புதுக்குடியிருப்பு மத்திய கல்லூரியின் தொழில்நுட்ப ஆய்வுகூட திறப்பு விழா நேற்று (16.06.2016) கல்லுரியின் அதிபர் திரு.ரவீந்திரராசா தலைமையில் நடைபெற்றது.

இந் நிகழ்வில் கல்வி இராஜாங்க அமைச்சர் வே.இராதாகிருஷ்ணன், வன்னி மாவட்ட பாராளுமன்ற உறுப்பினர் வைத்திய கலாநிதி சி.சிவமோகன், பாராளுமன்ற உறுப்பினர் சாந்தி சிறிஸ்கந்தராசா ஆகியோர் கலந்து சிறப்பித்தனர்.

விருந்தினர்கள் மாணவர்களின் இனியம் பாண்ட் வாத்தியத்துடன் அழைத்து வரப்பட்டு நிகழ்வு ஆரம்பமாகின.

தொழில்நுட்ப ஆய்வு கூடத்தினை கல்வி இராஜாங்க அமைச்சர் வே.இராதாகிருஷ்ணன், வன்னி பாராளுமன்ற உறுப்பினர் சி.சிவமோகன் இணைந்து திறந்துவைத்தனர்.

இதில் சிறப்புரையை பாராளுமன்ற உறுப்பினர் சி.சிவமோகன் வழங்கினார். அவர் தனதுரையில்..

இன்று இந்நிகழ்வில் கல்வி அமைச்சர் கலந்துகொண்டு ஆய்வு கூடத்தினை திறந்துவைப்பது மகிழ்ச்சி அளிக்கின்றது. எமது பிரதேசம் கொடிய யுத்தத்தின் மூலம் திட்டமிட்டு அழிக்கப்பட்டது. எமது மண்ணில் மீண்டும் தமது சொந்த முயற்சியில் கல்வியில் முன்னேற வேண்டும் என்ற ஒரே நோக்கத்தோடு ஒவ்வொரு கல்விமான்களும் உழைக்கின்றனர்.

ஒரு தமிழன் என்ற வகையிலும் ஆசிரியர்களின் நிரந்தர நியமனம் பெற்றுக்கொடுக்க போராடி துணை ஆசிரியர் என்ற நியமனம் பெற்றுக்கொடுத்து வெற்றி பெற்றவர் கல்வி இராஜாங்க அமைச்சர். எனவேதான் தொண்டர் ஆசிரியர்களாக பணியாற்றும் ஆசிரியர்களுக்கு நிரந்தர நியமனம் வழங்க ஆவண செய்யவேண்டும்.

அது போன்று நீண்ட காலமாக முன்பள்ளிகளில் சிறு வேதனத்துடன் கல்வி கற்பிக்கும் முன்பள்ளி ஆசிரியர்களுக்கு நியமனம் வழங்கப்படவேண்டும்.

சிவில் பாதுகாப்பு என்ற போர்வையில் இராணுவத்தினரின் தலையீடுகள் நிறுத்தப்பட்டு கல்வித் திணைக்களங்களிடம் முன்பள்ளிகள் ஒப்படைக்கப்பட வேண்டும் எனத் தெரிவித்தார்.

இந்தோனேஷிய கடற்கரையில் அநாதரவாக இருக்கும் குழந்தைகள், பெண்கள் உட்பட ஈழத்தமிழ் அகதிகள் 44 பேரையும் பொறுப்பேற்றுக் கொள்ளுமாறு சர்வதேச மன்னிப்புச் சபை உள்ளிட்ட சர்வதேச மனித உரிமை அமைப்புக்கள் பல கோரிக்கை விடுத்துள்ள நிலையில், படகை விட்டு வெளியேற முற்பட்டவர்களை இந்தோனேஷிய கடற்படையினர் துப்பாக்கிப் பிரயோகம் நடத்தி அச்சுறுத்தி தடுத்துள்ளனர்.

