கொழும்பில் உள்ள 113 முக்கிய அமைச்சுக்கள் உள்ளிட்ட அரச நிறுவனங்கள் பத்தரமுல்லைக்கு கொண்டு செல்லப்படவுள்ளதாகவும், கொழும்பு நகரை முற்றிலும் வர்த்தக நகராக மாற்றுவதே இதன் நோக்கம் என்றும் தெரிவிக்கப்பட்டுள்ளது.கொழும்பு நகரில் உள்ள அரச நிறுவனங்களை வெளியே கொண்டு செல்லும் திட்டத்தின் கீழ், செத்சிறிபாயவின் மூன்றாவது கட்டம் நடைமுறைப்படுத்தப்படுவதாகவும், இதற்கமையவே 113 அரச நிறுவனங்கள் பத்தரமுல்லைக்கு கொண்டு செல்லப்படவுள்ளதாகவும் பெருந்தெருக்கள் மற்றும் மேல் மாகாண அபிவிருத்தி அமைச்சர் பாட்டலி சம்பிக்க ரணவக்க தெரிவித்துள்ளார்.

கொழும்பில் காணப்படும் வாகன நெருக்கடி மற்றும் பொது மக்களின் தேவைப்பாடுகளைப் பற்றி சிந்தித்தே இந்த முடிவு எடுக்கப்பட்டதாக அமைச்சர் மேலும் குறிப்பிட்டுள்ளார்.இதற்கமைய பிரதான அமைச்சு அலுவலகங்கள் 31, திணைக்களங்கள் 50 மற்றும் அரச நிறுவனங்கள் 32 என்பனவே இடமாற்றப்படவுள்ளதாகவும் கூறியுள்ளார்.இதேவேளை குறித்த வேலைத்திட்டத்தின் கீழ் ஜனாதிபதி செயலகம், பிரதமர் அலுவலகம் என்பன பாராளுமன்றத்திற்கு அருகில் அமைக்கப்பட்டுள்ளதாகவும் தெரிவித்துள்ளார்.

முல்லைத்தீவு – புதுக்குடியிருப்பு பகுதியில் நிர்மாணிக்கப்பட்ட பால் பதனிடல் நிலையம் நேற்று பயனாளிகளிடம் கையளிக்கப்பட்டது.

இந்த பால் பதனிடல் நிலையம் கனடாவின் நிதி உதவியின் கீழ் ஜக்கிய நாடுகள் அபிவிருத்தித் திட்டத்தின் ஊடாக நிர்மாணிக்கப்பட்டுள்ளது.

இந்த நிகழ்வில் கனேடிய உயர்ஸ்தானிகர் செலி வைட்டிங் மற்றும் ஐக்கிய நாடுகள் அபிவிருத்தித் திட்டத்தின் இலங்கைக்கான வதிவிடப் பிரதிநிதி பீட்டர் பட்ச்லர் உள்ளிட்ட அதிகாரிகள் கலந்து கொண்டனர்.

இறக்குவானை – கவுடுவாவ பிரதேசத்தில் இன்று காலை இடம்பெற்ற வாகன விபத்தில் 16 பேர் காயமடைந்துள்ளதாக இறக்குவானை பொலிஸார் தெரிவித்துள்ளனர்.பயணிகள் பஸ்ஸொன்று கொள்கலன் ஒன்றுடன் மோதியதனாலேயே குறித்த விபத்து நேர்ந்துள்ளதாக பொலிஸார் குறிப்பிட்டுள்ளனர்.

சாரதிகள் உட்பட விபத்தில் காயமடைந்த 16 பேர் கஹவத்த மற்றும் இரத்தினபுரி வைத்தியசாலையில் அனுமதிக்கப்பட்டுள்ளதாக கூறப்பட்டுள்ளது.இந்த விபத்து தொடர்பான மேலதிக விசாரணைகளை இறக்குவானைப் பொலிஸார் முன்னெடுத்து வருகின்றனர்.

மழையுடனான காலநிலையினைத் தொடர்ந்து பெருந்தோட்டங்களில் தேயிலை உற்பத்தி அதிகரித்துள்ளதாக தெரிவிக்கபட்டுள்ளது.தேயிலை உற்பத்தியின் அதிகரிப்பால் நாளொன்றிற்கு 18 தொடக்கம் 20 கிலோ வரையான தேயிலை கொழுந்தினைப் பறிக்கக் கூடியதாக உள்ளதாக தொழிலாளர்கள் தெரிவித்துள்ளதாக குறிப்பிடப்பட்டுள்ளது.

மேலும் சில தோட்டப் பகுதிகளில் தொழிலாளர்கள் நாளொன்றிற்கு 40 தொடக்கம் 50 கிலோ வரையான தேயிலை கொழுந்தினை பறிப்பதாகவும் தகவல்கள் வெளியிடப்பட்டுள்ளன.அத்துடன் தேயிலை உற்பத்தி அதிகரிப்பனைத் தொடர்ந்து 1 கிலோவிற்கு 23 ரூபாய் அடிப்படையில் சம்பளம் வழங்குவதற்கு தீர்மானித்திருப்பதாக சில தனியார் தேயிலை தோட்ட நிறுவனங்களின் முகாமையாளர்கள் தெரிவித்திருப்பதாக குறிப்பிடப்பட்டுள்ளது.

