திண்டுக்கல் அடுத்த பழனி அருகே உள்ள கணக்கன்பட்டி கோம்பைபட்டியில் உதயநிதி ஸ்டாலின் தயாரிக்கும் இது கதிர்வேலன் காதல் என்ற சினிமா படப்பிடிப்பு நடந்து வருகிறது. இப்படத்தில் கதாநாயகனாக உதயநிதி ஸ்டாலின், கதாநாயகிகளாக நயன்தாரா, சாயாசிங் ஆகியோர் நடித்து வருகின்றனர். இந்த படத்தை பிரபாகரன் இயக்குகிறார்.

நேற்று இரவு 7 மணிக்கு படப்பிடிப்பு குழுவினருடன் நடிகை நயன்தாரா, நடிகர் உதயநிதி ஸ்டாலின் இருவரும் பழனி முருகன் கோவிலுக்கு ரோப்கார் மூலம் வந்தனர். பின்னர் அவர்கள் மலைக்கோவிலில் உள்ள ராஜஅலங்காரத்தில் இருந்த முருகபெருமானை பயபக்தியுடன் சாமி தரிசனம் செய்தனர்.

உதயநிதி ஸ்டாலினை புகைப்படம் எடுப்பதற்கு அவருடன் வந்த உதவியாளர்கள் எதிர்ப்பு தெரிவித்தனர். மலைக்கோவிலில் சாமி தரிசனம் செய்த அவர்களுக்கு கோவில் சார்பில் பிரசாதங்கள் வழங்கப்பட்டன. நடிகை நயன்தாரா வந்திருப்பது குறித்து அறிந்த பக்தர்கள் அவரை பார்ப்பதற்காக திரண்டு வந்தனர்.

இதை பார்த்த நயன்தாரா, உதயநிதி ஸ்டாலின் அவசர அவசரமாக சாமி தரிசனம் செய்துவிட்டு, பின்னர் ரோப்கார் மூலம் அடிவாரம் வந்த அவர்கள் காரில் தனியார் ஹோட்டலுக்கு புறப்பட்டனர்.

கனடாவைச் சேர்ந்த கவர்ச்சி நடிகையான சன்னி லியோன் சில பாலியல் படங்களில் நடித்து பரபரப்பை ஏற்படுத்தியவர். தற்போது இந்தியில் ஜாக்பாட் என்ற படத்தில் நடித்து வருகிறார். இந்த படத்தில் நம்மூர் நடிகர் பரத்தும் நடிக்கிறார். சமீபத்தில் பெங்களூர் வந்திருந்த சன்னி லியோன் தமிழ் படங்களில் நடிக்க ஆசை என கூறியிருந்தார்.

இந்நிலையில், தமிழில் ஜெய், ஸ்வாதி நடிக்கும் வடகறி படத்தில் ஒரு பாடலுக்கு நடனமாட இவரை ஒப்பந்தம் செய்துள்ளனர். இதுகுறித்து இப்படத்தின் தயாரிப்பாளரான தயாநிதி அழகிரி தனது டுவிட்டர் பக்கத்தில் வடகறி படத்தில் ஒரு பாடலுக்கு நடனமாட சன்னிலியோன் இப்போதுதான் ஒப்பந்தம் செய்யப்பட்டுள்ளார் என குறிப்பிட்டுள்ளார்.

வடகறி படத்தை வெங்கட்பிரபுவிடம் அசோசியேட் இயக்குனராக பணிபுரிந்த சரவண ராஜன் இயக்குகிறார். யுவன் சங்கர் ராஜா இசையமைக்கிறார். தயாநிதி அழகிரியின் மீகா என்டர்டெயின்மென்ட் நிறுவனம் தயாரிக்கிறது. காமெடி, திரில்லர் படமாக உருவாகி வருகிறது.

