வவுனியா நகரசபையின் தலைவர் கனகையா வட மாகாணசபைத் தேர்தலில் வவுனியா மாவட்டத்தில் போட்டியிடும் சுயேட்சைக்குழு – 6ற்கு தனது பூரண ஆதரவினைத் தெரிவிப்பதாக இன்றையதினம் உத்தியோகபூர்வமாக அறிவித்துள்ளார்.
சுயேட்சைக்குழு-6 ஐச் சேர்ந்த எழில்வேந்தனின் வவுனியா வேப்பங்குளம் அலுவலகத்தில் இடம்பெற்ற கூட்டத்தில் வைத்தே கனகையா இந்த ஆதரவு அறிவிப்பினை வெளியிட்டுள்ளார்.
கனகையா தமிழ்த் தேசியக் கூட்டமைப்பில் போட்டியிட்டு வவுனியா நகரசபை உறுப்பினராக தெரிவுசெய்யப்பட்டு தற்போது வவுனியா நகரசபையின் தலைவராக இயங்கி வருகின்றார் என்பது இங்கு குறிப்பிடத்தக்கது.
நாமக்கல் மாவட்டம் பரமத்தி, இலங்கை தமிழர் முகாமை சேர்ந்த ஐந்து வயது சிறுமி மீது பாலியல் வல்லுறவு புரிய முயற்சித்த ஒருவர் கைது செய்யப்பட்டுள்ளார். இது குறித்து மேலும் தெரியவருவதாவது,
நாமக்கல் மாவட்டம், பரமத்தி, இலங்கை தமிழர் முகாமை சேர்ந்தவர் கண்ணன்(40). அவருக்கு, ஐந்து வயதில், ஒரு பெண் குழந்தை உள்ளது. அவரது மனைவி சுமதி, குடும்பத்தகராறு காரணமாக, மூன்று மாதங்களுக்கு முன் தற்கொலை செய்து கொண்டார்.
கண்ணன், தினந்தோறும் வேலைக்குச் செல்வதால் தன் மகளை அருகில் உள்ள தன் தாயார் மீனாள் பாதுகாப்பில் விட்டிருந்தார். நேற்று முன்தினம் இரவு 12 மணியளவில் அதே பகுதியை சேர்ந்த நாராயணன் மகன் ராஜா 30 என்பவர், குடிபோதையில் மீனாள் வீட்டில் தூங்கிக் கொண்டிருந்த சிறுமியை தூக்கிக்கொண்டு அருகில் உள்ள முட்புதருக்குச் சென்று பாலியல் பலாத்காரம் செய்ய முயன்றார்.
சிறுமியின் அலறல் சத்தம் கேட்டு அக்கம் பக்கத்தில் இருந்தவர்கள் ஓடிச்சென்று பார்த்தனர். அப்போது ராஜா தப்பியோட முயன்றார். ஆத்திரமடைந்த பொதுமக்கள் ராஜாவை பிடித்து நையப்புடைத்தனர்.
பின்னர், அவ்வழியாக ரோந்து சென்ற டி.எஸ்.பி. உதயகுமாரிடம், ராஜாவை ஒப்படைத்தனர். பரமத்தி பொலிஸார் வழக்கு பதிந்து, ராஜாவை கைது செய்து விசாரிக்கின்றனர்.
இணைய பக்கங்களை பார்வையிட நாம் அதிகம் பயன்படுத்தக் கூடிய ப்ரெளசரான மோசில்லா ஃபயர்பொக்ஸ் இனி தமிழிலேயே இருக்கும் வகையில் வடிவமைக்கப்பட்டிருக்கிறது.
கணிணி பயன்பாடும் இணைய பயன்பாடும் அதிகரிக்க அதிகரிக்க மென்பொருட்களின் கட்டளை சொற்களை தமிழுக்கு மாற்றும் முயற்சிகள் மும்முரமாக நடைபெற்றன. இருப்பினும் அது வெற்றிகரமானதாக வலம் வந்துவிடவில்லை.
தற்போது 10 பொறியாளர்களைக் கொண்ட குழுவினர் மோசில்லா ஃபயர் பொக்ஸ் ப்ரெளசரின் கட்டளை சொற்களை தமிழுக்கு மாற்றும் முயற்சிகளை மேற்கொண்டுள்ளனர். இதில் file என்பதற்கு கோப்பு, preferences என்பதற்கு விருப்பங்கள் என்றும் copy என்பதற்கு நகல் எடு என்றும் தமிழாக்கம் செய்யப்பட்டுள்ளது.