இந்தோனேஷிய கடற்கரையில் தரையிறங்க இடமளிக்காவிட்டால் தம்மை சுட்டுக்கொல்லுமாறு, ஈழத்தமிழ் அகதிகளில் பெண்ணொருவர் கூச்சலிடும் காட்சி அனைவரினதும் மனங்களை உருக்கும் விதமாக அமைந்துள்ளது.

அவுஸ்திரேலியாவில் அரசியல் தஞ்சம்கோரும் நோக்கில், ஈழத்தமிழ் அகதிகள் 44 பேர் பயணித்த படகொன்று, கடந்த யூன் மாதம் 11 ஆம் திகதி மோசமான காலநிலை காரணமாக இந்தோனேஷியாவின் ஆச்சே மாநிலத்தின் கடற்கரையில் கரையொதுக்கப்பட்டது.

அகதிகளின் படகை, இந்தோனேஷிய மீனவர்கள் முதலில் கண்டுபிடித்த நிலையில், பின்னர் இதனை தடுத்து வைத்துள்ள இந்தோனேஷிய கடற்படையினர் குறித்த படகிலுள்ள ஈழத்தமிழர்களை தரையிறங்க அனுமதிக்காது தடுத்து வருகின்றனர்.

குறித்த படகில் கர்ப்பிணித்தாய் ஒருவரும் 9 குழந்தைகளும், 20 ஆண்களும் 14 பெண்களும் உள்ளனர்.

மிகவும் மோசமான கஷ்டங்களுக்கு மத்தியில் கடல் பயணத்தை மேற்கொண்டு நிர்க்கதியாக வந்துள்ள இந்த ஈழத் தமிழ் அகதிகளுக்கு, தரையிறங்க அனுமதி பெற்றுக்கொடுப்பதுடன், அவர்களுக்கு ஐக்கிய நாடுகள் சபையின் அகதிகளுக்கான உயர்ஸ்தானிகர் அலுவலகத்தின் அதிகாரிகளை சந்திக்கவும் அனுமதிக்க வேண்டும் என ஸ்ரமா அமைப்பின் ஆசியபசுபிக் பிராந்திய பணிப்பாளர் வலியுறுத்தியுள்ளார்.

இதேவேளை, இந்தோனேஷிய அரசு நிர்க்கதியாக இருக்கும் ஈழத்தமிழ் அகதிகள் 44 பேரையும் பொறுப்பேற்காது, மீண்டும் இந்து சமூத்திரத்திற்குள் தள்ளிவிடுமோ என்று சர்வதேச மன்னிப்புச் சபை சந்தேகம் வெளியிட்டுள்ளது.

இந்தநிலையில் இன்று ஆச்சே கடற்கரையில் கரையொதுங்கியுள்ள படகிலுள்ள ஈழத் தமிழர்கள் 44 பேரும் படகிலிருந்து தரையிறங்க முற்பட்ட போது, இந்தோனேஷிய கடற்படையினர் வானை நோக்கி துப்பாக்கிப் பிரயோகம் செய்து அச்சுறுத்தி அகதிகளை தரையிறங்கவிடாது தடுத்துள்ளனர்.

பல ஆபத்துக்களை கடந்து தமது குழந்தைகளுடன் வந்துள்ள தம்மை, தரையிறங்க அனுமதிக்காவிட்டால் தம்மை சுட்டுக்கொல்லுமாறு ஈழத் தமிழர்கள் கோஷமிட்டனர்.

இதேவேளை ஆபத்தானப்படகு பயணத்தால் மிகவும் சோர்வடைந்துள்ள இவர்கள், தமது குழந்தைகளை கையில் ஏந்திய வண்ணம் “இந்தக் குழந்தைகளின் நிலை உங்கள் கண்களுக்குத் தெரியவில்லையா” என்றும் இந்தோனேஷிய கடற்படையினரிடம் ஈழத்தமிழர்கள் கேள்வி எழுப்பினர்.

படகிலிருந்து தரையிறங்க அனுமதித்தால் ஈழத்தமிழர்களை ஏற்றுக்கொள்ள நேரிடும் என்பதாலேயே, இந்தோனேஷிய கடற்படையினர் இவ்வாறு மோசமாக நடந்துகொள்வதாக சர்வதேச மனித உரிமை அமைப்புக்கள் குற்றஞ்சாட்டுகின்றன.

