யாழ். இந்தியத் துணைத் தூதரகமானது வடமாகாண கல்வி பண்பாட்டலுவல்கள் விளையாட்டு அமைச்சுடன் இணைந்து பட்மன்றமொன்றை நடாத்த தீர்மானித்துள்ளது.

சுதந்திர இந்தியாவின் சட்டம் மற்றும் நீதித்துறைக்கான முதலாவது அமைச்சர் கலாநிதி டீ.சு.அம்பேத்கார் அவர்களின் 125வது பிறந்த தின நினைவு நாளை முன்னிட்டும்,

தமிழ் சித்திரை வருடப்பிறப்பை முன்னிட்டும் எதிர்வரும் 14ம் திகதி 5.30 மணிக்கு சிறப்புப் பட்டிமன்றம் நிகழ்வு ஒன்றினை நல்லூர், சங்கிலியன் தோப்பில் நடாத்தவுள்ளது.

இச்சிறப்புப் பட்டிமன்றம் நிகழ்வில் இந்தியாவிலிருந்து வருகை தரும் பிரபல பேச்சாளர்களான திரு. பட்டிமன்றம் ராஜா மற்றும் திருமதி. பாரதி பாஸ்கர் அவர்கள் கலந்து சிறப்பிக்கவுள்ளனர்.

இவர்களுடன் வடமாகாணத்தின் புகழ் பூத்த பேச்சாளர்களான முனைவர் மனோன்மணி சண்முகதாஸ், பேராசிரியர் தி.வேல்நம்பி, செந்தமிழ்ச் சொல்லருவி ச.லலீசன், திரு. ந.விஜயசுந்தரம், திரு. இ.சர்வேஸ்வரா மற்றும் செல்வி ப.கதிர்தர்சினி ஆகியோரும் இப்பட்டிமன்ற விவாத அரங்கினில் தமது வாதங்களை முன்வைப்பது குறிப்பிடத்தக்கதாகும்.

இந்தியாவைப் போன்று இலங்கையிலும் புகையிரத பயணிகள் புகையிரதத்தில் எங்கு இடமுள்ளதோ அங்கும் அமர்ந்து பயணத்தை மேற்கொண்டுள்ள காட்சி பதிவாகியுள்ளது.

களனி – பியகம வீதியின் களுபாலத்தின் கீழ் கொள்கலன் பாரவூர்தியொன்று விபத்துக்குள்ளானதால் புகையிரத சேவைகள் தாமதமாகின.

குறித்த விபத்தினால் இரு புகையிரத பாதைகள் சேதமடைந்து, பிரதான புகையிரத சேவைகளின் போக்குவரத்தில் பாதிப்பு ஏற்பட்டன.

இதனால் புகையிர நிலையத்தில் புகையிரதத்திற்காக காத்து நின்றவர்கள் வேறு புகையிரதங்களில் ஏறி பயணத்தை தொடர்ந்ததை அவதானிக்க முடிந்தது.

இதேவேளை, இந்தியா, பங்களாதேஷ் போன்ற நாடுகளில் பயணிகள் இவ்வாறு புகையிரதத்தில் பயணித்ததை கடந்த காலத்தில் அவதானிக்கக் கூடியதாக இருந்தது, இந்நிலையில் கொழும்பில் இவ்வாறு புகையிரதத்தில் பயணிகள் ஆபத்தான முறையில் பயணித்தமை குறிப்பிடத்தக்கது.

சித்திரைப் புத்தாண்டை முன்னிட்டு இன்று (08) முதல் விஷேட பஸ் சேவைகள் இடம்பெறவுள்ளதாக இலங்கை போக்குவரத்துச் சபை கூறியுள்ளது. பயணிகள் தமது சொந்த ஊர்களுக்கு செல்வதற்கு வசதியாக இந்த சேவை இடம்பெறவுள்ளதாக அந்த சபையின் பிரதி பொது முகாமையாளர் ராஜா குணதிலக கூறினார்.

அத்துடன், புத்தாண்டின் பின்னர் வெளிப்பிரதேசங்களிலிருந்து விஷேட பஸ்கள் சேவையில் ஈடுபடுத்தப்படும் என்றும் அவர் கூறியுள்ளார். அதேவேளை இன்றுமுதல் புத்தாண்டு காலம் நிறைவடையும் வரையில் பஸ்களில் ஆசன முன்பதிவுகளை மேற்கொள்ள முடியாது என்று ராஜா குணதிலக கூறினார்.