மோசில்லா ஃபயர் பொக்ஸ் 120 மொழிகளில் மொழிபெயர்க்கப்பட்டுள்ளது. இதில் சில இந்திய மொழிகளும் அடங்கும். இந்த தமிழாக்கம் செய்யப்பட்ட மோசில்லா ஃபயர்பொக்ஸ் அடுத்த 3 அல்லது 4 வாரங்களில் வெளியிடப்பட இருக்கிறது.
தமிழரை மோசமாக சித்தரிக்கும் மெட்ராஸ் கபே படத்தை மும்பையிலும் திரையிடக் கூடாது என்று பாரதிய ஜனதா கட்சி எதிர்ப்பு தெரிவித்துள்ளது.
விடுதலைப் புலிகளை தீவிரவாதிகளாகவும் தமிழரை மோசமானவர்களாகவும் சித்தரிக்கும் மெட்ராஸ் கபே திரைப்படத்தை வெளியிடக்கூடாது என்று தமிழக கட்சிகளை சேர்ந்த சீமான், வைகோ உள்ளிட்டோர் தடை கோரியுள்ளனர்.
இந்தப் படம் வெளியாகும் அரங்குகளை முற்றுகையிடப் போவதாகவும் அறிவித்துள்ளனர். ஆனால் தமிழக முதல்வர் ஜெயலலிதா இந்த விஷயத்தில் தன் நிலைப்பாட்டை தெரிவிக்கவில்லை. இந்நிலையில் விடுதலைப்புலிகள் இயக்கத்தை தவறாக சித்தரித்து காட்டப்பட்டுள்ள மெட்ராஸ் கபே திரைப்படத்தை மும்பையில் வெளியிட மும்பை பாராதீய ஜனதா எதிர்ப்பு தெரிவித்துள்ளார்.
இதுகுறித்து மும்பை பாரதீய ஜனதா தலைவர் அஷிஷ் ஷெலார் கூறுகையில், ஜோன் ஆபிரகாம் கதாநாயகனாக நடித்துள்ள மெட்ராஸ் கபே திரைப்படத்தில், விடுதலைப்புலிகள் தலைவர் பிரபாகரனை தீவிரவாதியாக சித்தரித்து காட்டப்பட்டுள்ளது.
முன்னாள் பிரதமர் ராஜீவ் காந்தி கொல்லப்பட்டதை இந்த படம் காட்டுகிறது. மேலும் தீவிரவாத செயல்களுக்கு தமிழ் அமைப்புகள் உதவியதாக காட்டப்படுகிறது. இந்த படத்தை இந்தியாவில் வெளியிட தடை கோரி தமிழ் அமைப்புகள் எதிர்ப்பு தெரிவித்து இருக்கின்றன.
நாட்டின் வர்த்தக தலைநகரான மும்பையில் ஏராளமான தமிழ் சகோதரர்கள் வாழ்ந்து வருகின்றனர். அவர்களின் நிறைய அமைப்பினர் எங்களிடம் இந்த திரைப்படத்தை வெளியிட எதிர்ப்பு தெரிவித்து விளக்கியுள்ளனர்.
எனவே மெட்ராஸ் கபே திரைப்படம் மும்பையில் திரையிடப்படுமானால் சமுதாயத்தில் முரண்பாட்டை உருவாக்கும் என்று அறியப்படுகிறது. மாநில அரசு இப்படம் திரையிடுவதை தடுக்காவிட்டால் தியேட்டர்களில் பாரதீய ஜனதா கட்சியினர் போராட்டம் நடத்துவார்கள் என்று குற்றிப்பிட்டுள்ளார்.
தனது மகள் தாமினி தன்னுடன் திரும்பி வந்த சந்தோஷத்தில் சாஷ்டாங்கமாக விழுந்து வணங்கி நன்றி தெரிவித்துள்ளார் இயக்குனர் சேரன். நீதிமன்றத்திற்கு வந்த தாமினி, தந்தையுடன் செல்வதாக கூறினார்.
இதுகுறித்து சேரன் கூறுகையில் என் பொக்கிஷம் திரும்பக் கிடைத்துவிட்டது. எனக்கு பக்கத் துணையாக நின்றது மீடியாவும் நண்பர்களும்தான். இந்த நேரத்தில் அவர்களுக்கு நான் என் நன்றியைத் தெரிவிக்கிறேன் என்று கூறி தரையில் சாஷ்டாங்கமாக விழுந்து வணங்கினார்.
சேரனின் இந்த செய்கை வந்திருந்த அனைவரையும் நெகிழ வைத்துவிட்டது. இதற்கு முன்னதாக பேஸ்புக்கில் சேரன், இன்று என் பொக்கிஷம் திரும்பி வரும் நாள். அவள் இந்த உலகிற்கு வந்த நாளில் எவ்வளவு பயமும் பதட்டமும் இருந்ததோ அதைவிட 100 மடங்கு இன்று.
