தேர்தல் முடிவுகளால் தி.மு.க வட்டாரம் கலவரப்பட்டுப் போனாலும், தமிழக சட்டசபையின் வரலாற்றில் இவ்வளவு பெரிய எதிர்க்கட்சியை எப்படித் தாங்கப் போகிறார் ஜெயலலிதா? என்ற கேள்வியும் எழுந்துள்ளது.

2006ம் ஆண்டு சட்டசபைத் தேர்தல் முடிவுகள் வந்தபோது கொஞ்சம் ஆடித்தான் போனார் கருணாநிதி. அ.தி.மு.க அதிக இடங்களைப் பெற்று மிகப் பெரிய எதிர்க்கட்சியாக சட்டசபையில் அமர்ந்தது. மைனாரிட்டி தி.மு.க அரசின் முதல்வராக பதவியேற்ற கருணாநிதி, ” என் வாழ்நாளில் இவ்வளவு பெரிய எதிர்க்கட்சியை நான் பார்த்ததில்லை. மிகுந்த வேதனையோடுதான் பதவியில் அமர்கிறேன்” என்றார்.

அதைப்போலவே, இந்தத் தேர்தலில் மிகப் பெரிய எதிர்க்கட்சியாக தி.மு.க மாறியிருக்கிறது. ‘இவ்வளவு பலம் வாய்ந்த எதிர்க்கட்சி இருப்பதை ஜெயலலிதா விரும்ப மாட்டார். இது ஒருவகையில் தமிழ்நாட்டின் நலனுக்கு நல்லது என்கிறார் சமூக ஆர்வலர் ஒருவர்.

தேர்தலில், ‘பூரண மதுவிலக்கு’ என்ற கோஷத்தை தி.மு.க தீவிரமாக முன்னெடுத்தது மக்கள் மத்தியில் எடுபடாமல் போனதற்குக் காரணம், தி.மு.க புள்ளிகள் நடத்தும் மதுபான ஆலைகள் குறித்த தகவல்கள் மக்கள் மத்தியில் வேகமாக பரப்பப்பட்டதுதான். அதிலும், நாள்தோறும் தினசரி பத்திரிகைகள் மற்றும் தொலைக்காட்சிகளில் தி.மு.க தலைமை கொடுத்த விளம்பரங்கள் மக்கள் மத்தியில் எந்தத் தாக்கத்தையும் ஏற்படுத்தவில்லை.

இதைப் பற்றி கனிமொழியிடம் பேசிய நிர்வாகி ஒருவர், ” டீக்கடையில் அமர்ந்து பேசுவர்கள்கூட நமது விளம்பரத்தைப் பற்றித்தான் பேசுகிறார்கள். பொதுவாக, ஆளுங்கட்சிதான் தேர்தல் நேரத்தில் இப்படி ஆடம்பரமாக விளம்பரம் கொடுப்பார்கள். நாம் எதிர்க்கட்சி வரிசையில்கூட இல்லை.

இதைப் பற்றிப் பேசும் மக்கள், ‘ இவங்ககிட்டதான் பணம் அதிகமாக இருக்கிறது. இப்பத்தான் வெளியில வருது’ எனப் பேசுகிறார்கள். நமக்கே எதிராகப் போகிறது” என வருத்தத்தைச் சொல்லியிருக்கிறார்.

கூடவே, ” எந்தத் தொலைக்காட்சியைத் திறந்தாலும், கலைஞர் பேசுகிறார், ஸ்டாலின் பேசுகிறார், மனிதன் படம் பற்றி உதயநிதி பேசுகிறார். பொதிகை தொலைக்காட்சியில் மட்டும்தான் யாரும் பேசுவதில்லை. விளம்பரங்களைக் குறைத்துக் கொண்டால்தான் நமக்கு நல்லது” எனவும் தலைமையிடம் சொல்லியிருக்கிறார்கள்.

‘எங்கள் ஆட்சியில் நாங்கள் இவ்வளவுதான் கடன் வைத்திருந்தோம். அவர்கள் வந்ததும் இவ்வளவு தூரத்திற்கு உயர்த்திவிட்டார்கள்’ என்ற பிரசாரம் எடுபடவில்லை. மேலும் ‘புதிய தொழிற்சாலைகள், வேலைவாய்ப்புகள்’ என ஸ்டாலின் பேசும்போது, ‘இத்தனை வருஷமாக ஆட்சியில இருந்து எதையும் செய்யலைன்னு ஒத்துக்கறாங்களா?’ என்ற விமர்சனமும் எழுந்தது.

தவிரவும், ‘இவ்வளவு இடங்கள் கிடைத்ததில் இருந்து ஒன்று தெளிவாகத் தெரிகிறது. தி.மு.கவை படிப்படியாகத்தான் மன்னிக்க முடியும். ஒரே அடியாக மன்னித்தால் மீண்டும் ஆடத் தொடங்கிவிடுவார்கள் என்பதில் மக்கள் தெளிவாக இருக்கிறார்கள்’ என்றார் அரசியல் ஆய்வாளர் ஒருவர்.