இதுதவிர புத்தாண்டை முன்னிட்டு இன்றுமுதல் விஷேட ரயில் சேவைகள் இடம்பெறவுள்ளதாக ரயில்வே போக்குவரத்து அதிகாரி விஜய சமரசிங்க கூறினார்.

பிறந்த குழந்தையை கொலை செய்த குற்றசாட்டின் பேரில் பெற்றோர்கள் நேற்று மாலை கைது செய்யப்பட்டுள்ளதாக பொலிஸார் தெரிவித்துள்ளனர்.குறித்த பெற்றோர் குழந்தையை கொன்று மிகவும் இரகசியமான முறையில் புதைத்துள்ளதாகவும் பொலிஸாரின் முதற்கட்ட விசாணைகளிலிருந்து தெரியவந்துள்ளது.

இவர்கள் கொச்சிக்கடையில் உள்ள அத்கல பகுதியை சேர்ந்தவர்கள் எனவும் 5குழந்தைகளின் பெற்றோர் எனவும் பொலிஸார் தெரிவித்துள்ளனர்.மேலும், நீர்கொழும்பு பிரதான நீதவான் முன்னிலையில் குழந்தையின் உடல் தோன்றி எடுக்கப்பட்டுள்ளதாகவும் பொலிஸார் சுட்டிகாட்டியுள்ளனர்.இந்த சம்பவம் தொடர்பான மேலதிக விசாரணைகளையும் பொலிஸார் மேற்கொண்டுள்ளனர்.

இலங்கையின் பல பாகங்களிலும் காணப்படும் சிறைச்சாலைகளில் கடும் இடநெருக்கடி ஏற்பட்டுள்ளதாக தெரிய வந்துள்ளது.இலங்கை முழுவதும் உள்ள அனைத்துச் சிறைகளையும் ஒன்றிணைத்தால் சுமார் எட்டாயிரம் கைதிகளை அடைத்து வைக்கும் அளவுக்கே இடவசதி உள்ளது. கொழும்பில் உள்ள சிறைகளில் மட்டும் ஆயிரத்து ஐநூறு பேருக்கான இடவசதி உள்ளது.

எனினும் தற்போது சுமார் 18 ஆயிரம் வரையான கைதிகள் இலங்கையின் பல்வேறு சிறைச்சாலைகளில் தடுத்து வைக்கப்பட்டுள்ளனர். இவர்களில் சுமார் 7000 பேர் வரையானோர் கொழும்பில் உள்ள சிறைச்சாலைகளில் தடுத்து வைக்கப்பட்டுள்ளனர்.சந்தேக நபர்களாக கைது செய்யப்பட்டு தடுத்து வைக்கப்பட்டிருக்கும் கைதிகளின் எண்ணிக்கை அதிகரிப்பின் காரணமாகவே சிறைச்சாலைகளில் இடநெருக்கடி ஏற்பட்டுள்ளதாக தெரிய வந்துள்ளது.

இலங்கை இரண்டு மாநிலங்களாக பிரிக்கப்பட வேண்டும் என முன்மொழியப்பட்டுள்ளது.அதில் வடக்கு கிழக்கில் முஸ்லிம் தன்னாட்சி அலகும், தென்னிலங்கையில் மலையக மக்கள் ஓர் அலகாகவும் அங்கீகரிக்கப்பட வேண்டும் என வட மாகாண சபை முன்மொழிகளை சமர்பித்துள்ளது.இலங்கையில் புதிய அரசியலமைப்பு உருவாக்கப்படும் நிலையில் அதற்கான முன்மொழிவாக இந்த பிரதான விடயம் இன்று வடக்கு மாகாண சபையில் முதலமைச்சர் சீ.வி விக்னேஸ்வரனால் முன்வைக்கப்பட்டது.

இதனைதவிர ஒற்றையாட்சிக்கு பதிலாக சமஷ்டி முறை அமுல்படுத்தப்பட வேண்டும் என்றும் வட மாகாண சபையின் முன்மொழிவில் குறிப்பிடப்பட்டுள்ளது.இலங்கை பிரஜை ஒருவர் மற்றுமொருவருக்கு கீழானவர் என்ற முறைமை மாற்றப்பட வேண்டும்.எண்ணிக்கையில் பெரும்பான்மையாக இருக்ககூடிய ஒரு இனம் மற்றைய இனத்தை விட கூடிய பயனை கோர கூடாது.வடக்கு கிழக்கு மாகாணங்களை ஒன்றிணைக்கும் போது முஸ்லிம் தன்னாட்சி பிராந்திய சபை உருவாக்கப்படும்.