இன்று நான் காணப்போகும் வெற்றி எனக்கானது மட்டும் அல்ல இவ்வுலகில் உள்ள அனைத்து பெற்றோர்களுக்குமானது” என்று எழுதியிருந்தது குறிப்பிடத்தக்கது.
பிரான்ஸ் நாட்டில் பெண் ஒருவர் 44 வருடங்களுக்கு முன்பு பிரிந்துபோன தன்னுடைய சகோதரிகளை பேஸ்புக்கின் உதவியால் கண்டுபிடித்துள்ளார்.
பிரான்சில் உள்ள துவைய்(Douai) என்னும் இடத்தில் வசிப்பவர் முரியேல் வண்டர்வேக்கன்(Muriel Vanderveken) (66). இவருக்கு லிலியான்(Liliane), டோர்த்தி( Dorothée) என்ற இரு சகோதரிகள் உள்ளனர்.
சிறு வயதில் தன்னுடைய குடும்பத்தை விட்டு கான்வென்ட் பள்ளிக்கு சென்றுவிட்ட இவரால் பின்பு தன்னுடைய குடும்பத்தினரை சந்திக்க முடியவில்லை. பல ஆண்டுகளுக்கு பின்பு தன்னுடைய குடும்பத்தினரை தேடும் முயற்சியில் ஈடுபட்டார். ஆனால் அவை தோல்வியிலேயே முடிந்துள்ளன.
இந்நிலையில் 66 வயதான வண்டர் வேக்கன் புற்றுநோயால் பாதிக்கப்பட்டார். எனவே தான் இறப்பதற்குள் தன்னுடைய சகோதரிகளை சந்தித்து விட வேண்டும் என்று நினைத்த இவர் பேஸ்புக்கின் மூலம் தனது சகோதரிகளை தேட ஆரம்பித்துள்ளார்.
அப்போது இவருடைய சகோதரிகளில் ஒருவரான டோர்த்தி என்பவரை கண்டுபிடித்துள்ளார். இது குறித்து முரிலி கூறுகையில், நான் பேஸ்புக்கில் பல பிரச்சனைகளை சந்தித்துள்ளேன். ஆனால் அவற்றில் நம்மைப் பற்றி விடயங்களை கொடுப்பதன் மூலம் என்னுடைய தங்கையை கண்டுபிடிக்க முடிந்தது.
மேலும், என்னுடைய மற்றொரு தங்கை மற்றும் அண்ணனை தேடிக்கொண்டிருக்கிறேன். ஆனால் அவர்கள் இறந்துவிட்டதாக தகவல் கிடைத்தது எனக்கு வருத்தமளிக்கிறது என்று கூறியுள்ளார்.
சிரியாவில் அதிபர் ஆசாத் அரசுக்கு எதிராக போராளிகள் சண்டையிட்டு வருகின்றனர். கடந்த 2 வருடங்களுக்கு மேலாக நடந்துவரும் உள்நாட்டு போரில் 1 லட்சத்திற்கும் மேற்பட்டோர் கொல்லப்பட்டிருக்க அஞ்சப்படுகிறது.
இந்நிலையில் சிரியா தலைநகர் டமாஸ்கஸ் அருகே போராளிகள் வசமிருந்த பகுதிகளில் நேற்று அரசுப்படையினர் குண்டுகள் வீசி தாக்குதல் நடத்தினர். இந்த இரசாயனக் குண்டுகளால் நடத்தப்பட்ட தாக்குதலில் பொதுமக்கள் 1300 பேர் கொல்லப்பட்டதாக போராளிகள்
தரப்பில் குற்றம் சாட்டப்பட்டுள்ளது.
இந்த தாக்குதல் குறித்த வீடியோ ஆதாரங்களையும் போராளிகள் வெளியிட்டுள்ளனர். இதில் மூச்சுத்திணறி உயிருக்கு போராடிக்கொண்டிருக்கும் சிறுவர்கள், பெரியவர்கள் என பொதுமக்கள் மருத்துவமனைகளில் நிரம்பியிருக்கும் காட்சிகள் காட்டப்பட்டுள்ளன.
மேலும் இதுபோன்று பல இடங்களில் நடத்தப்பட்ட இரசாயனக்குண்டு தாக்குதலுக்கு பொதுமக்கள் பாதிக்கப்பட்டதற்கான ஆதாரங்களை போராளிகள் வெளியிட்டுள்ளனர். இருந்தும் இதுகுறித்து உண்மை நிலை என்ன என்று இன்னும் ஊர்சிதப்படுத்தப்படவில்லை. சிரியா ஆட்சியாளர்கள் இதனை மறுத்துள்ளனர்.