வெசாக் தினத்தை முன்னிட்டு நாட்டில் ஏற்பாடு செய்யப்பட்டுள்ள அனைத்து தான சாலைகளையும் பதிவு செய்யுமாறு கோரப்பட்டுள்ளது. பொது சுகாதார பரிசோதகர்கள் இதனைத் தெரிவித்துள்ளனர்.அத்துடன் தான சாலைகளை ஏற்பாடு செய்துள்ள அமைப்புகளுக்கு தேவையான அறிவுரைகள் வழங்குவதற்கும் எதிர்பார்த்துள்ளதாக சுகாதார பரிசோதகர்கள் தெரிவித்துள்ளனர்.

மேலும் தான சாலைகள் நடத்தப்படும் பிரதேசத்தில் உள்ள மாகாண சபைகளில் பதிவு செய்யும் நடவடிக்கைகள் ஆரம்பித்திருப்பதாகவும் குறிப்பிடப்பட்டுள்ளது.அத்துடன் வெசாக் பூரண தினத்தை முன்னிட்டு யாத்திரை செல்பவர்கள் பாதுகாப்பாக ஒரு வேளை உணவை உட்கொள்வதற்கும்,பொதுமக்களின் நலன் கருதியுமே குறித்த பதிவும், அறிவுரைகளும் வழங்கப்படுவதற்கு எதிர்பார்த்துள்ளதாக சுகாதார பரிசோதக அதிகாரிகள் மேலும் தெரிவித்துள்ளனர்.

பசில் ராஜபக்ஸ சற்றுமுன் கைது செய்யப்பட்டுள்ளார் என தெரிவிக்கப்பட்டுள்ளது.இன்று குற்றப்புலனாய்வுத் துறைக்கு வாக்குமூலம் ஒன்றை பதிவு செய்வதற்காக சென்றபோதே கைது செய்யப்பட்டுள்ளார்.இவரிடம் மாத்தறை பிரதேசத்தில் காணி தொடர்பான விசாரணை செய்வதற்கு வந்திருந்த வேளையில் இந்த கைது இடம்பெற்றிருப்பதாக தெரிவிக்கப்படுகின்றது.

இதே வேளை இன்று மாலை இவரை மாத்தறை நீதிமன்றத்தில் ஆஜர்ப்படுத்தப்படஉள்ளதாக குறிப்பிடப்பட்டுள்ளது.பசில் ராஜபக்ஸ முன்னாள் பொருளாதார அமைச்சர் என்பதும் குறிப்பிடத்தக்கது.

இலங்கையில் உள்ள பெண் ஓரின சேர்க்கையாளர்கள், ஆண் ஓரின சேர்க்கையாளர்கள், அரவாணிகள், பால்நிலை மாற்றுநர்கள் ஆகியோருக்கு அமெரிக்கா தமது ஆதரவை வெளிப்படுத்தியுள்ளது.

அமெரிக்க தூதுவர் அடுல் கெசாப் இந்த ஆதரவை வெளிப்படுத்தியுள்ளார். கொழும்பில் உள்ள அமெரிக்க தூதரகத்தில் நேற்று சமவுரிமை மற்றும் புறக்கணிப்புக்கு எதிரான அமைப்புக்களின் பிரதிநிதிகள், அமெரிக்க தூதுவரை சந்தித்தனர். இதன்போதே கெசாப் தமது ஆதரவை வெளிப்படுத்தினார்.

இதேவேளை பிரித்தானியாவின் லிபரல் ஜனநாயகவாதியும் பால்நிலை மாற்று நாடாளுமன்ற உறுப்பினர்களின் தலைவியுமான பாரோனெஸ் பார்க்கர், தமது கருத்து ஒன்றில் இலங்கையில் ஓரின சேர்க்கையாளர்களின் உரிமைகளுக்காக போராடுபவர்கள் மரண அச்சுறுத்தலுக்கு உள்ளாகியுள்ளனர் என்று தெரிவித்துள்ளார்

இலங்கையில் சிங்ஹ லே என்று அமைப்பு இந்த அச்சுறுத்தலை விடுத்ததாகவும் அவர் குறிப்பிட்டுள்ளார்

இந்தநிலையில் இலங்கை அரசாங்கம் இந்த வன்முறை அமைப்பை கட்டுப்படுத்த நடவடிக்கை எடுக்க வேண்டும் என்றும் பாரோனெஸ் கோரிக்கை விடுத்துள்ளார்.

இலங்கையில் பயிரிடப்படும் கஞ்சாவை மருந்து உற்பத்திக்காக வெளிநாடுகளுக்கு ஏற்றுமதி செய்ய நடவடிக்கை எடுக்கப்படுவதாக சுகாதார அமைச்சரும், அமைச்சரவைப் பேச்சாளருமான ராஜித சேனாரட்ன தெரிவித்துள்ளார்.

நாட்டில் பாரம்பரியமாக முன்னெடுக்கப்பட்டுவந்த ஆயுர்வேத மருத்துவத்தை மீண்டும் கட்டியெழுப்புவதற்கான நடவடிக்கைகளையும் அரசு மேற்கொண்டுள்ளதாகவும் நிகழ்ச்சியொன்றில் பேசும்போது அவர் தெரிவித்தார்.

ஆயுர்வேத மருந்து உற்பத்திக்காக கடந்த காலங்களில், அபினை இந்தியாவிலிருந்து இறக்குமதி செய்ய வேண்டிய தேவை ஏற்பட்டதாகவும் அவர் அக்கூட்டத்தில் கூறினார்.

மருந்து உற்பத்திக்கு கஞ்சாவும் தேவைப்படுவதால் அதனை முறையாக இலங்கையில் உற்பத்தி செய்யவுள்ளதாகவும் அவர் கூறினார்.

-பிபிசி-