இராஜாங்கனையில் மின்குமிழை உட்கொள்ள முயற்சித்த 13 வயது சிறுவன் ஒருவன் வைத்தியசாலையில் அனுமதிக்கப்பட்டுள்ளான்.

குறித்த பகுதியில் நடைபெற்ற சாகச நிகழ்ச்சியொன்றில் மின்குமிழை உட்கொள்வது போன்ற காட்சி காண்பிக்கப்பட்டுள்ளது. இதனை நண்பர்களுக்கு விளக்குவதற்கு முயற்சித்த வேளையிலேயே இந்த அனர்த்தம் ஏற்பட்டுள்ளது.

காயங்களுக்குள்ளான சிறுவனை நொச்சியாகம வைத்தியசாலையில் அனுமதிக்கப்பட்டதை அடுத்து, மேலதிக சிகிச்சைகளுக்காக சிறுவன் அநுராதபுரம் வைத்தியசாலைக்கு மாற்றப்பட்டுள்ளான்.

இதேவேளை இவ்வாறான கண்காட்சிகள் தொடர்பில் பிள்ளைகளை தெளிவுப்படுத்துவது பெற்றோரின் பொறுப்பாகும் என ஶ்ரீ ஜயவர்தனபுர பல்கலைக்கழக பேராசிரியர் ஞானதாச பெரேரா தெரிவித்துள்ளார்.

15 முதல் 17 வயது வரையான பிள்ளைகள் தொடர்பில் பெற்றோர் கவனம் செலுத்துதல் அவசியம் என அவர் மேலும் வலியுறுத்தியுள்ளார்.

பலாங்கொடை, கிரிமெட்டிதென்ன பிரதேசத்தில் சட்டவிரோதமான முறையில் மரக்குற்றிகளை ஏற்றிச் சென்ற இருவர் கைது செய்யப்பட்டுள்ளனர். பலாங்கொடை பொலிஸாருக்கு கிடைத்த தகவலின்படி மேற்கொள்ளப்பட்ட சுற்றிவளைப்பில் இவர்கள் கைது செய்யப்பட்டதாக பொலிஸார் தெரிவித்தனர்.

இதன்போது 134 வெள்ளைச் சந்தன மரக்கட்டைகளுடன் மேலும் பல பெறுமதியான மரக்கட்டைகளும் போக்குவரத்துக்கு பயன்படுத்தப்பட்ட லொறியும் பொலிஸரால் கைப்பற்றப்பட்டுள்ளன. கைது செய்யப்பட்ட சந்தேகநபர்கள் பலாங்கொடை பிரதேசத்தைச் சேர்ந்தவர்கள் என்று தெரிவிக்கப்பட்டுள்ளது. அவர்கள் இன்று பலாங்கொடை நீதவான் நீதிமன்றில் ஆஜர்படுத்தப்பட உள்ளதுடன் பலாங்கொடை பொலிஸார் மேலதிக விசாரணைகளை ஆரம்பித்துள்ளனர்.

ஸ்ரீலங்கன் ஏயார்லைன்ஸ் விமான சேவைக்கு சொந்தமான UL 891 என்ற விமானத்தில் இருந்து தொழில்நுட்ப கோளாறினால் புகை வெளியேறியமை காரணமாக அந்த விமானம் பாங்கொக்கில் அவசரமாக தரையிறக்கப்பட்டுள்ளது.

நேற்றையதினம் பாங்கொக்கில் இருந்து கொழும்பை நோக்கி புறப்பட்ட விமானம் திடிரென்று மீண்டும் அந்த நாட்டிலேயே தரையிறக்க வேண்டி ஏற்பட்டதாக ஸ்ரீலங்கன் ஏயார்லைன்ஸ் நிறுவனம் வெளியிட்டுள்ள அறிக்கையில் கூறப்பட்டுள்ளது.

குறித்த விமானத்தில் 263 பயணிகள் இருந்துள்ளதுடன், எனினும் பயணிகள் எவருக்கும் எந்தவித காயங்களும் இன்றி விமானம் பாதுகாப்பாக தரையிறக்கப்பட்டதாகவும் அந்த அறிக்கையில் கூறப்பட்டுள்ளது.

சொர்ணபூமி விமான நிலையத்தில் தரையிறக்கப்பட்ட விமானம் அந்த நாட்டு பொறியிலாளர்களால் சரிசெய்யப்பட்டு பின்னர் பயணிகள் அனைவரும் அதே விமானம் மூலமாக கட்டுநாயக்க விமான நிலையத்தை வந்தடைந்ததாக குறிப்பிடப்பட்டுள்ளது.அந்த விமானத்தில் விமானியாக இருந்தவர் 25 வருட கால அனுபவம் கொண்ட ஒருவர் என்றும் ஸ்ரீலங்கன் ஏயார்லைன்ஸ் நிறுவனம் வெளியிட்டுள்ள அறிக்கையில் கூறப்பட்டுள்ளது.

புங்குடுதீவில் வன்புணர்வின் பின்னர் படுகொலை செய்யப்பட்ட வித்தியாவின் குடும்பத்தினருக்கு வவுனியாவில் நிர்மாணித்து கொடுக்கப்பட்ட வீடு இந்திய அரசின் நிதியுதவியினால் கட்டப்பட்டது என தெரிவிக்கப்பட்டுள்ளது.யாழ். இந்திய துணை உயர்ஸ்தானிகர் ஏ.நடராஜன் இதனை உறுதிப்படுத்தியுள்ளார்.

வன்புணர்வு செய்யப்பட்டு கொலை செய்யப்பட்ட வித்தியாவின் தாயாரை ஜனாதிபதி யாழ்ப்பாணத்தில் சந்தித்திருந்த போது தனது குடும்பத்தினருக்கு பாதுகாப்பு கருதி வவுனியாவில் வீடொன்றை பெற்றுத்தருமாறு கோரியிருந்தார்.

இதனையடுத்து, வவுனியா, குருமன்காடு, சிங்கள பிரதேச செயலக வீதியில் வீடு அமைக்கப்பட்டு கடந்த 3ஆம் திகதி பாதுகாப்பு இராஜாங்க அமைச்சர் ருவான் விஜேவர்தனவினால் வித்தியா குடும்பத்தினரிடம் கையளிக்கப்பட்டது.இந்நிலையில், குறித்த வீட்டினை இலங்கை அரசாங்கமே நிர்மாணித்ததாக தெரிவிக்கப்பட்ட நிலையில் அவர் மேற்கண்டவாறு கூறியுள்ளார்.

குறித்த வீட்டினை நிர்மாணிப்பதற்கான முழுமையாக நிதி உதவியினை இந்திய மத்தியரசு வழங்கியதாக அவர் சுட்டிக்காட்டியுள்ளார்.அத்துடன், கட்டுமானப் பணிகளுக்கான சரீர உதவிகளை இராணுவத்தினர் வழங்கியுள்ளனரே தவிர இலங்கை இராணுவத்தினரால் வீடு கட்டிக் கொடுக்கப்படவில்லை எனயாழ். இந்திய துணை உயர்ஸ்தானிகர் ஏ.நடராஜன் உறுதிப்படுத்தியுள்ளார்.