ஐ.நா. இரசாயன ஆயுதக்குழுவினரின் விசாரணை நடவடிக்கைகளை தடுப்பதற்கான முயற்சி என்று சிரியா செய்தி நிறுவனம் சானா மறுப்பு தெரிவித்துள்ளது. இந்த தாக்குதல் குறித்து உண்மை நிலையை கண்டறிய உடனடியாக சம்பவப் பகுதிகளுக்கு ஐ.நா. குழுவிர் விரைய அரபு லீக் வலியுறுத்தியுள்ளது.
இங்கிலாந்து அணியின் சுழற்பந்துவீச்சாளர் மொண்டி பனேசர் தொடர்ந்தும் இங்கிலாந்து அணிக்காக விளையாட முடியும் என அணித் தலைவர் அலிஸ்டெயார் குக் தெரிவித்துள்ளார்.
திறமை வாய்ந்த பந்துவீச்சாளரான மொண்டி பனேசர் தமது அணிக்கு தேவைப்படுவதாகவும் அவர் குறிப்பிட்டுள்ளார். இந்த பருவகாலத்துடன் சசெக்ஸ் பிராந்திய அணியில் இருந்து பனேசர் விலகவுள்ளதாக தெரிவிக்கப்பட்டதை அடுத்து இந்த அறிவிப்பு வெளியாகியுள்ளது.
இந்த மாத ஆரம்பத்தில் மதுபானசாலையில் இடம்பெற்ற சம்பவம் ஒன்றிற்காக அவருக்கு பொலிஸார் அபராதம் விதித்திருந்தனர். இந்தச் சம்பவம் குறித்து 31 வயதான மொண்டி பனேசர் கழகத்தின் உள்ளக விசாரணையை எதிர்நோக்கியுள்ளமையும் குறிப்பிடத்தக்கது.
47 வயதான பாகிஸ்தான் கிரிக்கெட் அணியின் முன்னாள் தலைவர் வசிம் அக்ரம் தனது 30 வயதான அவுஸ்திரேலிய காதலி தொம்சன் ஷனீராவை மணந்ததாக நேற்று அறிவித்தார்.
லாகூரில் கடந்த 12ம் திகதி எளிமையாக நடந்த விழாவில் நான் ஷனீராவை திருமணம் செய்துகொண்டேன். இது எனக்கு, எனது மனைவி, மகன்களுக்கும் ஒரு புதிய வாழ்க்கையின் தொடக்கமாக இருக்கிறது என்றும் அவர் கூறினார்.
அவுஸ்திரேலியாவை சேர்ந்த முன்னாள் மக்கள் தொடர்பு ஆலோசகரான காதலி ஷனீராவிடம் வசிம் அக்ரம் திருமணம் செய்துகொள்வது குறித்து கடந்த மாதம் பேசினார். இதனையடுத்து இருவீட்டர் சம்மதத்துடன் சென்ற அவர்கள் திருமணம் செய்துகொண்டனர்.
அவரது முதல் மனைவி ஹூமா நோய்வாய் பட்டநிலையில் 2009ம் ஆண்டு சென்னையில் இறந்தார். உடல் நிலை சரியில்லாத தனது தந்தையின் விருப்பத்திற்கு ஏற்பவும், திருமணம் செய்து கொள்ளாமல் இருவர் சேர்ந்து வாழ்வது இஸ்லாத்துக்கு எதிரானது என்று மதபோதகர் கூறியதை அடுத்தும் இந்த திருமணம் நடந்தது என்று கூறப்படுகிறது.
அசாருதீனை பயிற்சியாளராக நியமித்தால் ஆட்ட நிர்ணயத்தில் எப்படி ஈடுபடுவது என்று இளைஞர்களுக்கு பயிற்சி கொடுப்பார் என்று இந்திய அணியின் முன்னாள் வீரர் வினோத் காம்ளி கூறியுள்ளார்.
இந்திய கிரிக்கெட் அணியின் முன்னாள் அணித்தலைவரான அசாருதீனுக்கு ஜம்மு காஷ்மீர் கிரிக்கெட் அணியின் பயிற்சியாளராக பணியாற்ற அழைப்பு விடுக்கப்பட்டிருந்ததாக செய்திகள் வெளியாகி இருந்தது.
இது தொடர்பாக தமது டுவிட்டர் பக்கத்தில் கடுப்புடன் வினோத் காம்ளி பதிவிட்டிருக்கிறார். அதில் ஏக்தா கபூர் இந்திய அணியின் முன்னாள் அணித்தலைவர் பற்றி ஒரு படம் எடுக்க விரும்புகிறாராம்.
அந்த படத்துக்கு “Ali Baba mil gaya chalish choro se” என்றுதான் பெயர் வைக்கலாம். கிரிக்கெட் ஆட்ட நிர்ணயத்தில் ஈடுபட்டதை குரோஞ்சி ஒப்புக் கொண்டுவிட்டார்.