அரசியல் சதுரங்கத்தில், பல்லாயிரம் கோடி ரூபாய்களை இறைத்து வாக்குகள் வாங்கப்பட்டன என்பது பாமரனுக்கும் தெரியும். ஆட்சியில் அமரப் போகிறவர்களுக்கு, மிகப் பெரிய எதிர்க்கட்சியைக் கொடுத்து செக் வைத்திருக்கிறார்கள் தமிழக மக்கள். வரும் காலங்களில் தமிழகத்தின் நலனைத் தீர்மானிப்பவையாக அவை செயல்பட வேண்டும் என்ற வேண்டுகோளும் சேர்ந்தே எழுகிறது.

தமிழக சட்டப்பேரவைத் தேர்தல் முடிவுகளின் அடிப்படையில் இதுவரை வௌியான முடிவுகளின் அடிப்படையில் அதிமுக 129 தொகுதிகளிலும் திமுக 82 தொகுதிகளிலும் பாமக 4 தொகுதிகளில் முன்னிலை வகிக்கின்றன.

இந்நிலையில் திருவாடானையில் போட்டியிட்ட நடிகர் கருணாஸ் முன்னிலையில் உள்ளதோடு, பெண்ணாகரத்தில் அன்புமணி பின்னடைவையும் சந்தித்துள்ளதோடு உளுந்தூர்பேட்டையில் தேமுதிக தலைவர் விஜயகாந்த் பின்னடைவு சந்தித்து தோல்வியடைந்துள்ளார்.

தமிழக சட்டசபை தேர்தலில் அதிமுக வெற்றி பெற்று ஆட்சி அமைப்பது உறுதியாகி விட்ட நிலையில் வாக்களித்த வாக்களர்களுக்கு முதலமைச்சர் ஜெயலலிதா நன்றி தெரிவித்துள்ளார்.இது தொடர்பாக ஜெயலலிதா வெளியிட்டுள்ள அறிக்கையின் விவரம்:-

எழுகின்ற நன்றி உணர்ச்சி இவைகளை விவரிக்க அகராதியில் வார்த்தைகளே இல்லை. தி.மு.க-வின் பொய் பிரச்சாரங்களை பொடிப் பொடியாக்கி, உன்னதமான, உத்தமமான, உண்மையான ஜனநாயகத்தை நிலைநாட்டிய தேர்தல் இந்தத் தேர்தல். குடும்ப ஆட்சிக்கு நிரந்தர முற்றுப்புள்ளி வைத்த தேர்தல் இந்தத் தேர்தல். குடும்பத்தோடு வாக்கு கேட்டவர்களைகுழிதோண்டி புதைத்த தேர்தல் இந்தத் தேர்தல். தமிழக மக்களை நம்பாமல் கருத்துக் கணிப்புகளை நம்பிய கட்சிக்கு எதிர்பார்த்த தோல்வியைக் கொடுத்த தேர்தல் இந்தத் தேர்தல்.

என் மீது முழுமையான நம்பிக்கை வைத்து, எனது அன்பான வேண்டுகோளினை ஏற்று, மகத்தான, அபரிமிதமான, அளப்பரிய வெற்றியை அனைத்திந்திய அண்ணா திராவிட முன்னேற்றக் கழகத்திற்கு அளித்துள்ள தமிழக மக்களுக்கு என்றென்றும் நான் நன்றிக் கடன் பட்டவளாக இருப்பேன் என்றும்; தேர்தல் அறிக்கையில் அளிக்கப்பட்டுள்ள வாக்குறுதிகள் அனைத்தையும் நிறைவேற்றுவேன் என்றும்; இந்தியாவிலேயே தமிழ்நாட்டை அனைத்துத் துறைகளிலும் முதன்மை மாநிலமாக்க தொடர்ந்து அல்லும், பகலும் அயராது உழைப்பேன் என்றும் நான் உறுதி அளிக்கிறேன்.

இதய தெய்வம் புரட்சித் தலைவர் எம்.ஜி.ஆருக்குப் பிறகு, 1984-ஆம் ஆண்டுக்கு பிறகு, தொடர்ந்து ஆட்சியில் உள்ள கட்சியே வெற்றி பெற்ற பெருமையை எனக்கு அளித்த தமிழக மக்களுக்கும், இந்தத் தேர்தலில் மெய் வருத்தம் பாராமல், பசி நோக்காமல், கண் துஞ்சாமல், ‘கருமமே கண்ணாயினார்’ என்பதற்கேற்ப, ஓயாமல் கழகத்தின் வெற்றிக்காக உழைத்த ரத்தத்தின் ரத்தமான, என் உயிரினும் மேலான, எனது அருமை கழக உடன் பிறப்புகளுக்கும், கழக நிர்வாகிகளுக்கும், தோழமை கட்சித் தலைவர்களுக்கும், தொண்டர்களுக்கும் எனது நெஞ்சார்ந்த நன்றியினை உரித்தாக்கிக் கொள்கிறேன்.

