வீரப்பன் மனைவி கதாபாத்திரத்தில் நான் நடிக்கப் போகிறேனா என்று குலுங்கி சிரிக்கின்றார் நடிகை ப்ரியாமணி. கப்டன் பிரபாகரனில் தொடங்கி சந்தன கடத்தல் வீரப்பனின் கதையை பத்து, பதினைந்து ஆண்டுகளாக துருவி துளாவி நார் நாராக கிழித்து எறிந்து கொண்டிருக்கிறார்கள் சினிமாக்காரர்கள்.

சமீபத்தில்கூட, வனயுத்தம் என்றொரு படம் வெளியானது அர்ஜூன், விஜயலட்சுமி ஆகியோர் முக்கிய வேடங்களில் நடித்திருந்தனர். தமிழ், கன்னடம் என இரண்டு மொழிகளில் வெளியான அப்படம் வெற்றிபெறவில்லை.

இருப்பினும் அந்த கதையில் இன்னும் சொல்லப்படாத பக்கங்கள் நிறைய உள்ளன என்று இப்போது ஒரு கன்னட இயக்குனரும் மீண்டும் வீரப்பன் கதையை படமாக்கப்போவதாக களத்தில் இறங்கியிருக்கிறாராம்.

இதற்காக வீரப்பன் பதுங்கியிருந்த காட்டுப்பகுதிகளுக்கு வந்து லொகேசன்களை பார்த்து விட்டு சென்ற அந்த இயக்குனர் வீரப்பன் மனைவி முத்துலட்சுமியின் வேடத்தில் நடிக்க பருத்தி வீரன் ப்ரியாமணியை கேட்டாராம்.

அதைக்கேட்டு விழுந்து விழுந்து சிரித்த ப்ரியாமணி, வீரப்பன் கதையை திரும்பத்திரும்ப பார்த்து வெறுப்பில் இருக்கிறார்கள் ரசிகர்கள். அதனால் மீண்டும் அதே கதையில் நடித்து அவர்களின் வெறுப்புக்கு ஆளாக நான் தயாராகயில்லை என்று நழுவிக் கொண்டாராம்.

விடுதலைப்புலிகளை தீவிரவாதிகளாக சித்தரிக்கும் மெட்ராஸ் கபே திரைப்படத்தை வெளியிடக்கூடாது என்று தமிழக கட்சிகளை சேர்ந்த சீமான், வைகோ உள்ளிட்டோர் தடை கோரியுள்ளனர். இந்நிலையில் நேற்று அப்படத்தின் கதாநாயகனும் தயாரிப்பாளருமான ஜோன் ஆபிரகாம் செய்தி நிறுவனம் ஒன்றிற்கு பேட்டியளித்தார். அந்த பேட்டியில் அவர் கூறியிருப்பதாவது:-

சென்சார் போர்ட் அனுமதியளித்த பிறகு இவர்கள் ஏன் எதிர்க்கிறார்கள். யூகங்களின் அடிப்படையில் நிறைய பேர் இத்திரைப்படத்தை எதிர்க்கிறார்கள். மக்கள் இந்த திரைப்படத்தை பார்க்கட்டும். பிறகு முடிவு செய்வோம்.

கதை எப்படி இருக்கிறதோ அதை அப்படியேதான் சொல்ல வேண்டும். எனது படம் பலிகடா ஆக்கப்பட்டுக்கொண்டு இருக்கிறது. நான் மாநில அரசிடமிருந்தும் ரசிகர்களிடமிருந்தும் ஆதரவை பெற்றுள்ளேன்.

இத்திரைப்படம் எந்த ஒரு அரசுக்கும் எதிராகவோ, ஆதரவாகவோ இருக்கவில்லை. இப்படம் மனித உயிர்களின் இழப்பை வலியுறுத்துகிறது. எனவே, இத்திரைப்படத்திலிருந்து எந்த ஒரு காட்சியையும் நான் நீக்கப்போவதில்லை.

இத்திரைப்படம் குழப்பத்தை ஏற்படுத்த உருவாக்கப்படவில்லை. ஒரு நல்ல படம் மக்கள் மத்தியில் நிச்சயம் வரவேற்பை பெறும். என்று அவர் பேட்டியளித்துள்ளார்.

வாலு படத்தை அடுத்து சிம்பு, ஹன்சிகா ஜோடியாக நடிக்கும் படம், வேட்டை மன்னன். இதில் ஜெய்,தீக்ஷா சேத், விடிவி கணேஷ் உட்பட பலர் நடிக்கின்றனர்.

நிக் ஆர்ட்ஸ் சக்கரவர்த்தி தயாரிக்கும் இந்தப் படத்தை நெல்சன் இயக்குகிறார். ஹாலிவுட் படங்களை போன்ற ஆக்ஷன் காட்சிகளை கொண்ட இதன் ஷூட்டிங் சென்னையில் நடந்தது. இதையடுத்து படத்தின் 50 சதவிகித காட்சிகள் வெளிநாடுகளில் படமாக்கப்பட இருக்கிறது.

இதற்காக லொகேஷன் பார்க்க, இயக்குனர் நெல்சன் உட்பட படக்குழுவினர் ஜப்பான் சென்றுள்ளனர். ‘இது ஸ்டைலான ஆக்ஷன் படம். அடுத்த மாதம் ஜப்பானில் ஷூட்டிங் நடக்கிறது. தொடர்ந்து 40 நாட்கள் அங்கு ஷூட்டிங் நடக்கும். உலகம் சுற்றும் வாலிபன் படத்துக்குப் பிறகு ஜப்பானில் அதிக நாட்கள் ஷூட்டிங் நடக்கும் படம் இதுதான் என்று படக்குழு தெரிவித்தது.

லிப்ரா புரொடக்ஷன் நிறுவனத்தின் தலைவராக இருப்பவர் ரவீந்தர் சந்திரசேகர். ஐ.நா தலைமை அலுவலகத்தில் செய்தி தொடர்புத்துறை சிறப்பு ஆலோசகராக பணியாற்றி வருகிறார். தமிழ் திரைப்படங்களையும் தயாரித்து வருகிறார்.

முதலில் நளனும் நந்தினியும் என்ற படத்தை தயாரிக்க ஆரம்பித்தார். தற்போது சுட்ட கதை படத்தை தயாரித்து வருகிறார். இதுதவிர ஒண் பிளஸ் ஒண் த்ரீ என்ற படத்தையும் கொலை நோக்கு பார்வை என்ற படத்தையும் தயாரித்து வருகிறார்.

பாலாஜி, வெங்கி, லட்சுமி ரியா நடிக்கும் சுட்டகதை அடுத்த மாதம் வெளிவருகிறது. சுபு இயக்கி உள்ளார். இந்த படத்தின் வருமானத்தைக் கொண்டு இருதயம் பாதிக்கப்பட்ட 10 குழந்தைகளின் மருத்துவ செலவை ஏற்றுக் கொள்ள தயாரிப்பாளர் முடிவு செய்திருக்கிறார்.

சென்னை சவீதா பொறியியல் கல்லூரியும், பாரதிராஜா மருத்துவமனையும் இணைந்து நடத்திய இருதய பாதிப்பு குழந்தைகளின் மருத்துவ பரிசோதனை முகாமில் தேர்ந்தெடுக்கப்பட்டுள்ள குழந்தைகள் இந்த பலனை பெற இருக்கிறார்கள்.

உயிருக்கு போராடும் இந்த குழந்தைகளுக்காகவாவது படம் ஓட வேண்டும் என்று பிரார்த்திப்போம்.