ஆனால் நமது முன்னாள் அணித்தலைவர் மட்டும் ஒப்புக் கொள்ளவில்லை என்றும் அனேகமாக அவர் இளைஞர்களுக்கு எப்படி ஆட்ட நிர்ணயத்தில் ஈடுபடுவது என பயிற்சி கொடுக்க விரும்புகிறார் என்று நினைக்கிறேன் எனவும் கூறியுள்ளார்.
கடந்த 2011ம் ஆண்டு அசாருதீன் மீது அதிரடிப் புகாரைக் கூறியிருந்தார் காம்ளி. 1996ம் ஆண்டு உலகக் கிண்ணத் தொடரில் இலங்கைக்கெதிரான அரையிறுதி போட்டியில் களத்தடுப்பு செய்ய அசாருதீன் முடிவெடுத்தது பற்றி சந்தேகம் எழுப்பியிருந்தார். அப்போது அது பெரும் சர்ச்சையை ஏற்படுத்தியிருந்தது குறிப்பிடத்தக்கது.
பேராதனை பல்கலைக்கழகத்தில் பயிலும் மாணவன் மற்றும் மாணவியின் உடல் பாகங்கள் அக்குரஸ்ஸ வில்பிட வனப் பகுதியில் இருந்து இன்று பொலிஸாரினால் மீட்கப்பட்டுள்ளது.
உடல் பாகங்கள் கிடைந்த இடத்தில் இருந்து கிடைத்த தேசிய அடையாள அட்டைகள் மூலம் உயிரிழந்தவர்கள் 23 வயதான கிஷான் சஜித் மற்றும் 26 வயதான திலினி என அடையாளம் காணப்பட்டுள்ளனர்.
இவர்கள் சுருக்கிட்டு தற்கொலை செய்து கொண்டிருக்கலாம் என பொலிஸார் சந்தேகம் வெளியிட்டுள்ளனர்.
இந்த சம்பவம் தொடர்பில் அக்குரஸ்ஸ பொலிஸார் மேலதிக விசாரணைகளை மேற்கொண்டு வருகின்றனர்.
நாடாளுமன்றத் தெரிவிக்குழு தேசிய இனப்பிரச்சினைக்கு தீர்வாக அமையாது என ஜே.வி.பி தெரிவித்துள்ளது.
பிரச்சினையை திசை திருப்பும் நோக்கில் அரசாங்கம் நாடாளுமன்றத் தெரிவுக்குழுவின் பணிகளை ஆரம்பித்துள்ளதாக ஜே.வி.பி நாடாளுமன்ற உறுப்பின அனுரகுமார திஸாநாயக்க தெரிவித்துள்ளார்.
கடந்த காலங்களிலும் அரசாங்கம் இவ்வாறான பல்வேறு தெரிவுக்குழுக்களை நியமித்திருந்தது. எனினும் இவற்றின் மூலம் எந்தவிதமான பயனும் ஏற்படவில்லை.
நாடாளுமன்றத் தெரிவுக்குழுவில் பங்கேற்காமைக்கான காரணத்தை அறியத்தருமாறு கட்சித் தலைவர் கூட்டத்தில் வினவப்பட்டிருந்தது.
நாட்டில் நிலவி வரும் இனப்பிரச்சினையை தமிழ், சிங்கள முஸ்லிம் மக்கள் ஏற்படுத்தவில்லை. எனவே இந்தப் பிரச்சினைக்கு அவர்கள் பொறுப்பதாரிகளல்ல.
நாட்டை ஆட்சி செய்த முதலாளித்துவ வர்க்கத்தின் அதிகார மோகமே பிரிவினைவாதத்தை தூண்டியது.
அரசாங்கத்தின் பிரச்சினைகளை தீர்த்துக் கொள்வதற்காகவே நாடாளுமன்றத் தெரிவுக்குழு அமைக்கப்பட்டுள்ளது.
தேசிய இனப்பிரச்சினைக்கு தீர்வு காண வேண்டுமென்ற மெய்யான நோக்கமும், அவசியமும் அரசாங்கத்திற்கு கிடையாது என்றே கருதுகின்றோம் என அனுரகுமார திஸாநாயக்க தெரிவித்துள்ளார்.
நாடாளுமன்றில் உரையாற்றிய போது அவர் இதனைக் குறிப்பிட்டுள்ளார்.
குடும்பங்களை விட்டு விட்டு ஊர் ஊராகப் போய் உல்லாசமாக இருந்து விட்டு கடைசியி்ல் விஷம் குடித்து செத்துப் போயுள்ளது ஒரு கள்ளக்காதல் ஜோடி.