புதுச்சேரி யூனியன் பிரதேசம் மற்றும் கேரள மாநிலத்தில் உள்ள ஏழு சட்ட மன்றத் தொகுதிகளில் போட்டியிட்ட அனைத்திந்திய அண்ணா திராவிட முன்னேற்றக் கழக வேட்பாளர்களுக்கு வாக்களித்த அனைவருக்கும் எனது மனமார்ந்த நன்றியைத் தெரிவித்துக் கொள்கிறேன்.

இவ்வாறு அறிக்கையில் கூறியுள்ளார்.

இன்று காலை தொடங்கி விறுவிறுப்பாக நடைபெற்று வரும் தமிழக சட்டமன்ற தேர்தலுக்கான வாக்கு எண்ணிக்கையில் அதிமுக அதிக இடங்களில் முன்னிலை வகிக்கின்றது. இதனால், அதிமுக அலுவலகம் மற்றும் ஜெயலலிதாவின் வீடு உள்ள போயஸ் கார்டனில் அதிமுக தொண்டர்கள் ஆட்டம், பாட்டம் என்று கொண்டாடி வருகிறார்கள்.

முன்னதாக, இன்று காலை ஜெயா டிவியில் ஜெயலலிதாவின் ராசிக்கு எப்படி இருக்கிறது என்று ஜோதிடர்களை வைத்து நிகழ்ச்சி ஒன்று நடத்தப்பட்டது.

இதில் ஜெயலலிதாவின் ராசிப்படி லக்னத்திற்கு 6ம் இடத்தில் சனி இருப்பதால் எதிரிகள் நசிந்து போவார்கள். அம்மாவிற்கு வெற்றியே கிடைக்கும் என்றார் ஒரு ஜோதிடர். ஜெயலலிதா 25 வேட்புமனு தாக்கல் செய்தது ஏன்? அதனால் பலன் கிடைக்குமா என்று கேட்கவே? அதற்கு பதில் சொன்ன ஜோதிடர், கேது என்பது புரட்சிகளை கொடுக்க கூடிய கிரகம். அன்றைய தினம் 7, 2 என்ற அமைப்புப்படி இருக்கிறது.

ஏழு மிகவும் ராசியானது சிறப்பான மாற்றத்தை தரும் என்று கூறியுள்ளனர். வாஸ்துபடி ஆர்.கே.நகர் தொகுதி ஜெயலலிதாவின் வெற்றிக்கு சாதகமாக இருக்கிறது என்றும். துன்முகி வருடமானது ஜெயலலிதாவிற்கு சாதகமாகவே இருக்கிறது. நிச்சயம் ஆட்சிமைப்பார் என்று ஜோதிடர்கள் கூறியுள்ளனர்.

தற்போது ஜோதிடர்களின் கருத்து பளித்துள்ளது. வாக்கு எண்ணிக்கையின் நிலவரத்தைப் பார்த்தால், அதிமுக தான் மீண்டு ஆட்சி அமைக்கும் என்பது தெரிகிறது.

முதலமைச்சர் ஜெயலலிதா, திமுக தலைவர் கருணாநிதி, ஸ்டாலின், பெரியசாமி, பொன்முடி, வீரமணி ஆகியோர் தமிழக சட்டமன்ற தேர்தலில் தொடர்ந்தும் முன்னிலை வகித்து வருகின்றனர்.

இதேவேளை, தேமுதிக தலைவர் விஜயகாந்த், விடுதலை சிறுத்தைகள் கட்சித் தலைவர் தொல். திருமாவளவன், பாமக முதல்வர் வேட்பாளர் அன்புமணி பின்னடைவை சந்தித்துள்ளனர்.

திருவாரூர் தொகுதியில் திமுக தலைவர் கருணாநிதியும் ஆர்கேநகர் தொகுதியில் முதலமைச்சர் ஜெயலலிதாவும் வெற்றிபெற்றுள்ளனர்.

மேலும், தேமுதிக தலைவர் விஜயகாந்த் உளுந்தூர்பேட்டை தொகுதியிலும் திருச்செந்தூர் தொகுதியில் சமத்துவ மக்கள் கட்சித் தலைவர் சரத்குமாரும் காட்டுமன்னார்கோவில் தொகுதியில் விடுதலை சிறுத்தைகள் கட்சித் தலைவர் தொல்.திருமாவளவன் மற்றும் கடலூர் தொகுதியில் நாம் தமிழர் கட்சித் தலைவர் சீமான் ஆகியோர் பின்னடைவை சந்தித்துள்ளனர்.