இந்த தன்னாட்சி பிராந்தியத்தின் நிலை பரிமாணம் மற்றும் நியாயாதிக்கம் என்பன தமிழ் மற்றும் முஸ்லிம் பிரதிநிதிகளால் கலந்துரையாடப்பட்டு முடிவெடுக்கப்படும்.மொழி ரீதியிலான தமிழ் பேசும் வடக்கு கிழக்கு மாநிலமானது மாநில நாடாளுமன்றம் ஒன்றை கொண்டிருக்கும்.இதேபோன்ற ஒழுங்குகள் சிங்கள மொழி மூலமான மாநிலத்தில் மலையக தமிழர்களுக்காக மேற்கொள்ளப்பட வேண்டும்.

அதிகாரம் ஒரு சமூகத்திற்கு மட்டும் பகிரப்படாது, அனைத்து சமூகத்திற்கும் பகிரப்படுவதை நாட்டின் நாடாளுமன்றம் உறுதி செய்ய வேண்டும்.வடக்கு கிழக்கு மாநிலம், முஸ்லிம் தன்னாட்சி பிராந்தியம், மலையக தன்னாட்சி பிராந்தியம் ஆகியன பாதிக்கப்படும் வகையில் மத்திய கூட்டாட்சி சமஷ்டி நாடாளுமன்றத்தில் இயற்றப்படும் சட்டங்கள் குறித்த மூன்று அலகுகளால் அங்கீகரிக்கப்படும் வரை நடைமுறைக்கு வரக்கூடாது என்றும் வட மாகாண முன்மொழிவில் தெரிவிக்கப்பட்டுள்ளது.

வடக்கு கிழக்கு மாநிலம், வடக்கு கிழக்கு மாநில நாடாளுமன்றம், வடக்கு கிழக்கு முஸ்லிம் பிராந்திய சபை மற்றும் மலையக பிராந்திய சபை ஆகியவற்றுக்கு முழுமையான அதிகாரங்கள் பகிரப்பட வேண்டும்.தமிழ் பேசும் மாநில அரசில் மத்திய அரசாங்கத்தை பிரதிநிதித்துவப்படுத்தும் ஆளுநர் என்ற ஒருவருக்கு நிறைவேற்று அதிகாரம் இருக்ககூடாது.

இலங்கையின் அரச கரும சிங்களமும் தமிழுமாக இருக்க வேண்டும்.ஆங்கிலம் இணைப்பு மொழியாக இருக்க வேண்டும்.வடகிழக்கு மாநிலத்தின் சகல நடவடிக்கைளும் சிங்கள மற்றும் ஆங்கில மொழி பெயர்புடன் தமிழ் மொழியில் இருக்க வேண்டும்.மலையக தமிழ் பிராந்திய சபை தவிர்ந்த இலங்கையின் ஏனைய பகுதிகளில் பேணப்படும் சகல மொழிகளும் தமிழ் மற்றும் ஆங்கில மொழிப்பெயர்புடன் சிங்களத்தில் இருக்க வேண்டும்.

மலையக பிராந்திய சபையின் பதிவுகள் தமிழிலோ சிங்களத்திலோ இடம்பெறலாம்.அதில் தமிழ், சிங்கள, ஆங்கில மொழிப்பெயர்புகள் பேணப்பட வேண்டும்.வடக்கு கிழக்கு மாநில மற்றும் முஸ்லிம் மலையக தன்னாட்சி சபைகளின் சுயாட்சியானது கூட்டாட்சி அல்லது சமஷ்டி அரசாங்கத்தினால் அங்கீகரிக்கப்பட வேண்டும் என்றும் வடக்கு மாகாண சபை முன்மொழிவில் தெரிவிக்கப்பட்டுள்ளது.

இந்த முன்மொழிவுகளில் மாற்றங்கள் செய்யப்பட்டு எதிர்வரும் 12 ஆம் திகதி இறுதி முன்மொழிவு சபையின் அங்கீகாரத்திற்கு சமர்பிக்கப்படவுள்ளது.இதனையடுத்து, வடமாகாண சபையின் அரசியலமைப்புக்கான முன்மொழிவுகள் இலங்கை அரசாங்கத்தினால் உருவாக்கப்படவுள்ள அரசியலமைப்பு பேரவையிடம் கையளிக்கப்படவுள்ளமை குறிப்பிடத்தக்கது.