திருச்சி அருகே உள்ள கம்பரசம்பேட்டையை அடுத்த மல்லாட்சிபுரம் கொடிங்கால் வாய்க்கால் பகுதியில் ஒரு இளம் பெண்ணும், ஆணும் இறந்து கிடந்ததை சிலர் பார்த்து போலீஸாருக்குத் தெரிவி்த்தனர். உடனடியாக ஜீயர்புரம் போலீஸார் விரைந்து வந்து உடல்களை மீட்டனர். இருவரும் குளிர்பானத்தில் விஷம் கலந்து அருந்தி தற்கொலை செய்தது தெரிய வந்தது.
அருகில் ஒரு மொபைல் இருந்தது. அதில் உள்ள எண்களைத் தொடர்பு கொண்டு அவர்கள் யார் என்பதை போலீஸார் கண்டுபிடித்தனர். அந்த ஆண், புதுக்கோட்டை மாவட்டம் அரிமளம் அருகே உள்ள வடக்கு பொன்னம்பட்டியை சேர்ந்த செல்வராஜ். 40 வயதாகிறது. விவசாயி. இவருக்கு அழகுமலை என்ற மனைவியும், இரண்டு குழந்தைகளும் உள்ளனர்.
இதே தெருவில் வசி்த்து வந்தவர் 35 வயதான சாந்தி. இவருக்கு மருதமுத்து என்ற கணவரும் 2 குழந்தைகளும் உள்ளனர். மருதமுதது மஸ்கட்டி்ல வேலை பார்த்து வருகிறார். இதனால் கணவர் துணையின்றி குழந்தைகள், மாமியாருடன் வசி்த்து வந்தார் சாந்தி. கணவர் இல்லா சாந்திக்கும், செல்வராஜுக்கும் இடையே கள்ளக்காதல் மூண்டது.
இது இரு வீட்டாருக்கும் தெரிய வந்து கண்டித்தனர். இந்த நிலையி்ல் 6 மாதங்களுக்கு முன்பு மருதமுத்து திரும்பி வந்தார். அதன் பிறகு அவர் மஸ்கட் போகவி்லை. இதனால் சாந்திக்கு சிக்கலானது. அடிக்கடி போய் செல்வராஜைப் பார்க்க முடியவி்ல்லை. தவி்த்தார். இதனால் ஊரை விட்டு ஓட முடிவு செய்தனர்.
இதையடுத்து உடம்பு சரியில்லை என்று பொய் சொல்லி விட்டு கடந்த 14ம் திகதி வீட்டை விட்டு வெளியேறினார் சாந்தி. அதேபோல செல்வராஜும் கிளம்பி வந்தார். கையில் இருந்த காசு தீரும் வரை விளையாடிக் கழித்தனர். கடைசியாக முக்கொம்பு வந்துள்ளனர். அங்கு வந்து தங்களது நிலையை நினைத்துப் பார்த்துள்ளனர்.
அவர்களுக்கே வாழ்க்கை வெறுத்து விட்டது. குளிர்பானத்தை வாங்கி விஷம் கலந்து குடித்து செத்துப் போனார்கள். இறந்து நான்கு நாட்களாகி விட்டதால் உடல் கருமையாகி பார்க்கவே படு கோரமாக காணப்பட்டனர் இந்த கள்ளக்காதலர்கள். துர்நாற்றமும் சகிக்கவில்லை. பொலீஸார் பிரேதப் பரிசோதனைக்கு இரு உடல்களையும் அனுப்பி வைத்து விசாரணையைத் தொடர்கின்றனர்.கள்ளக் காதலுக்கு கடைசியில் இதுதான் முடிவு போல..
ஆர்யா, நயன்தாரா நடித்துள்ள ராஜா ராணி படத்துக்கு ஏகப்பட்ட விளம்பரம் கிடைத்துள்ளது. ஆர்யாவுக்கும் நயன்தாராவுக்கும் திருமணம் என பரபரப்பை கிளப்பி இருவரும் திருமணக் கோலத்தில் இருப்பதுபோன்ற படங்களை வெளியிட்டனர். அடுத்ததாக படத்தின் பாடல் எடுக்கப்பட்ட காட்சி என வெளியிட்டு அமர்க்களப்படுத்தினர்.
இந்நிலையில் ஜி.வி.பிரகாஷ் இசையில் உருவாகியுள்ள இப்படத்தின் பாடல்கள் வெளியீட்டு விழாவை வரும் 23ம் திகதி சென்னையில் பிரம்மாண்ட விழாவாக நடத்த திட்டமிட்டுள்ளனர்.
இந்த அழைப்பிதழை இன்று காலை சூப்பர் ஸ்டார் ரஜினியிடம் இப்படத்தின் இயக்குனர் அட்லி நேரில் கொடுத்து விழாவுக்கு அழைப்பு விடுத்தார். அவருக்கு ரஜினி தனது வாழ்த்துக்களை தெரிவித்தார்.