இதேவேளை, இந்தோனேஷியாவின் துணை ஜனாதிபதி யூசுப் கல்லாஹ், ஈழத் தமிழர்களை படகிலிருந்து தரையிறங்க அனுமதி அளித்துள்ள போதிலும், கடற்படை அதிகாரிகள் தொடர்ந்தும் தடுத்து வருவதாக மனித உரிமை செயற்பாட்டாளர்கள் தெரிவிக்கின்றனர்.

இந்தநிலையில், கடந்த 15 ஆம் திகதி ஆச்சே பிராந்திய துணை ஆளுநர் முசாக்கிர் மனாப் ஈழத்தமிழ் அகதிகளின் படகில் ஏற முற்பட்டபோதும், கடற்படையினர் அதற்கு அனுமதி வழங்க மறுத்துள்ளதுடன் அவரை திருப்பி அனுப்பியுள்ளனர்.

இவ்வாறு ஈழத்தமிழ் அகதிகள் விடயத்தில் இந்தோனேஷிய அதிகாரிகளும் கடற்படையினரும் மிக மோசமாக நடந்துவருவது தொடர்பில் மனித உரிமை அமைப்புக்கள் கடும் கண்டனம் வெளியிட்டுள்ளன.

250 மணித்தியாலங்கள் தொடர்ச்சியாக ஒலிபரப்பு செய்யும் சாதனை முயற்சியை புலம்பெயர்ந்து கனடாவில் வசிக்கும் ஈழத்தமிழரான சுரேஸ் யோகிம் ஆரம்பித்துள்ளார். இவர் கடந்த 12 ஆம் திகதி ஞாயிற்றுக்கிழமை ஸ்ரீலங்கா நேரப்படி மாலை 4.30 மணிக்கு சாதனை முயற்சியை ஆரம்பித்துள்ளார்.

250 மணித்தியாலங்கள் தொடர்ச்சியாக ஒலிபரப்பு செய்யும் முயற்சியை ஆரம்பித்துள்ள சுரேஸ் யோகிம் யாழ்ப்பாணம் அச்சுவேலியை சொந்த இடமாகவும் வவுனியாவை பிறப்பிடமாகவும் கொண்டவராவார்.

இவர் இலங்கையில் 1996 ஆம் ஆண்டு 1000 மணித்தியாலங்கள் தொடர்ந்து நடந்து சாதனை படைத்திருந்தார். இது மாத்திரமின்றி இவர் 5 கண்டங்களில் பல்வேறு சாதனைகளைப் படைத்துள்ளார்.

தற்போது 250 மணித்தியாலங்கள் ஒலிபரப்பு செய்யும் சாதனை முயற்சியை தொடங்கியுள்ள சுரேஸ் யோகிம் எதிர்வரும் 25 ஆம் திகதி மாலை 5 மணிக்கு தனது சாதனையை நிறைவு செய்வார் என எதிர்பார்க்கப்படுகின்றது.

இதேவேளை, நெதர்லாந்து நாட்டை சேர்ந்த ஒருவர் 197 மணித்தியாலங்கள் தொடர்ச்சியாக ஒலிபரப்பு செய்ததே இதுவரை சாதனையாக உள்ளமை குறிப்பிடத்தக்கது.

மாத்தளை நாவுல பகுதியில் காணமல் போனதாக கூறப்படும் இரண்டு மாணவர்கள் யாழ்பாணத்தில் கண்டு பிடிக்கப்பட்டுள்ளதாக பொலிஸார் தெரிவித்தனர்.

தரம் 8 மற்றும் 9 ஆம் தரத்தில் கல்வி கற்கும் டி.எம் சசிந்த பண்டார மற்றும் எ.ஜி.எஸ்.எஸ். அம்பகஸ்பிட்டிய என்ற குறித்த மாணவர்களே காணமல் போயுள்ளனர்.