தென்மேற்கு பருவகாற்று, பீட்சா, நடுவுல கொஞ்சம் பக்கத்த காணோம், இதற்குதானே ஆசைப்பட்டாய் பாலகுமாரா படங்களில் கதாநாயகனாக நடித்து பிரபலமானவர் விஜய்சேதுபதி. தற்போது பண்ணையாரும் பத்மினியும், புறம்போக்கு, மெல்லிசை, இடம்பொருள் ஏவல் உள்ளிட்ட படங்களில் நடித்து வருகிறார்.

விஜய்சேதுபதி சொல்கிறார், எனக்கு ரசிகர் மன்றம் வைக்க பலர் அனுமதி கேட்டனர். எனக்கு அதில் உடன்பாடு இல்லை. வேண்டாம் என்று மறுத்து விட்டேன். நடிப்பது மட்டுமே என் வேலை. படம் நன்றாக இருந்தால் போதும். கதைதான் ஹீரோ. என்னை நம்பி பணம் போடும் தயாரிப்பாளர்கள் நஷ்டம் அடையக் கூடாது என்பதில் கவனமாக இருக்கிறேன்.

பண்ணையாரும், பத்மினியும் படத்தின் கதை ரொம்ப பிடித்தது. படப்பிடிப்பு முடிந்து விரைவில் ரிலீசாக உள்ளது என்றார்.

காதலனுக்கு நடிகை ஏஞ்சலினா ஜோலி 120 கோடி மதிப்புள்ள தீவு ஒன்றை பரிசளிக்கிறார். பிரபல ஹொலிவுட் நடிகை ஏஞ்சலினா ஜோலி (38). ஆஸ்கார் விருது பெற்றவர். இவரது காதலன் நடிகர் பிராட் பிட். இவர்கள் இருவரும் திருமணம் செய்து கொள்ளாமல் ஒன்றாக சேர்ந்து வாழ்கின்றனர். 6 குழந்தைகளை தத்தெடுத்து வளர்க்கின்றனர்.

இந்த நிலையில் நடிகர் பிராட் பிட் தனது 50வது பிறந்த நாளை வருகிற டிசம்பர் 18ம் திகதி கொண்டாட உள்ளார். அதைத்தொடர்ந்து அவருக்கு தனது காதல் பரிசாக ஏஞ்சலினா ஜோலி இருதய வடிவிலான ஒரு சிறிய தீவை பரிசளிக்க உள்ளார். அது

அமெரிக்காவின் பெட்ரா போஸ்ட்ஸ் பகுதியில் உள்ளது. இங்கு பிராட் பிட்டுக்கு மிகவும் பிடித்தமான கட்டிட கலை நிபுணர் பிராங்க் லியோட் ரைட் வடிவமைத்த 2 பிரமாண்ட பங்களாக்களையும் கட்டியுள்ளார்.

இவற்றின் மதிப்பு 120 கோடியாகும். பெட்ரா போஸ்ட்ஸ் பகுதிக்கு மேன்ஹட்டன் நகரில் இருந்து 15 நிமிடத்தில் செல்ல முடியும். இப்பகுதி இயற்கை எழில் நிறைந்தது.

செல்வராகவன் இயக்கத்தில் தற்போது வெளிவந்து திரையரங்குகளில் ஓடிக் கொண்டிருக்கும் படம் இரண்டாம் உலகம். இவர் இயக்கிய எல்லா படங்களையும்விட இந்த படம்தான் அதிக பொருட்செலவில் படமாக்கப்பட்டது. இதற்கு முன்னதாக ஆயிரத்தில் ஒருவன் படத்தையும் பெரும் பொருட்செலவில் படமாக்கியிருந்தார். மற்றபடி இவர் இயக்கிய அனைத்துப் படங்களும் குறைந்த பட்ஜெட்டிலேயே உருவானவை.

இந்நிலையில் இரண்டாம் உலகம் படத்தைத் தொடர்ந்து சிறு பட்ஜெட்டில் ஒரு படத்தை இயக்க முடிவு செய்துள்ளதாக செல்வராகவன் கூறியுள்ளார். இதுகுறித்து அவர் கூறும்போது அடுத்ததாக ஆக்ஷன் படம் ஒன்றை இயக்கப் போகிறேன். ஆக்ஷன் என்றதும் பெரிய பட்ஜெட் என்றெல்லாம் நினைக்கவேண்டாம். சிறு பட்ஜெட்டிலேயே இந்த படத்தை எடுக்கப் போகிறேன் என்றார்.