ராஜா ராணி படத்தில் ஆர்யா, நயன்தாரா, ஜெய், நஸ்ரியா நஸீம், சத்யராஜ், சத்யன் ஆகியோர் நடித்துள்ளனர். பொக்ஸ் ஸ்டார் நிறுவனத்துடன் இணைந்து ஏ.ஆர்.முருகதாஸ் இப்படத்தை தயாரிக்கிறார். இப்படத்தின் இயக்குனர் அட்லி ஷங்கரிடம் உதவி இயக்குனராக பணியாற்றியவர்.
அமெரிக்காவில் போர் அடித்ததால் அவுஸ்திரேலிய விளையாட்டு வீரரை கொன்ற 3 சிறுவர்கள் மீது கொலை குற்றம் சாட்டப்பட்டுள்ளது. ஆஸ்திரேலியாவின் மெல்போனை சேர்ந்தவர் கிறிஸ்டோபர் லேன்(22). அவர் அவுஸ்திரேலியாவில் கால்பந்து வீரராக இருந்தார்.
பின்னர் அதைவிட்டு விட்டு அமெரிக்காவுக்கு வந்து பேஸ்போல் வீரராக மாறினார். இந்நிலையில் கடந்த வெள்ளிக்கிழமை அவர் நடைபயிற்சி சென்றபோது டங்கன் பகுதியில் பிணமாகக் கிடந்தார். இது குறித்து தகவல் அறிந்த பொலீசார் அவரது உடலை மீட்டு விசாரணை நடத்தினர்.
விசாரணையில் அதே பகுதியைச் சேர்ந்த 15, 16, 17 வயது சிறுவர்கள் போர் அடித்ததால் கிறிஸ்டோபரை சுட்டுக் கொன்றது தெரிய வந்தது. இதையடுத்து பொலீசார் அந்த 3 சிறுவர்களையும் கைது செய்தனர். அதில் 15, 16 வயது சிறுவர்கள் மீது கொலைக் குற்றம் சுமத்தப்பட்டுள்ளது.
17 வயது சிறுவன் சம்பவம் நடந்தபோது வாகனத்தை ஓட்டியதால் அவன் மீது கொலைக்கு உதவியதாக குற்றம் சாட்டப்பட்டுள்ளது. ஆனால் நீதிமன்றத்தில் ஆஜர்படுத்தப்பட்டபோது 17 வயது சிறுவன் தான் தான் கிறிஸ்டோபரை கொன்றதாகக் கூறினான்.
அதற்கு அவனை அமைதியாக இருக்குமாறு நீதிபதி கூறினார். கிறிஸ்டோபர் கொல்லப்பட்டதால் அவரது உறவினர்கள் கவலையில் ஆழ்ந்துள்ளனர். அவரது இறுதிச் சடங்கில் அவரது காதலி கலந்து கொண்டு கண்ணீர் விட்டார்.
கறிவேப்பிலை புற்றுநோயை ஆரம்பித்திலேயே கொல்லும் ஆற்றல் உடையது என்பதை அண்மையில் ஆஸ்திரேலிய உணவியல் அறிஞர்கள் கண்டறிந்துள்ளனர்.
“நியூட்ரிசன் சைன்டிஸ்ட் ஒப் சிசைய்ரோ” என்பது அவுஸ்திரேலியாவின் மிகப்பெரிய மருத்துவ ஆராய்ச்சி நிறுவனம். மசாலாப் பொருட்கள் நல்ல வாசனை உடையது மட்டுமல்ல அது பல மருத்துவ குணங்களை கொண்டது என்பதை அந்நிறுவனம் கண்டறிந்துள்ளது.
இந்நிறுவன தலைமை ஆராய்ச்சியாளர் லனேகோபியாக் கறிவேப்பிலை சிறந்த அண்டி ஆக்ஸிடென்டாக இயங்குகிறது என்கிறார். இது புற்றுநோய், இதய நோய்களை குறைக்கும் ஆற்றல் கொண்டது. மேலும் கறிவேப்பிலையால் ஞாபக சக்தி எளிதில் கிடைக்கிறது என்கிறார் .
சாதாரணமாக 100 கிராம் கறிவேப்பிலையை அரைத்து சாற்றை எடுத்து 100 கிராம் தேங்காய் எண்ணையில் கலந்து இதமான சூட்டில் ஈரப்பதம் நீங்கும் வரை காய்ச்சி தினசரி தலைக்கு தேய்த்து வந்தால் உடல் உஷ்ணம் மங்கும். பரம்பரை நரை வராது. கண்பார்வை குறைவு ஏற்படாது.
