவித்துள்ளார். அத்துடன் வெலிக்கடை சிறைச்சாலை அப்புறப்படுத்தப்பட்டு,அந்த இடத்தில் வர்த்தகநகரம் ஒன்று அமைக்கப்படும் எனவும் பிரதமர் இதன்போது தெரிவித்துள்ளமைகுறிப்பிடத்தக்கது

இலங்கையில் இருந்து கடத்தி செல்லப்பட்ட 2.74 கோடி இந்திய ரூபாய் பெறுமதியான தங்க பாலங்கள் சென்னையில் கைப்பற்றப்பட்டுள்ளன. சென்னையில் கிழக்குக்கரை வீதியில் பயணித்த பஸ் ஒன்றில் இருந்தே இந்த தங்கம் கைப்பற்றப்பட்டது. இச்சம்பவம் தொடர்பில் மூவர் கைதுசெய்யப்பட்டுள்ளதாக பி.டி.ஐ செய்திசேவை தெரிவித்துள்ளது.

இலங்கையில் இருந்து மீன்பிடிப்படகு மூலம் கொண்டு செல்லப்பட்ட நிலையிலேயே இந்த தங்கம் பின்னர் சென்னையில் பஸ் ஊடாக கடத்தப்பட்டுள்ளது.இந்த தங்கத்தின் நிறை 8.763 கிலோ கிராமாகும். மொத்த சந்தைப்பெறுமதி 2.74 கோடி இந்திய ரூபாய் என மதிப்பிடப்பட்டுள்ளது.

மஹியங்கனை குடாலுனுக பனுல்ல காட்டுப்பகுதியிலிருந்து 9 வயதான பாடசாலை மாணவியொருவர் சடலமாக மீட்கப்பட்டுள்ளதாக தெரிவிக்கப்பட்டுள்ளது. மொரான யல்வெல பகுதியை சேர்ந்த ஒன்பது வயதான மலினி சந்தமாலி என்ற சிறுமியே இவ்வாறு சடலமாக மீட்கப்பட்டுள்ளார்.

குறித்த சிறுமி பாடசாலைக்கு சென்று வீடு திரும்பாத நிலையில், அச்சம் கொண்ட பெற்றோர் பொலிஸில் முறைப்பாடு செய்தனர்.இதனையடுத்து பொலிஸாரும், கிராமவாசிகளும் இணைந்து மேற்கொண்ட தேடுதல் நடவடிக்கையின் போது குறித்த சிறுமி காட்டுப்பகுதியில் இருந்து சடலமாக மீட்கப்பட்டுள்ளார்.

இதேவேளை, குறித்த சிறுமி துஷ்பிரயோகத்துக்குட்படுத்தி கொலை செய்யப்பட்டுள்ளாரா என்பது குறித்து மஹியங்கனை பொலிஸார் விசாரணைகளை முன்னெடுத்துள்ளனர்.

பிரபல ஓட்ட வீராங்கணை சுசந்திகா ஜயசிங்க தாக்குதல் சம்பவம் ஒன்று காரணமாகவைத்தியசாலையில் அனுமதிக்கப்பட்டுள்ளார். கம்பஹா வைத்தியசாலையில் அனுமதிக்கப்பட்டதாகத் தெரிவிக்கப்படுகிறது.

வீட்டில் இடம்பெற்ற மோதல் சம்பவத்தினால் சுசந்திகா காயமடைந்துள்ளார். சம்பவம் தொடர்பில் சுசந்திகாவின் கணவர் கைது செய்யப்பட்டுள்ளார்.ஒலிம்பிக் போட்டியில் சுசந்திகா வெள்ளிப்பதக்கம் வென்றவர் என்பது குறிப்பிடத்தக்கது.

இந்தோனேசியாவின் ஆச்சே மாகாண கடற்கரையில் தரை தட்டியுள்ள இலங்கை தமிழ் அகதிகள் படகை அனைத்துலக கடற்பரப்புக்குள் இழுத்துச் செல்வதற்கான ஏற்பாடுகளை இந்தோனேசிய அதிகாரிகள் மேற்கொண்டுள்ளனர்.தேவையான எரிபொருள் மற்றும் உணவுப் பொருட்களை ஏற்றி இந்தப் படகின் இயந்திரத்தை இயங்க வைத்து, இந்தியா நோக்கி அனுப்பி வைப்பதற்கு இந்தோனேசியா முடிவு செய்துள்ளது.

இன்று அகதிகள் படகில் இருந்தவர்களுக்குத் தேவையான உணவுப் பொருட்கள் வழங்கப்பட்டன.அதேவேளை, படகில் இருந்த அகதிகள் தனித்தனியாக குடிவரவு அதிகாரிகளால் படம்பிடிக்கப்பட்டனர்.இந்தோனேசியக் கடற்படைக் கப்பல் ஒன்று இந்த அகதிகள் படகை பாதுகாப்பாக இந்தியா நோக்கி கொண்டு செல்லவுள்ளது.

இதற்காக இந்தோனேசிய கடற்படைக் கப்பல் ஒன்று அந்தப் பகுதிக்கு அனுப்பப்பட்டுள்ளது.அத்துடன் இழுவைப் படகு ஒன்றும் அனுப்பி வைக்கப்பட்டுள்ளது.அவுஸ்ரேலியா நோக்கி பயணிப்பது சாத்தியமில்லை என்றும் எனவே மீண்டும் இந்தியாவுக்கே திரும்புமாறு அகதிகளிடம் கூறியிருப்பதாகவும், இந்தோனேசிய அதிகாரிகள் தெரிவித்தனர்.

இன்று இந்தப் படகை அனைத்துலக கடற்பரப்புக்கு இழுத்துச் செல்வதற்கான இறுதிக்கட்ட நடவடிக்கைகளில் இந்தோனேசிய அதிகாரிகள் ஈடுபட்டுள்ளனர்.