ஹிக்கடுவை கடற்பரப்பில் குளித்தவேளை நீரில் மூழ்கி ஆபத்தான நிலையில் சிகிச்சை பெற்றுவந்த ரஸ்ய பிரஜை ஒருவர் உயிரிழந்துள்ளார்.

கடந்த 22ஆம் திகதி காலை கடற்பரப்புக்கு குளிக்கச் சென்றவேளை இந்நபர் நீரில் மூழ்கியுள்ளார். இந்நிலையில் கடலில் இருந்தவர்கள் அந்நபரை காப்பாற்றி கராப்பிட்டிய வைத்தியசாலையில் அனுமதித்துள்ளனர்.

சிகிச்சை பெற்று வந்தநிலையில் ரஸ்ய பிரஜை நேற்று பிற்பகல் உயிரிழந்துள்ளார். ஒலேல் லொமானின் என்ற 41 வயது ரஸ்ய பிரஜையே இவ்வாறு உயிரிழந்துள்ளதாக பொலிஸார் தெரிவித்தனர்.

இவரது சடலம் கராப்பிட்டிய வைத்தியசாலையின் பிரேத அறையில் வைக்கப்பட்டுள்ளது. சடலம் மீதான பிரேத பரிசோதனைகள் இன்று இடம்பெறவுள்ளன.

கிளிநொச்சி மாவட்ட சிவில் சமூக அமைப்புகளுக்கான மனித உரிமைகள் தொடர்பான செயலமர்வு ஒன்றினை நடாத்தவுள்ளதாக இலங்கை மனித உரிமைகள் ஆணைக்குழு அறிவித்துள்ளது.

இலங்கை மனித உரிமைகள் ஆணைக்குழுவின் யாழ்ப்பாணப் பிராந்திய காரியாலயமானது கடந்த வருடம் முதல் கிளிநொச்சி மாவட்டத்திலே தனது உப அலுவலகம் ஒன்றை திறந்து தனது சேவையை மேற்கொண்டு வருகின்றது.

அந்த வகையில் கிளிநொச்சி மாவட்ட மக்களுக்கு மனித உரிமைகள் தொடர்பான விழிப்புணர்வை ஏற்படுத்துவது காலத்தில் கட்டாயமானதாகும்.

குறிப்பாக சிவில் சமூக அமைப்புகளோடு இணைந்து எதிர்கால செயற்பாடுகளை முன்னெடுக்கும் முகமாக கிளிநொச்சி மாவட்டத்திலுள்ள சிவில் சமூக பிரதிநிதிகளுக்கு மனித உரிமைகள் தொடர்பிலான செயலமர்வு ஒன்றை ஆணைக்குழு ஒழுங்கு செய்துள்ளது என அதன் யாழ்.மாவட்ட இணைப்பாளர் த.கனகராஜ் அறிவித்துள்ளார்.

இந்த செயலமர்வானது எதிர்வரும் 30 ஆம் திகதி சனிக்கிழமை காலை 9 மணிக்கு கரைச்சி பிரதேச சபை மண்டபத்தில் நடைபெறவுள்ளது.

இதேவேளை யாழ்.மாவட்டத்திலும் அவ்வாறானதொரு செயலமர்வு கடந்த சில நாட்களுக்கு முன்னர் நடாத்தப்பட்டிருந்ததும் இங்கு குறிப்பிடத்தக்கது.

இலங்கையில் கடந்த ஆண்டில் நிலவிய வறட்சி காரணமாகவும் தேங்காய் பொருட்களின் ஏற்றுமதிக்கான கேள்வி அதிகரித்துள்ளதாலுமே தேங்காய்க்கு தட்டுப்பாடு ஏற்பட்டுள்ளதாக இலங்கை தென்னை ஆராய்ச்சி நிறுவனம் தெரிவித்துள்ளது.

தென்னை உற்பத்தி மாவட்டங்களில் கடந்த ஆண்டில் 8 மாதங்களாக நிலவிய வறட்சி காரணமாக தேங்காய் உற்பத்தி குறைந்தது என்பதைவிட உற்பத்தியான தேங்காய்களின் அளவு வெகுவாக சிறுத்துள்ளது.