பெரிய பட்ஜெட்டில் படம் எடுப்பவர்கள் பிரம்மாண்ட இயக்குனர் என முத்திரை குத்தப்பட்டு தொடர்ந்து பெரிய பட்ஜெட் படமாகவே எடுப்பர். ஆனால் செல்வராகவன் அதிலிருந்து மாறுபட்டு பெரிய பட்ஜெட்டுக்கு குட்பை சொல்லிவிட்டு சிறு பட்ஜெட்டுக்கு தாவியிருப்பது அனைவரையும் ஆச்சர்யத்தில் ஆழ்த்தியுள்ளது.

நடிகை சுருதிஹாசனை வீடு புகுந்து தாக்கியவனை போலீசார் கைது செய்துள்ளனர். அவன் பெயர் அசோக் சந்தர் திருமுக்கே (45). போரிவிலி திரைப்பட நகரில் உதவியாளராக இருக்கிறான். அசோக் சந்தர் மீது தாக்குதல், மானபங்கம், அத்துமீறி நுழைதல் போன்ற பிரிவுகளின் கீழ் வழக்கு பதிவு செய்யப்பட்டு உள்ளது. அவனை போலீஸ் காவலில் எடுத்து விசாரித்து வருகின்றனர்.

சுருதிஹாசனை தாக்குவதற்கு அவர் வீட்டிற்கு போகவில்லை என்று அசோக் சந்தர் கூறியுள்ளான். இதுகுறித்து போலீசாரிடம் அளித்த வாக்குமூலத்தில் சுருதிஹாசனுக்கு உதவியாளர் தேவை என்று கேள்விப்பட்டேன். எனது தம்பி வேலையின்றி இருக்கிறான். இதனால் அந்த வேலையை அவனுக்கு வாங்கி கொடுக்க முயற்சி செய்தேன். இதற்காகவே சுருதிஹாசனை நேரில் சந்திக்க சென்றேன்.

படப்பிடிப்பு நடந்த இடங்களில் அவரிடம் பேச முயன்றேன். முடியவில்லை. எனவே, அவர் வசிக்கும் அடுக்குமாடி குடியிருப்பு பற்றி தெரிந்து கொண்டு அங்கு போய் சந்திக்க முயன்றேன். சுருதிஹாசனை நான் தாக்கவில்லை என்று கூறியுள்ளார்.

அசோக் சந்தர், சகோதரி ஷாலினியும் வேலை கேட்டு போனதாகவே கூறியுள்ளார். இதை சுருதிஹாசன் மறுத்துள்ளார். இது குறித்து அவர் வெளியிட்டுள்ள அறிக்கையில் கூறி இருப்பதாவது..

என் வீட்டில் அத்து மீறி நுழைந்தவர் வேலை கேட்டு வந்ததாக சொல்வது பொய். அந்த நபர் பல இடங்களில் என்னை பார்த்துள்ளார். படப்பிடிப்பு நடந்த இடங்களிளெல்லாம் இருந்து இருக்கிறார். அப்போது வேலை கேட்டு என்னை அணுகவே இல்லை. என் உதவியாளர்களிடமும் அதுகுறித்து அவர் பேசவில்லை. அவர் வேலை கேட்டு அணுகி இருந்தால் முடிந்ததை செய்து இருப்பேன்.

நான் ஒரு பெண். மும்பையில் தனியாக வசிக்கிறேன். எனது வீட்டில் கதவை திறந்து உள்ளே ஒருவன் நுழைய முயன்றதை பெரிய குற்றமாகவே கருதுகிறேன். மும்பை போலீசார் இப்பிரச்சினையில் சரியான நடவடிக்கை எடுப்பார்கள் என்று நம்புகிறேன் என்று சுருதிஹாசன் கூறியுள்ளார்.