கறிவேப்பிலையை அரைத்து சாப்பிட்டால் நுரையீரல், இருதய சம்பந்தப்பட்ட ரத்த சம்பந்தப்பட்ட நோய்கள் வருவது குறையும் என்றும் கூறுகிறார்.
நீரிழிவு நோயாளிகள் காலையில் 10 கறிவேப்பிலை இலையையும், மாலையில் 10 இலையையும் பறித்த உடனேயே வாயில் போட்டு மென்று சாற்றை விழுங்கி வந்தால் மாத்திரை சாப்பிடும் அளவை பாதியாக குறைத்து விடலாம் என்கிறார்கள் மருத்துவர்கள்.
கறிவேப்பிலை சாப்பிடுவதால் உண்டாகும் நன்மைகள்..
இதில் நார்சத்து, விட்டமின், மினரல் ஆகியவை அடங்கியுள்ளன.
கறிவேப்பிலை செரிமானத்திற்கு மிகவும் உதவும்.
இளநரையை தடுக்கும். சர்க்கரை வியாதியையும் கட்டு படுத்த வல்லது.
தினசரி வெறும் வயிற்றில் கறிவேப்பிலை இலையை 3 மாதங்கள் சாப்பிட்டு வந்தால் நீரிழிவால் உடல் கனமாவது குறைக்கப்படும்..
சிறுநீரில் சர்க்கரை வெளியேறுவதும் முற்றிலும் தடை செய்யப்படும்.
கறிவேப்பிலை ரத்தத்தில் இருக்கும் கொழுப்பை குறைக்கவும், அறிவை பெருக்கவும் உதவுகிறது. கறிவேப்பிலையை பச்சையாகவே மென்று தின்றால் குரல் இனிமையாகும். சளியும் குறையும் என்கிறார்கள் மருத்துவர்கள்.
எந்த உணவானாலும், கடைசியாக அவற்றை தாளிக்கும் தருணத்தில், ஒன்றிரண்டு கறிவேப்பிலைகளை கிள்ளிப் போட்டு இறக்கி வைப்பார்கள்.
மலச்சிக்கலை தவிர்த்து, தேவையான பசியைத் தூண்டும் வேலையையும் கறிவேப்பிலை செய்கிறது.
கறிவேப்பிலை இலையை அரைத்து காய வைத்த பின், தேங்காய் எண்ணெய் அல்லது தலைமுடிக்கு உபயோகிக்கும் எண்ணெயில் போட்டு சில நாட்கள் ஊற வைத்து, அந்த எண்ணெயைத் தேய்த்து வர, நரை முடி நம்மை நெருங்காது. மேலும் முடி உதிர்தலையும் இந்த எண்ணெய் தடுத்து நிறுத்தும்.
பித்தத்தைத் தணித்து உடல் சூட்டை ஆற்றும்.
கறிவேப்பிலைக் கீரை மனதுக்கு உற்சாகத்தையும் கொடுக்க வல்லது.
குமட்டல், சீதபேதியால் உண்டான வயிற்று உளைச்சல், நாட்பட்ட காய்ச்சல் ஆகியவற்றைக் கறிவேப்பிலை குணப்படுத்தும். பித்த மிகுதியால் உண்டாகும் பைத்தியத்தைக் குணப்படுத்த கறிவேப்பிலை உதவுகின்றது.
வாந்தி, நாக்கு ருசியற்றுப் போதல், வயிற்றோட்டம், சாப்பிட்டவுடன் மலங்கழிக்கும் உணர்வு, பசியற்ற நிலை, சளி ஆகியவற்றைக் கறிவேப்பிலை குணப்படுத்தும். கண்கள் ஒளி பெறவும், முடி நரைக்காமலிருக்கவும், மேனி எழில் பெறவும் கறிவேப்பிலை உதவுகின்றது.
கறிவேப்பிலைச் சாறு இரத்தத்தில் உள்ள வெள்ளை அணுக்களைப் பலப்படுத்துகிறது. பத்திய உணவு சாப்பிடுபவர்கள் கறிவேப்பிலைத் துவையலை சேர்த்துக்கொள்வது நல்லது.
கண் ஒளி குன்றாமல், நரை திரை இல்லாமல் என்றும் இளமைப் பொலிவுடன் வாழ கறிவேப்பிலை அருமருந்தாக உதவுகிறது.
பேராதனை பல்கலைக்கழகத்தில் பயிலும் மாணவன் மற்றும் மாணவியின் உடல் பாகங்கள் அக்குரஸ்ஸ வில்பிட வனப் பகுதியில் இருந்து இன்று பொலிஸாரினால் மீட்கப்பட்டுள்ளது.
நாடாளுமன்றத் தெரிவிக்குழு தேசிய இனப்பிரச்சினைக்கு தீர்வாக அமையாது என ஜே.வி.பி தெரிவித்துள்ளது.