கடந்த 14 ஆம் திகதி குறித்த இருவரும் காணமல் போயுள்ள நிலையில் 15 ஆம் திகதி குறித்த மாணவர்களின் பெற்றோர்கள் நாவுல பொலிஸ் நிலையத்தில் முறைப்பாடு செய்துள்ளனர்.

இதனடிப்படையில் குறித்த மாணவர்கள் யாழ்பாணத்தில் வைத்து கண்டு பிடிக்கப்பட்டதாக பொலிஸார் தெரிவித்தனர்.

இதேவேளை மாணவர்கள் தொடர்பான தகவலை பொலிஸார் பெற்றோருக்கு தெரியப்படுத்தியுள்ளதோடு, மேலதிக விசாரணைகளையும் மேற்கொண்டு வருகின்றனர்.

இந்தோனேஷியாவின் அச்சே கடற்பரப்பில் நிர்க்கதிக்குள்ளான இலங்கை புகலிடக் கோரிக்கையாளர்களில் உள்ள பெண்கள் படகிலிருந்து அந்த நாட்டின் தரை இறங்குவதற்கு எதிராக எச்சரிக்கை துப்பாக்கி வேட்டு நடத்தப்பட்டுள்ளது.

அவுஸ்திரேலியா நோக்கி சட்டவிரோத படகுப் பயணம் மேற்கொண்டிருந்த 44 இலங்கைப் புகலிடக் கோரிக்கையாளர்கள், இந்தோனேஷியாவின் அச்சே கடற்பிராந்தியத்தில் படகில் ஏற்பட்ட இயந்திர கோளாறு காரணமாக நிர்க்கதிக்குள்ளாகினர்.

கடந்த 11 ஆம் திகதி முதல் இந்தோனேஷிய அதிகாரிகளால் படகு கடலில் தடுத்து வைக்கப்பட்டுள்ளதுடன், இவர்களில் சுகவீனமுற்ற பிள்ளையொன்றுடன் தரையிறங்குவதற்கு அனுமதிக்குமாறு ஐந்து பெண்கள் ஏற்கனவே கோரிக்கை விடுத்திருந்தனர்.

ஆயினும், கடவுச் சீட்டுக்களோ அல்லது பயண ஆவணங்களோ இன்றி இலங்கை தமிழ் புகலிடக் கோரிக்கையாளர்களான எவரையும் தமது நாட்டிற்குள் தரையிறங்குவதற்கு அனுமதிக்கப்போவதில்லை என்று இந்தோனேஷிய அதிகாரிகளை மேற்கொள்காட்டி அவுஸ்திரேலிய ஊடகம் செய்தி வெளியிட்டுள்ளது.

இலங்கை புகலிடக் கோரிக்கையாளர்களை தரையிறங்குவதற்கும், ஐக்கிய நாடுகளின் அகதிகளுக்கான உயர்ஸ்தானிகராலய அதிகாரிகளை சந்திப்பதற்கும் அனுமதிக்கப்பட வேண்டுமென சர்வதேச மன்னிப்புச் சபை மற்றும் அச்சேவிலுள்ள பொது அமைப்பு என்பன கூட்டாக இந்தோனேஷிய அரசாங்கத்தை வலியுறுத்தியுள்ளன.

இதேவேளை, படகிலுள்ள புகலிடக் கோரிக்கையாளர்களின் நிலை குறித்து தங்களுக்கு கவலையில்லை என்றும், அவர்களை சட்டவிரோத குடியேற்றவாசிகளாகவே கருதுவதாகவும் இந்தோனேஷிய குடிவரவுத்துறை தலைமை அதிகாரி சுட்டிக்காட்டியுள்ளார்.

இந்த நிலைமையின் கீழ், புகலிடக் கோரிக்கையாளர்கள் இந்தோனேஷிய கடலில் இருந்து வெளியேற்றப்படவுள்ளதாகவும், அதன் பின்னர் அவர்களின் பயண முடிவிடம் குறித்து அவர்களே தீர்மானிக்க வேண்டியுள்ளதாகவும் அந்த அதிகாரி குறிப்பிட்டுள்ளார்.