இதனால் ஒரு தொன் கொப்பரைத் தேங்காய் உற்பத்திக்கு தேவையான தேங்காய்களின் எண்ணிக்கையும் அதிகரித்துள்ளது.
இலங்கையில் ஆண்டுக்கு 2700 மில்லியனாக உள்ள தேங்காய் உற்பத்தியை 2016ம் ஆண்டாகும்போது 3650 மில்லியனாக அதிகரிக்கும் இலக்கில் கடந்த சில ஆண்டுகளாக அரசாங்கம் வேலைத்திட்டங்களை முன்னெடுத்தது.

ஆனால் ஏற்கனவே இருந்தததை விட 300 மில்லியன் அளவுக்கு தேங்காய் உற்பத்தி வீழ்ச்சியடைந்துள்ளதாக தென்னை ஆராய்ச்சி நிறுவனத்தின் இயக்குனர் டாக்டர் ஜயந்த குணதிலக்க தெரிவித்தார்.

எனினும், அண்மைய காலங்களில் நாட்டின் பல பாகங்களிலும் 6 முதல் 7 மில்லியன் அளவுக்கு புதிய தென்னம்பிள்ளைகள் நடப்பட்டுள்ளதால் இன்னும் 4 ஆண்டுகளில் அதன் பலாபலன்களை எதிர்பார்க்க முடியும் என்றும் அவர் கூறினார்.

2016ம் ஆண்டுக்குள் 3650 மில்லியனாக தேங்காய் உற்பத்தியை பெருக்க அரசு திட்டங்களை வகுத்துள்ளது. குறைந்த மழைவீழ்ச்சி அதிகரித்த வெப்பநிலை காரணமாக பாதிக்கப்பட்ட தேங்காய் உற்பத்தி அடுத்த ஆண்டு ஏப்ரல் மாதமளவில் முன்னேற்றமடையும் என்று எதிர்பார்ப்பதாவும் தென்னை ஆராய்ச்சி நிலையம் கூறுகிறது.

பாரம்பரியமாக தென்னை உற்பத்தி மேற்கொள்ளப்பட்டுவந்த முக்கோண வலயமான புத்தளம், குருநாகல், கம்பஹா ஆகிய மாவட்டங்களில் வேறு அபிவிருத்தி செயற்திட்டங்கள் காரணமாக தென்னைப் பயிர்ச்செய்கைக்கான நிலப்பரப்பு குறுகிவிட்டதாகவும் அரசாங்கம் தற்போது வடக்கு கிழக்கு பிரதேசங்களிலும் தென்னைப் பயிர்ச்செய்கையை விஸ்தரிக்கும் வேலைத்திட்டங்களில் இறங்கியுள்ளதாகவும் டாக்டர் ஜயந்த குணதிலக்க தெரிவித்தார்.

இலங்கையில் 70 வீத தேங்காய் பாவனை உணவுக்கானது மிகுதி 30 வீதம் தான் தொழிற்துறை தேவைக்கானது. உள்நாட்டு தேங்காய் எண்ணெய் உற்பத்திக்காகவும் ஏற்றுமதிக்கான துருவிய தேங்காய், தேங்காய்ப் பால்மா போன்ற தயாரிப்புகளுக்காகவும் தான் இந்த 30 வீத தேங்காய்கள் தேவைப்படுகின்றன´என்றார் அவர்.

வெளிநாட்டிலிருந்து வரும் பாம் ஒயில் இறக்குமதியை குறைக்கவும் உள்நாட்டு தேங்காய் எண்ணெய் விலையை மக்களுக்கு வசதியான அளவுக்கு வைத்திருக்கவுமே கொப்பரைத் தேங்காய்களை இறக்குமதி செய்யும் திட்டத்தை அமைச்சு முன்வைத்திருப்பதாகவும் இலங்கை தென்னை ஆராய்ச்சி நிறுவனம் கூறியது.